Read dyu MAKABEW FƆLƆ 5 Bible Online

MAKABEW FƆLƆ 5 - dyu bible

MAKABEW FƆLƆ 5

¹Zuwifuw lamini siyaw y'a mɛn tuma min na ko sarakabɔyɔrɔ lɔra kura ye, ani ko Alabatosoba lalagara i n'a fɔ a tun be cogo min na fɔlɔ la,

²u dimina kosɔbɛ. Isirayɛliden minw tun b'u cɛma, u y'a latigɛ k'u bena u faga. U y'a daminɛ ka olu faga, k'u halaki.

³Zuda ye kɛlɛ kɛ ni edɔmuw ye Akarabatɛni, Idume mara la, bari u tun ye Isirayɛlidenw datugu. A ye cɛnniba kɛ u cɛma, a y'u gwɛn, k'u bololafɛnw minɛ.

⁴O kɔ, a hakili jigira Bayan kɔmɔgɔw ka juguya la. U tun be to ka dogo siraw kan, ka siraw datugu janko ka Isirayɛlidenw minɛ.

⁵Zuda y'u datugu k'u to u ka sangasow kɔnɔ. A ye yɔrɔ datugu ka kali k'u bena u faga. A y'u ka sangasow jɛni n'a kɔnɔ mɔgɔw bɛɛ.

⁶O kɔ, a tɛmɛna ka taga amoniw ka mara la. A ye kɛlɛden barikaman caaman kunbɛn o yɔrɔ la. Timote le tun b'u kunna.

⁷A ye kɛlɛ kɛ n'u ye siɲɛ caaman. A sera u kɔrɔ k'u halaki.

⁸A ye Yazɛri dugu n'a maraw minɛ ka sɔrɔ ka kɔsegi Zude mara la.

⁹Isirayɛliden minw siginin tun be Galaadi mara la, o mara siyaw farala ɲɔgɔn kan ka wili u kama janko k'u faga. Nga Isirayɛlidenw tagara dogo Datema dugu barikaman kɔnɔ.

¹⁰U ye batakiw ci Zuda n'a badenw ma ko: «Siya wɛrɛw jɛnna an kama janko k'an faga.

¹¹An dogonin be dugu barikaman min kɔnɔ, u ka kɛlɛdenw b'u yɛrɛ labɛnna ka na o minɛ. Timote le b'u kunna.

¹²Na sisan k'an bɔsi u bolo, u y'an ka mɔgɔ caaman faga ka ban.

¹³An balima minw siginin tun be Tobi mara la, o bɛɛ fagara, u y'u ka musow n'u ka denmisɛnw minɛ ka taga n'u ye jɔnya la, k'u bololafɛnw bɔsi. Mɔgɔ waa kelen ɲɔgɔn fagara o yɔrɔ la.»

¹⁴K'u to bataki nin kalan na, ciden wɛrɛw nana ka bɔ Galile mara la n'o kibaruya kelen nin ɲɔgɔn ye, u ka faniw faranfarannin.

¹⁵Olu ko: «Siya wɛrɛ minw be Potolemayisi ni Tiri ani Sidɔn, ni lonanmara Galile [1] faan bɛɛ, olu bɛɛ farala ɲɔgɔn kan ka wili an kama janko k'an faga.»

¹⁶Zuda ni jama ye kibaruya nin mɛn tuma min na, u ye jama wele ɲɔgɔnyeba la. U ka kan ka koo min kɛ k'u balimaw dɛmɛ, u juguw be minw tɔɔrɔla ka to k'u kɛlɛ, u kumana ɲɔgɔn fɛ.

¹⁷Zuda y'a fɔ a baden Simɔn ye ko a ka mɔgɔ dɔw woloma ka taga u balimaw kisi Galile mara la. Ko ale n'u baden Zonatan bena taga Galaadi mara la.

¹⁸A ye Zakari deen Yusufu ni Azariya to Zude mara la, u ka kɛ jama ɲamɔgɔw ye. Olu ni kɛlɛden tɔw tun ka kan ka yɔrɔ kɔlɔsi.

¹⁹A y'a fɔ u ye k'u ka jama mara, k'u kana kɛlɛ kɛ ni siya wɛrɛw ye fɔɔ olu ka kɔsegi.

²⁰Mɔgɔ waa saba (3 000) farala Simɔn kan ka taga n'a ye Galile. Mɔgɔ waa seegi (8 000) farala Zuda kan ka taga n'a ye Galaadi mara la.

²¹Simɔn tagara Galile mara la ka kɛlɛ caaman kɛ ni siya wɛrɛw ye. A sera u kɔrɔ, k'u gwɛn.

²²A tugura u kɔ fɔɔ ka se Potolemayisi dugu donda la. Isirayɛlidenw ye mɔgɔ waa saba ɲɔgɔn faga siya wɛrɛw cɛma k'u bololafɛnw cɛ.

²³O kɔ, Simɔn ye Galile ni Aribata mara zuwifuw lajɛn, olu n'u musow, n'u ka denmisɛnw, ani u bololafɛnw bɛɛ, ka na n'u ye Zude mara la ni nisɔndiya ye.

²⁴Zuda Makabe n'a baden Zonatan ye Zurudɛn baji tigɛ ka tile saba taama kɛ kongokolon kɔnɔ.

²⁵U ye nabatiw [2] kunbɛn, olu y'u minɛ ka ɲa. Koo min kɛra u balimaw la Galaadi mara la, u y'o fɔ u ye.

²⁶Ko u juguw y'u caaman datugu duguba barikamanw kɔnɔ: Bozora, ni Alema, ani Kasafo, ni Makɛdi ani Karinayin.

²⁷Ko dɔw fana datugunin lo Galaadi mara dugu wɛrɛw la, ko u juguw tun y'a latigɛ ka dugu barikaman nunu kɛlɛ sini, k'u minɛ ani k'u kɔnɔ mɔgɔw bɛɛ faga loon kelen na.

²⁸Zuda y'o mɛn dɔrɔn, a n'a ka kɛlɛdenw y'u ɲaa yɛlɛma ka kongokolon sira minɛ ka taga Bozora. U ye dugu nin minɛ, k'a kɔnɔ cɛɛw bɛɛ faga, k'a nafolo cɛ, ka dugu jɛni.

²⁹U bɔra o yɔrɔ la sufɛ ka taama fɔɔ ka taga se Datema dugu barikaman na.

³⁰Dugu gwɛra tuma min na, k'u to yɔrɔjan, u ye kɛlɛden caaman ye, u daa yɛrɛ te lɔn, n'u be yɛlɛyɛlɛnanw lɔra, ka to ka gwɛrɛ ni kɛlɛkɛwotorow ye janko ka dugu minɛ. U tun ye kɛlɛ daminɛ ka ban.

³¹Zuda y'a ye ko kɛlɛ daminɛna ka ban, mankan be bɔra dugu kɔnɔ, ani buruw fiyɛkan ni kulekanw, fɔɔ ka se sankolo la.

³²A y'a fɔ a ka kɛlɛdenw ye ko: «Aw ka kɛlɛ kɛ an balimaw ye bii.»

³³A y'u tilan saba. A y'a fɔ k'u ka gwɛrɛ u juguw kɔfɛ. U ye buru fiyɛ k'u kaan kɔrɔta kosɔbɛ ka Ala dali.

³⁴Timote ka kɛlɛdenw y'a ye ko Zuda Makabe le be gwɛrɛla dɔrɔn, u ye boli ta. Zuda sera u kɔrɔ kosɔbɛ, u ka mɔgɔ waa seegi (8 000) ɲɔgɔn fagara kɛlɛ la o loon na.

³⁵O kɔ, a y'a ɲaa sin Alema faan fɛ. A tagara o dugu nin kɛlɛ k'a minɛ k'a kɔnɔ cɛɛw bɛɛ faga, ka nafolo cɛ, ka dugu jɛni.

³⁶A bɔra o yɔrɔ la ka taga Kasafo ni Makɛdi ani Bozora minɛ, ni Galaadi mara dugu tɔw.

³⁷O koo nunu tɛmɛnin kɔ, Timote ye kɛlɛbolo wɛrɛ lajɛn ka taga sigi Arafɔn gɛrɛfɛ, kɔɔ faan dɔ nin na.

³⁸Zuda ye mɔgɔw ci ka taga u ka sigiyɔrɔ kɔlɔsi dogo la. Olu segira ka n'a fɔ a ye ko: «Siya minw b'an lamini na, u bɛɛ lajɛnnin be Timote kɔrɔ, kɛlɛden nunu ka ca kosɔbɛ.

³⁹U ye kɛlɛden dɔw ta arabuw cɛma, janko k'u dɛmɛ. U siginin tun be kɔɔ kɔfɛ, u labɛnnin lo ka na i kɛlɛ.» Zuda tagara u kunbɛn.

⁴⁰A n'a ka kɛlɛdenw gwɛrɛla kɔɔ la. O la, Timote y'a fɔ a ka kɛlɛkuntigiw ye ko: «Ni Zuda le kɔnna ka kɔɔ tigɛ, an tena se ka lɔ a ɲa, siga t'a la, a bena se an kɔrɔ.

⁴¹Nga n'a siranna, ka lɔ kɔɔ kɔfɛ, an bena kɔɔ tigɛ k'a kɛlɛ, an bena se a kɔrɔ.»

⁴²Zuda sera jida la tuma min na, a ye kɛlɛkuntigiw to kɔda la k'a fɔ u ye ko u kan'a to mɔgɔ si ka to o yɔrɔ la, ko bɛɛ ka taga kɛlɛ la.

⁴³Zuda le kɔnna ka kɔɔ tigɛ ka taga u juguw faan fɛ, a ka kɛlɛdenw bɛɛ sɔrɔla ka tugu a kɔ. A ye siya wɛrɛw kɛlɛ k'u ɲɔti ka taga kɔfɛ. U y'u ka kɛlɛkɛminanw fili, ka sɔrɔ ka boli ka taga Karinayin jobon kɔnɔ.

⁴⁴Zuda ka mɔgɔw ye dugu minɛ, ka sɔrɔ ka jobon nin jɛni, ni mɔgɔ minw tun b'a kɔnɔ. U sera Karinayin kɔrɔ. Kabini o waati la, mɔgɔ si ma se ka lɔ Zuda ɲa tugu.

⁴⁵O kɔ, Isirayɛliden minw bɛɛ tun be Galaadi mara la, Zuda ye olu lajɛn, a faama fara fantanw kan, musow, ni denmisɛnw, ani u ka bololafɛnw, janko ka taga n'u ye Zuda mara la. Jamaba tun lo.

⁴⁶U tagara se Efurɔn, min tun be u ka sira kan. Duguba tun lo, barika tun b'a la. U tun te se ka munumunu ka tɛmɛ dugu kinibolo ɲafan fɛ, walima numanbolo fɛ, fɔɔ u k'a cɛtigɛ.

⁴⁷Nga dugu mɔgɔw ma sɔn u ka don dugu kɔnɔ, u y'a dondaw tugu ni kabakuruw ye.

⁴⁸Zuda ye kumaɲuman fɔ u ye ko: «An ka kan k'aw ka mara cɛtigɛ ka se ka taga an ka jamana na. Mɔgɔ si tena kojugu kɛ aw la, an bena tɛmɛ sira fɛ dɔrɔn.» Nga dugu mɔgɔw ma sɔn ka daa yɛlɛ a ye.

⁴⁹O la, a ko u k'a fɔ kɛlɛdenw cɛma ko u kelen kelen bɛɛ ka to a ka yɔrɔ la.

⁵⁰Kɛlɛdenw y'u yɛrɛ labɛn kɛlɛ kama. U ye suu ko ka dugu gwɛ dugu mɔgɔw kɛlɛ la. A laban, u sɔrɔla k'o dugu minɛ.

⁵¹U ye cɛɛw bɛɛ faga, ka dugu nafolo cɛ, ka dugu halaki pepewu, ka taama suuw kan ka dugu cɛtigɛ.

⁵²U ye Zurudɛn baji tigɛ ka se kɛnɛbayɔrɔ la Bɛtiseyan gɛrɛfɛ.

⁵³Mɔgɔ minw tora kɔfɛ, Zuda tun be to k'olu lajɛn, ani ka to ka jama jaa gwɛlɛya sira kan fɔɔ ka taga se Zuda mara la.

⁵⁴U nisɔndiyaninba yɛlɛla Siyɔn kulu kan. U ye saraka jɛnitaw bɔ, bari u ɲuman segira, u ka mɔgɔ si ma faga.

⁵⁵Ka Zuda ni Zonatan to Galaadi mara la, n'a baden Simɔn be Potolemayisi gɛrɛfɛ Galile mara la,

⁵⁶Zakari deen Yusufu ni Azariya, minw ye kɛlɛkuntigiw ye, olu y'a mɛn k'u ye cɛfariyakow kɛ kɛlɛ la.

⁵⁷U y'a fɔ ɲɔgɔn ye ko: «An fana ka tɔgɔ ɲini an yɛrɛ ye. An ka taga an lamini siyaw kɛlɛ.»

⁵⁸U tun be kɛlɛden minw kunna, u kumana olu fɛ ka sɔrɔ ka taga Zamuniya.

⁵⁹Gɔriziyasi n'a ka mɔgɔw bɔra dugu kɔnɔ k'u be kɛlɛ daminɛ.

⁶⁰U sera Yusufu ni Azariya kɔrɔ, ka tugu u kɔ fɔɔ Zude mara daan na. Isirayɛlidenw mɔgɔ waa fila (2 000) ɲɔgɔn fagara o loon na.

⁶¹O kɛra jama ka dɛsɛkojugu ye, bari Yusufu ni Azariya tun ma mɛnni kɛ Zuda n'a badenw fɛ. U tun be miiri k'olu fana bena se ka cɛfariya kɛ.

⁶²Nga Ala tun ye see di mɔgɔ minw ma Isirayɛlidenw kisi la, olu tun te o dɔw ye.

⁶³Cɛfari Zuda n'a badenw ye tɔgɔba sɔrɔ Isirayɛlidenw bɛɛ fɛ, ni siyaw bɛɛ fɛ u tɔgɔ fɔra minw cɛma.

⁶⁴Mɔgɔw tun be boli u nɔfɛ janko k'u fo.

⁶⁵Zuda n'a badenw tagara worodugu ɲafan fɛ, ka edɔmuw kɛlɛ. U ye Eburɔn n'a maraw minɛ, ka dugu yɔrɔ barikamanw ci, k'a lamini sangasow jɛni.

⁶⁶O kɔ, u ye sira minɛ k'u ɲaa sin filisiw ka jamana faan fɛ, ka taga Mariza cɛtigɛ.

⁶⁷O loon na, sarakalasebaga minw tun b'a fɛ ka taga kɛlɛ la k'u yɛrɛ yira cɛɛw ye, k'a sɔrɔ u ma miiri ka ɲa, olu fagara kɛlɛ la.

⁶⁸O kɔ, Zuda y'a ɲaa sin Asidɔdi faan fɛ, min be filisiw ka mara la. A y'u ka sarakabɔyɔrɔw ci k'u ka joow jɛni, k'u ka duguw nafolo cɛ ka sɔrɔ ka kɔsegi Zuda mara la.