Read dyu MAKABEW FILANAN 7 Bible Online

MAKABEW FILANAN 7 - dyu bible

MAKABEW FILANAN 7

¹Waati dɔ la, u ye balima wolonwula dɔw n'u bamuso minɛ. Masacɛ tun b'a fɛ k'u wajibiya ka lɛsogo ɲimi, min ye tanafɛn ye sariya kɔnɔ. A y'u bugɔ ni busan ni misi fasajuruw ye janko o ka se ka kɛ.

²U dɔ ye kuma ta bɛɛ tɔgɔ la k'a fɔ ko: «I b'a fɛ k'an ɲininga mun la? I b'a fɛ ka mun lɔn? An labɛnnin lo ka sa, o ka fisa an ma ni an faaw ka sariyaw cɛnko ye.»

³Masacɛ dimina kosɔbɛ, a ye tangow ni dagaw sigi tasuma kan.

⁴U gwanna kosɔbɛ tuma min na, a ko mɔgɔ min kumana bɛɛ tɔgɔ la, k'u k'ale nɛɛn tigɛ, k'a kuun golo bɔ, ani k'a tigɛw n'a sentigɛw tigɛ a balimaw n'a bamuso ɲana.

⁵U y'a bolo ni seenw tigɛ ka ban tuma min na, masacɛ ko u k'a gwɛrɛ tasuma na, k'a ɲanaman don tango kɔnɔ. A sisi tun be wilila tanko sanfɛ tuma min na, a balimaw n'u bamuso tun be ɲɔgɔn ladila ko u ka sa ni jagwɛlɛya ye. U tun b'a fɔra ko:

⁶ «Matigi Ala be yeli kɛra, siga t'a la, a bena makari an na i ko Musa y'a fɔ dɔnkili la cogo min na ko: ‹Matigi bena makari a ka jɔɔnw na.› »

⁷U fɔlɔ sara ten tuma min na, u nana ni filanan ye halakiyɔrɔ la. U y'a kunsigi bɔnbɔn, k'a kuun golo bɔ, ka sɔrɔ k'a ɲininga ko: «I tena sɔn ka lɛsogo ɲimi yan n'i fari bɛɛ be tigɛtigɛ ka bɔ ɲɔgɔn na wa?»

⁸Nga a y'u jaabi a faaw ka kaan na ko: «Ayi!» O le kosɔn, u ye dɔ nin tɔɔrɔ cogo min na, u y'ale fana tɔɔrɔ o cogo kelen na.

⁹Yanni a nii be bɔ, a y'a fɔ ko: «E mɔgɔjugu nin! E b'an nii bɔ diɲɛ nin na bii, nga diɲɛ Masa bena an kunun an be to hɛrɛ la kudayi, bari an be sa a ka sariyaw le kosɔn.»

¹⁰Ale kɔ, u y'o tɔɔrɔ ɲɔgɔn la sabanan kan. U y'a fɔ ko a k'a nɛnkun bɔ dɔrɔn, a y'o kɛ, k'a bolow jan, a ma yɛrɛyɛrɛ.

¹¹A ye kuma nin fɔ ni jagwɛlɛya ye ko: «Sankolotigi le ye n fari di n ma. N t'o jati fɛɛn ye ale ka sariyaw kosɔn, ne lanin b'a la ko a ben'a segi n ma tugu.»

¹²Masacɛ yɛrɛ ni mɔgɔ minw tun b'a laminina, olu kabakoyara kanbelen nin ka jagwɛlɛya la, min tun t'a ka tɔɔrɔ nunu jati.

¹³Ale sara tuma min na, u ye tɔɔrɔjugu nin ɲɔgɔn la naaninan kan o cogo kelen na.

¹⁴Ale tun be ɲini ka sa tuma min na, a ko: «Ka sa adamadenw bolo, n'i jigi be Ala kan ko a bena i kunun ka kɛɲɛ n'a ka layidu taninw ye, o ka ɲi. Ele kɔni, n'i sara tuma min na, i tena kunun tugu.»

¹⁵O kɔ, u nana n'u duurunan ye k'a tɔɔrɔ.

¹⁶Ale y'a ɲaa basa masacɛ la k'a fɔ a ye ko: «See b'i ye k'i sago kɛ adamadenw cɛma, k'a sɔrɔ i fana bena sa i n'a fɔ olu. Nga i kana miiri ko Ala y'an ka siya fili.

¹⁷E ka kɔnɔni kɛ, i ben'a ka sebagayaba ye, a bena ele n'i kɔmɔgɔw tɔɔrɔ cogo min na.»

¹⁸Ale kɔ, u nana ni wɔɔrɔnan ye. Ale tun be ɲini ka sa tuma min na, a ko: «Kana i yɛrɛ nigɛ dɛ! Anw ka tɔɔrɔ nin ye anw yɛrɛ nɔɔ ye. Bari, an ye an ka Ala hakɛ ta. O la, bɔnɛ kabakomanw y'an sɔrɔ.

¹⁹Nga e kana miiri ko i bena to ɲasuma na, e min y'i jaa gwɛlɛya ka Ala yɛrɛ kɛlɛ!»

²⁰Deen nunu bamuso ɲɔgɔn tun te yen, o la, mɔgɔ man kan ka ɲinɛ a kɔ. Tile kelen kɔnɔ, a y'a dencɛ wolonwula satɔ ye, a y'o muɲu ni hakilisigi ye, bari a jigi tun be Matigi kan.

²¹A tun be to k'u kelen kelen bɛɛ jaa gwɛlɛya u faaw ka kaan na. Bamuso hinɛ tun b'a dusu la, nga a jaa tun ka gwɛlɛ i n'a fɔ cɛɛ. A tun b'a fɔra u ye ko:

²²«Aw sɔrɔla ne kɔnɔ cogo min na, ne t'o lɔn. Min ye nii di aw ma ka ninakili see kɛ aw ye, o te ne ye. Min y'aw kelen kelen bɛɛ fari labɛn u cogo la, o fana te ne ye.

²³Diɲɛ Danbaga be koo bɛɛ daminɛ na, ale lo be mɔgɔ labɛn kabini a kɔnɔ tatuma na. Ale lo bena makari aw la k'aw nii segi aw ma, aw ka se ka kunun, bari aw b'aw yɛrɛ sarakala sisan a ka sariyaw kanuya kosɔn.»

²⁴Antiyokusi tun be miiri ko muso nin b'a dɔgɔyara, ko a ka kuma ye nɛnili ye. Denlaban tun be nii na halibi. Antiyokusi tora ka kuma ale fɛ, a tun b'a fɛ k'a kuun yɛlɛma ni kuma dimanw ye. A kalila fana k'a fɔ ko n'a sɔnna k'a faaw ka landa dabila, ko a ben'a kɛ nafolotigi ni mɔgɔ dagamunin ye, k'a kɛ masacɛ ka mɔgɔsɔbɛw dɔ ye, ani ka lɔyɔrɔba d'a ma.

²⁵Nga kanbelen nin m'a ka kuma jati hali dɔɔni. O la, masacɛ ko bamuso ka gwɛrɛ, a ye ale nigɛnigɛ ko a k'a deen nin ladi ko a k'a nii kisi.

²⁶A kumana n'a ye waatijan kɔnɔ, muso nin tilara ka sɔn ko a bena kuma a dencɛ fɛ.

²⁷O la, a jɛngɛnn'a faan fɛ, ka masacɛjugu nin namara. A y'a fɔ a deen ye a faaw ka kaan na ko: «N deen, makari ne la, ne min lɔra n'i kɔnɔ ye kalo kɔnɔntɔn kɔnɔ, ka siin d'i ma saan saba kɔnɔ. Ne ye n janto i la, k'i balo, k'i ladon fɔɔ ka na se sisan ma.

²⁸N deen, ne b'i dali, sankolo ni dugukolo filɛ, ka miiri u kɔnɔnafɛnw bɛɛ la, k'a lɔn ko Ala ma o dan ni fɛɛn wɛrɛ ye, a ye adamadenw fana dan o cogo kelen na.

²⁹Kana siran mɔgɔfagala nin ɲa. A yira ko i ka kan n'i balimaw ye, ka sɔn saya ma janko suuw kununwaati la, ne k'i ye tugu n'i balimaw ye.»

³⁰A tilara kuma na dɔrɔn, kanbelen nin y'a fɔ ko: «Aw be mun le kɔnɔna? Ne te masacɛ ka fɔtaw bato, ne be sariya ka fɔtaw le bato, Ala ye min di an faaw ma Musa barika la.

³¹Ele masacɛ min ye an eburuw ka bɔnɛ bɛɛ dabɔ, i tena se ka bɔsi Ala bolo!

³²Ni an tɔw be tɔɔrɔ, o be kɛ an yɛrɛ ka hakɛ kosɔn.

³³An Matigi, Ala dimina anw kɔrɔ waati dɔɔni kɔnɔ janko k'an ɲaa gwan k'an kolo. O kɔ, a bena bɛn n'an ye tugu, an minw ye a ka baarakɛlaw ye.

³⁴Nga ele mɔgɔjugu, e min ka jugu ni mɔgɔ bɛɛ ye, kan'i yɛrɛ boɲa gwansan ka wili Matigi ka baarakɛlaw kama! Kan'i yɛrɛ nigɛ n'i kɔnɔnako fufafu ye!

³⁵Bari Setigi Ala ɲaa be koo bɛɛ la, e ma bɔ a ka kiti la fɔlɔ.

³⁶Ne balimaw ye tɔɔrɔ tɛmɛta muɲu sisan, waasa ka nii banbali sɔrɔ. U sara Ala ka bɛɛn kosɔn, k'a sɔrɔ ele ɲaa bena gwan Ala ka kiti yɔrɔ la, min bɛnnin lo i ka yɛrɛboɲa kosɔn.

³⁷Ne kɔni, ne labɛnnin lo ka n fari ni n nii di n faaw ka sariyaw kosɔn i n'a fɔ n balimaw. Ne be Ala dali ko a ka makari an ka siya la joona, a k'i tɔɔrɔ janko i ka sɔn k'a fɔ ko ale kelenpe le ye Ala ye.

³⁸Ne b'a ɲini a fɛ fana ko ale Setigi dimina an ka siya kɔrɔ cogo min na, ni tiɲɛ b'a fɛ ka dimi, ne ni n balimaw ka fagali ka kɛ o dimi laban ye.»

³⁹Ɲadonyakuma nin tun digira masacɛ la kosɔbɛ. A dimininba ye kanbelen laban nin ka tɔɔrɔ juguya ka tɛmɛ tɔ nunu ta kan.

⁴⁰O bɛɛ n'a ta, kanbelen nin kɛra kantigi ye fɔɔ saya la, a jigi tun be Matigi kan kosɔbɛ.

⁴¹A laban, u ye bamusoman faga a dencɛ nunu bɛɛ kɔ.

⁴²Min ye landadumuni koo ni tɔɔrɔjugu ye, an bena olu dabila yan.