Read dyu MAKABEW FILANAN 5 Bible Online

MAKABEW FILANAN 5 - dyu bible

MAKABEW FILANAN 5

¹Antiyokusi tora k'a yɛrɛ labɛn ka taga Ezipiti jamana kɛlɛ kama a siɲɛ filanan na o waati la.

²Zeruzalɛmu dugu yɔrɔ bɛɛ kɛra kɛlɛden sotigiw ye ka to ka tɛmɛtɛmɛ sanfɛ tile bi naani ɲɔgɔn. Sanu tun be u kannafaniw na, taman tun be u dɔw bolo.

³Sotigi wɛrɛ minw labɛnnin lo kɛlɛ kama, olu fana tun be yen. U tora ka ɲɔgɔn kɛlɛ. Nigɛkunbɛnnanw bɛ fifara, taman caaman, murujanjanw bɔra u forokow kɔnɔ, biɲɛw be bonna, kɛlɛkɛminan sanulamanw tora ka manamanana, ni nigɛduloki sifa bɛɛ.

⁴Bɛɛ tun be Ala daalila k'o fɛɛn yenin nunu ka kɛ taamasiɲɛ ɲanaman ye.

⁵Kibaruya dɔ tun be fɔra ko Antiyokusi sara. K'a sɔrɔ tiɲɛ tun tɛ. O la sa, Zasɔn wilila ka kɛlɛden mɔgɔ waa kelen ɲɔgɔn minɛ ka na cun dugu kan. U donna fanga na ni kogo ye, a laban, u ye dugu minɛ. Menelasi bolila ka taga dogo yɔrɔ barikaman na.

⁶Zasɔn y'a daminɛ k'a fadenw halaki hali a ma hinɛ. A m'a lɔn ko k'i ka siya kɛlɛ ka se u kɔrɔ, k'o ye cɛnniba ye. A be miiri ko ale ser'a juguw le kɔrɔ, k'a sɔrɔ a badenw lo.

⁷O bɛɛ n'a ta, a ma se ka fanga sɔrɔ, a ye maloya le sɔrɔ a ka janfa kosɔn. O kɔ, a bolila ka ta'a dogoyɔrɔ la amoniw ka mara la.

⁸A ka juguya nana laban ni nimisa ye. Arabuw ka masacɛ fariman min tɔgɔ ko Aretasi, ale kɔnna k'a minɛ k'a datugu. O kɔ, a bolila ka dugu ni dugu sɛgɛrɛ, u tun b'a gwɛnna yɔrɔ bɛɛ. A koo goyara bari a ye janfa kɛ sariyaw koo faan fɛ, k'a yɛrɛ kɛ a badenw fagabaga ye a faso la. A ka koo tagara laban Ezipiti jamana na.

⁹A tagara Lasedemone mara la. A tun be miiri ko ale bena sigi Siparitakaw fɛ bari u bɛɛ ye buruju kelen ye. Ale Zasɔn min kɛra sababu ye ka mɔgɔ caaman bɔ u faso la, a sara jamana wɛrɛ la.

¹⁰Ale min sababu la mɔgɔ caaman sara n'u suu ma don, mɔgɔ si ma kasi a sako la, mɔgɔ si m'a sanga kɛ, a ma layɔrɔ sɔrɔ a faaw kaburu la.

¹¹Masacɛ Antiyokusi bɔra o koow kala ma tuma min na, a miirila ko Zude mara bɛɛ le murutira. O la, a bɔra Ezipiti n'a ka kɛlɛdenw ye ka na Zeruzalɛmu. A dimininba i n'a fɔ sogojugu, a nana dugu minɛ.

¹²A ye sira di a ka kɛlɛdenw ma ko n'u ye mɔgɔ o mɔgɔ sɔrɔ, k'u k'a faga hali u kana hinɛ. Ko ni minw dogora boonw kɔnɔ, k'u ka olu kaan tigɛ.

¹³U ye kanbelen ni cɛkɔrɔbaw faga, ka muso ni denmisɛnw halaki. U ye sunguruw ni denɲɛninw kaan tigɛ.

¹⁴Kɛlɛ ye mɔgɔ waa bi seegi (80 000) bɔ Zeruzalɛmukaw la tile saba kɔnɔ. U ye minw bugɔ ka faga, olu tun ye mɔgɔ waa bi naani (40 000) ye. O ɲɔgɔn fana minɛna ka taga jɔnya la.

¹⁵O bɛɛ n'a ta, Antiyokusi ma wasa, a sɔnna ka don Alabatosoba kɔnɔ, min jatinin be ka tɛmɛ diɲɛ kɔnɔ batokɛyɔrɔw bɛɛ kan. Menelasi min ye sariyaw cɛn, k'a faso janfa, o le tun bilanin be a ɲafɛ.

¹⁶A ye Alabatosoba minanw ta n'a bolo nɔgɔninw ye, ani masa tɔw tun nana boɲafɛn minw di, waasa ka boɲa ni karama la Alabatosoba nin kan k'a ka koow sabati.

¹⁷Antiyokusi y'a yɛrɛ boɲa! A m'a lɔn ko dugumɔgɔw ka hakɛ kama lo Setigi dimina waati kunkurunnin kɔnɔ a ka mɔgɔw kɔrɔ. O la, a m'a batoso nin tanga.

¹⁸N'u ka hakɛ cayako tun tɛ, Antiyokusi setɔ, Matigi tun bena ale fana bugɔ, a k'a ka nalomanya nin dabila i n'a fɔ Eliwodɔri. Masacɛ Selekusi tun ye min ci waasa ka na Alabatosoba nafolo jati minɛ.

¹⁹Matigi m'a ka jama woloma Alabatosoba kama, a ka soo le lɔr'a ka jama kama.

²⁰O le y'a to soo nin ye niyɔrɔ sɔrɔ jama ka bɔnɛ na, nga o kɔfɛ, olu ye hɛrɛ sɔrɔ tuma min na, soo nin fana ye hɛrɛ sɔrɔ. Setigi Ala dimina ka soo nin to yen, nga a ni jama nana bɛɛn tuma min na, soo nin ka dawula bɛɛ segir'a ma.

²¹Antiyokusi ye warigwɛ kilo waa bi naani ni seegi (48 000) le ta Alabatosoba kɔnɔ, ka taga joona joona Antiyɔsi. Yɛrɛboɲa tun b'a la kosɔbɛ. A lanin tun b'a yɛrɛ la haali! A ka miiri la, ko ale yɛrɛ be se ka kurun boli dugukolo kan, ani ka taama jii kan.

²²Antiyokusi taatɔ, a ye mɔgɔ dɔw to a kɔfɛ waasa ka zuwifuw tɔɔrɔ. A ye min bila Zeruzalɛmu, o tun ye Firizi mara mɔgɔ dɔ ye min tɔgɔ ko Filipu. A tun ka jugu ka tɛmɛ a sigibaga Antiyokusi yɛrɛ kan.

²³Andoroniki bilara Garizimu kulu kan, ka Menelasi fara olu kan. Ale min tun be to ka wili ni juguya ye a fadenw kama ka tɛmɛ tɔw kan. Zuwifuw koo goyara Antiyokusi ye haali,

²⁴fɔɔ a ye Misi mara kɛlɛkuntigi Apoloniyusi bila ka na Zeruzalɛmu ni kɛlɛden waa mugan ni fila (22 000) ye, ka sira di ko ka cɛɛw bɛɛ faga, ka musow ni denmisɛnw feere.

²⁵A sera Zeruzalɛmu tuma min na, a y'a yɛrɛ kɛ mɔgɔɲuman ye. A ye zuwifuw ka lafiɲɛlon kɔnɔ, u te baara kɛ lonba min na, k'a fɔ a ka kɛlɛbolo ye ko kɛlɛdenw ka taama be yen.

²⁶Mɔgɔ minw bɛɛ bɔra ka taga u filɛ, u ye olu halaki, ale n'a ka kɛlɛdenw girinna ka don dugu kɔnɔ n'u ka kɛlɛkɛminanw ye. U ye mɔgɔ caaman faga.

²⁷Zuda Makabe ni mɔgɔ tan ɲɔgɔn bolila ka taga to kongokolon kɔnɔ. Ale n'a tɔɲɔgɔnw tora yen i n'a fɔ kongosogow, kuluw kan, ka to ka furaburu dɔrɔn ɲimi janko u kana u yɛrɛ nɔgɔ.