Read dyu MAKABEW FILANAN 14 Bible Online

MAKABEW FILANAN 14 - dyu bible

MAKABEW FILANAN 14

¹Saan saba tɛmɛnin kɔ, Zuda n'a ka mɔgɔw y'a mɛn ko Selekusi dencɛ Demetiriyusi tun sera Tiripoli kurun lɔyɔrɔ la ni kɛlɛbolo barikaman ye, ani kurunw.

²A tun ye jamana minɛ, ka Antiyokusi halaki, ani Liziyasi, a mɔna min kɔrɔ.

³Alikime tɔgɔla dɔ tun be yen. Fɔlɔ la, a tun ye sarakalasebagaw kuntigi ye, nga a tugura k'a yɛrɛ nɔgɔ ni girɛkiw ka landaw ye muruti tuma na. A y'a faamu ko a tun tena se ka kisi cogo si la, walima ka don Ala ka sarakabɔyɔrɔ la tugu.

⁴O la, a tagara masacɛ Demetiriyusi fɛ girɛkiw ka masaya saan 151nan ɲɔgɔn na ni masafugulan sanulaman ye, ani ka tenfuraburu fara o kan a tun ka kan ka minw di ka kɛɲɛ ni Alabatosoba landa ye. Nga a ma foyi fɔ o loon na.

⁵Demetiriyusi n'a ladibagaw y'a wele ɲɔgɔnye la tuma min na k'a ɲininga zuwifuw ka miiriyaw n'u ka kolatigɛninw na, o kɛra waatiɲuman ye Alikime fɛ ka se k'a ka nalomanyako kɛ.

⁶A y'a jaabi ko: «U be zuwifu minw wele ko Asideɲɛw, [1] Zuda Makabe le be olu ɲafɛ. U be to ka kɛlɛ wili, ani ka mɔgɔw kɔnɔnasu, u te mara to ɲasuma na.

⁷Olu sababu la, ne yɛrɛ fana gwɛnna ka n niin bɔ cɛɛn na. O ye sarakalasebagaw kuntigi ka baara koo ye. Ne nakun yan, o ye

⁸masacɛ ka hɛrɛ sɔrɔko ye. Ne be hami o le la fɔlɔ sɔbɛ la. Nga ne be miiri anw fasodenw ka hɛrɛ la fana. Bari ne ye mɔgɔ minw tɔgɔ fɔ sisan, olu ka yada b'an ka siya bɛɛ bila tɔɔrɔba la.

⁹O la masacɛ, ne b'i dali i ka sɛgɛsɛgɛli kɛ kosɔbɛ koo nin na, ka sɔn ka janto an ka jamana n'an ka siya kisiko la ka bɔ tɔɔrɔ nin na. Bari, i be to k'i ka ɲumanyaba yira bɛɛ la.

¹⁰Ka Zuda to sii la, jamana te na to hɛrɛ la.»

¹¹A tilara kuma na dɔrɔn, Zuda koo ka go masacɛ ka mɔgɔsɔbɛ tɔ minw ye, olu banbana ka Demetiriyusi dusu gwan.

¹²O yɔrɔnin kelen, ale ye Nikanɔri woloma, min tun ye kɛlɛkɛsamaw kuntigi ye. A y'a kɛ Zude mara kuntigi ye, k'a ci yen

¹³ko a ka Zuda faga, k'a ka mɔgɔw jɛnsɛn, ani ka Alikime sigi sarakalasebagaw kuntigibaya la, Alabatosoba kunna, min ka bon ni batolikɛsow bɛɛ ye diɲɛ kɔnɔ.

¹⁴Zude mara Alaɲasiranbali minw tun bolila Zuda ɲa, olu caaman donna Nikanɔri ka kɛlɛdenw cɛma. U tun be miiri ko zuwifuw ka bɔnɛ n'u ka tɔɔrɔw bena kɛ olu ka nafa ye.

¹⁵Zuwifuw y'a mɛn ko Nikanɔri be gwɛrɛla, ko Alaɲasiranbali wilila kɛlɛ kama. U ye buguri kɛ u yɛrɛ kuun na, ka Ala dali, min y'u ka siya woloma k'a kɛ a ta ye kudayi, min be to k'a ka mɔgɔw dɛmɛ ni taamasiɲɛ yetaw ye.

¹⁶U kuntigi ko u ka wili ka taga. O yɔrɔnin kelen, u wilila ka taga kɛlɛ kɛ n'u juguw ye dugudennin dɔ gɛrɛfɛ min tɔgɔ ko Deso. [2]

¹⁷Zuda baden Simɔn tun ye kɛlɛ daminɛ ni Nikanɔri ye, nga Simɔn juguw barila ka na, o kosɔn, u tun ser'a kɔrɔ dɔɔni.

¹⁸O bɛɛ n'a ta, Zuda ka kɛlɛdenw jaa tun ka gwɛlɛ n'u hakili siginin tun be cogo min na kɛlɛw la, u tun be minw kɛ u faso kosɔn, Nikanɔri y'o mɛn tuma min na, a sigara kɛlɛ nin la n'a bena se.

¹⁹O la, a ye Pozidoniyusi, ni Tewodɔti, ani Matatiyasi ci ka taga bɛn ni zuwifuw ye.

²⁰Zuda y'u ka fɔtaw sɛgɛsɛgɛ kosɔbɛ tuma min na, a y'o ɲafɔ a ka kɛlɛdenw ye. U bɛɛ y'a yira ni miiriya kelen ye, k'u sɔnna bɛɛn nin na.

²¹U ye loon sigi ko kuntigiw bena ɲɔgɔn ye o loon na danna. Wotoro dɔw gwɛrɛla ka bɔ faan dɔw la, u ye mɔgɔbasigilanw bila.

²²Zuda tun ye mɔgɔw sigi yɔrɔɲumanw na, kɛlɛkɛminanw be minw bolo n'u labɛnnin be ka bɔ ni u juguw barila ka janfako dɔ kɛ. Nga ɲɔgɔnye nin labanna bɛɛn kɔnɔ.

²³Nikanɔri tora Zeruzalɛmu, a ma kotilenbali si kɛ. Jamakulu minw tun nan'a kɔ, a y'o labila.

²⁴Zuda tun be n'a ye tuma bɛɛ, bari a koo tun ka di cɛɛ nin ye kosɔbɛ.

²⁵A y'a ladi ko a ka furu ka deenw sɔrɔ. Zuda furu la, k'a daminɛ k'a sii dagamu hɛrɛ la.

²⁶Alikime y'a ye ko Nikanɔri ni Zuda bɛnna kosɔbɛ. O la, a y'u ka bɛɛn sɛbɛ dɔ sɔrɔ ka ta'a fɔ Demetiriyusi ye ko: «Nikanɔri be koo dɔw kɛra minw te bɛn ni fanga sariyaw ye. A ko Zuda bena ale nɔɔ ta, ale do ye ele ka mara kɛlɛɲɔgɔn yɛrɛ ye.»

²⁷Mɔgɔkolon nin ka galon ye masacɛ dusu wili. A ye sɛbɛ ci Nikanɔri ma k'a fɔ a ye ko a ma sɔn bɛɛn nin la fewu, ko a ka Makabe siri ni jɔrɔkɔw ye k'a ci Antiyɔsi joona joona.

²⁸Nikanɔri ye bataki nin sɔrɔ tuma min na, a hakili ɲagamina. Bari, ka bɛɛn cɛn ni mɔgɔ jalakibali ye, o tun bena digi a la.

²⁹Nga a tun te se ka koo kɛ ni masacɛ sago tɛ minkɛ, o la, a tora ka waatiɲuman ɲini ka cira nin ɲanabɔ ni cekuya ye.

³⁰Makabe fana y'a kɔlɔsi k'a ye ko Nikanɔri sumana ale faan fɛ, ko a tun be to k'a minɛ ka ɲa cogo min na, ko a t'o kɛ tugu. A y'a miiri k'o kɔrɔ te koɲuman ye. O la, a y'a ka mɔgɔw caaman lajɛn, ka taga dogo janko k'a yɛrɛ bɔsi Nikanɔri bolo.

³¹Nikanɔri y'a ye ko Zuda y'ale janfa minkɛ, a tagara Ala ka soba senuman nin na. O y'a sɔrɔ sarakalasebagaw tun be saraka bɔra a cogo la. A y'a fɔ u ye ko u ka Zuda don ale bolo.

³²Olu kalila k'a fɔ ko a be mɔgɔ min yɔrɔ ɲinina, olu t'o yɔrɔ lɔn. O la,

³³Nikanɔri y'a kinibolo sin Alabatosoba ma ka kali k'a fɔ ko n'u ma Zuda sirinin don ale bolo, ko ale bena Alabatosoba nin ci pepewu ka sarakabɔyɔrɔ halaki, ani ka Diyɔnizɔsi batoso ɲanaman lɔ yan yɔrɔ la.

³⁴O fɔnin kɔ, a y'a ka sira minɛ. Nga sarakalasebagaw y'u bolow sin Sankolotigi ma, min y'an ka siya dɛmɛ kɛlɛ la tuma bɛɛ, k'a dali ko:

³⁵«Matigi, e min mako te foyi la, a diyara i ye i batoso ka kɛ an cɛma, e siginin be min kɔnɔ.

³⁶O la sisan, Matigiɲuman, e min ɲɔgɔn te yi, i ka soo nin mara kudayi, foyi kan'a nɔgɔ tugu, ale min saniyara a ma mɛn.»

³⁷Zeruzalɛmu cɛkɔrɔbaw cɛma, mɔgɔ dɔ tun be yen min tɔgɔ ko Arazisi. Dɔ ye ale koo fɔ Nikanɔri ye. Cɛɛ nin sɔbɛ tun donnin be a ka siya koo la, a tɔgɔɲuman bɔra kosɔbɛ. U tun b'a wele zuwifuw faa, a ka kanuya kosɔn olu faan fɛ.

³⁸Bari murutili daminɛwaati la, u tun y'a jalaki ko a be to ka zuwifuw ka landaw kɛ. O la, a tun y'a yɛrɛ saraka zuwifuya tangako la kosɔbɛ.

³⁹Juguya min tun be Nikanɔri kɔnɔ zuwifuw faan fɛ, a tun b'a fɛ k'o yira minkɛ, a ye kɛlɛden mɔgɔ kɛmɛ duuru ni kɔ ci ko ka taga Arazisi minɛ.

⁴⁰Bari a tun be miiri ko n'a y'ale minɛ, k'o bena digi zuwifuw la haali.

⁴¹A ka kɛlɛdenw tun be ɲini ka sangaso minɛ. U tun be luda karila, a tun fɔra u ye ko u ka tasuma don sangaso dondaw la. Arazisi y'a ye ko boliyɔrɔ te yen minkɛ, a y'a ka murujan sin a yɛrɛ ma.

⁴²Ka sa kunkɔrɔta la, o tun ka fisa ale fɛ ka don kojugukɛlaw bolo, u k'a dɔgɔya min man kan n'a ka kunkɔrɔta ye.

⁴³Nga kɛlɛ gwankojugu fɛ, a ma se k'a yɛrɛ faga. Kɛlɛdenw tun be girinna ka don soo kɔnɔ tuma min na, a bolila dugu laminikogo kan, a ma siga, a y'a yɛrɛ fili jama bolo ni jagwɛlɛya ye.

⁴⁴Bɛɛ girinna ka bɔ kɔfɛ, a benna yɔrɔlakolon cɛmancɛ la.

⁴⁵A tun be ninakilila halibi. Dusugwɛlɛya kosɔn, a wilila, joli be woyora, a tɔɔrɔnin be kosɔbɛ a ka mandiminɔw bolo. A bolila ka jama cɛtigɛ, ka taga yɛlɛ kabakurujan dɔ kan.

⁴⁶A joli bɔnna ka ban, a y'a yɛrɛ nugu minɛ n'a bolo fila ye k'u sama ka fili jama kan. A ye nii tigi dali ko a k'u kɔsegi ale ma loon dɔ. A sara ten.