Read dyu MAKABEW FILANAN 15 Bible Online

MAKABEW FILANAN 15 - dyu bible

MAKABEW FILANAN 15

¹Nikanɔri y'a mɛn ko Zuda n'a ka mɔgɔw be Samari mara la tuma min na, a y'a latigɛ ko a bena u kɛlɛ lafiɲɛlon na, ko farati tena kɛ o la haali dɔɔni.

²Zuwifu minw tun be tugur'a kɔ jagoya la, olu y'a fɔ a ye ko a kana u halaki cogojugu la i n'a fɔ kongofɛnw. Ko Ala min be janto fɛɛn bɛɛ la, ale ye loon min boɲa k'a kɛ a yɛrɛ ta ye ka tɛmɛ loon tɔw kan, ko a k'o kɔlɔsi!

³Nga mɔgɔjugu dafanin nin y'u ɲininga ko yala kuntigi be sankolo la min y'a fɔ ko lafiɲɛlon ka kan ka bato wa.

⁴U y'a jaabi ko Matigi min ye kuntigi ye sankolo la, ale yɛrɛ le y'a fɔ ko loon wolonwulanan ka bato.

⁵Nikanɔri y'u jaabi ko: «Ne fana ye dugukolo kuntigi ye, ne b'a fɔ ko aw ka kɛlɛkɛminanw ta ani ka masacɛ ka baara kɛ.» O bɛɛ n'a ta, a ma se k'a ka kojugu latigɛnin kɛ.

⁶Nikanɔri wilila ni yɛrɛboɲa sifa dɔ ye fɔɔ a k'a latigɛ ko a bena fɛɛn minw sɔrɔ Zuda n'a ka mɔgɔw fɛ, ko a bena see sɔrɔli taamasiɲɛ lɔ n'o ye.

⁷Nga Makabe jigi ma tigɛ fewu. A jigi tun b'a la kosɔbɛ ko Matigi ben'a dɛmɛ.

⁸A y'a ka mɔgɔw jaa gwɛlɛya ko u kana siran Alaɲasiranbali nunu ka kɛlɛ ɲa, ko u ye dɛmɛ min sɔrɔ ka bɔ sankolo la, k'u ka miiri o la ka kɔnɔni kɛ ka l'a la ko halibi Setigi Ala bena see d'u ma.

⁹A y'u jaa gwɛlɛya ni Musa ka sariya ni kiraw ka kuma ye, ani k'u hakili jigi u ka kɛlɛ tɛmɛninw na. A kɛra ten, a ye barikakura don u la.

¹⁰A y'u fari foni ka ban ten minkɛ, a ye Alaɲasiranbali nunu ka mɔgɔkolonya n'u ka janfa lakali u ye k'a ka kuma kuncɛ.

¹¹Zuda y'a ka mɔgɔw kelen kelen bɛɛ labɛn kɛlɛ kama. A m'a fɔ u ye ko u k'u jigi la nigɛkunbɛnnanw ni tamaw kan dɛ, a y'u hakili sigi ni kuma ɲanamanw le ye. A sɔrɔla ka siko dɔ lakali u ye, mɔgɔ ka kan k'a jigi la min kan. A y'u bɛɛ nisɔn diya n'o kuma ye.

¹²Zuda tun ye min ye, o filɛ: A tun ye Oniyasi ye, ale tun ye sarakalasebagaw kuntigi ye ka kɔrɔ. Mɔgɔɲuman tun lo, a ka koo tun man gwɛlɛ, a sɔɔn tun ka ɲi. A tun be kuma ni hakilitigiya ye, a tun delila koɲumankɛ la kabini a denmisɛnman. A y'a bolow kɔrɔta ka Ala dali zuwifuw bɛɛ lajɛnnin ye.

¹³O kɔ, Zuda ye cɛɛ dɔ ye o cogo kelen na, ale kunsigi gwɛnin tun lo. O tigi nin ka kan ni boɲa ye kosɔbɛ. I man'a ye, a lɔn ko mɔgɔbaba lo.

¹⁴Oniyasi ye kuma ta k'a fɔ ko: «Ala ka kira Zeremi filɛ nin ye. A balimaw teri lo, a be Ala dali siɲɛ caaman jama ye, ani Ala ka dugu ye.»

¹⁵O kɔ, Zeremi ye murujan sanulaman sin Zuda ma n'a kinibolo ye, k'a d'a ma n'a b'a fɔra ko:

¹⁶«Ala ka muru nin minɛ, Ala y'a di. I bena i juguw faranfaran n'a ye.»

¹⁷Zuda ka kumaɲumanw ye zuwifuw hakili sigi, k'u jaa gwɛlɛya ani ka cɛya dusu di kanbelen nunu ma. U y'a latigɛ ko u tena to u ka sigiyɔrɔ la, ko u bena sin ka taga u juguw kɛlɛ ni jagwɛlɛya ye, ka bondori kɛ n'u fanga bɛɛ ye. U y'o le ŋaniya, bari Zeruzalɛmu dugu, ni Alasira ani Alabatosoba tun be farati la.

¹⁸Ka hami musow ni denmisɛnw kosɔn, n'u balimaw ani u ka mɔgɔw kosɔn, o tun te koba ye u fɛ. U tun be jɔɔrɔ koo min na kosɔbɛ ka tɛmɛ fɛɛn bɛɛ kan, o ye Alabatosoba ye, min tun kalifara Ala ma.

¹⁹Mɔgɔ minw tun datugunin be Zeruzalɛmu dugu kɔnɔ, olu nii tɔɔrɔnin tun lo kosɔbɛ. Koo min bena kɛ kongo kɔnɔ, u tun be hami n'o ye.

²⁰Bɛɛ tora ka koo nin laban kɔnɔ, min surunyana ka ban. U juguw ka kɛlɛdenw tun lajɛnna ka ban n'u b'u yɛrɛ labɛnna kɛlɛ kama. U tun nana ni samaw ye k'u lɔ yɔrɔɲuman na, sotigiw tun be kɛlɛbolo faan fila la.

²¹Makabe ye kɛlɛden jama nin filɛ, n'u ka kɛlɛkɛminan sifaw bɛɛ, ni samaw ka fariya. A y'a bolo wili sanfɛ ka Matigi dali, min be kabakow kɛ, bari a tun b'a lɔn ko ale be see di mɔgɔw ma minw ka kan n'a ye. A t'o kɛ kɛlɛkɛminanw barika la, nga a b'o latigɛ k'o kɛ dɔrɔn.

²²Zuda tun be Ala dalili, ko: «Matigi, e y'i ka mɛlɛkɛ ci Zude mara masacɛ Ezekiyasi ka tile la, a ye Senakeribu ka kɛlɛdenw mɔgɔ waa kɛmɛ ni bi seegi ni duuru (185 000) halaki.

²³Sankolo kuntigi, mɛlɛkɛɲuman ci an ɲa sisan fana, a ka siranya bila u la kosɔbɛ k'u hakili wili.

²⁴E k'i bolo barikaman kɛ ka mɔgɔ nunu bugɔ, minw nana i tɔgɔ cɛn k'i ka jama kɛlɛ!» Zuda tilar'a ka dalili la ten.

²⁵Nikanɔri ka kɛlɛdenw tora ka gwɛrɛ n'u be buruw fiyɛra, ani ka kɛlɛkɛdɔnkiliw la,

²⁶Zuda ka mɔgɔw ye kɛlɛ daminɛ n'u be Ala dalila ka dɛmɛ ɲini a fɛ.

²⁷U be kɛlɛ kɛra n'u bolow ye, ka to ka Ala dali u dusu la. U ye mɔgɔ waa bi saba ni duuru (35 000) ɲɔgɔn faga. Ala ka sebagaya min yera ten, o y'u nisɔndiya kosɔbɛ.

²⁸Kɛlɛ bannin kɔ, u tun be bɔra kɛlɛ yɔrɔ la ni nisɔndiya ye tuma min na, u ye Nikanɔri suu ye duguma, n'a ka yɛrɛtangafɛnw b'a la.

²⁹U ye mankanba kɛ, ka ɲagami ɲɔgɔn na. U tora ka Setigi tanu u faaw ka kaan na.

³⁰Zuda, min tun be kɔn k'a yɛrɛ bɛɛ di a ka siya kosɔn, ale min y'a ka jamanadenw koo diy'a a yɛrɛ ye kabin'a denmisɛnman, ale ko u ka Nikanɔri kuun tigɛ, k'a bolo fana tigɛ a gaman yɔrɔ la ka taga n'u ye Zeruzalɛmu.

³¹Ale yɛrɛ tagara yen, k'a fasodenw wele ka sarakalasebagaw bila sarakabɔyɔrɔ ɲafɛ, ani ka mɔgɔw ci ka taga dugu yɔrɔ barikaman kɔnɔ mɔgɔw wele.

³²A ye Nikanɔri mɔgɔjugu nin kungolo yira u la, k'o mɔgɔkuntan nin bolo yira fana. A tun ye min sin Setigi Ala ka boon ma ni yɛrɛboɲa ye.

³³A ye Nikanɔri Alaɲasiranbali nɛnkun tigɛ k'a fɔ ko u k'a tigɛtigɛ k'a di kɔnɔw ma, k'a bolo dulon Setigi batoso ɲafɛ k'a ka nalomanya tɔnɔ yira.

³⁴O la, bɛɛ y'u ɲaa kɔrɔta sanfɛ ka Matigi, Setigi fo ko: «Barika ka la Ala ye, min y'a batoso tanga, a ma se ka nɔgɔ!»

³⁵Zuda ye Nikanɔri kungolo dulon yɔrɔ barikaman nin kogo la k'a kɛ taamasiɲɛ gwɛnin ye, bɛɛ ka se k'a ye ko Matigi tun y'u dɛmɛ.

³⁶Jama bɛnn'a la k'a latigɛ ɲɔgɔn fɛ k'o loon nin ka kan ka to u hakili la k'a ɲanagwɛ kɛ saan kalo tan ni filanan tile tan ni saba loon na. Min ye *Adari kalo ye aramekan na, n'o ye Maridose ka loon ɲasigi ye.

³⁷Ayiwa, Nikanɔri ka koo kɛra ten le. Kabini o waati la, Zeruzalɛmu dugu tora eburuw bolo. O la, ne fana bena n ka sɛbɛ ban yan.

³⁸N'a labɛncogo ɲana, n'a koo diyara i ye, o le ye n ka laɲini ye. Ni nafa dɔɔni dɔrɔn le b'a la, n'a ma labɛn ka ɲa kosɔbɛ, ne kɔni ye n seko le kɛ.

³⁹A ma ɲi mɔgɔ fɛ ka duvɛn jalan dama kɛ i ka minnifɛn ye, walima jii dama. Nga ka jii ni duvɛn ɲagami, o ye minnifɛn diman ye! O cogo la fana, ni bataki nin sɛbɛnna ka ɲa, a b'a mɛnbagaw, walima a kalanbagaw nisɔndiya. O la, ne fana bena lɔ yan.