Read dyu Zakari ka kitabu 8 Bible Online

Zakari ka kitabu 8 - dyu bible

Zakari ka kitabu 8

¹Masaba, Setigi kumana ne fɛ ko:

²«*Siyɔn koo be ne Masaba, Setigi dusu la kosɔbɛ. A koo ka di n ye haali.»

³Masaba ko: «Ne bena segi ka na Siyɔn kulu kan, ka to Zeruzalɛmu dugu kɔnɔ. Zeruzalɛmu bena tɔgɔkura sɔrɔ ko Tiɲɛdugu. Ne Masaba, Setigi ka kulu bena wele ko Kulu senuman.»

⁴Masaba, Setigi ko: «Cɛkɔrɔbaw ni musokɔrɔbaw bena sigi Zeruzalɛmu dugu forobayɔrɔw la tugu, bɛɛ n'a bololabere.

⁵Dugu forobayɔrɔw bena fa denmisɛnw na, cɛdenninw ni musodenninw bena tulon kɛ yen.»

⁶Masaba, Setigi ko: «Jama tɔɔ min bɔra jɔnya la ka na, hali ni olu b'o koo filɛ ko a tena se ka kɛ o loon na, ne fana bena o filɛ kɛbali ye wa? Ne Masaba, Setigi le ko ten.»

⁷Masaba, Setigi ko: «Ne bena n ka mɔgɔw kisi ka bɔ kɔrɔn fɛ jamanaw, ni tileben fɛ jamanaw na.

⁸Ne bena na n'u ye, u ka sigi Zeruzalɛmu kɔnɔ. U bena kɛ ne ka mɔgɔw ye, ne ka kɛ u ka Ala ye, kantigiya ni tilenninya la.»

⁹Masaba, Setigi ko: «Aw minw be kiraw ka kuma mɛnna sisan, u tun ye min fɔ ne Masaba ka soo juu sigituma na, min bena lɔ ka kɛ ne Ala batoso ye, aw y'aw jaa gwɛlɛya.

¹⁰Sanni o waati ka se, sara tun te mɔgɔ ka baara la, tɔnɔ tun te begɛnw na. Taamabaga tun te sutura la, juguw kosɔn. Bari, ne tun ye mɔgɔw bɛɛ bila ɲɔgɔnw na.

¹¹Nga sisan, ne tena siya nin tɔɔ minɛ i n'a fɔ fɔlɔ la. Ne Masaba, Setigi le ko ten.

¹²«Ne bena hɛrɛ kɛ. *Ɛrɛzɛnsunw bena den, dugukolo ben'a nafa di, sankolo bena sanji di. Siya nin tɔɔ min tora, ne bena nin bɛɛ kɛ olu niyɔrɔ ye.

¹³Ayiwa, aw kɛra siya tɔw cɛma mɔgɔdanganinw ye cogo min na, aw, Zuda ni Isirayɛli mara mɔgɔw, o cogo kelen na, ne bena aw kisi, aw bena kɛ dubadenw ye. Aw kana siran, aw y'aw jaa gwɛlɛya.»

¹⁴Masaba, Setigi ko: «Ne tun y'a ŋaniya ta ko ne bena aw tɔɔrɔ bari aw faaw ye ne dusu dimi. Ne, Masaba, Setigi le ko ten. Ne tun m'o kɛko dabila.

¹⁵O cogo kelen na, sisan ne hakili yɛlɛmana, ne y'a latigɛ ko ne bena hɛrɛ kɛ Zeruzalɛmu ni Zuda mara mɔgɔw ye. Aw kana siran.

¹⁶ Aw ka kan ka min kɛ, o filɛ: Aw ka kɛ tiɲɛfɔbagaw ye aw ni ɲɔgɔn cɛ. Aw ka kititigɛyɔrɔw la, aw ka tiɲɛ fɔ yen min be na ni bɛɛn ye.

¹⁷Kan'a latigɛ ka kojugu kɛ i tɔɲɔgɔn na. Kana kali galon la. Bari o koo nunu bɛɛ ka go ne ye.» Masaba le ko ten.

¹⁸Masaba, Setigi kumana ne fɛ.

¹⁹Masaba, Setigi ko: «Suun min be don saan kalo naaninan, n'a kalo duurunan, n'a kalo wolonwulanan ani a kalo tannan, o sundonlon nunu bena yɛlɛma ka kɛ nisɔndiyalonw ye, ni ɲanagwɛ, ani batolikɛlonw ye Zuda mara mɔgɔw fɛ. Nga tiɲɛ ni hɛrɛ ka diya aw ye.»

²⁰Masaba, Setigi ko: «Siya wɛrɛw ni dugubaba caaman mɔgɔw bena na tugu.

²¹Dugu dɔ mɔgɔw bena wili ka ta'a fɔ dugu wɛrɛ mɔgɔw ye ko: ‹Aw ye n'an ka taga Masaba daali, ka Masaba, Setigi yɔrɔ ɲini. Ayiwa, an bena taga.›

²²Siya caaman, ni jamana barikamanw bena na ne Masaba, Setigi yɔrɔ ɲini Zeruzalɛmu, ka ne daali.»

²³Masaba, Setigi ko: «O waati la, siya wɛrɛw mɔgɔ tan bena zuwifu kelen ka fani dagolo minɛ ka to k'a fɔ ko: ‹An b'a fɛ ka taga n'aw ye, bari an y'a mɛn ko Ala b'aw le fɛ.› »