Read dyu Zakari ka kitabu 6 Bible Online

Zakari ka kitabu 6 - dyu bible

Zakari ka kitabu 6

¹Ne ye n ɲaa kɔrɔta tugu, ka koo dɔ ye. Kɛlɛkɛwotoro naani tun lo, n'u be bɔra kulu fila cɛma. Kulu nunu tun ye zira ye.

² Soo wulenmanw le tun be wotoro fɔlɔ samana, wotoro filanan taw tun ye finmanw ye,

³ sabanan taw tun ye gwɛmanw ye, a naaninan taw tɔnitɔninin be ni wulenman ye.

⁴Mɛlɛkɛ min tun be to ka kuma ni ne ye, ne y'ale ɲininga ko: «Nunu kɔrɔ ye mun ye, matigi?»

⁵ Mɛlɛkɛ ye ne jaabi ko: «Nunu ye fɔɲɔ naani ye, minw tun lɔra dugukolo bɛɛ Masa ɲakɔrɔ, ka sɔrɔ ka bɔ u lɔyɔrɔ la.»

⁶Sofin nunu y'u ka wotoro sama k'u ɲaa sin kɔgɔdugu ɲafan fɛ, gwɛmanw tugura olu kɔ. [1] Nga tɔnitɔninin wuleman nunu y'u kuun sin worodugu ɲafan fɛ.

⁷Soo wulenman nunu kɔrɔtɔninba gwɛrɛla, waasa ka taga dugukolo yaala. O tuma na, mɛlɛkɛ nin ye sira d'u ma k'u ka taga dugukolo yaala. Wotoro nunu tagara dugukolo yaala.

⁸A ye n wele k'a fɔ n ye ko: «A filɛ, minw be tagara kɔgɔdugu ɲafan fɛ, olu bena taga Masaba dusu suma yen.»

⁹Masaba kumana ne fɛ ko:

¹⁰«Taga bolomafara minɛ Ɛlidayi, ni Tobiya ani Yedaya fɛ, minw kɔsegira ka bɔ jɔnya la Babilɔni. E ka taga bii yɛrɛ, ka don Sefaniya deen Yosiya ka soo, u be o yɔrɔ la.

¹¹I bena warigwɛ ni sanu minɛ u fɛ, k'o kɛ masafugulan ye k'a biri Yewosadaki dencɛ sarakalasebagaw kuntigi Zozuwe kunna.

¹² I k'a fɔ a ye ko Masaba, Setigi ko: ‹Cɛɛ dɔ filɛ nin ye, min tɔgɔ ko Yiribolo. Ale sababu la, bolo bena sɔrɔ, ale lo bena Masaba batoso lɔ kura ye.

¹³Ale lo ben'a lɔ tigitigi. Masafaniw bena don a kaan na, ka sigi a ka masasigilan kan ka masaya kɛ. Sarakalasebaga kelen bena sigi a kɔrɔ fana. U bena bɛɛn kosɔbɛ.› [2]

¹⁴«Fugulan nin bena to Masaba batoso kɔnɔ, ka mɔgɔw hakili jigi Ɛlidayi, ni Tobiya ani Yedaya la, ani k'u hakili jigi Sefaniya deen ka ɲumanya la.» [3]

¹⁵Mɔgɔ minw be fɔɔ yɔrɔjan, olu bena na baara kɛ Masaba batoso lɔko la tugu. O la, aw ben'a lɔn ko Masaba, Setigi ye ne ci aw fɛ. O bena kɛ, n'aw sɔnna ka Masaba aw ka Ala ka fɔta kɛ sɔbɛ la.