Read dyu Sofoni ka kitabu 2 Bible Online

Sofoni ka kitabu 2 - dyu bible

Sofoni ka kitabu 2

¹Aw ye sigi ka miiri, aw ye miiri kosɔbɛ, malobali nunu,

²sanni aw ka tunu i ko furaburujalan, sanni Masaba dusu ka gwan aw kɔrɔ kosɔbɛ, sanni Masaba ka dimilon ka se.

³Aw ye Masaba yɔrɔ ɲini, aw mɔgɔmajigininw bɛɛ, aw minw b'a ka kuma bato. Aw ye kotilennin kɛ, k'aw yɛrɛ majigi, n'a sɔrɔ a bena aw tanga a ka dimilon na.

⁴ Gaza dugu bena bila pewu, Asikalɔn dugu lakolon bena to, Asidɔdi mɔgɔw bena gwɛn ka bɔ tilegwangwan fɛ, Ekurɔn bena gwɛn ka wili pewu.

⁵Aw Kɛrɛtikaw [1] minw siginin be kɔgɔji daa la, bɔnɛ ye aw ta ye! Kanaan jamana, filisiw ka dugukolo, Masaba be aw koo fɔra, ko: «Ne bena aw halaki fɔɔ mɔgɔ si tena sɔrɔ yen tugu!»

⁶Yɔrɔ min be kɔgɔji daa la, o bena kɛ begɛnw ka dumunikɛyɔrɔ ye, a bena kɛ u dɛndɛbagaw yaalayɔrɔ ye, a bena kɛ begɛnw ka wɛɛrɛ ye.

⁷A bena kɛ Zuda mara mɔgɔ tɔw ta ye, ka kɛ u ka begɛnw dɛndɛyɔrɔ ye. Sufɛ, u bena la Asikalɔn. Bari Masaba, u ka Ala bena u ɲafilɛ, ka hɛrɛ kɛ u ye tugu.

⁸ Masaba ko: «Ne ye mowabuw ka nɛnili mɛn, ne ye amoniw ka kumajugu mɛn, u tun be ne ka mɔgɔw nɛnina tuma min na ka to k'u ka jamana boɲa n ka mɔgɔw ta sababu la.

⁹ O kama, ne Masaba, Setigi, Isirayɛli ka Ala ko: Mowabuw ka yɔrɔ bena halaki i ko Sodɔmu, amoniw ka yɔrɔ bena halaki i ko Gɔmɔri. A bena kɛ ŋɔniyɔrɔ ye, kɔgɔbɔyɔrɔ ye, yɔrɔlakolon ye tuma bɛɛ. Ne ka mɔgɔ tɔɔ min tora, olu bena ben u kan, ne ka jama min kisira, olu bena u cɛɛn dumu.»

¹⁰O bena kɛ u ka yɛrɛboɲa sara ye, bari u ye Masaba Setigi ka mɔgɔw nɛni ka dabayakuma fɔ u ye.

¹¹Masaba ben'a ka fariya yira u la, a bena joow bɛɛ halaki ka bɔ yen. O la, jamana bɛɛ mɔgɔw bena u kunbiri gwan Masaba ye, u kelen kelen bɛɛ bena u kunbiri gwan u yɛrɛw ka dugukolo kan.

¹² «Aw Etiyopikaw, n ka murujan bena aw faga.»

¹³ Masaba bena maga kɔgɔdugu ɲafan mɔgɔw la, ka Asiri jamana kɛ tomo ye. A bena Ninivu duguba nin kɛ yɔrɔlakolon ye, yɔrɔjanin.

¹⁴O yɔrɔ bena kɛ begɛnw layɔrɔ ye, ni kongosogo sifa bɛɛ layɔrɔ. Sufɛkɔnɔw ni juguninw bena la yen. Kɔnɔw kasikan bena mɛn u ka fenɛtiriw daa la. U ye sɛdiriyiribaba lɔgɔ minw kɛ ka boonw lɔ, u bena olu walaka ka bɔ yen. K'a daminɛ dugu donda la, cɛnni dɔrɔn lo bena sɔrɔ.

¹⁵Dugu nin kɔnɔ mɔgɔw tun b'u yɛrɛ boɲa n'u hakili siginin lo. U tun b'a fɔra u yɛrɛ kɔnɔ ko: «An ka dugu ɲɔgɔn te yen!» A do kɛra di a halakira ka kɛ kongosogow layɔrɔ ye? Mɔgɔ o mɔgɔ mana tɛmɛ a gɛrɛfɛ, o be kaba ka to k'a curu.