Read dyu MAKABEW FƆLƆ 4 Bible Online

MAKABEW FƆLƆ 4 - dyu bible

MAKABEW FƆLƆ 4

¹Gɔriziyasi tagara ni kɛlɛden sennatigi mɔgɔ waa duuru (5 000) ni sotigi kɛlɛdenŋana waa kelen (1 000) ye. U wilila u ka sigiyɔrɔ la sufɛ

²janko ka taga bari zuwifuw ka kɛlɛdenw na ka se u kɔrɔ. Zeruzalɛmu dugu yɔrɔ barikaman mɔgɔw y'a bila sira.

³Zuda y'o mɛn minkɛ, a wilila n'a ka mɔgɔ jagwɛlɛnw ye k'u be taga masacɛ ka kɛlɛdenw kɛlɛ Emayusi.

⁴O y'a sɔrɔ Gɔriziyasi n'a ka kɛlɛdenw tun yɛrɛkɛnin be k'u yɔrɔ jaɲa u ka sigiyɔrɔ la.

⁵Gɔriziyasi n'a ka mɔgɔw sera Zuda ka kɛlɛbolo sigiyɔrɔ la sufɛ, u ma mɔgɔ ye. U tun be miiri ko zuwifuw be bolila u ɲa, o la, u daminɛna k'u yɔrɔ ɲini kuluw kan.

⁶Dugu gwɛtuma na, Zuda sera kɛnɛyɔrɔ la ni mɔgɔ waa saba (3 000) ye. Nga u mako tun be yɛrɛtangafɛnw ni murujan minw na, o tun t'u fɛ.

⁷K'u to yɔrɔjan, u ye Alaɲasiranbaliw ka kɛlɛdenw ye, barika b'u la, ni nigɛdulokiw b'u kaan na. Sotigiw tun y'u lamini, u bɛɛ fana tun ye kɛlɛdenŋanaw ye minw delila kɛlɛ la kosɔbɛ.

⁸Zuda y'a fɔ a ka mɔgɔw ye ko: «Aw kana siran jama nin ɲa. N'u benna an kan tuma min na, aw jaa kana tigɛ.

⁹An faaw kisira Buruku kɔgɔji daa la cogo min na, o y'a sɔrɔ Ezipiti masacɛ n'a ka kɛlɛdenw tun tugunin be u kɔ k'u gwɛn, aw k'aw hakili to o la.

¹⁰Sisan, an ka dɛmɛ ɲini Sankolotigi fɛ. N'an koo ka d'a ye, a n'an faaw bɛnna koo min na, a hakili bena to o la, ka kɛlɛbolo nin halaki an ɲana bii.

¹¹Siyaw bɛɛ ben'a lɔn ko Isirayɛlidenw kunmabɔbaga n'u kisibaga be yen.»

¹²Siya wɛrɛ nunu y'u ɲaa kɔrɔta k'a ye ko zuwifuw be nana u kama.

¹³U bɔra u ka sigiyɔrɔ la janko k'u kɛlɛ. Zuda ka mɔgɔw ye buru fiyɛ

¹⁴ka kɛlɛ daminɛ. U ye siya nunu halaki, dɔw bolila ka taga kɛnɛyɔrɔ faan fɛ.

¹⁵Minw tun be kɔfɛ, u ye olu bɛɛ faga. Isirayɛlidenw tugura u kɔ k'u gwɛn fɔɔ ka taga se Gezɛri, ni kɛnɛyɔrɔ minw bɛ Edɔmu mara la, ni Asidɔdi ani Yabune gɛrɛfɛ. U y'u mɔgɔ waa saba ɲɔgɔn faga o yɔrɔ la.

¹⁶Zuda n'a ka kɛlɛdenw kɔsegira tuma min na, a y'a fɔ a ka mɔgɔw ye ko:

¹⁷«Aw kana miiri an juguw ka bololafɛnw koo la fɔlɔ, bari kɛlɛ dɔ wɛrɛ b'an ɲa.

¹⁸Gɔriziyasi n'a ka mɔgɔw be kuluw yɔrɔ la, u yɔrɔ man jan an na. Sisan, aw ka lɔ kelen kan k'u kɛlɛ. O kɔ, aw bena se k'u bololafɛnw cɛ hɛrɛ la.»

¹⁹Zuda tilar'a ka kuma na dɔrɔn, u ye kɛlɛden dɔw ye kulu kan n'u be kɔlɔsili kɛra.

²⁰U y'a ye ko u y'u ka mɔgɔw gwɛn, n'u ka sigiyɔrɔ be jɛnina. Sisi tun y'o yira ka gwɛ.

²¹U y'o ye tuma min na, siranya y'u minɛ. U ye Zuda ka kɛlɛdenw ye kɛnɛyɔrɔ la tuma min na, k'a ye k'u labɛnnin lo kɛlɛ kama,

²²u bɛɛ bolila ka taga filisiw ka jamana na.

²³O la, Zuda kɔsegir'a juguw ka sigiyɔrɔ la k'u bololafɛnw cɛ. Zuwifuw ye sanu ni warigwɛ caaman ta, ni fani bulaman ni wulemanw, ani nafolo caaman.

²⁴U kɔsegitɔ, u tun be Sankolotigi tanura ka barika la a ye, bari a ka ɲi, a ka kanuya te ban ka ye.

²⁵O loon kɛra lonba ye bari Isirayɛlidenw bɔra bolo la pepewu.

²⁶Koo min kɛra, mɔgɔ minw kisira siya wɛrɛw cɛma, u tagara o bɛɛ fɔ Liziyasi ye.

²⁷Ale y'o kibaruya nin mɛn tuma min na, a hakili ɲagamina, a jaa tigɛra, bari a tun b'a fɛ ka koo min kɛ Isirayɛlidenw na, a ma kɛ ten. Masacɛ tun y'a fɔ a ye ko a ka min kɛ, o ma kɛ.

²⁸Saan wɛrɛ, Liziyasi ye kɛlɛdenŋana waa bi wɔɔrɔ (60 000), ni sotigiw waa duuru (5 000) lajɛn janko ka zuwifuw kɛlɛ.

²⁹U tagara Idume mara la, ka sigi Bɛtisuri. Zuda nan'a kunbɛn ni mɔgɔ waa tan (10 000) ye.

³⁰A y'a ye ko barika be kɛlɛbolo nin na kosɔbɛ tuma min na, a ye Ala dali ko: «I tɔgɔ ka tanu, Isirayɛlidenw kisibaga! E min ye kɛlɛdɛnŋana fanga cɛn i ka baarakɛla Dawuda barika la, e min ye filisiw ka kɛlɛdenw don Sawuli deen Zonatan n'a ka kɛlɛkɛminanw tabaga bolo.

³¹I ka kɛlɛden nunu datugu k'u don i ka jama Isirayɛli bolo o cogo kelen na, u ka maloya u ka kɛlɛden sennatigiw n'u ka sotigiw kosɔn.

³²Siranya bila u la. U jigi b'u yɛrɛ kan, e k'u jigi tigɛ. U ka yɛrɛyɛrɛ see sɔrɔbaliya kosɔn.

³³I koo ka di mɔgɔ minw ye, a to olu k'u faga ni murujan ye. O la, i lɔnbagaw bɛɛ bena i tanu ni dɔnkiliw ye.»

³⁴Kɛlɛbolo fila nunu ye kɛlɛ daminɛ, zuwifuw ye Liziyasi ka kɛlɛdenw mɔgɔ waa duuru ɲɔgɔn faga.

³⁵Liziyasi y'a ye ko a ka kɛlɛdenw be bolila, ko Zuda ka kɛlɛdenw jaa ka gwɛlɛ, fɔɔ u labɛnnin yɛrɛ lo k'u nii to kɛlɛ la ni jagwɛlɛya ye. O la, a tagara Antiyɔsi ka kɛlɛden dɔw ta wari la lonanw cɛma, janko ka kɔsegi Zude mara la ni fangaba ye.

³⁶Zuda n'a badenw y'a fɔ ko: «Sisan, an sera an juguw kɔrɔ. An ka taga Alabatosoba saniya k'a kalifa Ala ma tugu.»

³⁷Kɛlɛdenw bɛɛ lajɛnna ka sɔrɔ ka taga Siyɔn kulu kan.

³⁸U y'a ye ko Alabatosoba lakolon tun lo. Sarakabɔyɔrɔ nɔgɔra, koonw jɛnina. Yirimisɛnw tun falenna luuw kɔnɔ i n'a fɔ kongo kɔnɔ na, walima kulu kan. Boonw halakira.

³⁹U y'u ka faniw faranfaran, ka kulekule kosɔbɛ dusukasiba bolo, ka bugurigwɛ kɛ u kuun na.

⁴⁰U benna k'u ɲaa biri duguma. Buru fiyɛra tuma min na, min tun be daliwaati yira, u ye Sankolotigi dali.

⁴¹Zuda y'a fɔ a ka mɔgɔ dɔw ye ko mɔgɔ minw be dugu yɔrɔ barikaman na, k'u ka olu kɛlɛ fɔɔ ale ka tila Alabatosoba saniyali la.

⁴²O kɔ, a ye sarakalasebaga jalakibali dɔw woloma, minw nɔrɔnin be Musa ka sariya la.

⁴³Olu ye Alabatosoba saniya. Kabakuru minw tun nɔgɔnin lo, u tagara ni olu ye yɔrɔ nɔgɔnin dɔ la. [1]

⁴⁴U tun be ɲɔgɔn ɲiningara k'u ka kan ka mun kɛ ni saraka jɛnita bɔyɔrɔ ye, bari a tun nɔgɔra.

⁴⁵U ye hakiliɲuman sɔrɔ ko u b'a ci janko o kana kɛ maloyafɛn ye, bari siya wɛrɛw tun y'a nɔgɔ. U y'a ci

⁴⁶k'a kabakuruw bila yɔrɔ bɛnnin dɔ la kulu kan, Alabatosoba be min kan, yanni kira dɔ ka na dɔ fɔ o kosɔn.

⁴⁷U ye kabakuru lɛsɛbaliw ta ka kɛɲɛ ni sariya ye, ka sarakabɔyɔrɔkura lɔ, fɔlɔta lɔcogo la.

⁴⁸U ye Alabatosoba dilan: U y'a kɔnɔna lalaga k'a luuw saniya.

⁴⁹U ye minankuraw dilan Ala ka baara kama ka ban tuma min na, u ye fitinɛw bilayɔrɔ, ni wusulan jɛniyɔrɔ, ani buru bilayɔrɔ ta ka don Alabatosoba kɔnɔ.

⁵⁰U ye wusulan jɛni a jɛniyɔrɔ kan, ka fitinɛw mana u bilayɔrɔ la, u tun be yeelen bɔ Alabatosoba kɔnɔ.

⁵¹U ye burukunw bila tabali nin kan, ka soo cɛtigɛfaniw siri. U tun ye baara minw daminɛ, u tilara o bɛɛ la.

⁵²Girɛkiw ka masaya saan 148nan kalo kɔnɔntɔnnan na, min ye *Kisilewu kalo ye, o tile mugan ni duurunan loon na, u wilila sɔgɔma joona

⁵³ka saraka bɔ ka kɛɲɛ ni Musa ka sariya ye, saraka jɛnita bɔyɔrɔkura kan, u tun ye min lɔ.

⁵⁴Siya wɛrɛw tun ye sarakabɔyɔrɔ nin nɔgɔ o loon ɲɔgɔn na saan tɛmɛnin dɔ la. U ye dɔnkili la k'a kalifa Ala ma tugu o loon na, ka gɔniw ni kolonjow fɔ, ani ka nigɛw gosi ɲɔgɔn na.

⁵⁵Jama bɛɛ birila duguma ka Sankolotigi bato, k'a tanu, ale min y'u bila sira ka kɛlɛ diya u la.

⁵⁶U ye tile seegi kɛ sarakabɔyɔrɔ nin kalifako la Ala ma. U ye saraka jɛnitaw bɔ ni nisɔndiyaba ye, ani jɛnɲɔgɔnya sarakaw, ni foli taw.

⁵⁷U ye Alabatosoba ɲafɛla masiri ni masafugulan jaa sanulamanw, ni nigɛkunbɛnnan jaa sanulamanw ye, k'a dondaw ni boonw lalaga k'u kɛ i n'a fɔ u tun be cogo min na fɔlɔ la, ka koonw don u la tugu.

⁵⁸Jama nisɔndiyanin tun be kosɔbɛ, siya wɛrɛw tun ye maloya min lase u ma, o bɔra u kan.

⁵⁹Zuda n'a badenw, ani Isirayɛli jama bɛɛ y'a latigɛ ko u bena ɲanagwɛ kɛ ni nisɔndiyaba ye tile seegi kɔnɔ o waati ɲɔgɔn na saan o saan, k'a daminɛ Kisilewu kalo tile mugan ni duurunan loon, sarakabɔyɔrɔ kalifako la Ala ma.

⁶⁰O tile fila nin na, u ye kogojan lɔ ka Siyɔn kulu lamini, ka sangaso barikamanw lɔ fana, janko ka siya wɛrɛw bali ka na don yɔrɔ nunu na k'u nɔgɔ tugu.

⁶¹Zuda ye kɛlɛden jɛnkulu dɔ to yen ko u ka Alabatosoba kɔlɔsi. A ye barika don Bɛtisuri dugu la, janko a ka kɛ yɔrɔ barikaman ye Isirayɛli jama fɛ Idume mara gɛrɛfɛ.