Read dyu Zakari ka kitabu 13 Bible Online

Zakari ka kitabu 13 - dyu bible

Zakari ka kitabu 13

¹«O waati la, jii bɔyɔrɔ dɔ bena dayɛlɛ Dawuda ka somɔgɔw ni Zeruzalɛmukaw ye, min bena kɛ u ka hakɛ n'u ka konɔgɔninw fura ye.»

²Masaba, Setigi ko: «O waati la, ne ben'a kɛ joow tɔgɔw be tunu ka bɔ jamana kɔnɔ. U tɔgɔ tena wele tugu. Ne bena kira galontigɛlaw gwɛn, ka joko nigɛ bɔ mɔgɔw la.

³O tuma na, ni mɔgɔ dɔ ye kirayakuma fɔ, a yɛrɛ facɛ n'a bamuso le ben'a fɔ a ye ko: ‹I ka kan ka faga, bari i be galon le tigɛra Masaba tɔgɔ la.› O la, n'a ye kiraya kɛ, a yɛrɛ wolofa n'a yɛrɛ woloba le ben'a sɔgɔ ni muru ye.

⁴O waati la, kira kelen kelen bɛɛ bena maloya a ka kirayako la, u tena kiraya fani don tugu ka mɔgɔw namaran.

⁵U bena to k'a fɔ ko: ‹Ne te kira ye dɛ! Ne ye sɛnɛkɛla le ye, kabini n kanbelenman, foro be n fɛ.›

⁶N'u y'a ɲininga ko: ‹Nɔɔ minw be i disi la do?› A bena u jaabi ko: ‹Ne koo ka di minw ye, ne y'u sɔrɔ olu lo fɛ.› »

⁷ Masaba, Setigi ko: «Wili ne ka sagadɛndɛbaga kama, murujan! Wili ne baarakɛɲɔgɔn kama! Sagadɛndɛbaga bugɔ, sagaw be jɛnsɛn. N bolo yɛrɛ bena se hali deenw ma.»

⁸Masaba ko: «Jamana bɛɛ kɔnɔ, mɔgɔw bena tilan saba, tilan fila bena sa, tilan kelen le bena to yen.

⁹O tilan kelen nin, n bena o don tasuma kɔnɔ. U be warigwɛ yelen k'a nɔgɔ bɔ cogo min na, ne bena u kɛ ten. Sanu be sɛgɛsɛgɛ cogo min na, ne bena u ka koo sɛgɛsɛgɛ ten. U bena ne wele, ne bena u jaabi. Ne bena u wele ko: ‹Ne ka mɔgɔw.› Olu ben'a fɔ ko: ‹Masaba le ye an ka Ala ye.› »