Read dyu Zakari ka kitabu 9 Bible Online

Zakari ka kitabu 9 - dyu bible

Zakari ka kitabu 9

¹ Masaba ka kuma filɛ nin ye: Masaba ka kuma sera Adiraki mara la, ka lɔ Damasi dugu kɔnɔ. Bari, Masaba ɲaa be Isirayɛli siya bɛɛ la cogo min na, a be adamaden tɔw la ten.

²Kuma nin sera Amati dugu kɔnɔ fana, min be Damasi gɛrɛfɛ, ka se Tiri ni Sidɔn fana, olu n'u ka lɔnniya bɛɛ.

³Tirikaw ye yɔrɔ barikaman lɔ u fɛ. U ye warigwɛ lajɛn caaman i n'a fɔ buguri. Ka sanu lajɛn i n'a fɔ sira kan bɔgɔ.

⁴Nga Masaba bena o nafolo nin bɔsi, k'a laminikogo ci k'a fili kɔgɔji kɔnɔ. Dugu nin yɛrɛ bena jɛni.

⁵ Asikalɔnkaw bena o ye ka siran, Gazakaw bena yɛrɛyɛrɛ kosɔbɛ tɔɔrɔ bolo. Ekurɔnkaw ben'a ye ko dɛmɛbaga te olu la tugu. [1] Gaza masacɛ bena tunu. Mɔgɔ tena sigi Asikalɔn dugu kɔnɔ tugu.

⁶Asidɔdi dugu bena kɛ lonanw ka dugu ye. Masaba ko: «Ne bena filisiw ka yɛrɛboɲa nagasi.»

⁷«Ne bena u bali joli ni tanafɛn wɛrɛw dumu ma. U tɔɔ min bena to, ne bena kɛ olu ka Ala ye. U bena kɛ i n'a fɔ Zuda kɔmɔgɔw ka gwaso dɔ. Ekurɔnkaw bena kɛ i n'a fɔ zebuziw.

⁸Ne yɛrɛ bena n ka jamana kɔlɔsi k'a tanga kɛlɛdenw ma. Mɔgɔ si tena tɔɔrɔ la u kan tugu. Bari, ne yɛrɛ le b'u kɔlɔsira sisan.»

⁹ *Siyɔnkaw, aw ye ɲanagwɛ kosɔbɛ! Zeruzalɛmukaw ka nisɔndiya ka mankan kɛ! Aw ka masacɛ natɔ filɛ aw fɛ! Mɔgɔtilennin lo, setigi lo, mɔgɔmajiginin lo. A be fali kan, a be faliden kan.

¹⁰ A ben'a kɛ kɛlɛkɛwotorow koo be dabila Efarayimu mara la, kɛlɛkɛsow fana koo ka dabila Zeruzalɛmu kɔnɔ. A bena bonnikɛkala kari. A bena hɛrɛkuma fɔ siyaw ye. A bena kɔgɔji fila furancɛ mara, ani k'a ta Efarati baji ma, fɔɔ ka ta'a bila diɲɛ daan na.

¹¹ Masaba ko: «Bɛɛn min kɛra an ni ɲɔgɔn cɛ joli barika la, o kosɔn, aw ka mɔgɔ minw be kɔlɔnkolon janin kɔnɔ, ne bena u bɔ yen.

¹²Aw minw tagara jɔnya la, ni kɔsegi jigi b'aw la, aw ye segi ka na aw ka dugu barikaman kɔnɔ. Bii yɛrɛ, ne ko: N bena aw ka sigɛn tɔnɔ d'aw ma siɲɛ fila.

¹³Ne bena n ka kala labɛn, o ye Zuda mara mɔgɔw ye. N bena biɲɛ don a la, o ye Efarayimu kɔmɔgɔw ye. *Siyɔnkaw, ne bena aw ka kɛlɛdenw bila girɛkiw la. N bena aw kɛ i ko kɛlɛden ka murujan.»

¹⁴Masaba ben'a yɛrɛ yira sanfɛ u kunna. A ka biɲɛ be taga i ko sanmanamana. Matigi, Masaba bena buru fiyɛ, a bena na worodugu ɲafan fɔɲɔba kɔnɔ.

¹⁵Masaba, Setigi ben'a ka mɔgɔw tanga. U bena se u juguw kɔrɔ, k'u ka bɛrɛbonnan bɛrɛw dɔndɔn. U bena pɛrɛn i ko dɔrɔtɔw k'u juguw joli bɔnbɔn. U ben'a bɔn i ko saraka joli, filen kɔnɔ, min be seriseri sarakabɔyɔrɔ nɔnkɔn na.

¹⁶Masaba u ka Ala bena u kisi o loon na, olu minw y'a ka mɔgɔw ye. U bena manamana a ka jamana kɔnɔ i ko dakamanakabakuruw.

¹⁷U bena to hɛrɛ la, dawula bena kɛ u la! Suman ni duvɛnkɛnɛ bena barika don kanbelenw ni sunguruw la.