Read dyu MAKABEW FƆLƆ 2 Bible Online

MAKABEW FƆLƆ 2 - dyu bible

MAKABEW FƆLƆ 2

¹O waati la, sarakalasebaga dɔ tun be yen min tɔgɔ ko Matatiyasi. Simeyɔn deen Zan ka deen tun lo, Yowaribu ka somɔgɔw dɔ tun lo. A bɔra Zeruzalɛmu ka taga sigi Modin.

²Dencɛ duuru tun b'a fɛ: Zan, u b'a wele Gadi fana,

³ni Simeyɔn, u be ale wele Tasi,

⁴ni Zuda, u b'ale wele Makabe,

⁵ni Eleyazari, ale be wele Awaran, ani Zonatan min be wele Afu.

⁶Kojuguba minw kɛra Ala ɲakɔrɔ Zuda mara la ani Zeruzalɛmu kɔnɔ na, a y'o ye tuma min na,

⁷a ko: «Bɔnɛ ye ne ta ye! Ne wolokun le ye ka n ka siya, ni Ala ka dugu halakitɔ ye wa? Ne wolokun ye ka sigi ka n bolo meleke ɲɔgɔn na ka n ka dugu to an juguw bolo, ani ka Alabatosoba to lonanw bolo wa?

⁸Alabatosoba kɛra i ko u ye mɔgɔ min dɔgɔya.

⁹Minan minw tun b'a ka boɲa yira, an juguw y'o cɛ ka taga n'u ye. An ka denɲɛninw fagara forobayɔrɔw la, an juguw y'an ka kanbelenw faga ni murujan ye.

¹⁰Siya jumɛn le ma kuntigiya kɛ dugu nin kan? U jumɛn m'a k'a nafolo cɛ ka taga n'a ye?

¹¹U y'a ka masirifɛnw bɛɛ soɲa. Hɔrɔn tun lo, sisan a kɛra jɔɔn ye.

¹²An ka Alabatosoba cɛɲa tun ye an ka kunkɔrɔta sababu ye, sisan a kɛra yɔrɔlakolon ye. Siya wɛrɛw y'a kɛ yɔrɔ gwansan ye.

¹³Nafa jumɛn b'an fɛ ka to diɲɛ kɔnɔ tugu?»

¹⁴Matatiyasi n'a dencɛw nii tɔɔrɔnin y'u ka faniw faran, ka dusukasifaniw don, ka kasi kosɔbɛ.

¹⁵Masacɛ Antiyokusi ka ciden minw tun be mɔgɔw wajibiya ka Musa ka sariya cɛn, olu nana Modin dugu kɔnɔ janko ka dugu mɔgɔw karaba ka joo sɔn.

¹⁶Isirayɛlidenw caaman tagara u fɛ, nga Matatiyasi n'a deenw bɛɛ tora u danna ɲɔgɔn fɛ.

¹⁷Masacɛ ka ciden nunu ye kuma ta k'a fɔ Matatiyasi ye ko: «I ye ɲamɔgɔba ye dugu nin kɔnɔ, mɔgɔw b'i jati, i deenw n'i balimaw b'i kɔ.

¹⁸O la, masacɛ ye min fɔ, e yɛrɛ ka kan ka gwɛrɛ k'o kɛ fɔlɔ, i n'a fɔ siya tɔw bɛɛ y'a kɛ cogo min na, ni Zuda mara mɔgɔw ani minw tora Zeruzalɛmu. O la, e n'i deenw bena kɛ masacɛ ka mɔgɔsɔbɛw ye. U bena aw boɲa, ka warigwɛ ni sanu, ani boɲafɛn caaman di aw ma.»

¹⁹Matatiyasi y'a kaan kɔrɔta k'u jaabi ko: «Siya minw bɛɛ be masacɛ ka mara kɔnɔ, hali n'u bɛɛ sɔnn'a ta ma, n'u kelen kelen bɛɛ b'u faaw ka batolikɛcogo dabila ka sɔn masacɛ ka kuma ma,

²⁰ne, ni n dencɛw, ani n balimaw, anw bena an faaw ka bɛɛn bato, u ye o min kɛ ni Ala ye.

²¹Ala k'an dɛmɛ, ka see di an ma an kan'a ka sariya, n'a ka fɔtaw batoli dabila fewu!

²²An tena sɔn masacɛ ka cira ma, k'an ka sira bila fewu, k'an ka batolikɛcogo to yen.»

²³Matatiyasi tilara kuma na dɔrɔn, zuwifu dɔ gwɛrɛla bɛɛ ɲana ka saraka bɔ Modin sarakabɔyɔrɔ kan ka kɛɲɛ ni masacɛ ka cira ye.

²⁴Matatiyasi y'o ye tuma min na, a daminɛna ka yɛrɛyɛrɛ dusudimikojugu fɛ. A dimi tiɲɛ tun b'a fɛ. A bolila ka taga cɛɛ nin kaan tigɛ sarakabɔyɔrɔ kan.

²⁵Masacɛ ka ciden min tun be mɔgɔw wajibiya ka saraka bɔ, a y'ale faga o waati kelen na, ka sɔrɔ ka sarakabɔyɔrɔ ci.

²⁶A y'a yira ko Musa ka sariya koo ka d'a ye kosɔbɛ i n'a fɔ Pinasi [1] tun y'a kɛ cogo min na, tuma min na a ye Salu dencɛ Zimuri faga.

²⁷O kɔ, Matatiyasi daminɛna ka dugu yaala ka to k'a kaan bɔ kosɔbɛ k'a fɔ ko: «Musa ka sariya koo ka di mɔgɔ minw bɛɛ ye, n'u be Ala ka bɛɛn bato, olu ka tugu ne kɔ!»

²⁸O kɔ, a n'a deenw bolila ka taga kuluw yɔrɔ la, k'u bololafɛnw bɛɛ to dugu kɔnɔ.

²⁹O la, minw tun b'a fɛ ka taama tilenninya la, ka kɛɲɛ ni Musa ka sariya ye, olu caaman tagara kongokolon kɔnɔ ka sigi yen,

³⁰olu, n'u deenw, n'u musow, ani u ka begɛnw, bari mɔgɔw tun b'u tɔɔrɔ kojugu.

³¹Masacɛ ka cidenw, ni kɛlɛden minw tun siginin bɛ Zeruzalɛmu, Dawuda ka dugu kɔnɔ, olu y'a mɛn ko mɔgɔ minw banna masacɛ ka cira ma, k'u dɔw tagara dogo kongokolon kɔnɔ.

³²Kɛlɛden caaman wilila ka tugu u kɔ. U sera u gɛrɛfɛ tuma min na, u y'u yɛrɛ labɛn u kɛlɛ kama, o kɛra lafiɲɛlon yɛrɛ la.

³³U y'a fɔ u ye ko: «O ka kɛ a daan ye! Aw ka bɔ, ka sɔn masacɛ ka fɔta ma, o la, aw bena kisi.»

³⁴Zuwifuw y'u jaabi ko: «An tena bɔ, an tena sɔn masacɛ ka fɔta ma ka lafiɲɛlon cɛn.»

³⁵O yɔrɔnin kelen, masacɛ ka kɛlɛdenw daminɛna k'u kɛlɛ.

³⁶Zuwifuw y'u yɛrɛ minɛ, u ma kɛlɛ kɛ u fɛ, u ma u bon ni kabakuru ye, u fana ma u ka dogoyɔrɔw datugu.

³⁷U tun b'a fɔra ko: «An bɛɛ ka sa tilenninya la. Sankolo ni dugukolo kɛra an seerew ye ko aw b'an fagara gwansan le.»

³⁸O la, u juguw benna u kan lafiɲɛlon yɛrɛ la, k'u faga, olu, n'u musow, n'u ka denmisɛnw ani u ka begɛnw. Minw bɛɛ fagara, u tun ye mɔgɔ waa kelen ɲɔgɔn ye.

³⁹Matatiyasi n'a teriw y'o mɛn tuma min na, u kasira kosɔbɛ.

⁴⁰U y'a fɔ ɲɔgɔn ye ko: «N'an bɛɛ y'a kɛ i n'a fɔ an balimaw y'a kɛ cogo min na, n'an te siya wɛrɛ nunu kɛlɛ fana janko k'an yɛrɛ kisi, ani k'an ka landaw mara, yanni dɔɔni dɔrɔn an bɛɛ bena faga ka bɔ dugukolo kan.»

⁴¹O loon na, u y'a latigɛ ko mɔgɔ o mɔgɔ mana na ko a b'u kɛlɛ lafiɲɛlon na, ko u bena o tigi kɛlɛ, o la, u bɛɛ tena sa i n'a fɔ u balimaw sara cogo min na u dogoyɔrɔw la.

⁴²O kɔ, Asideɲɛw [2] ka jɛnkulu dɔ farala u kan. Mɔgɔ jagwɛlɛnw tun lo Isirayɛli jamana kɔnɔ, u bɛɛ labɛnnin tun lo ka Musa ka sariya bato hali n'u ka kan ka kɛlɛ kɛ a kosɔn.

⁴³Mɔgɔ minw tun be boli tɔɔrɔ nunu ɲa, olu bɛɛ nana fara u kan k'u barika boɲa.

⁴⁴U bɛɛ lajɛnnin kɛra kɛlɛbolo barikaman ye. Zuwifu minw ma sɔn ka Musa ka sariya bato, u ye olu faga u ka dimikojugu fɛ. U ma se ka minw faga, olu bolila ka taga siya wɛrɛw fɛ.

⁴⁵Matatiyasi n'a teriw wilila ka yaala jamana kɔnɔ ka sarakabɔyɔrɔw ci.

⁴⁶U ye deen kɛnɛkɛnɛbali minw sɔrɔ Isirayɛli jamana kɔnɔ, u y'olu kɛnɛkɛnɛ fanga na.

⁴⁷U sera k'u jugu kumababafɔlaw gwɛn. U ye see sɔrɔ.

⁴⁸U ye Musa ka sariya kisi siya wɛrɛw n'u ka masacɛw ka cɛnni ma. U ma sɔn kojugukɛla ka fanga sɔrɔ.

⁴⁹Matatiyasi satuma tun surunyana ka ban. A y'a fɔ a deenw ye ko: «Sisan kɔni, yɛrɛboɲa ni ɲadonya ye barika sɔrɔ, halakili ani dimijugu bɔwaati lo.

⁵⁰N deenw, sisan a be aw ma ka wili ka lɔ n'aw dusu bɛɛ ye ka Ala ka sariya minɛ ka ɲa. Ala ye bɛɛn min kɛ n'an faaw ye, aw k'aw nii di o kosɔn.

⁵¹An faaw ye koo minw kɛ u ka tile la, aw k'aw hakili to o la k'o ɲɔgɔn kɛ. O la, aw bena boɲaba sɔrɔ, ani tɔgɔba min tena tunu fewu.

⁵²Yala Ibrayima ma kɛ kantigi ye kɔrɔbɔli waati la wa? Ala y'a jati mɔgɔtilennin ye o le kosɔn.

⁵³Yusufu ye Ala ka sariya bato a ka tɔɔrɔ waati la, o kɔ, a sɔrɔla ka kɛ Ezipiti jamana kuntigi ye.

⁵⁴An bɛma Pinasi ka jija kosɔn, Ala y'a daa di a ma ko a kɔmɔgɔw bena kɛ sarakalasebagaw ye tuma bɛɛ.

⁵⁵Zozuwe kɛra Isirayɛlidenw ka koɲanabɔbaga ye, bari a tun y'a ka cii kɛ ka ɲa.

⁵⁶Kalɛbu y'a niyɔrɔ dugukolo sɔrɔ, bari a ye tiɲɛ fɔ jama ɲana.

⁵⁷Dawuda ye masaya sɔrɔ, o kɛra ale n'a kɔmɔgɔw ta ye kudayi a ka Alaɲasiran kosɔn.

⁵⁸Eli tara ka taga sankolo la bari a jijanin tun lo Ala ka sariya la.

⁵⁹Ananiya ni Azariya ani Mikayɛli kisira ka bɔ tasuma na bari u jigi lanin tun be Ala kan.

⁶⁰Daniyɛli kisira jaraw daa ma a ka tilenninya barika la.

⁶¹Aw k'a faamu ko waati o waati, mɔgɔ minw jigi ye Ala ye, olu si barika te dɛsɛ.

⁶²Aw kana siran kojugukɛla ka bagabagali ɲa, bari a ka boɲa bena ban a satuma na, tumuw ben'a suu dumu.

⁶³Boɲa b'a kan bii, nga sini a tena ye tugu, bari a bena segi buguri la, a ka koo latigɛninw bena kɛ fu ye.

⁶⁴N deenw, aw ka kɛ cɛɛw ye, ka nɔrɔ sariya la kosɔbɛ, bari aw bena boɲaba sɔrɔ o la.

⁶⁵«Aw baden Simeyɔn [3] filɛ, ne b'a lɔn ko ladilikɛbagaɲuman lo. Aw ka mɛnni kɛ a fɛ tuma bɛɛ, a bena kɛ faa ye aw fɛ.

⁶⁶Zuda Makabe, min ye mɔgɔ jagwɛlɛn ye kabini a denmisɛnwaati, ale bena kɛ aw ka kɛlɛkuntigi ye, ka kɛlɛ kɛ ni siya wɛrɛw ye.

⁶⁷Minw bɛɛ be Musa ka sariya bato, aw k'olu lajɛn aw kɔrɔ, k'aw ka siya dimi bɔ.

⁶⁸Siya wɛrɛw ye kojugu min kɛ aw la, aw k'o ɲɔgɔn segi u ma. Aw ka nɔrɔ sariya kɔnɔnakumaw na.»

⁶⁹O kɔ, Matatiyasi ye duba kɛ u ye, ka sɔrɔ ka sa ka ta'a faaw fɛ.

⁷⁰A sara girɛkiw ka masaya saan 146nan na. U y'a suu don a ka somɔgɔw kaburu kɔnɔ Modin. Isirayɛlidenw bɛɛ y'a sanga kɛ kosɔbɛ.