Read dyu MAKABEW FILANAN 11 Bible Online

MAKABEW FILANAN 11 - dyu bible

MAKABEW FILANAN 11

¹Waati dɔɔni dɔrɔn o kɔ, Liziyasi, min tun be mara koɲaw kunna, n'ale ye «masacɛ balima» ye, a mɔna min kɔrɔ, ale ye koo kɛnin nunu mɛn, o digir'a la haali.

²A ye kɛlɛden sennatigi mɔgɔ waa bi seegi (80 000) ɲɔgɔn lajɛn, n'a ka sotigiw bɛɛ, ka taama daminɛ ka taga zuwifuw kama. A ka miiri tun ye ka Zeruzalɛmu kɛ girɛkiw ka dugu ye,

³ka wari sarata sigi Alabatosoba kama i n'a fɔ siya wɛrɛw ka josow, ani ka sarakalasebagaw kuntigiya kɛ feerefɛn ye saan o saan.

⁴A ma Ala ka sebagaya jati fewu, a y'a yɛrɛ boɲa k'a jigi la a ka kɛlɛden sennatigiw caaman, n'a ka sotigi waa caaman, ani a ka sama bi seegi kan.

⁵A sera Zude mara la tuma min na, a gwɛrɛla Bɛtisuri yɔrɔ barikaman na, kilomɛtɛrɛ mugan ni seegi ɲɔgɔn be ale ni Zeruzalɛmu cɛ. A y'a kɛlɛ kosɔbɛ.

⁶Tuma min na Makabe n'a ka mɔgɔw y'a mɛn ko Liziyasi tun ye dugu barikaman nunu datugu, u jɛnna ni jama ye ka Matigi dali ni ɲaji ni ŋunankan ye, ko a ka mɛlɛkɛɲuman ci Isirayɛlidenw fɛ k'u kisi.

⁷Makabe yɛrɛ le kɔnna ka kɛlɛkɛminan ta. A ye tɔɔ nunu ladi ko u k'u yɛrɛ bila farati la ni ale ye janko k'u balimaw dɛmɛ. Olu girinna ka taga ni ŋaniya kelen ye.

⁸K'u to Zeruzalɛmu masurun na halibi, sotigi dɔ y'a yɛrɛ yira u la, ka bila u ɲa. Fani gwɛman b'a kaan na, n'a be kɛlɛkɛminan sanulamanw fifara.

⁹O la, u bɛɛ jɛnna ka makaritigi Ala fo, u y'a ye ko fangaba donna u la. Hali mɔgɔ, u labɛnnin tun lo k'a sɔgɔ, o dama tɛ, hali sogo farimanw, hali nigɛkogow.

¹⁰U labɛnnin gwɛrɛla kɛlɛ kama, dɛmɛbaga dɔ sɔrɔla u la ka bɔ Sankolo la. Matigi tun makarila u la.

¹¹U girinna u juguw kan i n'a fɔ jaraw. U ye kɛlɛden sennatigi mɔgɔ waa tan ni kelen (11 000) nii bɔ kɛlɛ la, ani sotigi mɔgɔ waa kelen ni kɛmɛ wɔɔrɔ (1 600), k'u juguw ka kɛlɛdenw bɛɛ wajibiya ka boli.

¹²U caaman mandiminin le bɔsira ka taga k'u ka kɛlɛkɛminanw to yen. Liziyasi yɛrɛ y'a yɛrɛ bɔsi ka boli ni maloya ye.

¹³Nga Liziyasi tun ye hakilitigi ye minkɛ, a miirila kɛlɛ nin la, min tun cɛnn'a bolo, sisan sisan. A y'a faamu ko mɔgɔ si te se eburuw kɔrɔ, bari Setigi Ala be n'u ye. O la, a ye cidenw bila

¹⁴ka taga bɛɛn kuma fɔ u ye ani k'a daa di ko a bena masacɛ wajibiya fana ka kɛ u teri ye.

¹⁵Liziyasi ye fɛɛn min bɛɛ fɔ, Makabe sɔnna o bɛɛ ma jama ka hɛrɛ kosɔn. Makabe ye fɛɛn min bɛɛ sɛbɛ k'a ci Liziyasi ma zuwifuw kosɔn, masacɛ sɔnna o la.

¹⁶Liziyasi ye bataki min ci zuwifuw ma, a sɛbɛnna o kɔnɔ ko: «Ne, Liziyasi be zuwifuw bɛɛ lajɛnnin fo!

¹⁷Aw ye sɛbɛ min di aw ka ciden Zan ni Abusalɔn ma ko ka n'o di ne ma, o ɲɔgɔn sɛbɛnnin be ɲafɛ. U ye ne dali ko koo minw fɔnin b'a kɔnɔ, ko ne ka n fɛta fɔ u la.

¹⁸O la, min tun ka kan ka fɔ masacɛ ye, n y'o fɔ a ye. O y'a sɔrɔ ale yɛrɛ sɔnna ko minw be se ka yɛlɛma, k'olu bena yɛlɛma.

¹⁹O la sa, ni aw ma wili anw ka jamana kama, ne bena jija fana ka baara kɛ aw ka hɛrɛ kosɔn loon nataw la.

²⁰A koo misɛnmanw faan fɛ, ne y'a fɔ aw ka cidenw ni ne ka mɔgɔw ye ko u ka kuma n'aw ye o la.

²¹Ne ka duba be aw ye. Sɛbɛ nin labɛnna girɛkiw ka masaya saan 148nan na Diyosikɔri kalo [1] tile mugan ni seeginan loon.»

²²Masacɛ ka bataki kɔnɔnakuma filɛ nin ye: «Ne, masacɛ Antiyokusi be n balima Liziyasi fo!

²³Kabini an faa tagara sukɔrɔw fɛ, an yɛrɛ tun b'a fɛ an ka mara mɔgɔw ka sigi ɲasuma na, u ka banba n'u yɛrɛw ka koo ye.

²⁴An y'a mɛn ko zuwifuw tun te sɔnna ka girɛkiw ka landaw kɛ, an faa tun be min fɛ, ko olu yɛrɛ ka balocogo le tun ka d'u ye, k'o kosɔn, u be sira dali, u ka se k'u ka sariyaw bato.

²⁵O la, an t'a fɛ siya nin ka gwɛlɛya sɔrɔ fana minkɛ, an y'a latigɛ ko Alabatosoba ka segi u ma, ani ko u ka se ka taama ka kɛɲɛ n'u bɛmaw ka landaw ye.

²⁶O la, ne b'a ɲini e fɛ ko i ka mɔgɔ dɔ ci u fɛ, ani ka bɛɛn ɲini n'u ye janko, an be bolo min kan, u k'o lɔn. U jigi ka sigi, u ka to ka janto u yɛrɛ ka koow la hɛrɛ la.»

²⁷Masacɛ ye bataki min ci zuwifu jama ma, a sɛbɛnna o kɔnɔ ko: «Ne, masacɛ Antiyokusi be zuwifuw ɲamɔgɔw ka jɛnkulu ni zuwifu tɔw fo!

²⁸Ni aw ka kɛnɛ, o le ye an ka laɲini ye. An yɛrɛ ka kɛnɛ.

²⁹Menelasi y'a fɔ an ye ko aw b'a fɛ ka kɔsegi aw fɛ yen janko ka janto aw ka koow la.

³⁰Mɔgɔ minw bɛɛ bena segi u fasow la yanni Zantiki [2] kalo tile bi sabanan loon, u ka l'a la ko foyi tena kɛ u la.

³¹Aw zuwifuw bena se k'aw ka dumuniw kɛ aw ka landaw cogo la, k'aw ka sariyaw bato i n'a fɔ fɔlɔ la. Ni aw dɔ filila koo dɔw la lɔnbaliya kosɔn, u ten'a tɔɔrɔ cogo si la o kosɔn.

³²Ne ye Menelasi fana ci k'aw hakili sigi.

³³Ne ka duba be aw ye. Sɛbɛ nin labɛnna girɛkiw ka masaya saan 148nan na Zantiki kalo tile tan ni duurunan loon.»

³⁴Ɔrɔmukaw fana ye bataki ci zuwifuw ma, o kɔnɔnakuma filɛ, ko: «Ɔrɔmukaw ka lasigidenw, Kɛntusi Mɛmiyusi, ni Titusi Maniliyusi, ani Maniyusi Sɛriziyusi be aw zuwifuw fo!

³⁵Masacɛ balima Liziyasi sɔnna aw ka koo minw na, anw fana sɔnna o la.

³⁶A y'a ye ko koo minw ka kan ka fɔ masacɛ ye, ni aw y'o sɛgɛsɛgɛ ka ban, aw ka mɔgɔ dɔ ci an ma joona janko o ka yira masacɛ la cogo bɛnnin na min bena kɛ aw ma hɛrɛ ye. Bari an be tagara Antiyɔsi.

³⁷O la, aw ye teliya ka mɔgɔw ci an ma janko an fana k'aw ka miiriya lɔn.

³⁸An ka duba be aw ye. Sɛbɛ nin labɛnna girɛkiw ka masaya saan 148nan na Zantiki kalo tile tan ni duurunan loon.»