Read dyu MAKABEW FƆLƆ 10 Bible Online

MAKABEW FƆLƆ 10 - dyu bible

MAKABEW FƆLƆ 10

¹Girɛkiw ka masaya saan 160nan na, Antiyokusi naaninan deen Alɛkisandiri Epifani nana jigi kurun kɔnɔ ka Potolemayisi dugu minɛ. Dugu mɔgɔw sɔnn'a ka masaya ma.

²Masacɛ Demetiriyusi y'o mɛn tuma min na, a ye kɛlɛden caaman lajɛn ka ta'a kama ko a b'a kɛlɛ.

³A ye bataki sama Zonatan ma ka kuma diman fɔ a kɔnɔ, k'a daa di a ma koo caaman na.

⁴A tun b'a fɔra a yɛrɛ kɔnɔ ko: «An ka kan ka bɛn ni Zonatan ye joona sanni a ka bɛɛn ni Alɛkisandiri ye an kama.

⁵N'o tɛ, an tun ye kojugu minw kɛ ale, n'a balimaw, n'a ka siya la, a hakili bena jigi o la tugu.»

⁶Demetiriyusi ye sira di Zonatan ma ka kɛlɛbolo lajɛn, ani ka kɛlɛkɛminanw dilan. A y'a dali ko a ka kɛ a jɛnɲɔgɔn ye. U tun ye Isirayɛliden minw minɛ k'u datugu Zeruzalɛmu yɔrɔ barikaman na, a ko u k'olu segi a ma.

⁷O kɔ, Zonatan tagara Zeruzalɛmu ka masacɛ ka bataki nin kalan jama bɛɛ ɲana, ni kɛlɛdenw ɲana minw tun be dugu nin yɔrɔ barikaman na.

⁸U y'a mɛn tuma min na ko masacɛ ye sira di Zonatan ma ka kɛlɛbolo lajɛn, siranya y'u minɛ kosɔbɛ.

⁹Kɛlɛden minw tun be dugu nin yɔrɔ barikaman na, olu ye mɔgɔ minɛnin nunu segi Zonatan ma, Zonatan fana y'u segi u ka somɔgɔw ma.

¹⁰Zonatan sigira Zeruzalɛmu, k'a daminɛ ka lɔli kɛ ani ka dugu lalaga.

¹¹A y'a fɔ baarakɛlaw ye k'u ka dugu laminikogo lɔ kura ye ni kabakuru lɛsɛninw ye ka Siyɔn kulu lamini. U y'o kɛ.

¹²Bakidɛsi tun ye dugu barikaman minw lɔ, jamana wɛrɛ kɛlɛden minw tun siginin be olu kɔnɔ, olu bolila.

¹³U bɛɛ y'u ka baarada to yen ka kɔsegi u ka jamana na.

¹⁴Nga Isirayɛliden minw tun ye Musa ka sariya n'a kɔnɔnakuma to yen, olu dɔw tora Bɛtisuri, bari yɛrɛkalifayɔrɔ tun lo.

¹⁵Demetiriyusi y'a daa di Zonatan ma koo minw na a ka bataki kɔnɔ, masacɛ Alɛkisandiri y'o mɛn. U ye Zonatan n'a badenw ka kɛlɛkow fana fɔ a ye, n'u ka cɛfariyakow, ani u ye tɔɔrɔ minw muɲu.

¹⁶A kabara k'a fɔ ko: «An tena cɛɛ nin ɲɔgɔn sɔrɔ fewu! Kabini sisan, an k'a kɛ an teri ye, n'an jɛnɲɔgɔn ye.»

¹⁷O la, a ye bataki sɛbɛn k'a ci a ma ko:

¹⁸«Ne masacɛ Alɛkisandiri be n balima Zonatan fo.

¹⁹Ne y'i koo mɛn: i ye mɔgɔ jagwɛlɛn ye, i ka kan ka kɛ an teri ye.

²⁰O le kosɔn, k'a ta bii ma, ne b'i kɛ i ka siya ka sarakalasebagaw kuntigi ye, k'i wele ko masacɛ ka mɔgɔsɔbɛ. I ka kan ka sɔn ka kɛ an jɛnɲɔgɔn ye, ani ka to an ka teriya la.» Masacɛ ye faniwulen ni fugulan sanulaman fana ci a ma k'a boɲa.

²¹Zonatan ye sarakalasebagaw ka kuntigifaniw don girɛkiw ka masaya saan 160nan kalo wolonwulanan na, Gwatakɔrɔsigi ɲanagwɛ waati la. A daminɛna ka kɛlɛdenw lajɛn, ani ka kɛlɛkɛminanw dilan caaman.

²²Demetiriyusi y'o mɛn tuma min na, o ma diya a ye. A ko:

²³«An ye mun kɛ sa? Alɛkisandiri ka kɔn anw ɲa ka zuwifuw kɛ a teriw ye, ka barika don a yɛrɛ la ten!

²⁴Ne fana bena bataki ci u ma ka kuma diman fɔ u ye, k'a fɔ u ye ko n bena boɲa ni nafolo d'u ma janko u labɛnnin ka to ka n dɛmɛ.»

²⁵A ye bataki sɛbɛn k'a fɔ u ye ko: «Ne, Demetiriyusi be aw zuwifuw fo.

²⁶An y'a mɛn ko bɛɛn min be an cɛ, aw b'o bato, ko aw ye an teriw ye halibi, ko aw ma taga fara an juguw kan. O diyara an ye.

²⁷N'aw tora kantigiya la an faan fɛ, aw be koo min kɛ k'an dɛmɛ, an bena aw sara o kosɔn.

²⁸An bena nisɔngɔ nɔgɔya aw ye, ka boɲafɛnw di aw ma.

²⁹Kabini sisan, ne b'aw hɔrɔnya. Aw zuwifuw cɛma, ne tena mɔgɔ si wajibiya tugu k'a ka bolomafara di, walima ka kɔgɔ wusuru sara, ani ka wari wɛrɛw sara masacɛ ye.

³⁰O dama tɛ, k'a ta bii ma, u be to ka sumanw tilan sabanan kelen, ni yiridenw tilancɛ minw di ne ma, ne ko Zuda mara mɔgɔw tena o di tugu. Samari mara saba minw farala Zuda mara kan, o mɔgɔw fana tena o di, ni Galile mara mɔgɔw.

³¹Zeruzalɛmu bena jati Ala ka yɔrɔ ye, Zeruzalɛmu n'a mara tena *jakaw ni bolomafaraw sara.

³²Ne tena Zeruzalɛmu dugu yɔrɔ barikaman jati n ta ye tugu, n b'a kalifa sarakalasebagaw kuntigi ma, ale k'a sagolamɔgɔw woloma u k'a kɔlɔsi.

³³U tun ye zuwifu minw bɛɛ minɛ Zuda mara la ka taga n'u ye yɔrɔ o yɔrɔ ne ka mara kɔnɔ, ne b'u bɛɛ hɔrɔnya, ne tɛ foyi ɲini u kunmabɔ koo la. U si tena nisɔngɔ sara, hali u ka begɛnw ta.

³⁴Zuwifu minw be ne ka mara kɔnɔ, olu si tena nisɔngɔ ni wusuru sara tugu, walima juru wɛrɛ, ɲanagwɛlonw na, ni lafiɲɛlonw, ni kalokura ɲanagwɛw, ani ɲanagwɛ latigɛninw. U hɔrɔnyanin lo kabini tile saba yanni o loon nunu dɔ ka se, fɔɔ tile saba a kɔfɛ.

³⁵Mɔgɔ si tena se k'u wajibiya ka wari dɔ sara, walima k'u sigɛn koo dɔ la.

³⁶«Zuwifuw bena se ka don masacɛ ka kɛlɛbolo la fɔɔ ka se mɔgɔ waa bi saba (30 000) ma. U ni ne ka mara kɛlɛden tɔw ka sara bena kɛ kelen ye.

³⁷U dɔw bena ci ka taga masacɛ ka duguba barikamanw la, dɔw bena bila yɔrɔbaw la mara kɔnɔ. U kuntigiw n'u ɲamɔgɔw bena woloma ka bɔ u cɛma, u bena u ka koow ɲanabɔ ka kɛɲɛ n'u yɛrɛ ka sariyaw ye, i n'a fɔ masacɛ y'a latigɛ Zuda mara mɔgɔw faan fɛ cogo min na.

³⁸Samari mara saba minw farala Zude mara kan, olu bena fara Zude mara kan ka kɛ mara kelen ye, sarakalasebagaw kuntigi dɔrɔn le ka kɛ u kunna.

³⁹«Ne be Potolemayisi n'a ka mara di Zeruzalɛmu Alabatosoba ma, janko o yɔrɔ nin sɔrɔw ka kɛ ka batoliko musakaw ɲanabɔ.

⁴⁰Ne yɛrɛ bena warigwɛ kuru waa tan ni duuru di saan o saan ka bɔ n ka sɔrɔw la, min be bɛn o ma.

⁴¹Faamaw tun ka kan ka wari min don kɛsu la n'u m'o don i n'a fɔ u tun b'a don cogo min na saan fɔlɔw la, u bena o di Alabatosoba baaraw kama.

⁴²O dama tɛ, u tun be to ka warigwɛ kuru waa duuru minw bɔ Alabatosoba sɔrɔw la saan o saan, o bena kɛ sarakalasebagaw ta ye minw be baara la Alabatosoba kɔnɔ.

⁴³Mɔgɔ o mɔgɔ man'a yɛrɛ kalifa Alabatosoba kɔnɔ Zeruzalɛmu, walima a mara la, bari a ma se ka wari don masacɛ ka kɛsu kɔnɔ, walima ko juru wɛrɛ le b'a la, o bena yafa o tigi ma, u b'a bololafɛnw tigiya d'a ma tugu ne ka mara kɔnɔ.

⁴⁴«Masacɛ bena lɔ ni Alabatosoba lɔ n'a lalaga baaraw musakaw ye.

⁴⁵U bena wari min kɛ ka Zeruzalɛmu laminikogo lɔ kura ye, ani ka barika don a la, ani ka Zuda mara dugu wɛrɛw laminikogow lɔ, masacɛ bena lɔ n'o fana ye.»

⁴⁶Zonatan ni jama ye Demetiriyusi ka kuma nin mɛn tuma min na, u ma la a la, u m'a jati. Bari a tun ye kojugu min bɛɛ kɛ Isirayɛli kɔnɔ, ka sigɛn min la u kan, u tun ma ɲinɛ o kɔ.

⁴⁷U y'a latigɛ k'u jigi la Alɛkisandiri kan, bari u ka miiri la, ale lo kɔnna ka kuma diman fɔ. U kɛra ale jɛnɲɔgɔnw ye a sii bɛɛ la.

⁴⁸Masacɛ Alɛkisandiri ye kɛlɛden caaman lajɛn ka taga Demetiriyusi kama.

⁴⁹Masacɛ fila nunu ye kɛlɛ daminɛ, nga Alɛkisandiri ka kɛlɛdenw ye boli ta. Demetiriyusi tugura u kɔ, a sera u kɔrɔ.

⁵⁰A jijara kɛlɛ la fɔɔ ka tile ban, nga o loon na, u ye Demetiriyusi faga.

⁵¹Alɛkisandiri ye mɔgɔw ci Ezipiti masacɛ Potoleme wɔɔrɔnan fɛ k'a fɔ a ye ko:

⁵²«Ne kɔsegira n ka mara la, ne sigira n faaw ka masasigilan kan. Ne ye fanga ta, ne sera Demetiriyusi kɔrɔ k'an ka jamana minɛ tugu.

⁵³Ne ni n ka kɛlɛdenw ye kɛlɛ daminɛ n'a ye, an sera ale n'a ka kɛlɛdenw kɔrɔ pepewu, ka fanga bɔsi a la.

⁵⁴Sisan, an ka bɛn, e k'i denmuso di ne ma furu la. O la, ne bena kɛ i birancɛ ye, ka boɲafɛnw di e n'i denmuso ma, i ka kan ni minw ye.»

⁵⁵Masacɛ Potoleme y'a jaabi ko: «I segira i faaw ka jamana na loon min na, ka fanga ta, o kɛra lonba ye.

⁵⁶Sisan, i ye min sɛbɛn, ne bena o kɛ i ye, nga i ka na ne kunbɛn Potolemayisi fɔlɔ, an ka ɲɔgɔn ye. Ne bena n denmuso d'i ma furu la i n'a fɔ i y'a ɲini ne fɛ cogo min na.»

⁵⁷Potoleme bɔra Ezipiti n'a denmuso Kileyopatiri ye, ka se Potolemayisi girɛkiw ka masaya saan 162nan na.

⁵⁸Masacɛ Alɛkisandiri nan'a kunbɛn o yɔrɔ la. Potoleme y'a denmuso d'a ma, u ye kɔɲɔya kɛ Potolemayisi mɔgɔbaya la, i n'a fɔ a bɛnnin lo masaw fɛ cogo min na.

⁵⁹Masacɛ Alɛkisandiri ye sɛbɛ ci Zonatan ma ko a ka n'a kunbɛn.

⁶⁰Zonatan tagara Potolemayisi mɔgɔbaya la ka masacɛ fila nunu kunbɛn. A ye warigwɛ ni sanu, ani boɲafɛn caaman di olu ni masacɛ ka mɔgɔsɔbɛw ma. O la, a koo diyara u ye.

⁶¹Isirayɛliden minw ye janfamɔgɔw ye, n'u te sariya bato, olu dɔw wilila ɲɔgɔn fɛ a kama. U y'a jalaki masacɛ ɲana, nga masacɛ ma sɔn ka mɛnni kɛ u fɛ.

⁶²A yɛrɛ ko u ka Zonatan ka faniw bɔ ka faniwulen don a kaan na, u y'o kɛ.

⁶³Masacɛ ko a ka sigi ale kɔrɔ. O kɔ, a y'a fɔ a ka mɔgɔbabaw ye ko u ka taga n'a ye dugu kɔnɔ, k'a fɔ ko mɔgɔ si man kan k'a jalaki koo si la, ko mɔgɔ si man kan k'a sɛgɛn koo si la.

⁶⁴Tuma min na Zonatan jalakibagaw y'a ye ko Zonatan ye boɲa sɔrɔ ka kɛɲɛ ni masacɛ ka fɔta ye, k'a ye ko u ye faniwulen don a kaan na, u bɛɛ ye boli ta.

⁶⁵Masacɛ y'a boɲa tugu, a y'a tɔgɔ sɛbɛn k'a fara masacɛ ka mɔgɔsɔbɛ fɔlɔw kan, k'a kɛ kɛlɛkuntigi ni marakuntigi ye.

⁶⁶Zonatan nisɔndiyanin segira Zeruzalɛmu hɛrɛ la.

⁶⁷Girɛkiw ka masaya saan 165nan na, Demetiriyusi fɔlɔ deen Demetiriyusi bɔra Kɛrɛti ka kɔsegi a faso la.

⁶⁸Masacɛ Alɛkisandiri y'o mɛn tuma min na, a hakili ɲagamina kosɔbɛ. A bɔra yen ka kɔsegi Antiyɔsi.

⁶⁹Demetiriyusi ye Apoloniyusi kɛ Siriba mara kuntigi ye. Apoloniyusi ye kɛlɛden caaman lajɛn ka taga sigi n'u ye Zamuniya gɛrɛfɛ. O kɔ, a ye cii bila ka taga sarakalasebagaw kuntigi Zonatan ma ko:

⁷⁰«E kelen le be wili an kama. Ani e kelen kosɔn, ne ye dɔgɔya ni maloya sɔrɔ. Mun kama e b'i ka kuntigiya yira an na kuluw yɔrɔ la?

⁷¹N'i lanin b'i ka kɛlɛdenw na, jigi ka na an kɛlɛ sisan kɛnɛyɔrɔ la. O la, an ben'a ye ni min ye setigi ye an fila cɛma, bari kɛlɛden minw bɔra duguw kɔnɔ, olu be ni ne ye.

⁷²I ka ɲiningali kɛ k'a filɛ, ne ye mɔgɔ min ye, ani an jɛnɲɔgɔnw ye minw ye. U ben'a fɔ i ye ko aw te se ka lɔ an ɲa fewu, bari aw faaw gwɛnna ka bɔ u yɛrɛ ka jamana kɔnɔ fɔɔ siɲɛ fila.

⁷³Tiɲɛ na, i tena se ka lɔ sotigiw ni kɛlɛden caaman ɲa kɛnɛyɔrɔ la. Boliyɔrɔ te yen, farakulu te yen, kabakuru yɛrɛ fana te yen.»

⁷⁴Zonatan ye Apoloniyusi ka kuma nin mɛn tuma min na, a dimina kosɔbɛ. A ye mɔgɔ waa tan (10 000) woloma ka bɔ n'u ye Zeruzalɛmu. A kɔrɔcɛ Simɔn n'a ka kɛlɛdenw faral'a kan k'a dɛmɛ.

⁷⁵U tagara sigi Zope gɛrɛfɛ. Zopekaw tun ye dugu dondaw tugu, bari Apoloniyusi ka kɛlɛden dɔw tun be yen. O la, Isirayɛlidenw ye kɛlɛ daminɛ.

⁷⁶Siranya ye dugu mɔgɔw minɛ, u ye dugu dondaw yɛlɛ, Zonatan ye Zope minɛ.

⁷⁷Apoloniyusi y'o kibaruya mɛn tuma min na, a ye sira minɛ ni sotigi mɔgɔ waa saba (3 000) ye, ni kɛlɛden caaman ye, k'a ɲaa sin Asidɔdi ma k'a kɛ i n'a fɔ k'u bena tilen ka jamana cɛtigɛ. Nga a tun be tagara kɛnɛyɔrɔ faan fɛ le, bari a jigi tun lanin be a ka sotigi caaman nunu kan.

⁷⁸Zonatan tugur'a kɔ Asidɔdi faan fɛ, kɛlɛbolo fila nunu ye kɛlɛ daminɛ.

⁷⁹Nga Apoloniyusi tun sera ka sotigi waa kelen (1 000) dogo, olu tora Isirayɛlidenw kɔfɛ, u ma bɔ o kala ma.

⁸⁰Zonatan barila k'a faamu ko mɔgɔ nunu be dogo la kɔfɛ. U y'a ka kɛlɛdenw lamini k'u bonbon ni biɲɛw ye k'a ta sɔgɔma fɔɔ wulafɛ.

⁸¹Zonatan ka kɛlɛdenw lɔra ka ɲa ka kɛɲɛ ni Zonatan ka fɔta ye, u juguw ka soow barika nana ban.

⁸²O waati la, Simɔn gwɛrɛla n'a ka kɛlɛdenw ye. U ye kɛlɛ daminɛ ni sennatigiw ye, bari sotigiw barika tun banna. Simɔn ser'a juguw kɔrɔ, u bolila.

⁸³Sotigiw jɛnsɛnna kɛnɛyɔrɔ la. Bolibaga nunu sera Azɔti ka don Dagɔn sɔnso kɔnɔ, k'u yɛrɛ kalifa yen. U ka jobon dɔ lo.

⁸⁴Zonatan ye Azɔti n'a laminiduguw ka nafolo cɛ, ka dugu nunu jɛni. Dagɔn ka soo nin jɛnina, mɔgɔ minw tun nana dogo yen, u bɛɛ jɛnina.

⁸⁵Minw sara kɛlɛ la ni tasuma kɔnɔ, u bɛɛ lajɛnnin tun ye mɔgɔ waa seegi (8 000) ye.

⁸⁶Zonatan n'a ka kɛlɛdenw bɔra o yɔrɔ la ka taga sigi Asikalɔn gɛrɛfɛ. Dugu mɔgɔw bɔra ka n'a kunbɛn faama kunbɛncogo la.

⁸⁷A kɛra ten, Zonatan n'a ka mɔgɔ segira Zeruzalɛmu n'u juguw ka nafolo caaman ye.

⁸⁸Masacɛ Alɛkisandiri y'o koo nunu bɛɛ mɛn tuma min na, a ye boɲa wɛrɛ kɛ Zonatan ye tugu.

⁸⁹A ye masirifɛn sanulaman ci a ma i n'a fɔ u b'a kɛ mɔgɔw ye cogo min na u be minw wele masacɛ ka balimaw. A ye Ekurɔn n'a ka mara bɛɛ fana d'a ma, a ka kɛ o tigi ye.