Read dyu Malasi ka kitabu 3 Bible Online

Malasi ka kitabu 3 - dyu bible

Malasi ka kitabu 3

¹ Ayiwa, Masaba, Setigi ko: «N bena n ka ciden ci, a ka sira labɛn n ɲa. Aw be Matigi min yɔrɔ ɲinina, ale bena bari ka don a batoso kɔnɔ. Ciden min bena jɛnɲɔgɔnya koo fɔ, aw be min fɛ, o natɔ filɛ!»

² Jɔn bena se ka lɔ a nalon na? Jɔn bena se ka lɔ seen kan a bɔlon na? Bari, a bena kɛ i n'a fɔ numucɛ ka faan tasuma, i n'a fɔ fanikobaga ka safina.

³A bena sigi ka nɔgɔ bɔ i n'a fɔ warigwɛbaarabaga. A bena sarakalasebaga Levi kɔmɔgɔw saniya i n'a fɔ warigwɛbaarabaga ni sanufagala b'a kɛ cogo min na k'u nɔgɔ bɔ. Olu le bena sarakaw di Masaba ma cogo bɛnnin na.

⁴O tuma na, Zeruzalɛmukaw ni Zuda mara mɔgɔw ka sarakaw bena diya Masaba ye i n'a fɔ fɔlɔtaw, i n'a fɔ saan tɛmɛnin taw.

⁵Masaba, Setigi ko: «Ne bena gwɛrɛ aw la kiti kama. Ne bena teliya ka lagwɛlikɛla le jalaki, ni ɲamɔgɔyakɛlaw ni minw be kali ka sɔrɔ tiɲɛ tɛ, ni minw be baaradenw namara, ani minw be firiyamusow, ni falatɔw, ni lonanw tɔɲɔ n'u te siran ne ɲa, ne bena olu bɛɛ jalaki.»

⁶Masaba ko: «Tiɲɛ na, ne cogo te yɛlɛma. Aw fana be Yakuba ka denya la kudayi. [1]

⁷K'a ta aw faaw ka tile ma, aw kɔni ma sɔn ka nɔrɔ ne ka fɔta la k'a bato. Aw ye kɔsegi ne ma, ne bena sɔn aw ma. Aw b'a fɔ ko: ‹An bena kɔsegi i ma cogo di?›

⁸Adamaden be se ka Ala namara wa? K'a sɔrɔ aw be ne namara. Nga aw b'a fɔ ko: ‹An b'i namara cogo di?› Aw be n namara jaka ni sarakaw la.

⁹Aw be ne namara minkɛ, o la, danga b'aw kan, aw ka siya bɛɛ.

¹⁰ Aw ye na ni jakaw bɛɛ dafaninw ye n batoso nafolo marayɔrɔ la, waasa dumuni ka sɔrɔ n ka soo kɔnɔ. Aw ka ne kɔrɔbɔ ten k'a filɛ. Ne Masaba, Setigi le ko ten. Ni ne tena sankolo dayɛlɛ, n ka hɛrɛ ka jigi aw kan kosɔbɛ.

¹¹Ne bena suman cɛnfɛnw bali, u tena aw ka foro kɔnɔ sumanw cɛn tugu, *ɛrɛzɛnsun denbaliw tena sɔrɔ aw ka foro kɔnɔ tugu. Ne le ko ten.

¹²Siyaw bɛɛ ben'a fɔ ko aw dagamuna. Bari aw ka yɔrɔ bena kɛ hɛrɛyɔrɔ ye.» Masaba, Setigi ko ten.

¹³Masaba ko: «Aw be minw fɔra ne ka koo la, o ka jugu. Aw be tila k'a fɔ ko: ‹An ye mun le fɔ ɲɔgɔnw ye i ka koo la?›

¹⁴Aw b'a fɔ ko: ‹Ka baara kɛ Ala ye, tɔnɔ t'o la. An y'a ka kuma bato, ka taama Masaba, Setigi ɲakɔrɔ dusukasi la, an ye tɔnɔ jumɛn sɔrɔ o la?

¹⁵An be se k'a fɔ sisan ko yɛrɛboɲalaw dagamunin lo. Kojugukɛlaw ka hɛrɛ be taga ɲa yɛrɛ. U be Ala darabɔ, nga u do be bɔ!› »

¹⁶O tuma na, mɔgɔ minw tun be siran Masaba ɲa, olu le tun be kumana ɲɔgɔn fɛ. Nga Masaba y'a tulo malɔ u ka kuma na, k'a janto a la. Kitabu dɔ sɛbɛnna Masaba ɲana k'a ɲasiranbagaw koo fɔ, minw b'a tɔgɔ boɲa.

¹⁷Masaba, Setigi ko: «Ne be loon min labɛnna, u bena kɛ ne niyɔrɔ ye o loon na. Deen min be baara kɛ a faa ye, a faa be makari a la cogo min na, ne bena makari u la ten.

¹⁸O la, faranfasi min be mɔgɔtilennin ani mɔgɔjugu cɛ, aw bena o lɔn. Min be baara kɛ ne Ala ye, ani min te baara kɛ ne ye, faranfasi min b'u cɛ, aw bena o lɔn.

¹⁹Loon nin setɔ filɛ, a gwannin be i n'a fɔ dibi. A bena yɛrɛboɲalaw ni mɔgɔjuguw bɛɛ jɛni i n'a fɔ biin. Ne Masaba, Setigi ko ten. U lili tena to, sankofɛrɛ u furaburu!

²⁰Aw minw be siran ne ɲa, hɔrɔnya tile bena bɔ, funteni min be kɛnɛya di, a be bɔ n'o ye. Aw bena bɔ ka to ka panpan i n'a fɔ misi bɔtɔ wɛɛrɛ la.

²¹Aw bena taama mɔgɔjuguw kan bari u kɛra i n'a fɔ bugurigwɛ, aw seen kɔrɔ, ne ka loon labɛnnin na. Ne Masaba, Setigi ko ten.

²²Aw k'aw hakili to n ka baarakɛla Musa ka sariya la, ne ye min d'a ma *Orɛbu kulu kan, o ka kɛ Isirayɛli bɛɛ ta ye, sariyaw ni landaw.

²³ Ayiwa, ne bena kira Eli ci aw ma, sanni ne Masaba ka loon ka se. Lonba, siranyalon!

²⁴A bena bɛn don faaw n'u deenw cɛ, deenw n'u faaw be bɛɛn fana. N'o tɛ, n bena na jamana halaki.»