Read dyu Zakari ka kitabu 7 Bible Online

Zakari ka kitabu 7 - dyu bible

Zakari ka kitabu 7

¹Dariyusi ka masaya saan naaninan na, kalo kɔnɔntɔnnan tile naaninan loon, n'o ye *Kisilewu kalo ye, Masaba kumana Zakari fɛ.

²Betɛlikaw ye Sarɛsɛri, ni Eregɛmumelɛki, ani mɔgɔ dɔw ci Masaba, Setigi batoso kɔnɔ. Olu cira waasa ka na Masaba daali,

³ani ka sarakalasebagaw, ni kiraw ɲininga ko: «An ka kan ka kasi ani ka suun don saan kalo duurunan na wa, i n'a fɔ an delila ka to k'a kɛ saan caaman kɔnɔ cogo min na?»

⁴O tuma na, Masaba, Setigi kumana ne fɛ ko:

⁵«A fɔ jamanadenw bɛɛ ye, ani sarakalasebagaw ye ko: ‹Aw tun ye suun don, ka kasi saan kalo duurunan n'a kalo wolonwulanan na, o saan bi wolonwulanan filɛ nin ye. Yala aw y'o kɛ janko ka ne dusu diya wa?

⁶Aw tun t'aw ka dumuni kɛ, ka minni kɛ aw ka dusudiya kama wa?

⁷Masaba tun ye kuma minw fɔ fɔlɔfɔlɔkiraw barika la, o y'a sɔrɔ Zeruzalɛmu n'a gɛrɛfɛduguw tun be hɛrɛ la, ni worodugu ɲafan ni kulujukɔrɔ mara sigibagaw ka ca, o le te nin ye wa?› »

⁸Masaba kumana Zakari fɛ tugu ko:

⁹«Ne Masaba, Setigi tun b'a fɔra ko: ‹Aw ka kiti tigɛ k'a tilen, aw ka ɲumanya ni makari kɛ ɲɔgɔn ye.

¹⁰Aw kana firiyamusow ni falatɔw tɔɲɔ, walima lonanw, walima fantanw. Mɔgɔ si kana miiriyajugu ta i tɔɲɔgɔn kama.›

¹¹«Nga, u ma sɔn ka mɛnni kɛ, u y'u kuun gwɛlɛya ka ban ka mɛnni kɛ.

¹²Fɔlɔfɔlɔkiraw tun ye ne Masaba, Setigi ka sariya, ni ne ka kuma minw fɔ u ye Nii Senuman barika la, u y'u dusu gwɛlɛya i n'a fɔ diyaman janin lo cogo min na, u ma sɔn ka mɛnni kɛ. O la, ne Masaba, Setigi dimina u kɔrɔ kosɔbɛ.»

¹³Masaba, Setigi ko: «Ne y'u wele, u ma sɔn ka na mɛnni kɛ ne fɛ. O la, olu fana nana ne wele, ne m'u lamɛn.

¹⁴Ne y'u yɛrɛkɛ siya tɔw bɛɛ cɛma u ma deli ka minw lɔn. Jamana halakira u kɔfɛ, fɔɔ mɔgɔ te bɔ yen, mɔgɔ te tɛmɛ yen. U ye dugukoloɲuman nin kɛ dugukolo kuntan ye.»