Read dyu MAKABEW FƆLƆ 1 Bible Online

MAKABEW FƆLƆ 1 - dyu bible

MAKABEW FƆLƆ 1

¹Maseduwani masacɛ Filipu deen Alɛkisandiri bɔra Maseduwani jamana na ka taga kɛlɛ la. A sera pɛrɛsiw ni mɛdiw ka masacɛ Dariyusi kɔrɔ. A ye fanga bɔsi a la girɛkiw ka mara la fɔlɔ. O kɔ,

²a ye kɛlɛ caaman kɛ, ka dugu barikaman caaman minɛ, k'o mara masacɛw faga.

³A tagara se fɔɔ diɲɛ daan na ka siya caaman ka nafolo bɔsi. A sera diɲɛ mɔgɔw kɔrɔ ka kɛlɛ ban tuma min na, a y'a yɛrɛ boɲa.

⁴A ye kɛlɛboloba lajɛn, barika tun be min na kosɔbɛ, ka maraw, ni siyaw n'u ɲamɔgɔw kolo, k'u wajibiya ka nisɔngɔ sara a ye.

⁵O kɔ, a banana, a y'a faamu ko ale bena sa.

⁶A y'a ka kɛlɛkuntigiw wele, minw tun ye hɔrɔnw ye, a yɛrɛ tun lamɔna ni minw ye kabini a denmisɛn tuma, k'a ka mara tilan u cɛ sanni a ka sa.

⁷Alɛkisandiri tun ye saan tan ni fila kɛ masaya la ka sɔrɔ ka sa.

⁸A ka kɛlɛkuntigi nunu kelen kelen bɛɛ ye fanga ta u ka mara la min tun dir'a ma.

⁹A sanin kɔ, u kelen kelen bɛɛ tun b'u yɛrɛ jati masaw ye, u dencɛw fana y'o ɲɔgɔn kɛ u kɔ saan caaman kɔnɔ. Olu sababu la, tɔɔrɔ cayara dugukolo kan.

¹⁰Masacɛ nunu kɔmɔgɔw cɛma, dɔ wilila, a tɔgɔ tun ko Antiyokusi Epifani, a tun te siran Ala ɲa fewu. Masacɛ Antiyokusi deen tun lo. A tun minɛna ka to Ɔrɔmu. O kɔ, a sigira masaya la girɛkiw ka masaya saan 137nan na. [1]

¹¹O waati la, mɔgɔkolon dɔw wilila Isirayɛli jamana kɔnɔ. U ye mɔgɔ caaman nigɛ k'a fɔ u ye ko: «An ka bɛn ni an lamini siyaw ye, bari kojugu caaman y'an sɔrɔ kabini an banna ka kɛ i n'a fɔ olu.»

¹²O kuma diyara jama ye.

¹³U dɔw nisɔndiyara fɔɔ u teliyara ka taga masacɛ fɛ. Masacɛ ye sira d'u ma ka siya wɛrɛw ka landaw kɛ.

¹⁴O la, u ye tolonkɛbon dɔ lɔ Zeruzalɛmu i n'a fɔ siya nunu tun b'a kɛ cogo min na.

¹⁵U ye koo dɔ kɛ k'u ka kɛnɛkɛnɛnɔ dogo. [2] O la, bɛɛn min tun be u ni Ala cɛ, u y'o cɛn, ka jɛn ni siya wɛrɛw ye, k'u yɛrɛ feere, ka kojugu kɛ.

¹⁶Antiyokusi y'a ye ko a ka fanga sabatira tuma min na, a y'a latigɛ ko a bena kɛ Ezipiti masacɛ ye janko a ka kɛ jamana fila nunu kunna.

¹⁷A tagara Ezipiti ni kɛlɛboloba ye, ni kɛlɛkɛwotorow, ani samaw, ni kurun caaman ye,

¹⁸a ye kɛlɛ daminɛ ni Ezipiti masacɛ Potoleme ye, ale bolil'a ɲa. Mɔgɔ caaman fagara o kɛlɛ la.

¹⁹Antiyokusi ye Ezipiti dugu barikamanw minɛ ka Ezipiti nafolo cɛ.

²⁰A sera Ezipiti kɔrɔ girɛkiw ka masaya saan 143nan na. A kɔsegitɔ sinna Isirayɛli ma Zeruzalɛmu kɛlɛ kama n'a ka kɛlɛboloba ye.

²¹Antiyokusi donna Alabatosoba kɔnɔ ni yɛrɛboɲa ye, ka sarakabɔyɔrɔ sanulaman ta, ni fitinɛ n'a minanw bɛɛ,

²²ni buru bilayɔrɔ, ni sarakajidagaw, ni filenw, ni wusulandaga sanulamanw, ni Alabatosoba cɛtigɛfani, ani masafugulanw. Sanufɛn minw tun kɛra ka Alabatosoba ɲafɛla masiri, a y'o bɛɛ ta.

²³A ye warigwɛ ni sanu, ani minan sɔngɔgwɛlɛnw fana ta. A y'u ka nafolo dogonin fana ta ka taga n'a ye.

²⁴A ye fɛɛn nunu bɛɛ cɛ ka ban tuma min na, a kɔsegir'a ka jamana na. A tun ye mɔgɔ caaman faga, ka dabayakuma fɔ fɔɔ k'a dama tɛmɛ.

²⁵Dusukasi kɛra Isirayɛli jamana faan bɛɛ la.

²⁶Ɲamɔgɔw ni mɔgɔkɔrɔbaw tora ka ŋuna, kanbelenw ni sunguruw barika banna. Musow ka cɛɲa tununa.

²⁷Kɔɲɔcɛw ye dusukasidɔnkili la, dusukasi ye kɔɲɔmusow sɔrɔ u ka layɔrɔ la.

²⁸Dugukolo yɛrɛyɛrɛla Isirayɛlidenw ka sigɛnba kosɔn, Yakuba ka somɔgɔw bɛɛ maloyara.

²⁹Saan fila tɛmɛnin kɔ, masacɛ ye kɛlɛkuntigi dɔ ci Zuda mara duguw la, a tagara Zeruzalɛmu ni kɛlɛboloba ye.

³⁰A ye hɛrɛkuma fɔ dugu mɔgɔw ye, dugu mɔgɔw lar'a la, k'a sɔrɔ galon lo. O kɔ, a barila ka ben dugu kan ka cɛnniba kɛ yen, ka Isirayɛliden caaman faga.

³¹A ye dugu nafolo cɛ ka tasuma don dugu la, soo minw tun b'a kɔnɔ, k'olu ni dugu laminikogo halaki.

³²A ka kɛlɛdenw ye musow ni denmisɛnw minɛ, ka begɛnw tilan u ni ɲɔgɔn cɛ.

³³O kɔ, u ye Dawuda ka ciin lalaga ka kogojan barikaman lɔ k'a lamini, ka sangaso barikamanw lɔ k'u kɛ kɔlɔsilikɛyɔrɔw ye. O kɛra u ka dugu yɔrɔ barikaman ye.

³⁴U ye mɔgɔkuntan dɔw sigi a kɔnɔ, janfamɔgɔw tun lo n'u tɛ sariya bato, olu ye barika sɔrɔ o yɔrɔ la kosɔbɛ.

³⁵U ye kɛlɛkɛminanw ni dumunifɛnw mara yen. U tun ye nafolo min cɛ Zeruzalɛmu, u y'o bila yen. O kɛra faratiyɔrɔ ye Isirayɛlidenw fɛ.

³⁶O kɛra faratiko ye Alabatosoba kama, o kɛra sutanako ye Isirayɛlidenw fɛ tuma bɛɛ.

³⁷U ye mɔgɔ jalakibaliw joli bɔn ka Alabatosoba lamini, u ye Alabatosoba nɔgɔ.

³⁸Zeruzalɛmukaw bolila u kosɔn, dugu kɛra lonanw ka sigiyɔrɔ ye. Dugulenw kɛra lonanw ye a kɔnɔ, u y'u karaba ka bɔ a kɔnɔ.

³⁹Zeruzalɛmu Alabatosoba kɛra yɔrɔlakolon ye. A ka ɲanagwɛlonw kɛra sangalonw ye, a ka lafiɲɛlonw kɛra mafiɲɛyalon ye, a ka boɲa yɛlɛmana ka kɛ dɔgɔya ye.

⁴⁰A tɔgɔ tun ka bon cogo min na, a ka maloya boɲana ten fana. A ka kunkɔrɔta kɛra dusukasi ye.

⁴¹Masacɛ y'a fɔ ko a ka mara kɔnɔ mɔgɔw ka kɛ kelen ye, ko u kelen kelen bɛɛ k'u ka landaw dabila yɔrɔ bɛɛ a ka mara kɔnɔ.

⁴²Siya tɔw bɛɛ ye masacɛ ka kuma bato.

⁴³Isirayɛlidenw caaman fana sɔnn'a ka batolikɛcogo ma. U ye joow sɔn, u ma lafiɲɛlon bato tugu. O dama tɛ,

⁴⁴masacɛ ye mɔgɔw ci ni batakiw ye Zeruzalɛmu, ni Zuda mara dugu tɔw la, k'a fɔ o yɔrɔ mɔgɔw ye ko u ka jamana wɛrɛ landaw kɛ minw n'u ka jamana ta te kelen ye.

⁴⁵Ko u kana saraka jɛnitaw, ni jii ta, ani saraka wɛrɛw bɔ Alabatosoba kɔnɔ tugu. Ko u kana lafiɲɛlonw ni ɲanagwɛlonw bato tugu,

⁴⁶ko u ka Alabatosoba nɔgɔ, ni fɛɛn minw ye Ala ta ye k'o nɔgɔ,

⁴⁷ka sarakabɔyɔrɔw lɔ, ka soow lɔ joow ye, ka lɛɛw bɔ saraka ye, ni sogo sifa wɛrɛ, minw nɔgɔnin lo sariya faan fɛ.

⁴⁸Ko u man kan k'u dencɛw kɛnɛkɛnɛ tugu. Ko u ka kokuntan sifa bɛɛ kɛ k'u yɛrɛ nɔgɔ.

⁴⁹Masacɛ tun b'a fɛ u ka ɲinɛ Musa ka sariya kɔ ten, k'u ka landaw bɛɛ yɛlɛma.

⁵⁰Ko ni mɔgɔ o mɔgɔ ma sɔn ka masacɛ ka cira bato, k'o tigi be faga.

⁵¹Masacɛ ye o kuma sɛbɛn k'a ci a ka mara mɔgɔw bɛɛ ma. A ye mɔgɔ dɔw bila Isirayɛli jama kɔlɔsili la, k'a fɔ Zuda mara duguw bɛɛ mɔgɔw ye ko u ka sarakaw bɔ duguw kelen kelen bɛɛ kɔnɔ.

⁵²Isirayɛlidenw caaman ye Musa ka sariya fili, ka tugu masacɛ ka mɔgɔw kɔ. U ye kojugu kɛ jamana kɔnɔ.

⁵³U ye Isirayɛlidenw wajibiya ten, fɔɔ u tagara dogo dogoyɔrɔw bɛɛ la.

⁵⁴Masacɛ y'a ka fɛnjugu cɛnnikɛla lɔ saraka jɛnitaw bɔyɔrɔ la, ka sarakabɔyɔrɔw lɔ dugu tɔw la Zuda mara la. O kɛra girɛkiw ka masaya saan 145nan na, *Kisilewu kalo tile tan ni duurunan loon.

⁵⁵U tun be wusulan jɛni sodaw la ni forobayɔrɔw la.

⁵⁶N'u ye sariyasɛbɛ minw sɔrɔ, u b'o faranfaran k'u fili tasuma kɔnɔ.

⁵⁷U mana Musa ka kitabu ye dɔ fɛ, walima ni dɔ be Musa ka sariya bato, u b'o tigi faga ka kɛɲɛ ni masacɛ ka kuma ye.

⁵⁸Isirayɛliden minw tun te masacɛ ka fɔta bato duguw kɔnɔ, ni u ye olu sɔrɔ, u tun be olu tɔɔrɔ kosɔbɛ kalo o kalo.

⁵⁹Kalo o kalo tile mugan ni duurunan loon, u tun bɛ saraka bɔ saraka jɛnita bɔyɔrɔ la.

⁶⁰Muso minw y'u dencɛw kɛnɛkɛnɛ, u tun be olu faga ka kɛɲɛ ni masacɛ ka kuma ye,

⁶¹k'u ka denɲɛninw dulon u kaan na, k'u ka somɔgɔw faga, ani deenw kɛnɛkɛnɛbagaw.

⁶²O bɛɛ n'a ta, Isirayɛli kɔnɔ mɔgɔ caaman sera ka to kantigiya la, ani ka ban ka fɛnnɔgɔninw dumu.

⁶³U sɔnna saya ma sanni ka fɛnnɔgɔnin dumu k'u ka bɛɛn cɛn, min tun be u ni Ala cɛ. O kosɔn, u y'u faga.

⁶⁴O loonw na, Ala ka dimiba sera Isirayɛlidenw ma.