Read dyu MAKABEW FƆLƆ 8 Bible Online

MAKABEW FƆLƆ 8 - dyu bible

MAKABEW FƆLƆ 8

¹Ɔrɔmukaw tɔgɔ bɔra fɔɔ Zuda nan'a mɛn. Mɔgɔw tun b'a fɔra ko kɛlɛdenŋanaw lo, ko mɔgɔ o mɔgɔ mana bɛɛn n'u ye u be koɲuman kɛ u bɛɛ ye. Mɔgɔ minw be taga u fɛ, u be teriya kɛ ni olu ye.

²U y'u ka kɛlɛkow fɔ Zuda ye, ani u ye koba minw kɛ goliw fɛ. Ɔrɔmukaw tun sera u kɔrɔ k'u wajibiya ka nisɔngɔ gwiliman sara.

³U tun ye kɛlɛ kɛ Ɛsipaɲɛ jamana na fana, k'o yɔrɔ warigwɛ ni sanu bɔyɔrɔw minɛ.

⁴U tun ye jamana nin minɛ u ka hakilitigiya n'u ka jijali barika la, k'a sɔrɔ a tun ka jan n'u ka jamana ye kosɔbɛ. Masacɛ dɔw tun nana u fɛ ka bɔ yɔrɔjanw ko u b'u kɛlɛ, nga Ɔrɔmukaw sera u kɔrɔ, u ye cɛnniba kɛ u fɛ. Minw ma sa, u y'olu wajibiya ka nisɔngɔ sara saan o saan.

⁵U sera Filipu ni Pɛrɛse kɔrɔ, k'u kolo, olu tun ye kitiw ka masacɛw ye, [1] ani tɔ nunu minw tun wilila u kama.

⁶Azi masacɛ Antiyokusiba tun tagara u kama ni sama kɛmɛ ni mugan ye, ni sotigiw, ni kɛlɛkɛwotorow ani kɛlɛbolo barikaman ye, ko a b'u kɛlɛ. U sera ale kɔrɔ fana.

⁷U y'a minɛ, k'ale n'a kɔfɛ masaw wajibiya ka wariba sara, ani ka mɔgɔw d'u ma u ka to u fɛ.

⁸U ye Ɛndi ni Mɛdi, ani Lidi jamanaw bɔsi a la, n'a ka maraɲumanw dɔw, k'u di masa Emɛni ma.

⁹Girɛkiw tun y'a latigɛ k'u bena taga u kama k'u halaki.

¹⁰Ɔrɔmukaw y'o mɛn tuma min na, u ye kɛlɛkuntigi kelenpe ci u kama ka kɛlɛ kɛ n'u ye. Ɔrɔmukaw ye girɛki caaman faga, k'u musow n'u ka denmisɛnw minɛ, k'u ka bololafɛnw cɛ, k'u ka jamana mara, k'u ka dugu barikamanw ci. U y'u minɛ i n'a fɔ jɔɔnw, fɔɔ ka na se bii ma.

¹¹Ni jamana wɛrɛ mɔgɔw murutira u ma, walima minw bɛ dugukolodenninw na kɔgɔji cɛma, u tun b'o yɔrɔw fana halaki, ka mɔgɔw bila jɔnya la.

¹²Nga teriyasɔbɛ tun be olu ni u jɛnɲɔgɔnw cɛ, ani mɔgɔw fɛ minw jigi lanin b'u kan. U ye yɔrɔsurun ani yɔrɔjan masacɛw mara. Mɔgɔ minw y'u koo mɛn, u bɛɛ tun bɛ siran u ɲa kosɔbɛ.

¹³U y'u diyanamɔgɔw sigi kuntigiya la, ani ka dɔw jigi ka bɔ yen. U ka fanga boɲana kosɔbɛ.

¹⁴O bɛɛ n'a ta, u cɛma, mɔgɔ si ma masafugulan biri, mɔgɔ si ma masafani don ko a b'a yɛrɛ boɲa.

¹⁵U tun ye jamana ɲamɔgɔw jɛnkulu dɔ sigi jamana kɔnɔ. Mɔgɔ kɛmɛ saba ni mugan tun b'a kɔnɔ. U tun be ɲɔgɔn ye loon o loon ka kuma jama ka koɲaw kan, bɛɛ ka hɛrɛ kosɔn.

¹⁶Saan o saan, u be fanga kalifa mɔgɔ kelen ma, ko a k'u mara, a be kɛ u ka jamana bɛɛ kunna. Bɛɛ tun be mɛnni kɛ ale kelenpe fɛ, keliya tun te yen, ɲagoya tun te yen.

¹⁷Zuda ye Akɔsi deen Zan dencɛ Epolɛmu ni Eleyazari dencɛ Zasɔn woloma k'u ci Ɔrɔmu, ko u ka teriya don ka bɛn ni Ɔrɔmukaw ye.

¹⁸Zuda tun b'a fɛ ka zuwifuw hɔrɔnya, bari u y'a ye ko girɛkiw tun b'a la ka Isirayɛlidenw kɛ jɔɔnw ye.

¹⁹Epolɛmu ni Zasɔn ye Ɔrɔmu sira minɛ, u ye taamajan kɛ kosɔbɛ. U sera yen tuma min na, u donna jamana ɲamɔgɔw jɛnkulu fɛ ka kuma n'u ye ko:

²⁰«Zuda Makabe n'a badenw, ani zuwifu tɔw y'an ci aw fɛ ka bɛɛn ni hɛrɛ ɲini n'aw ye, ani k'a ɲini aw fɛ, aw k'an jati aw jɛnɲɔgɔnw n'aw teriw ye.»

²¹O kuma nin diyara jɛnkulu nin ye.

²²U ye bataki sɛbɛn walaka ziralaman fila kan k'u ci Zeruzalɛmu janko ka zuwifuw hakili jigi a la k'u bɛnna k'u be kɛ ɲɔgɔn teriw ye, ko u tena ɲɔgɔn kɛlɛ. O bataki filɛ nin ye:

²³«Hɛrɛ ka kɛ Ɔrɔmukaw ni zuwifuw cɛ, kɔgɔji ni dugukolo kan fɔɔ tuma bɛɛ! U ka kisi u juguw ma, kɛlɛ yɔrɔ ka jaɲa u la!

²⁴Nga ni kɛlɛ dɔ wilila Ɔrɔmukaw kama, walima a jɛnɲɔgɔnw dɔ kama, yɔrɔ o yɔrɔ a ka mara la,

²⁵zuwifuw ben'a dɛmɛ o kɛlɛ la n'u dusu bɛɛ ye ka kɛɲɛ ni o waati cogo ye.

²⁶Ɔrɔmukaw b'a ɲini zuwifuw fɛ ko u kana suman di a juguw ma, walima kɛlɛkɛminanw, walima wari, walima kurunw, k'u kana o si dɔndɔ u ma fana. U ka kan ka kɛ kantigiw ye, ani u tena foyi fana minɛ u fɛ.

²⁷O cogo kelen na, ni dɔw wilila zuwifuw kama k'u kɛlɛ, Ɔrɔmukaw bena u dɛmɛ kɛlɛ la n'u dusu bɛɛ ye, ka kɛɲɛ ni o waati cogo ye.

²⁸Ɔrɔmukaw b'u daa di zuwifuw ma ko u tena suman di u juguw ma, walima kɛlɛkɛminanw, walima wari, walima kurunw. U bena kɛ kantigiw ye fana.

²⁹«Ɔrɔmukaw bɛnna ni zuwifuw ye ten.

³⁰Ni u y'a latigɛ ɲɔgɔn fɛ sini ko dɔ ka fara bɛɛn nin kan, walima ko dɔ ka bɔ a la, u bena se k'o kɛ u sago la, fɛɛn min mana fara a kan, walima min mana bɔ a la, u ka kan k'o bato.

³¹Masa Demetiriyusi ye kojugu minw kɛ zuwifuw la k'u sigɛn, an ye sɛbɛ ci a ma o la ko: ‹Mun na e y'i fanga digi zuwifuw kan ten? Minw ye an teriw n'an jɛnɲɔgɔnw ye?

³²N'u y'i jalaki tugu, an bena u dɛmɛ, an bena i kɛlɛ kɔgɔji ni dugukolo kan.› »