Read dyu Aze ka kitabu 2 Bible Online

Aze ka kitabu 2 - dyu bible

Aze ka kitabu 2

¹Kalo wolonwulanan tile mugan ni kelennan loon, Masaba kumana kira Aze barika la ko:

²«A fɔ Salitiyɛli dencɛ Zorobabɛli ye, min ye Zuda mara lasigiden ye, ani Yewosadaki dencɛ Zozuwe sarakalasebagaw kuntigi ye, ani jama tɔɔ minw bɛɛ bɔra jɔnya la ka na ko ne ko:

³ Dawula min tun be ne ka soo nin na fɔlɔ la, aw minw tora sii la, aw la jɔn y'o ye? A be cogo di aw ɲana bii? Kɔni aw t'a jatira fɛɛn nafatan ye dɛ!

⁴Nga sisan, i jaa gwɛlɛya Zorobabɛli. Ne Masaba le ko ten. Yewosadaki dencɛ Zozuwe, sarakalasebagaw kuntigi, i jaa gwɛlɛya. Jamanadenw, aw bɛɛ k'aw jaa gwɛlɛya. Ne Masaba le ko ten. Aw ka baara kɛ. Bari ne be n'aw ye. Ne Masaba, Setigi le ko ten.

⁵ Ne tun ye n daa di aw ma ten aw bɔwaati la Ezipiti jamana na. O la do, ka ne ka Nii to aw cɛma, aw kana siran foyi ɲa.»

⁶ Bari, Masaba, Setigi ko: «Waati dɔɔni tugu, ne bena sankolo ni dugukolo ɲagami, ka kɔgɔji ni dugukolo ɲagami.

⁷Ne bena siyaw bɛɛ ɲagami, u ka nafolow bena yɛlɛma ka na yan. Ne bena nɔɔrɔ la soo nin kan. Ne Masaba, Setigi le ko ten.

⁸Warigwɛ ye ne ta ye, sanu ye ne ta ye.

⁹Ne ka soo nin bena nɔɔrɔ min sɔrɔ sisan, o bena tɛmɛ fɔlɔta kan. Ne Masaba, Setigi le ko ten. Ne bena hɛrɛ kɛ yan yɔrɔ la.»

¹⁰Dariyusi ka masaya saan filanan kalo kɔnɔntɔnnan tile mugan ni naaninan loon, Masaba kumana kira Aze fɛ ko:

¹¹«Ne Masaba, Setigi ko i ka sarakalasebagaw ɲininga.

¹²Saraka min bɔra Ala ye, n'o tɔɔ be mɔgɔ dɔ ka fani dakun na, n'a magara buru la, walima naan, walima duvɛn na, walima tulu la, walima dumunifɛn o dumunifɛn na, o fɛɛn nin be kɛ Ala ta ye wa?» Sarakalasebagaw y'a jaabi ko: «Ayi.»

¹³ Aze ko: «Ni mɔgɔ dɔ magara suu la k'a yɛrɛ nɔgɔ, ka tila ka maga o fɛɛn nunu dɔ la, o be kɛ fɛɛn nɔgɔnin ye wa?» U y'a jaabi ko: «Ɔnhɔn.»

¹⁴O tuma na, Aze y'a fɔ ko: «Jama nin be ten, siya nin be ten ne ɲana. Masaba le ko ten. U ye baara minw kɛ, olu be ten. U be fɛɛn minw dira ne ma sarakabɔyɔrɔ la, olu be ten!»

¹⁵«Sisan, k'a ta bii ma, aw ye miiri ka ɲa kosɔbɛ. Sanni Masaba batoso ka lɔ,

¹⁶fɔlɔfɔlɔ, suman bɔɔrɔ mugan tun ka kan ka bɔ foro min kɔnɔ, tan le be sɔrɔ o la. Duvɛnbara bi duuru tun ka kan ka bɔ *ɛrɛzɛn bisiyɔrɔ min na, bara mugan dama le be sɔrɔ yen.

¹⁷Ne y'aw ka sɛnɛfɛnw bɛɛ cɛn ni sigɛn ni finfin ye, ani sanbɛrɛ. Nga aw ma sɔn ka kɔsegi ne ma. Ne Masaba le ko ten.

¹⁸K'a ta bii ma, aw ye miiri ka ɲa kosɔbɛ, k'a ta kalo kɔnɔntɔnnan tile mugan ni naani ma, kabini Masaba batoso juu sigira. Aw ye miiri ka ɲa:

¹⁹Suman tɔɔ be sɔrɔ bondo kɔnɔ wa? Hali ɛrɛzɛnsun, ni toroyiri, ni gerenadiyiriw, ni olivuyiriw ma deen kɛ! K'a ta bii ma, n bena aw ta ɲa.»

²⁰Masaba kuman'a siɲɛ filanan na Aze fɛ kalo tile mugan ni naaninan loon na ko:

²¹«A fɔ Zorobabɛli ye, min ye Zuda mara lasigiden ye, ko ne bena sankolo ni dugukolo ɲagami.

²²Ne bena masaw ka masayaw ɲagami, ka siyaw ka fanga cɛn. Ne bena kɛlɛkɛwotorow n'u bolibagaw la duguma, soow n'u bolibagaw bena ben u badenw ka murujanjanw fɛ.»

²³Masaba, Setigi ko: «O loon na, Salitiyɛli deen Zorobabɛli, e min ye ne ka baarakɛla ye, ne bena cii d'i ma. Ne Masaba le ko ten. Ne bena i kɛ i n'a fɔ masacɛ ka bololanigɛ, a be min kɛ k'a bulonɔ la fɛɛnw kan. Bari ne ye e le woloma.» Masaba, Setigi le ko ten.