Read dyu Matiyo ka kitabu 10 Bible Online

Matiyo ka kitabu 10 - dyu bible

Matiyo ka kitabu 10

¹Yezu y'a ka kalanden tan ni fila wele. A ye see d'u ma ka jinaw gwɛn, ani ka banabagatɔ sifa bɛɛ kɛnɛya.

²A ye mɔgɔ tan ni fila minw kɛ cidenw ye, olu tɔgɔ filɛ: Ciden fɔlɔ tɔgɔ ko Simɔn, u b'a wele Piyɛri fana, n'ale dɔgɔcɛ Andere ni Zebede ka dencɛ fila, Zaki n'a dɔgɔcɛ Zan,

³Filipu ni Baritelemi, Toma ni Matiyo lɛnpominɛla, Tade ni Alife dencɛ Zaki,

⁴Simɔn u be min wele Fasodenŋana, ni Zuda Isikariyɔti min ye Yezu don a juguw bolo.

⁵Yezu y'o mɔgɔ tan ni fila nunu ci tuma min na, a y'a fɔ u ye ko: «Aw kana taga siya wɛrɛw fɛ. Aw kana taga Samari mara dugu si la.

⁶Nga, Isirayɛliden minw be i n'a fɔ saga tununinw, aw ka taga olu fɛ.

⁷ N'aw tagara, aw ye waajuli kɛ ko *sankolo masaya waati surunyana.

⁸Aw ye banabagatɔw kɛnɛya, ka suuw kunun, ka farisogobanatigiw kɛnɛya, ka jinaw gwɛn ka bɔ mɔgɔw la. Ne y'o koow kɛ see d'aw ma gwansan, o la, aw fana k'o kɛ mɔgɔw ye gwansan.

⁹«Aw kana taga ni sanu ni wari ye.

¹⁰ Aw kana dugutagaminan ta, aw kana deleke filanan ta, aw kana sanbara fila ta, aw kana bere ta, bari baarakɛla ka kan n'a ka dumuni ye.

¹¹N'aw sera dugu min kɔnɔ, duguba lo wo, dugudennin lo wo, mɔgɔ min sɔɔn ka ɲi, aw y'o tigi yɔrɔ ɲini ka jigi a fɛ. Aw ye to yen fɔɔ aw ka bɔ o dugu nin kɔnɔ.

¹²N'aw bena don luu min kɔnɔ, aw k'a fɔ ko Ala ka hɛrɛ kɛ o luu kɔnɔ mɔgɔw ye.

¹³N'u sɔnna ko aw ka jigi u fɛ, aw ye duba min kɛ u ye, u bena o hɛrɛ sɔrɔ. Nga n'u banna ko aw te jigi u fɛ, aw tun ye duba min kɛ u ye, u tena o hɛrɛ sɔrɔ.

¹⁴ Ni luu min mɔgɔw banna ka jigiyɔrɔ d'aw ma, walima ni dugu mɔgɔ minw banna k'aw lamɛn, aw bɔtɔ yen, aw k'aw sennabuguri furanfuran. [1] O kɔ, aw ye bɔ yen.

¹⁵ Tiɲɛ na, ne b'a fɔ aw ye ko kiti loon na, Sodɔmukaw ni Gɔmɔrikaw ka tɔɔrɔ bena nɔgɔya ka tɛmɛ o dugu mɔgɔ nunu ta kan.

¹⁶ «Ayiwa, ne b'aw ci i n'a fɔ sagaw, waraw cɛma. O la, aw ka kɛ yɛrɛkɔlɔsibagaw ye i n'a fɔ saa, aw ka koo ka nɔgɔya i n'a fɔ jɛnɛtuba.

¹⁷ «Aw k'aw yɛrɛ kɔlɔsi bari mɔgɔw bena aw don kititigɛlaw bolo. U bena aw bugɔ ni golokami ye u ka kalansow kɔnɔ.

¹⁸U bena aw minɛ ka taga n'aw ye faamaw ni masaw fɛ bari aw ye ne ka kalandenw ye. O bena kɛ sababu ye aw bena ne koo fɔ u ye, ani siya wɛrɛw ye.

¹⁹N'u tagara n'aw ye kititigɛlaw fɛ, aw kana jɔɔrɔ aw ka kuma fɔta, n'a fɔcogo fana na. Ni kuma sera aw ma tuma min na, aw ka kan ka kuma min fɔ, Ala bena o don aw daa la,

²⁰bari aw bena kuma min fɔ, o tena kɛ aw yɛrɛ ka kuma ye, nga Faa Ala ka Nii Senuman le bena o don aw daa la.

²¹ Mɔgɔ dɔw bena kɛ sababu ye u balimaw be faga. Dɔw bena u deenw faga. Deen dɔw bena wili u wolobagaw kama k'u faga.

²² Mɔgɔ bɛɛ bena aw kɔniya ne tɔgɔ kosɔn. Nga ni mɔgɔ min muɲuna fɔɔ ka taga se a laban ma, o tigi bena kisi.

²³Ni mɔgɔw be aw tɔɔrɔ dugu dɔ la, aw ye boli ka taga dugu wɛrɛ la. Tiɲɛ na, ne b'a fɔ aw ye ko aw tena Isirayɛli duguw bɛɛ kɛ ɲɔgɔn kan ka ban ni Mɔgɔ Dencɛ ma segi ka na.

²⁴ Kalanden si man fisa n'a ka karamɔgɔ ye. Baaraden si fana man fisa n'a ka kuntigi ye.

²⁵ Kalanden ka kɛ i n'a fɔ a ka karamɔgɔ, baaraden fana ka kɛ i n'a fɔ a ka kuntigi. Ni mɔgɔw ye sotigi yɛrɛ wele ko Belezebuli, u bena tɔgɔ minw la a ka somɔgɔw la, olu bena juguya.

²⁶ «Aw kana siran u ɲa. Fɛndogonin si te yen min tena ye. Gundo si te yen min tena bɔ kɛnɛ kan.

²⁷Ni n ye min fɔ aw ye dogo la, aw k'o fɔ kɛnɛ kan. N'u ye min ŋunuŋunu aw tulo kɔrɔ, aw k'o wango la sanbon kan.

²⁸Mɔgɔ minw be se k'aw faga n'u te se ka foyi kɛ aw nii na, aw kana siran olu ɲa. Min be se ka farikolo ani nii halaki jahanama na, aw ka siran ale lo ɲa.

²⁹Mɔgɔ te kɔnɔnin fila feere pɔpɔrɔ kelen na wa? K'a sɔrɔ u si te ben duguma n'aw Faa ma sɔn.

³⁰Hali aw kunsigi yɛrɛ, Ala b'o bɛɛ daa lɔn.

³¹O la, aw kana siran. Aw ka fisa ni kɔnɔninw ye.

³²«Ni mɔgɔ min y'a fɔ mɔgɔw ɲana ko ale ye ne ka mɔgɔ ye, ne Faa min be sankolo la, ne fana ben'a fɔ ale ɲana k'o tigi ye ne ka mɔgɔ ye.

³³ Nga, ni mɔgɔ min banna ne la mɔgɔw ɲana, ne fana bena ban o tigi la n Faa ɲana min be sankolo la.

³⁴«Aw kana miiri ko ne nana ni hɛrɛ ye diɲɛ na dɛ. Ne ma na ni hɛrɛ ye, nga ne nana ni murujan le ye.

³⁵ Ne nana ka dencɛ n'a facɛ bila ɲɔgɔn na, ka denmuso n'a bamuso bila ɲɔgɔn na, ka furumuso n'a biranmuso bila ɲɔgɔn na.

³⁶I ka mɔgɔw bena kɛ i juguw ye.

³⁷«Ni mɔgɔ min b'a facɛ, walima a bamuso kanu ka tɛmɛ ne kan, o tigi te se ka kɛ ne ka kalanden ye. Mɔgɔ min b'a dencɛ, walima a denmuso kanu ka tɛmɛ ne kan, o tigi te se ka kɛ ne ka kalanden ye.

³⁸ Ni mɔgɔ min m'a yɛrɛ gwengwenlɔgɔ ɲun ka tugu ne kɔ, o tigi man kan ni ne ye.

³⁹ Ni mɔgɔ min b'a fɛ ka koo bɛɛ kɛ waasa a kana bɔnɔ a nii na, o tigi bena bɔnɔ a la. Nga, ni min bɔnɔna a nii na ne kosɔn, o tigi bena tila k'a sɔrɔ.

⁴⁰«Ni mɔgɔ min ye aw minɛ ka ɲa, o tigi ye ne minɛ ka ɲa. Mɔgɔ min ye ne minɛ ka ɲa, o tigi ye ne cibaga fana minɛ ka ɲa.

⁴¹Ni mɔgɔ min ye kira minɛ ka ɲa, a ka kiraya kosɔn, o tigi bena kira ka sara ɲɔgɔn sɔrɔ. Ni mɔgɔ min ye mɔgɔɲuman minɛ ka ɲa, a ka ɲumanya kosɔn, o tigi bena mɔgɔɲuman ka sara ɲɔgɔn sɔrɔ.

⁴²Tiɲɛ na, ne b'a fɔ aw ye ko ne ka kalanden minw lɔyɔrɔ ka dɔgɔ mɔgɔw ɲana, ni min ye jii suma di olu dɔ ma, bari ne ka kalanden lo, hali ni filen ɲaa kelen lo, o tigi ben'a tɔnɔ sɔrɔ.»