Read dyu MAKABEW FƆLƆ 6 Bible Online

MAKABEW FƆLƆ 6 - dyu bible

MAKABEW FƆLƆ 6

¹Ka masacɛ Antiyokusi to sanfɛ maraw cɛtigɛ la, a y'a mɛn ko dugu dɔ be Pɛrɛsi, min tɔgɔ ko Elimayisi. O tɔgɔ tun bɔr'a ka nafolo, n'a ka warigwɛ, n'a ka sanu kosɔn.

²Nafolo caaman tun b'a ka jobon kɔnɔ: yɛrɛtangafɛn sanulaman dɔw tun be yen, ani nigɛdulokiw, ni kɛlɛkɛminanw. Maseduwani masacɛ Filipu deen Alɛkisandiri tun ye minan minw to yen, ale min tun kɛra girɛkiw ka masacɛ fɔlɔ ye.

³Antiyokusi tagara Elimayisi janko ka cogo ɲini ka dugu nin minɛ k'a nafolo cɛ, nga a ma se, bari dugu mɔgɔw tun y'o mɛn.

⁴U wilil'a kama k'a kɛlɛ. A hakili ɲagamina kosɔbɛ, a bolila ko a be kɔsegi Babilɔni.

⁵K'a to Pɛrɛsi jamana na, u nan'a fɔ a ye ko Zuda ser'a ka kɛlɛdenw kɔrɔ minw tun tagara Zuda mara la.

⁶Liziyasi tun tagara yen ni kɛlɛbolo barikaman ye, nga zuwifuw sera u kɔrɔ k'u halaki pepewu. Olu tun ye masacɛ ka kɛlɛdenw halaki. U tun ye kɛlɛkɛminanw, ni minan wɛrɛw, ani nafolo caaman minɛ kɛlɛden minw fɛ, o le tun ye barika don u la.

⁷Antiyokusi tun ye fɛnjugu min lɔ sarakabɔyɔrɔ kan Zeruzalɛmu, u tun y'o ci fana, k'u ka Ala ka yɔrɔ lamini ni kogojan ye i n'a fɔ a tun be cogo min na fɔlɔ la, k'o ɲɔgɔn kɛ Bɛtisuri fana, min kɛra masacɛ ka duguw dɔ ye.

⁸Masacɛ y'o kibaruya mɛn tuma min na, a fari fagara siranya fɛ, a hakili ɲagamina fɔɔ a banana ka la. A jigi tigɛra pewu, bari a tun b'a fɛ koo nin ka kɛ cogo min na, a ma kɛ ten.

⁹Farifaga nana juguya k'a la dilan kan tile damani. A y'a ye ko a bena sa tuma min na,

¹⁰a y'a ka mɔgɔsɔbɛw bɛɛ wele k'a fɔ u ye ko: «Sinɔgɔ tigɛra n ɲaa na, n dusu kasinin be kojugu.

¹¹Ne ye n yɛrɛ ɲininga ko mun na tɔɔrɔba ye n sɔrɔ, ka n datugu i n'a fɔ fɔɲɔba? K'a sɔrɔ n tun ka ɲi, n koo tun ka di mɔgɔw ye n ka fanga waati la!

¹²Nga sisan, ne ye kojugu minw kɛ Zeruzalɛmu, n hakili jigira n'o ye. Minan sanulaman ni warigwɛlaman minw tun be o yɔrɔ la, ne y'olu bɛɛ ta, ani ka mɔgɔw ci ka taga Zuda mara mɔgɔw faga gwansan.

¹³Ne b'a lɔn k'o le kama, kojugu nunu ye ne sɔrɔ, ko ne bena sa jigitigɛ bolo jamana wɛrɛ la.»

¹⁴A ye mɔgɔ ci ka taga Filipu wele, min ye masacɛ ka mɔgɔsɔbɛw dɔ ye, k'a sigi mara bɛɛ kunna.

¹⁵A y'a ka masafugulan ni masafani, n'a bololanigɛ d'a ma, a be taamasiɲɛ la sɛbɛw kan ne min ye. O kɔ, a ko a k'a janto a dencɛ Antiyokusi la, k'a lamɔ, ani k'a labɛn ka kɛ masa ye.

¹⁶Girɛkiw ka masaya saan 149nan na, masacɛ Antiyokusi sara Pɛrɛsi jamana na.

¹⁷Liziyasi y'a banko mɛn tuma min na, a y'a deen Antiyokusi kɛ masa ye, a tun ye min lamɔ kabini a denmisɛn tuma. A ye tɔgɔ wɛrɛ l'a kan ko Epatɔri. [1]

¹⁸Isirayɛlidenw jugu minw tun be dugu yɔrɔ barikaman nin na, u tun be Isirayɛlidenw bali ka bɔ Alabatosoba yɔrɔ la. Tuma o tuma u tun be cogo bɛɛ ɲini ka kojugu kɛ u la, siya wɛrɛw barika tun be boɲa ten.

¹⁹Zuda tun y'a latigɛ ko a bena u halaki. A ye jama bɛɛ wele janko ka taga u datugu k'u kɛlɛ.

²⁰Isirayɛlidenw ye ɲɔgɔn lajɛn k'o dugu lamini girɛkiw ka masaya saan 150nan na. U ye bonnikɛyɔrɔw lɔ, ka kɛlɛkɛwotoro dɔ wɛrɛw dilan.

²¹Nga u jugu dɔw sera ka bɔ. Isirayɛliden Alaɲasiranbali dɔw farala u kan

²²ka ta'a fɔ masacɛ ye ko: «I bena kɔnɔni kɛ fɔɔ tuma jumɛn ka sɔrɔ ka wili ka kotilennin kɛ k'an balimaw dimi bɔ?

²³Anw tun sɔnna ka baara kɛ i facɛ ye, k'a ka ciraw kɛ, ani k'a ka sariyaw bato.

²⁴O le kosɔn, an fadenw kɛra an juguw ye. U ye dugu yɔrɔ barikaman koori. Ka fara o kan, u sera k'an ka mɔgɔ minw sɔrɔ, u y'olu faga, k'an bololafɛnw bɔsi.

²⁵U bolo ma se an dama ma, u ye kɛlɛ kɛ n'i ka maraw bɛɛ ye fana.

²⁶Sisan, u ye Zeruzalɛmu yɔrɔ barikaman lamini janko k'a minɛ. U ye barika don Alabatosoba la, ani Bɛtisuri la fana.

²⁷N'i ma wili k'u bali sisan sisan, u bena o ɲɔgɔn kɛ tugu, i tena se k'u bali fana tugu.»

²⁸Masacɛ Antiyokusi y'o mɛn tuma min na, a dimina. A y'a ka mɔgɔsɔbɛw bɛɛ lajɛn, n'a ka kɛlɛden sennatigiw kuntigi, ani a ka sotigiw kuntigiw.

²⁹A ye kɛlɛden dɔw ta baara la ka bɔ jamana wɛrɛw la, ani dugukolodenninw na kɔgɔji cɛma.

³⁰Kɛlɛden sennatigi mɔgɔ waa kɛmɛ (100 000), ni sotigi mɔgɔ waa mugan (20 000), ani kɛlɛkɛsama bi saba ni fila tun b'a ka kɛlɛbolo la.

³¹Masacɛ n'a ka kɛlɛdenw ye Idume mara cɛtigɛ ka taga Bɛtisuri lamini, u ye waatijan ta a kɛlɛ la. U ye kɛlɛkɛwotoro dɔw dilan, nga minw datugunin tun be dugu kɔnɔ, olu bɔra u ka yɔrɔ la ka masin nunu jɛni. U ye kɛlɛ kɛ ni jagwɛlɛya ye.

³²O kɔ, Zuda bɔra dugu yɔrɔ barikaman na ka ta'a yɛrɛ labɛn kɛlɛ kama Bɛtizakariya, ka sigi k'a ɲaa sin masacɛ ka kɛlɛdenw sigiyɔrɔ ma.

³³Sɔgɔmada joona, masacɛ wilila k'a fɔ a ka kɛlɛdenw ye ko u ka Bɛtizakariya sira minɛ. U y'u yɛrɛ labɛn kɛlɛ kama, ka buruw fiyɛ.

³⁴U ye *ɛrɛzɛnji ni yiriden dɔ wɛrɛ jii di samaw ma janko k'u fariya kɛlɛ kama.

³⁵U ye sama nunu tilan kɛlɛden sennatigiw jɛnkuluw cɛ. U ye mɔgɔ waa kelen bila u kelen kelen bɛɛ gɛrɛfɛ, nigɛduloki tun b'u kaan na, ni fugulan ziralaman b'u kuun na. Sotigi kɛlɛdenŋanaw mɔgɔ kɛmɛ duuru fana tun tugunin be sama nunu kelen kelen bɛɛ kɔ.

³⁶Ni sama be yɔrɔ o yɔrɔ, olu fana be o yɔrɔ la. N'a tagara ɲafɛ, u ka kan ka taga n'a ye, u man kan k'u yɔrɔ jaɲa a la tuma si.

³⁷Boon barikaman yirilaman tun sirinin be samaw kelen kelen bɛɛ kɔɔ la ni juruw ye, k'a kɛ yɛrɛtangayɔrɔ ye. Kɛlɛden mɔgɔ saba tun be u kelen kelen bɛɛ kɔnɔ, olu tun bɛ kɛlɛ kɛ k'u to samaw kan, ka fara sama bolibaga kan.

³⁸Masacɛ ye sotigi tɔw bila kɛlɛbolo faan fila la janko u ka Zuda ka kɛlɛdenw ɲaa gwan, ani ka kɛlɛden sennatigiw sutara.

³⁹Tile lɔra nigɛkunbɛnnan sanulaman ni ziralamanw kan tuma min na, u yeelen be taga kuluw kan, k'u manamana i n'a fɔ kala mananin.

⁴⁰Masacɛ ka kɛlɛdenw labɛnnin tun lo kɛlɛ kama, dɔw yɛlɛla kulujanjanw kan, dɔw be kulu jukɔrɔ. U tun be gwɛrɛla ni hakilisigi ye, cogoɲuman na.

⁴¹Mɔgɔ minw ye jamaba nin mankan mɛn, k'u taamakan n'u ka kɛlɛkɛminanw lamagakan mɛn, olu bɛɛ hakili ɲagamina. Kɛlɛbolo nin tun ka bon kosɔbɛ, fanga tun b'a la.

⁴²Zuda n'a ka kɛlɛdenw gwɛrɛla janko ka kɛlɛ daminɛ, u ye masacɛ ka kɛlɛdenw mɔgɔ kɛmɛ wɔɔrɔ faga.

⁴³U be Eleyazari min wele ko Awaran, ale ye sama nunu kelen ye, masacɛ ka tangafɛn dɔ b'a kɔɔ la, ale tun ka bon ni tɔw ye. A y'a miiri ko masacɛ be sɔrɔ a kan.

⁴⁴A y'a latigɛ k'a yɛrɛ saraka janko k'a ka siya kisi, ani ka tɔgɔba sɔrɔ min tena tunu ka ye.

⁴⁵A y'a jaa gwɛlɛya ka boli ka taga sama nin faan fɛ, u juguw ka kɛlɛden sennatigiw jɛnkulu cɛma. A tun be mɔgɔw fagar'a kinibolo n'a numanbolo fɛ, k'u juguw jɛnsɛn faan bɛɛ la.

⁴⁶A donna sama kɔrɔ k'a kɔnɔ sɔgɔ k'a faga. Sama benna Eleyazari kan k'a faga o yɔrɔnin kelen na.

⁴⁷Zuwifuw ye masacɛ ka kɛlɛdenw barika ye, ani u ka fariya, u bɔra u ɲa.

⁴⁸Masacɛ ka kɛlɛdenw yɛlɛla ka taga Zeruzalɛmu faan fɛ janko ka taga zuwifuw kama. Masacɛ ye Zude mara ni Siyɔn kulu datugu.

⁴⁹A bɛnna ni Bɛtisuri zuwifuw ye, olu bɔra u ka dugu la. U ma se k'u yɛrɛ datugunin to a kɔnɔ, bari dumunifɛn tun t'u fɛ tugu. Lafiɲɛsan tun lo, u tun te sɛnɛ kɛ saan min na.

⁵⁰Masacɛ ye Bɛtisuri minɛ ka kɛlɛden dɔw to a kɔnɔ.

⁵¹A ye Alabatosoba lamini waatijan kɔnɔ, ka bonnikɛyɔrɔw ni kɛlɛkɛwotorow dilan: tasumabonnanw ni kabakurubonnanw, ni biɲɛbonnan sifa bɛɛ, ani fɛɛn wɛrɛ bonnanw.

⁵²Mɔgɔ datugunin nunu ye masin wɛrɛw dilan ka masin nunu cɛn. U ye kɛlɛ kɛ waatijan kɔnɔ.

⁵³Nga dumunifɛn tun te u ka bondow kɔnɔ tugu, bari lafiɲɛsan tun lo. Ka fara o kan, Isirayɛliden minw tun segira Zude mara la ka bɔ jamana wɛrɛw la, dumuni min tun maranin be, olu tun y'o tɔɔ dumu.

⁵⁴Kɔngɔ tun gwanna kosɔbɛ minkɛ, u ye mɔgɔ damani dɔrɔn to Alabatosoba kɔnɔ, tɔw jɛnsɛnna ka taga u ka soo.

⁵⁵Ka masacɛ Antiyokusi to nii na, a tun ye Filipu woloma ko a k'a dencɛ Antiyokusi lamɔ k'a labɛn ka kɛ masa ye. Liziyasi y'a mɛn k'o Filipu

⁵⁶segira ka bɔ Pɛrɛsi ni Mɛdi jamana na ni kɛlɛdenw ye minw tun ye masacɛ bila sira, ko a b'a fɛ k'a yɛrɛ bila jamana ka koɲaw kunna.

⁵⁷A y'o kuma nin mɛn tuma min na, a teliyara k'a yɛrɛ labɛn ka taga. A y'a fɔ masacɛ ye, ni kɛlɛdenw n'u ɲamɔgɔw ye ko: «Loon o loon an barika be dɔgɔyara ka taga, an ka dumuni be dɔgɔyara. An ye yɔrɔ min datugu, barika b'o la kosɔbɛ, jamana ka koɲaw kunko b'anw kan.

⁵⁸An ka kɛlɛ dabila ni mɔgɔ nunu ye, an ka bɛn n'u ye, ka bɛn n'u ka siya bɛɛ ye.

⁵⁹An ka sira d'u ma k'u ka koow kɛ ka kɛɲɛ n'u ka landaw ye i n'a fɔ fɔlɔ la. Tiɲɛ na, u ye nin bɛɛ kɛ dimi kosɔn, bari an y'u wajibiya k'u ka landaw dabila.»

⁶⁰Kuma nin diyara masacɛ ni ɲamɔgɔ nunu ye. Liziyasi ye mɔgɔw ci zuwifuw fɛ ka bɛɛn ɲini u fɛ, u sɔnna.

⁶¹Masacɛ ni ɲamɔgɔ nunu kalila ko u bena bɛɛn nin bato, o kɔ, zuwifuw bɔra u ka yɔrɔ barikaman kɔnɔ.

⁶²Nga masacɛ sera Siyɔn kulu kan tuma min na, a y'a ye ko u tun ye barika don yɔrɔ nin na kosɔbɛ. A tun kalila ko a bena min kɛ, a ma o kɛ. A ko u ka Alabatosoba laminikogo ci pewu.

⁶³O kɔ, a teliyara ka kɔsegi Antiyɔsi. A y'a sɔrɔ Filipu ye dugutigiya ta. A ye kɛlɛ kɛ n'a ye ka Antiyosi minɛ fanga la.