Read dyu MAKABEW FƆLƆ 14 Bible Online

MAKABEW FƆLƆ 14 - dyu bible

MAKABEW FƆLƆ 14

¹Girɛkiw ka masaya saan 172nan na, masacɛ Demetiriyusi filanan y'a ka kɛlɛdenw lajɛn ka Mɛdi jamana sira minɛ ko a be taga dɛmɛ ɲini waasa ka se ka Tirifɔn kɛlɛ.

²Pɛrɛsi ni Mɛdi masacɛ Arisasi y'a mɛn ko Demetiriyusi donn'a ka mara kɔnɔ tuma min na, a y'a ka kɛlɛkuntigiw dɔ ci ko ale ka ta'a minɛ.

³Ale tagara, a sera Demetiriyusi ka kɛlɛdenw kɔrɔ, ka Demetiriyusi minɛ ka na n'a ye Arisasi fɛ. Arisasi y'a bila kaso la.

⁴Jamana tun be hɛrɛ la Simɔn sii bɛɛ la. A tun b'a ka siya ka hɛrɛ le fɛ. A ka mɔgɔw sɔnn'a ka fanga ma. A ye boɲa sɔrɔ u fɛ a sii bɛɛ la.

⁵A ye tɔgɔba sɔrɔ Zope minɛko la. A ye Zope kɛ a ka kurunlɔyɔrɔ ye. Dugukolodennin minw be kɔgɔji cɛma, a ye olu sira dayɛlɛ a ka mɔgɔw ye.

⁶A y'a ka siya ka mara boɲa, a y'a ka fanga sabati jamana kɔnɔ.

⁷A ye mɔgɔ caaman minɛ kɛlɛ la ka segi n'u ye. A sera Gazara ni Bɛtisuri, ani Zeruzalɛmu dugu yɔrɔ barikaman kɔrɔ. Fɛɛn min tun be dugu yɔrɔ barikaman nɔgɔ Ala ɲana, a y'o bɛɛ bɔ a kɔnɔ.

⁸Mɔgɔw tun b'u ka dugukolo sɛnɛ hɛrɛ la, suman tun be sɔrɔ forow kɔnɔ, yiriw tun be den kɛnɛyɔrɔw la.

⁹Mɔgɔkɔrɔbaw tun be sigi forobayɔrɔw la, u bɛɛ tun be hɛrɛ koo fɔ. Kɛlɛkɛfani ni kɛlɛkɛminan ɲanamanw tun be kanbelenw kaan na.

¹⁰A ye dumuni di duguw ma, a ye kɛlɛkɛminanw d'u ma, u be se k'u yɛrɛ tanga ni minw ye. A tɔgɔɲuman bɔra fɔɔ dugukolo daan na.

¹¹A ye kɛlɛ ban ka bɔ jamana kɔnɔ, Isirayɛlidenw nisɔndiyanin tun lo kosɔbɛ.

¹²Mɔgɔ kelen kelen bɛɛ tun siginin be a ka *ɛrɛzɛnsun n'a ka torosun kɔrɔ, mɔgɔ si tun te yen k'u jaa tigɛ.

¹³U kɛlɛbagaw bɛɛ tun bɔra jamana kɔnɔ, u tun sera siya wɛrɛw ka masacɛw kɔrɔ.

¹⁴A y'a ka siya fantanw bɛɛ dɛmɛ. A ye Musa ka sariya bato, ka Alaɲasiranbaliw ni mɔgɔjuguw bɛɛ tunu ka bɔ yen.

¹⁵A ye boɲa la Alabatosoba kan. A ye minan caaman di ka fara Alabatosoba nafolo kan.

¹⁶Ɔrɔmukaw ni Siparitakaw y'a mɛn ko Zonatan sara, u dusu kasira kosɔbɛ.

¹⁷Nga u nan'a mɛn fana ko a baden Simɔn kɛra sarakalasebagaw kuntigi ye a nɔɔ na, n'a be Zude mara n'a duguw kunna.

¹⁸O la, bɛɛn ni teriya min tun be olu n'a baden Zuda ni Zonatan cɛ, u y'o lakurayako sɛbɛn walaka ziralaman kan k'o ci Simɔn ma.

¹⁹U ye walaka nunu kalan jama ɲana Zeruzalɛmu.

²⁰Siparitakaw ye bataki min ci, o filɛ nin ye: «Siparitakaw n'u ka dugu ɲamɔgɔw be sarakalasebagaw kuntigi Simɔn fo ka zuwifuw ka cɛkɔrɔbaw ni sarakalasebagaw, ani zuwifuw tɔw bɛɛ fo.

²¹Aw ye mɔgɔ minw ci ka na anw fɛ, aw ye tɔgɔba min sɔrɔ, n'aw jatinin be cogo min na, olu y'o fɔ an ye. U na diyara an ye.

²²An y'u ka kuma sɛbɛn jama ka kolatigɛninw sɛbɛ kɔnɔ ko: Zuwifuw ye cidenw bila ka na an fɛ, Antiyokusi dencɛ Numeniyusi ni Zasɔn dencɛ Antipatɛri fɛ, ko u b'u ka teriya lakuraya n'an ye.

²³A diyara jama ye k'u minɛ ka ɲa, k'u ka kuma sɛbɛn k'o mara jama ka sɛbɛmarayɔrɔ la, janko Siparitakaw hakili ka to a la. U y'o sɛbɛ ɲɔgɔn kelen sɛbɛn k'a ci sarakalasebagaw kuntigi Simɔn ma fana.»

²⁴Waati dɔ tɛmɛnin kɔ, Simɔn ye Numeniyusi ci Ɔrɔmu ni nigɛkunbɛnnan sanulaman belebele ye, janko k'a yira k'ale sɔnna bɛɛn nin na ni Ɔrɔmukaw ye. A gwiliya tun ye kilo kɛmɛ duuru ye.

²⁵Zuwifuw ye koo nunu mɛn tuma min na, u ko: «An bena mun le kɛ Simɔn n'a deenw ye k'u fo?

²⁶Bari ale n'a badenw, an'a facɛ ka somɔgɔw bɛɛ tora kelen kan. U ye Isirayɛli juguw kɛlɛ k'u gwɛn, k'an ka siya hɔrɔnya.» O la, u ye sɛbɛnni kɛ walaka ziralamanw kan, k'u nɔrɔ kabakuruw la k'u tutu Siyɔn kulu kan.

²⁷U ye min sɛbɛn, o filɛ nin ye ko: «Girɛkiw ka masaya saan 172nan na, *Eluli kalo tile tan ni seeginan loon, min ye sarakalasebagaw kuntigi Simɔn ka saan sabanan ye fanga la, ale min kɛra mɔgɔbaba ye Azaramɛli,

²⁸sarakalasebagaw ni jama, ni zuwifuw kuntigiw, ani cɛkɔrɔbaw ye ɲɔgɔnyeba kɛ. K'an to o yɔrɔ la, u y'an hakili jigi koo dɔw la. U ko:

²⁹Kɛlɛ caaman kɛra an ka mara kɔnɔ. Ni kɛlɛ wilila tuma o tuma, Matatiyasi deen Simɔn, Yoyaribu kɔmɔgɔw dɔ, ale n'a badenw sɔnna faratiko ma, ka wili u ka siya juguw kama. U tun b'a fɛ Alabatosoba, ani Musa ka sariya ka to seen kan. U ye boɲaba lase an ka siya ma.

³⁰Zonatan y'an ka siya ka jɛnɲɔgɔnya sabati, a kɛra u ka sarakalasebagaw kuntigi ye, sanni a ka sa.

³¹Zuwifuw juguw tun b'a fɛ ka don Zude mara la ka cɛnni kɛ, ani ka Alabatosoba halaki.

³²O la, Simɔn wilila ka kɛlɛ kɛ a ka siya ye. A y'a yɛrɛ bololafɛn caaman don kɛlɛkɛminanw na k'o di jamana kɛlɛdenw ma, ani ka kɛlɛdenw sara.

³³A ye barika don Zude mara duguw la, ani Bɛtisuri, min be jamana daan na, zuwifuw juguw tun b'u ka kɛlɛkɛminanw mara yɔrɔ min na ka kɔrɔ. A ye zuwifuw ka kɛlɛden dɔw to o yɔrɔ la.

³⁴A ye barika don Zope la, min be kɔgɔjida la, ni Gazara, min be Azɔti mara kɔnɔ, u juguw tun siginin be o yɔrɔ min na ka kɔrɔ. A ye zuwifu dɔw sigi o dugu nunu kɔnɔ. U mako tun be fɛɛn o fɛɛn na, k'o bɛɛ mara u kɔnɔ.

³⁵Jama ye Simɔn ka mɔgɔtilenninya ye, o ni a b'a fɛ ka boɲa min lase a ka siya ma. A tun ye min bɛɛ kɛ, o kosɔn, u y'a kɛ u ɲamɔgɔ, ni u ka sarakalasebagaw kuntigi ye, ani a ka tilenninya ni mɔgɔsɔbɛya kosɔn, a ye min yira a ka siya faan fɛ, bari a ka siya ka kunkɔrɔta tun y'a haminako ye tuma bɛɛ.

³⁶A ka tile la, a sera ka siya tɔw gwɛn ka bɔ Zude mara kɔnɔ, ni minw tun be Dawuda ka ciin kɔnɔ Zeruzalɛmu, minw tun ye dugu yɔrɔ barikaman nin lɔ u yɛrɛ ye. U tun be to ka bɔ yen ka taga Alabatosoba lamini nɔgɔ, k'a ka senumanya cɛn sɔbɛ la.

³⁷Simɔn ye zuwifu kɛlɛden dɔw to o yɔrɔ la, ka barika don a la jamana ni dugu ka hɛrɛ kosɔn. A ye dɔ fara Zeruzalɛmu laminikogo jaɲa kan fana.

³⁸O kɔ, masacɛ Demetiriyusi filanan y'a yira ko a sɔnna Simɔn ka kuntigiya ma sarakalasebagaw kunna.

³⁹A y'a kɛ masacɛ ka mɔgɔsɔbɛw dɔ ye, k'a boɲa kosɔbɛ.

⁴⁰A tun y'a mɛn ko Ɔrɔmukaw be zuwifuw minɛ i n'a fɔ u teriw, n'u jɛnɲɔgɔnw n'u balimaw. K'u tun ye Simɔn ka cidenw minɛ ka ɲa fana.

⁴¹Ko sarakalasebagaw ni zuwifu tɔw tun sɔnna Simɔn n'a ka soo ka kɛ u ɲamɔgɔ ni sarakalasebagaw kuntigi ye kudayi fɔɔ kirasɔbɛ ka sɔrɔ.

⁴²U ye Simɔn kɛ u ka kɛlɛkuntigi ye, ni Alabatosoba ɲamɔgɔ ye. Ale tun ka kan ka Alabatosoba baarakuntigiw woloma, ani jamana ɲamɔgɔw, ni kɛlɛkɛminanw ɲamɔgɔw, ni dugu barikamanw taw.

⁴³O la, Simɔn kɛra Alabatosoba ɲamɔgɔ ye. Bɛɛ tun ka kan ka mɛnni kɛ a fɛ, jamana ka sɛbɛw bɛɛ tun ka kan ka labɛn a tɔgɔ la. A tun be se ka faniwulen don, ka masirifɛn sanulamanw nɔrɔ a ka fani kan.

⁴⁴Jama cɛma, ni sarakalasebagaw cɛma, mɔgɔ si tun te se ka koo nunu si ban, walima k'a ka fɔta sɔsɔ, walima ka ɲɔgɔnye kɛ jamana kɔnɔ n'a ma o sira di. U tun man kan ka faniwulen don, walima ka masirifɛn sanulaman don u kaan na.

⁴⁵Ni mɔgɔ o mɔgɔ ma koo nunu bato, u ka kan k'o tigi ɲaa gwan.

⁴⁶Jama bɛɛ sɔnna k'o see di Simɔn ma.

⁴⁷Simɔn sɔnna ka kɛ sarakalasebagaw kuntigi ye, ni kɛlɛkuntigi, ni sarakalasebagaw ni zuwifu tɔw ɲamɔgɔ ye, ka bila jama bɛɛ kunna.

⁴⁸Zuwifuw y'a latigɛ ka kuma nin sɛbɛn walaka ziralamanw kan, k'u bila Alabatosoba luu kɔnɔ, u be se ka ye yɔrɔ min na.

⁴⁹Ko u bena kuma nin sɛbɛn tugu siɲɛ damani k'o sɛbɛnni mara Alabatosoba nafolo marayɔrɔ la Simɔn n'a deenw bolo kɔrɔ.»