Read dyu MAKABEW FƆLƆ 11 Bible Online

MAKABEW FƆLƆ 11 - dyu bible

MAKABEW FƆLƆ 11

¹Ezipiti masacɛ Potoleme ye kɛlɛden caaman lajɛn, u tun ka ca i n'a fɔ kɔgɔjida la cɛncɛn. A ye kurun caaman lajɛn fana. A tun b'a fɛ ka Alɛkisandiri ka mara minɛ cekuya la k'a fara a yɛrɛ ta kan.

²A tagara Siri jamana na ni kuma diman ye. O yɔrɔ mɔgɔw y'u ka duguw dondaw yɛlɛ a ye, ka ta'a kunbɛn. Masacɛ Alɛkisandiri tun ko u k'a minɛ ka ɲa, bari Potoleme tun ye a birancɛ ye.

³Nga, Potoleme donna dugu o dugu la, a ye kɛlɛdenw to yen ko u k'a kɔlɔsi.

⁴A gwɛrɛla Asidɔdi la tuma min na, u ye Dagɔn sɔnso yira a la, min tun jɛnina, ni Asidɔdi n'a lamini cɛnni, ani suu minw tun filifilila yɔrɔ bɛɛ la, ni minw tun jɛnina kɛlɛ waati la, k'u tɔɔ to. Masacɛ tun ka kan ka tɛmɛ yɔrɔ min na, u tun y'u tonton ɲɔgɔn kan o yɔrɔ la.

⁵U ye Zonatan ka kɛwaliw fɔ masacɛ ye janko k'a kɔnɔnasu a kama, nga a ma foyi fɔ.

⁶Zonatan tagara masacɛ kunbɛnyɔrɔ Zope, ni boɲaba ye. U ye ɲɔgɔn fo, ka si yen.

⁷Zonatan ye masacɛ bila sira fɔɔ Eletɛri baa daa la, o kɔ, a kɔsegira Zeruzalɛmu.

⁸Masacɛ Potoleme ye kɔgɔji daa la duguw minɛ fɔɔ ka taga se kɔgɔjida la Selesi. A tora ka kojugu latigɛ Alɛkisandiri kama.

⁹A ye mɔgɔw ci masacɛ Demetiriyusi fɛ ko a ka na u ka bɛn. Ko a ben'a denmuso Kileyopatiri d'a ma, min ye Alɛkisandiri ka muso ye. Ko Demetiriyusi bena sigi a facɛ ka mara kunna.

¹⁰Ko a tun y'a denmuso di cɛɛ nin ma, nga a nimisara o la, bari o cɛɛ min ye cogo ɲini k'ale faga.

¹¹Potoleme ye Alɛkisandiri jalaki ten, bari a tun b'a fɛ k'a ka mara minɛ.

¹²O la, a y'a denmuso bɔsi a la k'a di Demetiriyusi ma. A faranna Alɛkisandiri la, u kɛra ɲɔgɔn juguw ye, u ma juguya nin dogo.

¹³Potoleme donna Antiyɔsi k'a yɛrɛ kɛ Siriba masacɛ ye. A kɛra ten, a kɛra mara fila masa ye, n'o ye Ezipiti ni Siriba ye.

¹⁴O waati la, masacɛ Alɛkisandiri tun be Silisi mara la, bari o yɔrɔ mɔgɔw tun murutira.

¹⁵Potoleme tun ye koo min kɛ, a y'o mɛn tuma min na, a wilila ka ta'a kama janko k'a kɛlɛ. Nga Potoleme tagar'a kunbɛn ni kɛlɛbolo barikaman ye k'u kɛlɛ k'u gwɛn.

¹⁶Alɛkisandiri bolila ka taga Arabi jamana na. O la, masacɛ Potoleme kɛra setigi ye.

¹⁷Arabucɛ dɔ min tɔgɔ ko Zabudiyɛli, ale ye Alɛkisandiri minɛ k'a kuun tigɛ k'o ci Potoleme ma.

¹⁸Tile fila o kɔ, Potoleme sara. A tun ye kɛlɛden minw to dugu barikamanw kɔnɔ, o duguw mɔgɔw wilila u kama k'u faga.

¹⁹A kɛra ten, Demetiriyusi kɛra masa ye girɛkiw ka masaya saan 167nan na.

²⁰O tile fila nin na, Zonatan ye Zude mara mɔgɔw lajɛn janko ka taga Zeruzalɛmu dugu yɔrɔ barikaman minɛ. A ye kɛlɛkɛwotoro caaman dilan o kama.

²¹Zuwifu minw kɛra janfamɔgɔw ye, n'u te sariya bato, ni u yɛrɛ ka siya koo ka go u ye, olu dɔw tagara masacɛ fɛ k'a fɔ a ye ko Zonatan ye dugu yɔrɔ barikaman nin datugu.

²²Demetiriyusi y'o mɛn tuma min na, a dimina. O yɔrɔnin bɛɛ, a y'a latigɛ ko a be taga Potolemayisi. A ye sɛbɛ ci Zonatan ma ko a ka dugu nin kɛlɛ dabila ka na Potolemayisi joona, u ka ɲɔgɔn ye.

²³Zonatan ye cira nin mɛn tuma min na, a ko u ka to dugu gɛrɛfɛ halibi k'a lamini. A ye Isirayɛli cɛkɔrɔba dɔw woloma, ni sarakalasebaga dɔw, olu k'a bila sira. A sɔnna o faratiko la.

²⁴A ye warigwɛ ni sanu, ni faniw ani boɲafɛn wɛrɛ ta caaman ka taga n'u ye masacɛ fɛ Potolemayisi. O la, a koo diyara Demetiriyusi ye.

²⁵Zuwifu Alaɲasiranbali dɔw y'a jalaki.

²⁶Nga masacɛ y'a boɲa a ka mɔgɔsɔbɛw bɛɛ ɲana i n'a fɔ masacɛ tɔw tun y'a kɛ cogo min na.

²⁷A y'a fɔ ko a be to a ka sarakalasebagaw kuntigiya la. Boɲa minw tun b'a kan ka kɔrɔ, a k'olu bɛɛ ka kɛ a kan halibi. O kɔ, a y'a kɛ masacɛ ka mɔgɔsɔbɛ fɔlɔw dɔ ye.

²⁸Zonatan y'a ɲini masacɛ fɛ ko a ka sɔn Zude mara, ani Samari mara ka mara saba nunu seenw bɔ nisɔngɔ sara la, ko n'a sɔnna o la, ale bena warigwɛ kilo waa seegi ani kilo kɛmɛ (8 100) d'a ma.

²⁹Masacɛ sɔnna. O kɔ, a ye sɛbɛ ci Zonatan ma ko:

³⁰«Ne masacɛ Demetiriyusi be n balima Zonatan ni zuwifuw fo.

³¹An tun ye bataki min ci Lasitɛni ma, min ye ‹masacɛ balimaw› dɔ ye, an b'o ɲɔgɔn ci aw fana ma janko min fɔra a kɔnɔ, aw k'o lɔn.

³²Ne masacɛ Demetiriyusi be n facɛ Lasitɛni fo.

³³Miiriyaɲumanw be zuwifuw fɛ ne faan fɛ minkɛ, ne y'a latigɛ ka koɲuman kɛ u ye. U ye an teriw ye, u b'u ka koow kɛ an faan fɛ ni tilenninya ye.

³⁴O la, ne ko Zude mara kuntigiya b'u bolo, ni mara saba nunu: Aferema, ni Lida ani Aramatayimu. Olu tun faranna ka bɔ Samari mara la ka fara Zude mara kan, olu n'u laminiw bɛɛ. Mɔgɔ minw bɛɛ be taga sarakaw bɔ Zeruzalɛmu, o kɛra olu ka nafa kosɔn. Wari min tun be to ka sara masacɛ ye saan o saan, sɛnɛfɛnw ni yiridenw kosɔn, kabini sisan, u wajibiyanin te tugu k'o sara.

³⁵Fɛɛn wɛrɛ min ka kan ka sara ne ye, n'o ye *jakaw, ni wari wɛrɛw ye, ani kɔgɔ wusuru, ni bolomafara, k'a ta sisan ma, o si wajibiyanin te zuwifuw ma tugu.

³⁶Kabini sisan ni waati bɛɛ, kolatigɛnin nunu bena to seen kan.

³⁷O la, aw ka banba ka bataki nin ɲɔgɔn wɛrɛ sɛbɛn tugu, k'a di Zonatan ma. A ka kan k'a bila Ala ka kulu kan, a ka teli ka ye yɔrɔ min na.»

³⁸Tuma min na masacɛ Demetiriyusi y'a ye ko jamana mɔgɔw be hɛrɛ la a ka fanga kɔrɔ, ko mɔgɔ si te murutir'a ma tugu, a y'a ka kɛlɛdenw bɛɛ bila ka taga u ka soo. U kelen kelen bɛɛ tagara soo. A tun ye minw ta baara la ka bɔ siya wɛrɛw cɛma, dugukolodenninw kan kɔgɔji cɛma, fɔɔ olu dama. O le y'a to kɛlɛden minw tun ye baara kɛ a faaw ye ka kɔrɔ, olu bɛɛ y'a kɔniya.

³⁹Tirifɔn, min tun ye Alɛkisandiri ka mɔgɔw dɔ ye, ale y'a ye minkɛ ko kɛlɛdenw bɛɛ be Demetiriyusi kɔrɔfɔra, a tagara arabucɛ Iyamulikɔsi fɛ, min tun be Alɛkisandiri deen kanbelennin Antiyokusi lamɔna.

⁴⁰A y'a dali kosɔbɛ ko a ka deen nin d'a ma janko a ka sigi masaya la a facɛ nɔɔ na. Demetiriyusi tun ye koo minw latigɛ, a y'o bɛɛ fɔ a ye. A ka kɛlɛdenw b'a kɔniyara cogo min na, a y'o fana fɔ. A ye lafila kɛ Iyamulikɔsi fɛ.

⁴¹Zonatan ye cira sama masacɛ Demetiriyusi ma k'a dali ko a k'a ka kɛlɛdenw bɔ Zeruzalɛmu dugu yɔrɔ barikaman na, ni dugu barikamanw kɔnɔ, bari u tun be Isirayɛlidenw kɛlɛ tuma bɛɛ.

⁴²Demetiriyusi ye Zonatan jaabi ko a ye min ɲini a fɛ, ko ale bena o kɛ ale n'a ka siya ye, k'o dama tɛ, ko ni waatiɲuman sera dɔrɔn, a bena ale n'a ka siya boɲa.

⁴³Ko sisan n'a be se ka mɔgɔw ci a fɛ k'a dɛmɛ kɛlɛ la, k'o ka ɲi, bari ale ka kɛlɛdenw bɛɛ bɔra ale kɔ.

⁴⁴Zonatan ye kɛlɛdenŋana mɔgɔ waa saba (3 000) ci a fɛ Antiyɔsi. U sera tuma min na, masacɛ nisɔn diyara.

⁴⁵Bari dugu mɔgɔ waa kɛmɛ ni mugan (120 000) ɲɔgɔn tun lajɛnna dugu kɔnɔ ko u b'a faga.

⁴⁶A tun dogora masaso kɔnɔ, dugu mɔgɔw bɔra ka siraw bɛɛ fa, kɛlɛ daminɛna.

⁴⁷Masacɛ ye zuwifuw wele ko u ka n'a dɛmɛ, u bɛɛ lajɛnna a kɔrɔ. O kɔ, u jɛnsɛnna dugu kɔnɔ ka mɔgɔ waa kɛmɛ (100 000) ɲɔgɔn faga o loon na.

⁴⁸U ye dugu nafolo cɛ, o tun ka ca kosɔbɛ. O kɔ, u ye dugu jɛni o loon kelen na, ka masacɛ kisi.

⁴⁹Dugu mɔgɔw y'a ye tuma min na ko dugu minɛko ma kɛ kogwɛlɛn ye zuwifuw fɛ minkɛ, u jaa tigɛra, u kulera masacɛ nɔɔ fɛ k'a dali ko

⁵⁰a ka bɛn n'u ye, k'a fɔ zuwifuw ye ko u ka olu n'u ka dugu kɛlɛ dabila.

⁵¹U y'u ka kɛlɛkɛminanw fili, u bɛnna ni masacɛ ye. Zuwifuw ye tɔgɔba sɔrɔ masacɛ n'a ka mara mɔgɔw bɛɛ fɛ. O kɛnin kɔ, u kɔsegira Zeruzalɛmu ni nafolo caaman ye, u tun ye min cɛ.

⁵²Masacɛ Demetiriyusi ka fanga ye barika sɔrɔ tugu. Jamana ye hɛrɛ sɔrɔ a ka fanga kɔrɔ.

⁵³Nga a tun y'a daa di koo minw na, a ma o kɛ, a yɛlɛmana ka kɛ Zonatan jugu ye. Zonatan nunu tun ye min kɛ a ye, a m'u waleɲuman lɔn, a y'a daminɛ ka Zonatan sigɛn kosɔbɛ.

⁵⁴Waati dɔ tɛmɛnin kɔ, Tirifɔn kɔsegira ni Antiyokusi ye. A y'a kɛ masa ye ka masafugulan biri a kuun na, a n'a ka denmisɛnya bɛɛ.

⁵⁵Demetiriyusi tun ye kɛlɛden minw bila ka taga, olu bɛɛ lajɛnna Tirifɔn kɔrɔ. U ye Demetiriyusi kɛlɛ, u sera a kɔrɔ, a bolila.

⁵⁶Tirifɔn ye kɛlɛkɛsamaw minɛ ka Antiyɔsi dugu minɛ.

⁵⁷Kanbelennin Antiyokusi wɔɔrɔnan ye sɛbɛ ci Zonatan ma ko: «I bena to i ka sarakalasebaga kuntigiya la, ani mara naani nunu kunna, ne b'i jati masacɛ ka mɔgɔsɔbɛw dɔ ye.»

⁵⁸A ye minan sanulamanw ci a ma, ni dumunikɛminanw fana, ka sira d'a ma ko a ka minni kɛ sanufilenw kɔnɔ, ka faniwulen don, ani ka masirifɛn sanulaman ta.

⁵⁹Kulu min be wele ko Tiri yɛlɛyɛlɛnan, k'a ta o ma fɔɔ ka taga se Ezipiti daan ma, a ye Zonatan kɔrɔcɛ Simɔn kɛ o mara kɛlɛkuntigi ye.

⁶⁰Zonatan tagara Siriba jamana yaala k'o mara duguw kɛ ɲɔgɔn kan. Siri kɛlɛdenw bɛɛ nana lajɛn a kɔrɔ ko u ben'a dɛmɛ kɛlɛ la. A tagara Asikalɔn, o dugu mɔgɔw y'a kunbɛn ni boɲaba ye.

⁶¹A bɔra yen ka taga Gaza, nga Gazakaw y'u ka dugu dondaw tugu. A y'o dugu datugu k'a laminiyɔrɔw nafolo cɛ ka yɔrɔ nunu jɛni.

⁶²Gazakaw ye Zonatan dali ko a ka bɛn n'u ye. A sɔnna. Nga a y'u ɲamɔgɔw dencɛw minɛ k'u ci Zeruzalɛmu. O kɔ, a ye mara yaala ka taga fɔɔ Damasi.

⁶³Zonatan y'a mɛn ko Demetiriyusi ka kɛlɛkuntigiw sera Kedɛsi gɛrɛfɛ, Galile mara la ni kɛlɛden caaman ye janko k'a bɔ a ka baara la.

⁶⁴A tagara u kunbɛn. A tun y'a kɔrɔcɛ Simɔn to Zude.

⁶⁵Simɔn n'a ka kɛlɛdenw sigira Bɛtisuri gɛrɛfɛ k'a datugu, k'a kɛlɛ waatijan kɔnɔ.

⁶⁶Dugu mɔgɔw ye bɛɛn ɲini Simɔn fɛ, a sɔnna. Nga a y'u gwɛn ka bɔ dugu kɔnɔ. A yɛrɛ sigira dugu kɔnɔ, ka kɛlɛden dɔw to yen.

⁶⁷Zonatan n'a ka kɛlɛdenw sigira Zenezarɛti baa daa la. O dugusagwɛ sɔgɔma joona, u tagara se Azɔri kɛnɛyɔrɔ la.

⁶⁸U juguw ka kɛlɛdenw tun be gwɛrɛla ka na u kunbɛn kɛnɛyɔrɔ nin na. O y'a sɔrɔ u tun y'u ka mɔgɔ dɔw dogo kuluw yɔrɔ la minw bena wili Zonatan kama. Nga olu yɛrɛ tun bɛ nan'a kunbɛn.

⁶⁹Zonatan wilila k'a ɲaa sin a ɲafɛmɔgɔw ma. Kɛlɛden dogonin nunu bɔra u dogoyɔrɔ la ka kɛlɛ daminɛ.

⁷⁰Zonatan ka kɛlɛdenw bɛɛ bolila, hali mɔgɔ kelen ma to, fɔɔ a ka kɛlɛdenw ɲamɔgɔw fila: Abusalɔmu deen Matatiyasi, ni Kalifi deen Zuda.

⁷¹Zonatan y'a ka faniw faran ka buguri kɛ a yɛrɛ kuun na, ka Ala dali.

⁷²O kɔ, a segira ka kɛlɛ kɛ n'a juguw ye, a sera u kɔrɔ, u bolila.

⁷³Kɛlɛden minw tun bolila k'a to a kelen, olu y'o ye tuma min na, u kɔsegir'a fɛ ka fara a kan. U tugura u juguw kɔ k'u gwɛn ka taga fɔɔ u juguw ka sigiyɔrɔ la Kedɛsi. Olu yɛrɛ sigira o yɔrɔ la.

⁷⁴O loon na, u juguw mɔgɔ waa saba (3 000) ɲɔgɔn fagara. O kɔ, Zonatan kɔsegira Zeruzalɛmu.