Read dyu Zakari ka kitabu 11 Bible Online

Zakari ka kitabu 11 - dyu bible

Zakari ka kitabu 11

¹Liban jamana, i k'i ka siraw dayɛlɛ, tasuma k'i ka sɛdiriyiribabaw halaki!

²Sipɛrɛyiriw ka kasi bari sɛdiriyiribabaw benna, yiri ɲanaman nunu halakira! *Basan joyiriw ka kasi, bari tuba nin lara duguma!

³Sagadɛndɛbagaw kasikan be bɔra bari u ka yɔrɔɲumanw nagasira. Jaraw kasikan be bɔra bari Zurudɛn bada tuu halakira.

⁴Masaba ne ka Ala ko: «Saga fagataw dɛndɛ.

⁵U sanbagaw b'u faga, mɔgɔ si te olu ɲaa gwan. U feerebagaw b'a fɔra ko: ‹Masaba ka tanu! An kɛra waritigiw ye.› K'a sɔrɔ u dɛndɛbagaw te makari u la yɛrɛ.

⁶Ne fana tena makari jamanadenw na tugu. Ne Masaba le ko ten. O la do, ne bena mɔgɔ kelen kelen bɛɛ don o sigiɲɔgɔnw bolo, ani u ka masa bolo. Masaw bena jamana cɛn, ne tena u bɔsi u bolo.

⁷«Begɛnfeerebagaw tun be taga ni saga minw ye fagayɔrɔ la, ne le kɛra olu dɛndɛbaga ye. Ne ye bere fila ta n bolo. Ne be fɔlɔ nin wele ko Teriya, ka filanan wele ko Jɛnɲɔgɔnya. Ne tora k'u dɛndɛ.

⁸O kɔ, ne ye dɛndɛbaga mɔgɔ saba gwɛn kalo kelen kɔnɔ. Sagaw nigɛ tun bɔra ne la, ne fana nigɛ bɔra u la.

⁹O la, ne y'a fɔ u ye ko: «Ne tena taga aw dɛndɛ tugu. Ni min ka kan ka sa, o ka sa. Ni min ka kan ka halaki, o ka halaki. Ni minw tora, olu ka ɲɔgɔn faga.»

¹⁰Ne be n ka bere min wele ko Teriya, ne y'o ta ka kari, janko bɛɛn min tun be ne ni siyaw bɛɛ cɛ, k'o cɛn.

¹¹A cɛnna o loon na, begɛnfeerebaga minw tun be ne kɔlɔsira, olu y'a lɔn o le fɛ ko Masaba ka kuma tun lo.

¹² Ne y'a fɔ u ye ko: «N'a ka di aw ye, aw ka ne ka sara di ne ma, n'a ka di aw ye, aw ka to n'a ye.» O la, u ye ne ka sara di, warigwɛ bi saba.

¹³Masaba y'a fɔ ne ye ko: «U y'a jati ko min be bɛn i sara ma, o wariba nin ta ka ta'a di dagadilanbaga ma.» Ne ye warigwɛ bi saba nunu ta ka ta'a di dagadilanbaga ma Masaba ka soo kɔnɔ.

¹⁴O kɔ, ne ye n ka bere filanan nin kari min tɔgɔ ko Jɛnɲɔgɔnya, janko balimaya ka ban Zuda mara ni Isirayɛli mara mɔgɔw cɛ.

¹⁵O tuma na, Masaba y'a fɔ ne ye ko: «I yɛrɛ kɛ sagadɛndɛbaga naloman ye sisan.

¹⁶Bari, ne bena sagadɛndɛbaga dɔ bila jamana kunna. Saga minw be ɲini ka sa, a ten'a janto olu la, minw mana tunu, a tena olu ɲini, minw mana mandimi, a tena olu furakɛ, minw ka kɛnɛ, a tena janto olu la. Minw tulɔtulɔnin lo, a bena olu le faga k'o ɲimi fɔɔ k'u sɔnnifara ci.

¹⁷Sagadɛndɛbaga min ye lagalagatɔ ye n'a b'a ka begɛnw bila, bɔnɛ y'o ta ye! Murujan k'a bolo kelen faran, k'a kinibolo ɲaa ci! A bolo kelen ka sa pepewu, a kinibolo ɲaa ka dibi!»