Read dyu Matiyo ka kitabu 11 Bible Online

Matiyo ka kitabu 11 - dyu bible

Matiyo ka kitabu 11

¹Yezu y'o ladili di a ka kalanden tan ni fila ma ka ban tuma min na, a bɔra ka taga mɔgɔw waaju k'u kalan gɛrɛfɛduguw la.

²O waati la, Zan batizelikɛla tun be kaso la. A ye Yezu ka koo kɛtaw kibaru mɛn minkɛ, a y'a ka kalanden dɔw ci,

³k'a ɲininga ko: «Ala ka Mɔgɔ wolomanin min ka kan ka na, ele lo wa? Walima an ka kan ka mɔgɔ wɛrɛ kɔnɔ?»

⁴Yezu y'u jaabi ko: «Aw be min mɛnna, n'aw be min yera, aw ye taga o lakali Zan ye,

⁵ ko fiɲɛntɔw be yeli kɛra, murukuw be taamana, farisogobanatigiw be kɛnɛyara, tulogwerenw be mɛnni kɛra, suuw be kununna, kibaru diman be fɔra fantanw ye.

⁶Ni mɔgɔ min kunna ma cɛn ne kosɔn, o tigi dagamunin lo.»

⁷Zan ka kalandenw kɔsegira ka taga tuma min na, Yezu y'a daminɛ ka kuma jama fɛ Zan koo la. A y'u ɲininga ko: «Aw tun tagara mun le filɛ kongokolon kɔnɔ? Fɔɲɔ be biin min lamaga wa?

⁸Aw tagara mun le filɛ? Dakamana fanitigi wa? Nga mɔgɔ minw be dakamana faniw don, olu be sɔrɔ masaluw le kɔnɔ.

⁹Aw tagara mun le filɛ? Kira lo wa? Tiɲɛ na, ne b'a fɔ aw ye ko a tɛmɛna kira yɛrɛ kan!

¹⁰ Ciden min koo fɔra Ala ka kuma na, o ciden nin ye Zan ye. A fɔra ko: ‹A filɛ, ne be n ka ciden ci i ɲa, a bena i ka sira labɛn.›

¹¹«Tiɲɛ na, ne b'a fɔ aw ye ko mɔgɔ si ma wolo diɲɛ na min kɛra mɔgɔbaba ye ka tɛmɛ Zan batizelikɛla kan. Nga *sankolo masaya la, mɔgɔ min lɔyɔrɔ ka dɔgɔ n'u bɛɛ ye, o tigi ka bon ni Zan ye.

¹² K'a ta Zan ka waajuli kɛtuma ma fɔɔ ka na se bii ma, mɔgɔ bɛɛ be jijara ka donyɔrɔ sɔrɔ sankolo masaya la. Ni mɔgɔ minw jijara, olu le bena don yen.

¹³Musa ni kiraw bɛɛ kumana sankolo masaya koo la fɔɔ ka na se Zan ka waati ma.

¹⁴ N'aw b'a fɛ k'o faamu, u tun y'a fɔ ko Eli min bena segi ka na, Zan ye o Eli nin le ye.

¹⁵Tulo be min fɛ, o ka mɛnni kɛ.

¹⁶Ne bena bii mɔgɔw suma ni jɔn ye? U bɔnin be denmisɛnw fɛ minw siginin be kɛnɛba la ka to k'u kaan sama u tɔɲɔgɔnw ma ko:

¹⁷‹Anw ye fɔli kɛ aw ye, aw ma dɔɔn kɛ. Anw ye sanga dɔnkili la, aw ma kasi fana.›

¹⁸«N b'o fɔ bari Zan nana, a te dumuni kɛ, a te minni kɛ, mɔgɔw ko jina b'a la.

¹⁹Mɔgɔ Dencɛ nana, a be dumuni kɛ ka minni kɛ, mɔgɔw ko cɛɛ nin ye nugubagatɔ ni dɔrɔtɔ ye. U ko lɛnpominɛlaw ni hakɛkɛlaw teri lo. Nga, lɔnniya ka kɛtaw b'a ka tilenninya yira.»

²⁰O kɔ, Yezu y'a ka kabako caaman kɛ dugu minw kɔnɔ, a y'a daminɛ ka kumajugu fɔ o dugu mɔgɔw ma, bari u ma nimisa ka faran u ka kojuguw la. A ko:

²¹ «Aw Korazɛnkaw ni Bɛtisayidakaw, bɔnɛ bena kɛ aw ta ye, bari ne ye kabako minw kɛ aw fɛ, ni olu tun kɛra Tirikaw ni Sidɔnkaw fɛ, bii tun y'a sɔrɔ u ye dusukasifani don, ka bugurigwɛ mɔn u yɛrɛ la k'u sɔɔn yɛlɛma.

²²Tiɲɛ na, ne b'a fɔ aw ye ko kiti loon na, Tirikaw ni Sidɔnkaw ka tɔɔrɔ bena nɔgɔya ka tɛmɛ aw ta kan.

²³ Aw Kafaranamukaw, aw ka dugu bena taga ɲa wa? Abada! A bena halaki pewu. Bari ne ye kabako minw kɛ aw fɛ, ni olu tun kɛra Sodɔmu dugu kɔnɔ, bii tun ben'a sɔrɔ n'a be yen.

²⁴ O kama, ne b'a fɔ aw ye ko kiti loon na, Sodɔmukaw ka tɔɔrɔ bena nɔgɔya ka tɛmɛ aw ta kan.»

²⁵O waati la, Yezu y'a fɔ ko: «Ne be barika la i ye n Faa, sankolo ni dugukolo masa, bari i ye koo minw dogo lɔnnikɛlaw ni hakilitigiw la, i ye olu yira denmisɛnw na.

²⁶I y'a kɛ ten bari a diyara i ye tiɲɛ na.»

²⁷ O kɔ, a y'a fɔ mɔgɔw ye ko: «N Faa Ala ye fɛɛn bɛɛ di n ma. Mɔgɔ si te Dencɛ lɔn n'a Faa dɔrɔn tɛ, mɔgɔ si te Faa fana lɔn fɔɔ Dencɛ kelenpe. Ni Dencɛ b'a fɛ mɔgɔ min k'a Faa lɔn, o tigi ben'a lɔn.

²⁸«Aw minw nii tɔɔrɔnin lo, ni sigɛn b'aw kan, aw ka na ne fɛ, ne bena lafiya di aw ma.

²⁹ Aw ka kɛ ne ka kalandenw ye, bari ne sabalinin lo, n te mɔgɔ si dɔgɔya fana. N'aw sɔnna ne ka kuma ma, aw bena lafiya sɔrɔ,

³⁰bari ne tena jɔnya ni sigɛn gwiliman la aw kan.»