Read dyu MAKABEW FƆLƆ 7 Bible Online

MAKABEW FƆLƆ 7 - dyu bible

MAKABEW FƆLƆ 7

¹Girɛkiw ka masaya saan 151nan na, Selekusi dencɛ Demetiriyusi bolila ka bɔ Ɔrɔmu. A ni mɔgɔ damani y'u ɲaa sin dugu dɔ ma, kɔgɔjida la. A tagar'a yɛrɛ kɛ masa ye yen.

²K'a to sira kan ka taga masaso faan fɛ, min tun ye a faaw ka soo ye, kɛlɛdenw ye Antiyokusi duurunan ni Liziyasi minɛ janko ka na n'u ye a fɛ.

³Demetiriyusi y'a mɛn ko u minɛna tuma min na, a ko ale t'a fɛ a ɲaa ka la u kan.

⁴O la, kɛlɛdenw y'u faga, Demetiriyusi sigira masaya la.

⁵O kɔ, Isirayɛliden janfamɔgɔw nan'a fɛ, minw te sariya bato. Alikime le tun ye u ɲamɔgɔ ye. Ale tun b'a fɛ ka kɛ sarakalasebagaw kuntigi ye.

⁶U ye zuwifu tɔw jalaki masacɛ ɲana k'a fɔ ko: «Zuda n'a badenw y'i ka mɔgɔsɔbɛw bɛɛ faga, k'an gwɛn ka bɔ an ka jamana na.

⁷Sisan, Zuda ye cɛnni min kɛ an cɛma ni masacɛ ka mara kɔnɔ, i ka lanamɔgɔ dɔ ci ka taga o filɛ. A fɔ u ye ko u k'u ɲaa gwan, olu n'u dɛmɛbagaw bɛɛ.»

⁸Masacɛ Demetiriyusi ye Bakidɛsi woloma min tun ye masacɛ ka mɔgɔsɔbɛw dɔ ye, n'a be Siriba jamana kunna. Mɔgɔba tun lo jamana kɔnɔ, a tun kɛra masacɛ ka lanamɔgɔ ye.

⁹Masacɛ y'a ci ni Alikime ye, Alaɲasiranbali nin. A ye Alikime kɛ sarakalasebagaw kuntigi ye. A ko Isirayɛlidenw ye kojugu min kɛ, k'u k'o ɲɔgɔn sara u la.

¹⁰U tagara ni kɛlɛden caaman ye fɔɔ ka taga se Zuda mara la. U ye mɔgɔw ci Zuda n'a badenw fɛ janko k'u nigɛ ni hɛrɛkuma ye.

¹¹Nga zuwifuw y'a ye k'u nana ni kɛlɛbolo barikaman ye, u ma la u ka kuma na.

¹²O bɛɛ n'a ta, sariya karamɔgɔ dɔw ye ɲɔgɔn lajɛn ka taga Alikime ni Bakidɛsi fɛ janko ka cogo bɛnnin ɲini a la.

¹³Isirayɛlidenw cɛma, asideɲɛw ka jɛnkulu fɔlɔ le tun b'a fɛ ka bɛɛn n'u ye.

¹⁴U tun b'a fɔra ko: «Mɔgɔ min nana ni kɛlɛdenw ye, sarakalasebaga lo ka bɔ Arɔn kɔmɔgɔw la, a tena tilenbaliyako kɛ an na.»

¹⁵Alikime ye kumaɲuman fɔ u ye, ka kali u ɲana ko ale n'a ka mɔgɔw t'a fɛ ka kojugu si kɛ u la, walima u teriw la.

¹⁶U y'u jigi la a kan dɔrɔn, a y'u ka mɔgɔ bi wɔɔrɔ minɛ k'u faga o loon kelen na, i n'a fɔ a sɛbɛnnin be cogo min na ko:

¹⁷ «U ye ele, Ala ka mɔgɔw suuw fili, k'u joli bɔnbɔn Zeruzalɛmu lamini bɛɛ la, mɔgɔ si tun te yen k'u suuw don.»

¹⁸O la, siranya ye bɛɛ minɛ kosɔbɛ. U ko: «Mɔgɔ nunu ye galontigɛlaw le ye, u tilennin tɛ, bari u y'o bɛɛn cɛn, an tun ye min kɛ n'u ye, u kalila koo min na, u ma o bato fana.»

¹⁹Bakidɛsi bɔra Zeruzalɛmu ka taga n'a ka kɛlɛdenw ye Bɛtizɛti ka sigi yen. Mɔgɔ minw tun nana fara ale kan, a ye mɔgɔw ci k'olu caaman minɛ, ni zuwifu dɔ wɛrɛw, k'u kaan tigɛ k'u suuw fili kɔlɔnba dɔ kɔnɔ.

²⁰A y'o mara to Alikime bolo, ka kɛlɛdenw to n'a ye janko u k'a dɛmɛ. O kɔ, a kɔsegira masacɛ fɛ.

²¹Alikime y'a seko kɛ janko mɔgɔw ka sɔn k'a jati sarakalasebagaw kuntigi ye.

²²Mɔgɔ minw tun be ɲagamini don jama cɛma, olu bɛɛ lajɛnn'a kɔrɔ. U y'u yɛrɛ kɛ Zuda mara tigiw ye, ka kojugu caaman kɛ Isirayɛlidenw na.

²³Zuda y'a ye ko Alikime n'a kɔmɔgɔw be kojugu kɛ Isirayɛlidenw na ka tɛmɛ siya wɛrɛw yɛrɛ kan.

²⁴O la, a ye Zude mara yɔrɔ bɛɛ kɛ ɲɔgɔn kan. A y'u dimi bɔ janfamɔgɔ nunu na, minw tun farala Alikime kan, ka jamanadenw bali ka yaala jamana kɔnɔ.

²⁵Alikime y'a ye ko Zuda n'a ka mɔgɔw ye barika sɔrɔ tuma min na, ko a tena se ka lɔ u ɲa, a segira masacɛ fɛ k'u jalaki ko u ye kojugubabaw kɛ.

²⁶Masacɛ ka kɛlɛkuntigiw dɔ tun ye mɔgɔbaba ye masacɛ ka mara kɔnɔ, a tɔgɔ ko Nikanɔri. Isirayɛlidenw koo tun ka go a ye, k'u kɛ a yɛrɛ juguw ye. Masacɛ y'a ci ko a ka taga siya nin halaki.

²⁷Nikanɔri sera Zeruzalɛmu ni kɛlɛden caaman ye. A ye kumaɲuman fɔ Zuda n'a badenw ye janko k'u nigɛ. A ko:

²⁸«An kana kɛlɛ, n bena taga i fɛ ni mɔgɔ damani ye janko an ka ɲɔgɔn ye hɛrɛ la.»

²⁹A sera Zuda fɛ tuma min na, u ye ɲɔgɔn fo ka ɲa, nga Isirayɛlidenw jugu nunu tun labɛnnin lo ka Zuda minɛ ka taga n'a ye.

³⁰Zuda y'a ye ko Nikanɔri nan'a fɛ ni namara ye minkɛ, a siranna, a ma sɔn ka kuma n'a ye tugu.

³¹Nikanɔri y'a faamu ko a ka namarako bɔra kɛnɛ kan tuma min na, a bɔra Zeruzalɛmu ko a be taga Zuda kɛlɛ Kafarasalama gɛrɛfɛ.

³²Nikanɔri ka mɔgɔw cɛma, mɔgɔ kɛmɛ duuru ɲɔgɔn fagara, tɔw bolila ka taga Dawuda ka dugu kɔnɔ.

³³O koo nunu tɛmɛnin kɔ, Nikanɔri yɛlɛla Siyɔn kulu kan. Sarakalasebagaw ni cɛkɔrɔbaw bɔra Alabatosoba kɔnɔ janko k'a fo ka ɲa, ani ka saraka jɛnita yira a la, u tun be min bɔra masacɛ tɔgɔ la.

³⁴Nga Nikanɔri y'u dɔgɔya, k'u lɔgɔbɔ, ka dabayakuma fɔ.

³⁵A diminin kalila k'a fɔ ko: «Ni aw ma Zuda n'a ka kɛlɛdenw don n bolo sisan, ni kɛlɛ banna tuma min na, ne bena kɔsegi ka na tasuma don batoso nin na.» A dimininba bɔra yen.

³⁶Sarakalasebagaw donna luu kɔnɔ tugu ka lɔ sarakabɔyɔrɔ ni Alabatosoba ɲafɛ. U kasitɔ ye Ala dali ko:

³⁷«Ee Ala, e le ye soo nin woloma janko a ka kɛ i ta ye, ani ka kɛ soo ye, mɔgɔw b'i dali ka fɛɛn ɲini i fɛ min kɔnɔ.

³⁸E k'i dimi bɔ cɛɛ nin n'a ka kɛlɛdenw na, a to u be sa kɛlɛ la! I hakili to u ka kumajuguw la, kana u to sii la.»

³⁹Nikanɔri bɔra Zeruzalɛmu k'a ka kɛlɛdenw sigiyɔrɔ labɛn Bɛtorɔn. Siri kɛlɛdenw nana fara a kan o yɔrɔ la.

⁴⁰Zuda sigira Adasa ni mɔgɔ waa saba (3 000) ye. A ye Ala dali ko:

⁴¹«Loon dɔ, masacɛ dɔ ka cidenw ye kumajugu fɔ i ye. I ka mɛlɛkɛ nana ka mɔgɔ waa kɛmɛ ni bi seegi ni duuru (185 000) faga u cɛma.

⁴²I ka kɛlɛden nunu halaki ka bɔ yen an ɲana o cogo kelen na bii. O la, minw ma sa, olu ben'a lɔn ko cɛɛ nin ye kumajugu fɔ i batoso ye. Nikanɔri sara ka kɛɲɛ n'a ka juguya ye.»

⁴³Kɛlɛdenw ye kɛlɛ daminɛ *Adari kalo tile tan ni sabanan loon. Isirayɛlidenw sera Nikanɔri n'a ka kɛlɛbolo kɔrɔ k'u halaki. Ale yɛrɛ kɛra mɔgɔ fɔlɔ ye ka faga kɛlɛ la.

⁴⁴A ka kɛlɛdenw y'a ye ko a fagara tuma min na, u y'u ka kɛlɛkɛminanw fili ka boli.

⁴⁵Zuwifuw tugura u kɔ k'u gwɛn tile kelen kuturu bɛɛ la, k'a daminɛ Adasa fɔɔ ka taga se Gezɛri. U tun be buruw fiyɛ ka mɔgɔw lasɔmi ko u be tugura u kɔ.

⁴⁶Mɔgɔw bɔra Zude mara duguw bɛɛ la ka bolibagatɔ nunu lamini k'u to cɛmancɛ la. Nikanɔri ka kɛlɛdenw bɛɛ fagara o kɛlɛ la, hali mɔgɔ kelen ma kisi.

⁴⁷Zuwifuw y'u ka kɛlɛkɛminanw n'u bololafɛnw cɛ. U ye Nikanɔri kuun, n'a kinibolo tigɛ, a tun ye min kɔrɔta ni yɛrɛboɲa ye. U tagara u bila janko Zeruzalɛmukaw k'u filɛ.

⁴⁸Jama nisɔndiyaninba tun lo. U ye ɲanagwɛ kɛ o loon na i n'a fɔ ɲanagwɛlonba.

⁴⁹U y'a latigɛ k'u bena to ka ɲanagwɛ kɛ saan o saan Adari kalo tile tan ni sabanan loon, k'u hakili jigi o loon na.

⁵⁰Zuda mara tora hɛrɛ la waati dɔɔni kɔnɔ.