Read dyu Malasi ka kitabu 1 Bible Online

Malasi ka kitabu 1 - dyu bible

Malasi ka kitabu 1

¹Masaba ye kuma min fɔ Isirayɛlidenw ye Malasi barika la, olu ye nin ye:

² Masaba ko: «Aw koo ka di ne ye. Nga aw do b'a fɔ ko: ‹Mun le b'a yira ko anw koo ka di e ye?› Ezawu tun te Yakuba kɔrɔcɛ ye wa? Ne Masaba b'a fɔ aw ye ko, Yakuba koo diyara ne ye,

³Ezawu koo man di ne ye. N y'a ka kuluyɔrɔ kɛ yɔrɔlakolon ye, k'a cɛɛn di kongowuluw ma.

⁴Ni edɔmuw y'a fɔ ko: ‹An ka yɔrɔ cira, nga an ben'a lɔ tugu,› ne Masaba, Setigi le ko u k'a lɔ, ne ben'a ci. Mɔgɔw bena tɔgɔkura la a kan ko: ‹Marajugu,› ani ko: ‹Ala diminin be siya min kɔrɔ tuma bɛɛ.›

⁵Aw ɲaa bena o ye, aw ben'a fɔ ko: ‹Masaba ka sebagaya sera Isirayɛli jamana kɔɔ kan!›

⁶«Deen b'a faa boɲa, baaraden b'a kuntigi boɲa. Ni ne ye aw faa ye, ne ka kan ni boɲa min ye, o be min? Ni ne ye aw ka Masaba ye, ne ka kan ni boɲa min ye, o be min? Ne Masaba, Setigi le b'o fɔra aw sarakalasebagaw ye, aw minw be ne dɔgɔyara. Aw be sɔrɔ k'a fɔ ko: ‹An y'i dɔgɔya cogo di?›

⁷Aw be n dɔgɔya, bari aw be ne ni dumunifɛn minw ye ne ka sarakabɔyɔrɔ la, u saniyanin tɛ. Aw be tila k'a fɔ ko: ‹An m'i jati cogo di?› Aw b'a fɔ ko: ‹Masaba ka dumuni te foyi ye!› O la, aw te ne jati.

⁸ Aw be na ni begɛn ɲaa fiɲɛnninw ye k'u kɛ saraka ye ne ye. O ka ɲi wa? Aw be na ni dɔw senkelenninw ye, dɔw banabagatɔlaman, o ka ɲi wa? Aw k'o ɲɔgɔnw di aw ka jamanatigi ma sa, yala a bena diy'a ye wa? Yala a bena i kunbɛn ka ɲa wa? Ne Masaba, Setigi le ko ten.

⁹O la sa, aw ye ne Ala daali, waasa n ka makari aw na. Aw ka koo nin kɛnin kɔ, ne bena sɔn aw ma wa? Ne Masaba, Setigi le ko ten.

¹⁰«Ee! Mɔgɔ kelen jumɛn le bena n ka soo daa tugu sa? Waasa aw kana tasuma mana n ka sarakabɔyɔrɔ la gwansan! Aw nigɛ te n na hali dɔɔni! Ne Masaba, Setigi le ko ten. Aw be saraka minw bɔ, n t'u minɛ.

¹¹Bari, k'a ta kɔrɔn fɛ, ka ta'a bila tileben fɛ, ne tɔgɔ ka bon siyaw cɛma. Yɔrɔ bɛɛ la, wusulan be jɛni ne ye ani sarakafɛn saniyanin, bari ne tɔgɔ ka bon siyaw cɛma. Ne Masaba, Setigi le ko ten.

¹²K'a sɔrɔ, aw be ne dɔgɔya, ka to k'a fɔ ko: ‹Masaba ka sarakabɔyɔrɔ nɔgɔnin lo. Dumuni min be yen, o fana ma ɲi.›

¹³Aw b'a fɔ ko: ‹Nin ye sɛgɛn ye dɛ!› Aw be n ka koo lɔgɔbɔ ten le. Ne le ko ten. Aw be na ni begɛn soɲaninw ye, ni senkelenninw ani bananinw ye, k'u saraka ne ye. Ne be se k'olu minɛ aw fɛ wa?

¹⁴Ni begɛndafanin cɛman be namaramɔgɔ min ka wɛɛrɛ kɔnɔ, n'a y'o to yen ka begɛn wɛrɛ kɛ a ka dadili saraka ye, fiɲɛ be min na, o tigi ka danga. Bari ne ye Masaba le ye. Ne Masaba, Setigi le ko ten. Siyaw bɛɛ ka kan ka siran n ɲa.