Read dyu Zakari ka kitabu 1 Bible Online

Zakari ka kitabu 1 - dyu bible

Zakari ka kitabu 1

¹ Dariyusi ka masaya saan filanan kalo seeginan, Masaba kumana Ido deen Berekiya dencɛ kira Zakari fɛ ko:

²«Masaba dimina kosɔbɛ aw faaw kɔrɔ.

³A fɔ jama ye ko: Masaba, Setigi ko: ‹Aw k'aw sɔɔn yɛlɛma ka sɔn ne ma. Ne, Masaba, Setigi le ko ten. O la, ne bena sɔn aw ma.› Masaba, Setigi le ko ten.

⁴«Aw kana aw faaw ladege dɛ, fɔlɔfɔlɔ kiraw tun ye minw ladi ko: Masaba, Setigi ko: ‹Aw ye sirajugu taama to, k'aw ka kɛwalijuguw dabila. Nga u ma sɔn k'u tulo malɔ o la, u ma ne jati yɛrɛ.› Ne, Masaba le ko ten.

⁵Ayiwa, aw faaw do, u be min? Kiraw do, u be nii na halibi wa?

⁶Ne tun ye n ka kuma fɔ ne ka baarakɛlaw ye, kiraw ye, ka n ka koo latigɛninw don u bolo, o ma aw faaw sɔrɔ wa? U nana u sɔɔn yɛlɛma, u y'a fɔ ko: ‹Masaba, Setigi tun y'a latigɛ ko a bena an sara ka kɛɲɛ n'an taamacogo, n'an ka kɛwaliw ye. A do y'a kɛ ten!› »

⁷Dariyusi ka masaya saan filanan kalo tan ni kelen tile mugan ni naaninan loon, n'o ye *Seba kalo ye, Masaba kumana ne, kira Zakari, Ido deen Berekiya dencɛ fɛ.

⁸ Ne ye koo dɔ ye o loon sufɛ. Cɛɛ dɔ tun be soo wuleman kan. A lɔnin tun be yirininw cɛma, minw be wele ko miriti, kɔkɛnɛ dɔ la. Soo wɛrɛw tun b'a kɔfɛ: dɔw ye wulemanw ye, dɔw ma wulen kosɔbɛ, dɔw ye gwɛmanw ye.

⁹Ne y'a ɲininga ko: «Ne matigi, soo nunu kɔrɔ ye mun ye?» O la, mɛlɛkɛ min tun be kumana ni ne ye, ale ye ne jaabi ko: «Ne bena o kɔrɔ yira i la.»

¹⁰Cɛɛ min tun lɔnin be miritiyiriw cɛma, ale ye kuma ta k'a fɔ ko: «Masaba ye minw ci ka taga dugukolo yaala, olu lo.»

¹¹O tuma na, olu kumana Masaba ka mɛlɛkɛ fɛ, min tun lɔnin be yiri nunu cɛma, u ko: «An ye dugukolo bɛɛ yaala, lafiya be dugukolo kan, kɛlɛ te yen.»

¹²O tuma na, Masaba ka mɛlɛkɛ y'a fɔ ko: «Masaba, Setigi, e bena ban ka makari Zeruzalɛmu dugu, ni Zuda mara dugu tɔw la fɔɔ tuma jumɛn, e dimina minw kɔrɔ fɔɔ saan bi wolonwula?»

¹³Mɛlɛkɛ min tun be kumana ni ne ye, Masaba y'o jaabi ni jagwɛlɛyakuma ye, ni dususaalokuma ye.

¹⁴Mɛlɛkɛ min tun be kumana ni ne ye, ale y'a fɔ n ye ko: «Wango la ko: Masaba, Setigi kumana ko: ‹Zeruzalɛmu ni *Siyɔn kulu koo be ne dusu la kosɔbɛ.

¹⁵Nga, siya minw siginin be lafiya la, ne diminin be olu kɔrɔ kosɔbɛ. Ne tun dimina Isirayɛlidenw kɔrɔ dɔɔni, k'a sɔrɔ olu ye Isirayɛlidenw ka tɔɔrɔ juguya kosɔbɛ.›

¹⁶O le kama, Masaba ko: ‹Ne bena segi Zeruzalɛmu ka n ka ɲumanya yira. Ne ka soo bena lɔ yen tugu. Sumanikɛjuru bena la Zeruzalɛmu kɔnɔ.› Ne Masaba, Setigi le ko ten.

¹⁷Wango la tugu ko: Masaba, Setigi kumana ko: ‹Ne ka duguw bena hɛrɛ sɔrɔ tugu. Ne Masaba bena Siyɔnkaw dusu saalo tugu, ne bena Zeruzalɛmu kɛ n ta ye.› »