Read dyu Matiyo ka kitabu 1 Bible Online

Matiyo ka kitabu 1 - dyu bible

Matiyo ka kitabu 1

¹Yezu Krista buruju filɛ nin ye. A buruju bɔra Dawuda la, Dawuda buruju bɔra Ibrayima la.

²Ibrayima tun ye Isiyaka facɛ ye. Isiyaka tun ye Yakuba facɛ ye. Yakuba tun ye Zuda n'a balimaw facɛ ye.

³Zuda tun ye Pɛrɛti ni Zara sɔrɔ ni Tamari ye. Pɛrɛti tun ye Ɛsirɔn facɛ ye. Ɛsirɔn tun ye Aramu facɛ ye.

⁴Aramu tun ye Aminadabu facɛ ye. Aminadabu tun ye Naasɔn facɛ ye. Naasɔn tun ye Salimɔn facɛ ye.

⁵Salimɔn tun ye Boozi sɔrɔ ni Araabu ye. Boozi tun ye Zobɛdi sɔrɔ ni Uruti ye. Zobɛdi tun ye Zese facɛ ye.

⁶Zese tun ye masacɛ Dawuda facɛ ye. Dawuda tun ye Solomani facɛ ye. Solomani bamuso tun ye Uri ka muso ye.

⁷Solomani tun ye Orobowamu facɛ ye. Orobowamu tun ye Abiya facɛ ye. Abiya tun ye Aza facɛ ye.

⁸Aza tun ye Zozafati facɛ ye. Zozafati tun ye Zoramu facɛ ye. Zoramu tun ye Oziyasi facɛ ye.

⁹Oziyasi tun ye Zowatan facɛ ye. Zowatan tun ye Akazi facɛ ye. Akazi tun ye Ezekiyasi facɛ ye.

¹⁰Ezekiyasi tun ye Manase facɛ ye. Manase tun ye Amɔn facɛ ye. Amɔn tun ye Zoziyasi facɛ ye.

¹¹ Zoziyasi tun ye Zekoniyasi n'a balimaw facɛ ye. Zekoniyasi ka tile la, Babilɔnikaw ye see sɔrɔ u kan, u ye u cɛ ka taga u kɛ jɔɔnw ye Babilɔni.

¹²U bɔnin kɔ jɔnya la Babilɔni, Zekoniyasi ye Salatiyɛli wolo. Salatiyɛli fana ye Zorobabɛli wolo.

¹³Zorobabɛli fana ye Abiyudi wolo. Abiyudi fana ye Eliyakimu wolo. Eliyakimu fana ye Azɔri wolo.

¹⁴Azɔri fana ye Sadɔki wolo. Sadɔki fana ye Akimu wolo. Akimu fana ye Eliyudi wolo.

¹⁵Eliyudi fana ye Eleyazari wolo. Eleyazari fana ye Matan wolo. Matan fana ye Yakuba wolo.

¹⁶Yakuba fana ye Yusufu wolo. Yusufu ye Mariyamu furu. Mɔgɔw be Yezu min wele ko Krista, Mariyamu ye ale bamuso ye.

¹⁷K'a ta Ibrayima ma ka n'a bila Dawuda la, faa tan ni naani be olu cɛ. K'a ta Dawuda ma ka n'a bila u taawaati ma jɔnya la, faa tan ni naani be o waati cɛ. K'a ta jɔnya waati ma Babilɔni ka n'a bila Krista la, faa tan ni naani fana be o waati cɛ.

¹⁸ Yezu Krista wolola cogo min na, o filɛ. A bamuso tɔgɔ tun ko Mariyamu, a maminɛnin tun be Yusufu ye. Sanni u ka furu, o y'a sɔrɔ Mariyamu ye kɔnɔ ta Nii Senuman barika la.

¹⁹Yusufu tun ye mɔgɔɲuman ye minkɛ, a tun t'a fɛ ka Mariyamu tɔgɔ cɛn mɔgɔw ɲana. O la, a ye ŋaniya ta ko a bena ban Mariyamu na dogo la.

²⁰K'a to o miiriya la, Matigi ka mɛlɛkɛ dɔ y'a yɛrɛ yira a la siko la k'a fɔ a ye ko: «Dawuda deen Yusufu, i kana siran ka Mariyamu furu, bari a ye kɔnɔ ta Nii Senuman barika la.

²¹ A bena dencɛ wolo, i k'a tɔgɔ la ko Yezu, bari ale lo ben'a ka mɔgɔw kisi u ka hakɛw ma.»

²²O koow bɛɛ kɛra ten janko kira tun ye Matigi ka kuma min fɔ, o ka dafa. A tun y'a fɔ ko:

²³ «Sunguru kɛnɛkɛnɛ dɔ bena kɔnɔ ta ka dencɛ wolo. O deen nin tɔgɔ bena la ko Emanuwɛli, o kɔrɔ ko Ala b'an cɛma.»

²⁴Yusufu kununna tuma min na, Matigi ka mɛlɛkɛ tun ye min fɔ a ye, a y'o kɛ. A ye Mariyamu furu siri.

²⁵Nga, u ma jɛn fɔɔ Mariyamu nana jigi dencɛ la. Yusufu ye o deen nin tɔgɔ la ko Yezu.