Read dyu MAKABEW FƆLƆ 12 Bible Online

MAKABEW FƆLƆ 12 - dyu bible

MAKABEW FƆLƆ 12

¹Tuma min na Zonatan y'a ye ko koo nunu diyara ale la, a ye mɔgɔ dɔw woloma k'u ci Ɔrɔmu, ka taga u ka teriya kɔrɔman lakuraya ni Ɔrɔmukaw ye.

²A ye bataki nin ɲɔgɔnw ci Siparita ni dugu wɛrɛw ma fana.

³O la, ciden nunu ye Ɔrɔmu sira minɛ ka taga u yɛrɛ yira jamana ɲamɔgɔw la k'a fɔ ko: «Aw ni zuwifuw tun ye bɛɛn min kɛ, sarakalasebagaw kuntigi Zonatan ni zuwifu tɔw y'an ci ka na o teriya ni bɛɛn nin lakuraya n'aw ye.»

⁴U tun bena jamana minw cɛtigɛ u segitɔ Zuda mara la, jamana ɲamɔgɔw ye batakiw d'u ma, u ka kan ka minw di o yɔrɔ kelen kelen bɛɛ kuntigiw ma janko olu k'u janto u la u ɲuman ka se soo.

⁵Zonatan ye bataki min ci Siparitakaw ma, o filɛ nin ye:

⁶«Sarakalasebagaw kuntigi Zonatan, ni jamana ɲamɔgɔw, ni sarakalasebagaw ani zuwifu tɔw b'u balima Siparitakaw fo.

⁷A mɛnna, aw ka masacɛ Areyɔsi ye bataki ci an ka sarakalasebagaw kuntigi Oniyasi ma, ko: ‹Aw k'aw yɛrɛ jati an balimaw ye, i n'a fɔ o sɛbɛ nin b'a yira cogo min na.

⁸Oniyasi y'aw ka ciden nin minɛ ka ɲa. Bɛɛn ni teriya koo tun fɔra sɛbɛ min kɔnɔ, a y'o minɛ.

⁹An fɛ, Ala ka kitabu minw b'an bolo, olu b'an jigi tugu, hali n'o bɛɛn ɲɔgɔn ma kɛ aw ni anw cɛ.

¹⁰O bɛɛ n'a ta, an ye cira nin sama janko ka bɛɛn ni teriya lakuraya. An t'a fɛ ka kɛ lonanw ye aw fɛ, bari saan caaman tɛmɛna kabini aw y'aw ka ciden ci an fɛ.

¹¹An be to ka miiri aw la waati bɛɛ, tuma min na an be saraka bɔ, walima ka Ala dali, ɲanagwɛlonbaw la, ni ɲanagwɛlon wɛrɛw la, i n'a fɔ a bɛnnin lo balimaw ka miiri ɲɔgɔn la cogo min na.

¹²An nisɔndiyanin lo bari aw ye tɔgɔba sɔrɔ.

¹³Anw fɛ kɔni, gwɛlɛya y'an sɔrɔ, kɛlɛ sera an ma, masacɛ minw b'an lamini na, olu y'an kɛlɛ.

¹⁴An tun t'a fɛ k'aw sigɛn kɛlɛ nunu la, walima k'an jɛnɲɔgɔnw n'an teri wɛrɛw sigɛn.

¹⁵An ka dɛmɛ be bɔ Sankolotigi le fɛ, ale y'an kisi ka bɔ an juguw bolo, k'u maloya.

¹⁶«Ayiwa, sisan an ye Antiyokusi deen Numeniyusi ni Zasɔn deen Antipatɛri woloma k'u ci Ɔrɔmukaw fɛ janko k'an ka teriya n'an ka bɛɛn kɔrɔman lakuraya n'u ye.

¹⁷An y'a fɔ u ye ko u ka taga aw fɛ k'aw fo, ani k'an ka bataki di aw ma, an y'a fɔ min kɔnɔ ko an b'a fɛ ka bɛɛn ni balimaya lakuraya.

¹⁸An b'a ɲini aw fɛ, aw ka jaabi d'an ma o la.›

¹⁹«Bataki min tun cira Oniyasi ma, o filɛ nin ye:

²⁰‹Ne Areyɔsi, Siparitakaw ka masacɛ be sarakalasebagaw kuntigi Oniyasi fo.

²¹An y'a ye sɛbɛ dɔ kɔnɔ, min be Siparitakaw ni zuwifuw koo fɔ, k'u ye balimaw ye, k'u bɛɛ bɔra Ibrayima la.

²²An b'o lɔn sisan minkɛ, n'aw be sɛbɛ ci an ma k'aw ka kibaruya di an ma, o bena diya an ye.

²³An ka jaabi filɛ nin ye: An ka begɛnw n'an bololafɛnw ye aw ta ye, aw taw ye an ta ye fana. O la, an y'a fɔ an ka cidenw ye k'u k'o lase aw ma.› »

²⁴Zonatan y'a mɛn ko Demetiriyusi ka kɛlɛkuntigiw segira ka na a kɛlɛ ni kɛlɛden minw ye, k'u ka ca ni fɔlɔtaw ye.

²⁵O yɔrɔnin kelen, a bɔra Zeruzalɛmu ka taga u kunbɛn Amati mara la, bari a tun t'a fɛ u ka don a ka jamana kɔnɔ cogo si la.

²⁶A ye yɔrɔkɔlɔsibagaw ci u ka sigiyɔrɔ la. U kɔsegira ka n'a fɔ a ye ko u juguw b'u yɛrɛ labɛnna ka na bari u la sufɛ.

²⁷Tile bentuma na, Zonatan y'a fɔ a ka mɔgɔw ye ko u ka to ɲana, k'u ka kɛlɛkɛminanw to u bolo kɔrɔ, u labɛnnin ka to kɛlɛ kama o suu bɛɛ la. A ye mɔgɔ dɔw bila k'u ka sigiyɔrɔ lamini fana, u ka to ka kɔlɔsili kɛ.

²⁸U juguw y'a mɛn tuma min na ko Zonatan nunu labɛnnin lo ka kɛlɛ kɛ, u siranna, u jaa tigɛnin ye tasumaw mana u ka sigiyɔrɔ la, ka sɔrɔ ka boli. [1]

²⁹Zonatan nunu tun m'a kɔlɔsi k'u wilila ka bɔ yen fɔɔ o dugusagwɛ, bari u tun be tasuma mananinw yera.

³⁰Zonatan wilila ka tugu u kɔ k'u gwɛn nga a m'u sɔrɔ, bari u tun ye Eletɛri baa tigɛ ka ban.

³¹O kɔ, Zonatan yɛlɛmana ka taga arabu dɔw kama, u be minw wele ko zabadeɲɛw. A sera u kɔrɔ k'u bololafɛnw bɔsi.

³²O kɔ tugu, a n'a ka kɛlɛdenw wilila ka bɔ yen ka taga Damasi k'o mara bɛɛ yaala.

³³Simɔn fana ye taama daminɛ ka taga fɔɔ Asikalɔn n'a lamini dugu barikamanw na. A ye Zope sira minɛ ka ta'a ka mɔgɔ dɔw to dugu nin kɔnɔ.

³⁴A tun y'a mɛn ko Zopekaw b'a fɛ ka dugu barikaman nin don Demetiriyusi ka mɔgɔw bolo. A ye kɛlɛden dɔw to yen janko u k'a kɔlɔsi.

³⁵Zonatan kɔsegira Zeruzalɛmu tuma min na, a ye jama cɛkɔrɔbaw lajɛn. U y'a latigɛ ɲɔgɔn fɛ k'u bena dugu barikaman dɔw lɔ Zude mara la,

³⁶ka dɔ fara Zeruzalɛmu laminikogo jaɲa kan, ani ka kogojan lɔ ka dugu n'a yɔrɔ barikaman danbɔ ɲɔgɔn na, janko a ka to danna, Demetiriyusi ka mɔgɔw kana se ka foyi san, walima ka fɛɛn feere yen.

³⁷Zeruzalɛmukaw y'a daminɛ ɲɔgɔn fɛ ka dugu lɔ kura ye. Dugu laminikogo tun benna yɔrɔ dɔ la, kɔɔ faan fɛ, dugu kɔrɔn fɛ. Ciin min be wele ko Kafenata, u y'o lalaga fana.

³⁸Simɔn ye Adida dugu lɔ kura ye kulujukɔrɔ mara la. A ye barika don a la, ka koonw don a dondaw la, ka sɔgɔnanw kɛ u la.

³⁹Tirifɔn tun b'a fɛ ka Antiyokusi kɛlɛ janko ka sigi Siriba jamana kunna ka kɛ a masa ye.

⁴⁰Nga a tun be siran ko a ye koo min latigɛ, ko Zonatan ben'a kɛlɛ k'a bali k'o kɛ. O la, a tun be cogo ɲinina k'a minɛ k'a faga. A ye sira minɛ ka taga Bɛtiseyan.

⁴¹Zonatan tagar'a kunbɛnyɔrɔ ni kɛlɛdenŋana mɔgɔ waa bi naani (40 000) ye a tagara se Bɛtiseyan fana.

⁴²Tirifɔn y'a ye ko a nana ni kɛlɛden caaman ye tuma min na, a ma sɔn ka se a ma.

⁴³A y'a kunbɛn ni boɲa ye, k'a yira a teriw bɛɛ la, ka boɲafɛnw d'a ma. A y'a ɲini a teriw n'a ka kɛlɛdenw bɛɛ fɛ ko u ka mɛnni kɛ Zonatan fɛ i n'a fɔ u be mɛnni kɛ ale fɛ cogo min na.

⁴⁴O kɔ, a ye Zonatan ɲininga ko: «Mun na i ye mɔgɔ nunu bɛɛ sigɛn, k'a sɔrɔ an yɛrɛ te kɛlɛ la?

⁴⁵E k'i ka kɛlɛden nunu bila ka taga soo. I ka mɔgɔ damani woloma k'i bila sira, ka na an be taga Potolemayisi. Ne bena dugu nin don i bolo, ni dugu barikaman tɔɔ nunu, ani kɛlɛdenw ni faama minw be yen halibi. O kɔ, ne bena kɔsegi, bari o le ye ne nakun ye yan.»

⁴⁶Zonatan lara Tirifɔn la. Tirifɔn ye min fɔ, a y'o kɛ. A y'a ka kɛlɛdenw bila ka taga. U ye Zuda mara sira ta k'u be kɔsegi.

⁴⁷A tora ni mɔgɔ waa saba (3 000) ye. O kɔ, a ye olu mɔgɔ waa fila (2 000) to Galile mara la, mɔgɔ waa kelen (1 000) minw tora, u y'a bila sira.

⁴⁸Zonatan donna Potolemayisi dɔrɔn, dugumɔgɔw ye dugu dondaw tugu. U ye Zonatan minɛ, mɔgɔ minw bɛɛ tun donna n'a ye, u ye olu faga.

⁴⁹Tirifɔn ye kɛlɛden sennatigiw ni sotigi dɔw ci Galile mara la ni kɛnɛbayɔrɔ la, ko u ka Zonatan ka kɛlɛdenw bɛɛ faga.

⁵⁰Olu y'a faamu ko Zonatan tun minɛna, ko ale n'a tɔɲɔgɔnw fagara. U ye ɲɔgɔn jaa gwɛlɛya, ka to ka taga ɲa, u labɛnnin kɛlɛ kama.

⁵¹U kɔgwɛnbagaw y'a ye tuma min na k'u be sɔn ka kɛlɛ kɛ fɔɔ ka sa, o la, u kɔsegira.

⁵²Zuwifuw ka kɛlɛdenw bɛɛ segira Zude mara la hɛrɛ la. U ye Zonatan n'a tɔɲɔgɔnw suu kasi, siranya y'u minɛ kosɔbɛ. Isirayɛlidenw bɛɛ tun ye sanga kɛ kosɔbɛ.

⁵³U lamini siyaw bɛɛ tun be cogo ɲinina k'u halaki. U tun b'a fɔra ko: «Ɲamɔgɔ t'u fɛ tugu, dɛmɛbaga t'u fɛ tugu. An k'u kɛlɛ sisan k'u faga, janko mɔgɔ si kana miiri u la tugu.»