Read dyu MAKABEW FILANAN 10 Bible Online

MAKABEW FILANAN 10 - dyu bible

MAKABEW FILANAN 10

¹Matigi ye Makabe n'a tɔɲɔgɔnw dɛmɛ, u sera ka Alabatosoba ni dugu minɛ tugu.

²Lonanw tun ye sarakabɔyɔrɔ minw lɔ forobayɔrɔ la, a ye olu ci, ani sɔnnikɛyɔrɔw.

³U ye Alabatosoba saniya ka ban tuma min na, u ye sarakabɔyɔrɔ wɛrɛ lɔ. U ye tabɛrɛ kɛ ka tasuma mana, ani ka saraka bɔ, min tun ma se ka kɛ saan fila tɛmɛnin kɔnɔ. U ye wusulan jɛni, ka fitinɛw mana, ani ka burukunw bila.

⁴Landa nunu kɛnin kɔ, u lara ka biri ka Matigi dali ko a kana o kojugu nunu ɲɔgɔn la u kan tugu, ko n'a sɔrɔla ko u ye hakɛ dɔ kɛ, a k'u ladi cogo nɔgɔman na, ko a kana u don siya wɛrɛw bolo, a tɔgɔ cɛnbaga, banbagatɔ mɔgɔjugu nunu bolo.

⁵Alabatosoba nin saniyalon tun bɛnn'a nɔgɔlon ɲɔgɔn ma siya wɛrɛw fɛ, o kɔrɔ *Kisilewu kalo tile mugan ni duurunan loon.

⁶U ye tile seegi kɛ ni nisɔndiya ye Gwatakɔrɔsigi ɲanagwɛ kɛcogo la, k'u hakili to a la ko a ma mɛn u ye Gwatakɔrɔsigi ɲanagwɛ loonw kɛ k'u to kuluw kan, ani kuluwow kɔnɔ i n'a fɔ kongosogow.

⁷O le kosɔn, u ye furaburuw ta, ni yiribolokɛnɛw, ani tenfuraburuw, ka Ala tanu ni dɔnkiliw ye, ale min y'a kɛ a batoso saniyako kɛra ka dafa.

⁸U y'a latigɛ ka bɛɛn a la ko saan o saan, zuwifuw bɛɛ bena loon nunu bato.

⁹Ayiwa, Antiyokusi ka sayako kɛra ten, u tun be min wele fana ko Epifani.

¹⁰Sisan an bena dɔ fɔ Alaɲasiranbali nin dencɛ Antiyokusi Epatɔri ka koo la. A ka kɛlɛw ye bɔnɛ minw lase, k'o kumababaw fɔ.

¹¹A ye fanga ta dɔrɔn, a ye Liziyasi tɔgɔla dɔ bila a ka koow kunna. Liziyasi nin tun ye Siriba ni Fenisi maraw kuntigiba ye.

¹²Min ye Potoleme ka koo ye, n'u b'a wele fana ko Makirɔn, ale lo kɔnna ka kotilennin kɛ zuwifuw ye. Bari, u tun bagara u ma. Ale jijara k'u mara hɛrɛ la.

¹³O la, masacɛ ka mɔgɔsɔbɛw tagar'a jalaki Epatɔri ɲafɛ. Tuma caaman yɛrɛ, u tun b'a wele ko janfamɔgɔ. Bari, Filometɔri tun ye Sipɔrɔ jamana kalifa a ma, nga a y'o yɔrɔ to ka taga fara Antiyokusi Epifani kan. A tun te sera k'o lɔyɔrɔba nin koo ɲa tugu ni kunkɔrɔta ye minkɛ, a y'a yɛrɛ faga ni fura ye ka diɲɛ to.

¹⁴Gɔriziyasi kɛra Idume mara kuntigi ye tuma min na, a ye kɛlɛdenw ta baara la. A tun be zuwifuw kɛlɛ ni kuun bɛrɛ t'a la.

¹⁵O waati kelen na, Idumeka minw tun be dugu yɔrɔ barikamanw kunna, olu tun be zuwifuw tɔɔrɔ. Mɔgɔkolon minw tun mana gwɛn ka bɔ Zeruzalɛmu dugu kɔnɔ, u tun be olu ladon u fɛ, ka to ka kɛlɛ tigɛ.

¹⁶Makabe n'a ka kɛlɛdenw ye Ala dali kɛnɛ kan k'a ɲini a fɛ ko a ka to n'u ye. O kɔ, u ye taama daminɛ ka taga Idumekaw ka dugu yɔrɔ barikamanw kama.

¹⁷U y'u kɛlɛ ni barika ye k'u ka yɔrɔ nunu minɛ. Mɔgɔ minw bɛɛ tun be kɛlɛ kɛra dugu laminikogo kan, u ye olu gwɛn. Minw donna u bolo, u ye olu kaan tigɛ. U ye mɔgɔ minw faga, o sera mɔgɔ waa mugan (20 000) ni kɔ ma.

¹⁸Mɔgɔ waa kɔnɔntɔn (9 000) ɲɔgɔn tagara dogo yɔrɔ barikaman fila dɔ la. Mɔgɔ makoya be bɔ fɛɛn minw bɛɛ la, ka se ka to yen n'u datugunin lo u juguw fɛ, o bɛɛ tun be yen.

¹⁹Makabe ye Simɔn ni Yusufu to yen, ani ka Zase n'a ka mɔgɔw fara u kan, mɔgɔda min ka ɲi, k'u datugu yen. A tun gwannin be yɔrɔ minw na, ale yɛrɛ tagara o yɔrɔw la.

²⁰Nga wariko tun ka di Simɔn ka mɔgɔw ye kojugu, o kɔlɔsibaga nunu dɔw sɔnna dugu barikaman kɔnɔ mɔgɔ dɔw ye warigwɛkuru waa bi wolonwula (70 000) di u ma, u y'a to dɔw bɔra ka boli.

²¹Koo nin kibaruya sera Makabe ma tuma min na, a ye kɛlɛdenw kuntigiw lajɛn ka kojugukɛla nunu jalaki ko u y'u balimaw feere. Bari, u tun y'u juguw labila wari kosɔn.

²²O la, a ye janfamɔgɔ nunu faga, o kɔ dɔrɔn, a ye dugu yɔrɔ barikaman fila nunu minɛ.

²³A tun be see sɔrɔ a ka kɛlɛw bɛɛ la. A ye mɔgɔ waa mugan ni kɔ halaki dugu yɔrɔ barikaman fila nunu kɔnɔ.

²⁴Zuwifuw tun sera Timote min kɔrɔ ka tɛmɛ, ale ye lonanw ta caaman kɛlɛdenya la. A ye soo caaman lajɛn ka bɔ Azi jamana na. A gwɛrɛla n'a ka kɛlɛdenw ye Zude mara la janko ka yɔrɔ nin minɛ kɛlɛkɛminanw barika la.

²⁵Makabe n'a ka mɔgɔw ye buguri kɛ u kuun na, k'u cɛɛ siri ni dusukasifani ye, ka to ka Ala daali Timote gwɛrɛtuma na.

²⁶U birila duguma sarakabɔyɔrɔ juu la, n'u be Ala daalila ko a ka olu dɛmɛ, ko a ka kɛ u juguw jugu ye, ani u kɛlɛɲɔgɔnw kɛlɛbaga ye ka kɛɲɛ n'a ka sariya kɔnɔnakuma gwɛninw ye.

²⁷U tilara dalili la tuma min na, u ye kɛlɛkɛminanw ta ka gwɛrɛ ka bɔ dugu kɔnɔ ka se yɔrɔjan. U surunyana u juguw la tuma min na, u lɔra.

²⁸Dugugwɛdafɛ kɛnɛ citɔ, u ye kɛlɛ daminɛ. Zuwifuw bolo lanin tun be u ka jagwɛlɛya kan see sɔrɔko la, ani Matigi kan, u ka koo bɛɛ tonin be min bolo. Siya wɛrɛw kɔni fɛ, kɛlɛ dusudimi le tun b'u samana ka taga dɔrɔn.

²⁹Kɛlɛ tun juguyara kosɔbɛ tuma min na, u juguw ye cɛɛ ɲanaman mɔgɔ duuru natɔ ye ka bɔ sankolo la, u tun be soow kan, soow masirifɛnw tun ye sanu ye. U bilara zuwifuw ɲa.

³⁰U ye Makabe bila u cɛma k'a tanga n'u ka kɛlɛkɛminanw ye, a ma mandimi. U tun be zuwifu kɛlɛɲɔgɔnw bonbonna ni biɲɛ ni sanpɛrɛn ye fɔɔ olu ɲaa tun te sera ka yeli kɛ, u hakili ɲagamina, u bɛɛ bolila u kunfɛ ka jɛnsɛn pewu!

³¹Kɛlɛden sennatigi mɔgɔ waa mugan ni kɛmɛ duuru (20 500), ani sotigiw mɔgɔ kɛmɛ wɔɔrɔ kaan tigɛra.

³²Timote yɛrɛ bolila ka taga don yɔrɔ barikaman dɔ kɔnɔ min tun sutaranin be kosɔbɛ, n'o be wele Gazara. Kereyasi tun be min kunna.

³³Nga Makabe n'a ka mɔgɔw y'a datugu tile naani kɔnɔ nisɔndiya la.

³⁴Mɔgɔ minw tun b'o yɔrɔ la, olu jigi tun be yɔrɔ nin sutarako kan minkɛ, u tora ka Ala nɛni, u ma kumajugu fɔ dabila fana.

³⁵Tile duurunan loon, kɛnɛ citɔ, kanbelen mɔgɔ mugan dimina kosɔbɛ Makabe ka kɛlɛdenw cɛma, Ala nɛniko kama. U girinna ka taga yɛlɛ dugu laminikogo kan ni jagwɛlɛya ye. U dimininba ye mɔgɔ o mɔgɔ sɔrɔ, u y'o faga.

³⁶Dɔ wɛrɛw yɛlɛla mɔgɔ datugunin nunu kama o cogo kelen na ni faan wɛrɛ ye, ka sangasow jɛni ka lɔgɔw mana, ka Ala nɛnibagaw ɲanaman jɛni. Dɔ wɛrɛw fana ye daaw kari k'a to kɛlɛden tɔ nunu donna, ka kɔn ka dugu minɛ.

³⁷Timote tun dogora jidingɛlakolon dɔ kɔnɔ, nga u y'a ye k'a kaan tigɛ, k'a balima Kereyasi kaan tigɛ fana, ani Apolofani.

³⁸O koo nunu kɛnin kɔ, u y'a daminɛ ka dɔnkiliw la ka Matigi tanu n'o ye. A tun ye koɲuman kɛ Isirayɛlidenw ye kosɔbɛ, ani k'a kɛ u sera u juguw kɔrɔ. U y'a fo o le kosɔn.