Read dyu Matiyo ka kitabu 12 Bible Online

Matiyo ka kitabu 12 - dyu bible

Matiyo ka kitabu 12

¹ Loon dɔ, Yezu n'a ka kalandenw tun be tɛmɛna *bileforo dɔw kɔnɔ. Lafiɲɛlon tun lo. Kɔngɔ tun b'a ka kalandenw na. O la, u y'a daminɛ ka suman dɔw tigɛ k'u ɲimi.

²*Fariziɲɛw y'o ye minkɛ, u y'a fɔ Yezu ye ko: «A filɛ, koo min daganin te lafiɲɛlon na, i ka kalandenw b'o kɛra.»

³ Yezu y'u jaabi ko: «Kɔngɔ ye Dawuda n'a kɔmɔgɔw minɛ tuma min na, a ye min kɛ, aw m'o kalan ka ye wa?

⁴ A donna Ala ka soo kɔnɔ, a n'a tɔɲɔgɔnw ye buru ɲimi minw tun bilanin be Ala ye, n'u tun man kan k'o ɲimi ni sarakalasebagaw dɔrɔn tɛ.

⁵ Aw m'a kalan ka ye sariya sɛbɛ kɔnɔ wa, ko sarakalasebagaw be baara kɛ Alabatosoba kɔnɔ lafiɲɛlon, k'a sɔrɔ u te jalaki fana?

⁶Ne b'a fɔ aw ye ko mɔgɔ be yan min ka fisa ni Alabatosoba ye.

⁷ Ala y'a fɔ a ka kuma na ko: ‹Ne be makari le fɛ, ne te saraka fɛ.› N'aw tun b'o kɔrɔ lɔn, mɔgɔ minw ma kojugu kɛ, aw tun tena sariya boli olu kɔɔ kan,

⁸bari Mɔgɔ Dencɛ ye lafiɲɛlon kuntigi ye.»

⁹Yezu bɔra o yɔrɔ la ka taga don zuwifuw ka kalanso dɔ kɔnɔ.

¹⁰Cɛɛ bolo faganin dɔ tun be mɔgɔw cɛma yen. Mɔgɔ dɔw ye Yezu ɲininga ko: «A daganin be mɔgɔ ka banabagatɔw kɛnɛya lafiɲɛlon na wa?» U y'a ɲininga o la bari u tun b'a fɛ k'a jalaki.

¹¹ Yezu y'u jaabi ko: «Ni saga kelen be aw dɔ fɛ, n'o saga benna kɔlɔn kɔnɔ lafiɲɛlon na, o tigi ten'a bɔ wa?

¹²Mɔgɔ ka fisa ni saga ye kosɔbɛ. O kama, a bɛnnin lo mɔgɔ ka koɲuman kɛ mɔgɔ ye lafiɲɛlon na.»

¹³Yezu sɔrɔla k'a fɔ cɛɛ nin ye ko: «I bolo jan.» A y'a jan, a kɛnɛyara ka kɛ i n'a fɔ tɔ kelen nin be cogo min na.

¹⁴*Fariziɲɛw bɔra ka taga ɲɔgɔn ye ka Yezu fagacogo ɲini.

¹⁵Yezu bɔra *Fariziɲɛw ka koo nin kala ma minkɛ, a bɔra o yɔrɔ la ka taga. Jamaba tugura a kɔ. A ye banabagatɔw bɛɛ kɛnɛya.

¹⁶Nga a y'a gwɛlɛya u ma k'u kana ale koo fɔ mɔgɔ si ye.

¹⁷O kɛra ten janko Ala tun ye min fɔ kira Ezayi ye, o ka dafa. A tun ko:

¹⁸ «Ne ye baarakɛla min woloma, o filɛ nin ye. Ne b'a kanu, a diyara ne ye k'a woloma. Ne bena n ka Nii don a la, a bena tilenninyako fɔ siyaw ye.

¹⁹A tena kɛlɛ kɛ, a tena pɛrɛn. Mɔgɔ si ten'a kaan mɛn siraw kan.

²⁰A tena buruku fɔnsɔnnin tigɛ, fitinɛ min be sisi bɔra, a tena o tɔɔ faga. A bena to o la fɔɔ k'a kɛ tilenninya be see sɔrɔ.

²¹Siyaw bɛɛ bena u jigi la a kan.»

²²O kɔ, mɔgɔw tagara ni jinatɔ dɔ ye Yezu fɛ. Fiɲɛntɔ ni bobo tun lo. Yezu ye jina gwɛn fɔɔ cɛɛ sera ka kuma, a ɲaa fana yɛlɛla.

²³Jama bɛɛ kabakoyara. U ko: «An be masacɛ Dawuda dencɛ min kɔnɔna, kɔni ale lo te nin ye?»

²⁴ Nga *Fariziɲɛw y'o kuma mɛn tuma min na, u y'a fɔ ko: «Jinaw kuntigi Belezebuli le be see dir'a ma ka jinaw gwɛn ka bɔ mɔgɔw la.»

²⁵Yezu y'u ka miiriya lɔn minkɛ, a y'a fɔ u ye ko: «Ni jamana min mɔgɔw be ɲɔgɔn kɛlɛ, o jamana nin te se ka ɲa. Ni dugu, walima somɔgɔ minw be ɲɔgɔn kɛlɛ, o be ci.

²⁶Ni Sutana b'a yɛrɛ ka mɔgɔw gwɛn, a b'a yɛrɛ kɛlɛ, a ka masaya bena taga ɲa cogo di?

²⁷Ni ne be jinaw gwɛn Belezebuli barika la, o tuma na, aw ka kalandenw b'u gwɛn jɔn le barika la? Olu yɛrɛ bena kɛ aw jalakibagaw ye.

²⁸Nga ni ne be jinaw gwɛn Ala ka Nii barika la, o b'a yira ko Ala ka masaya sera aw ma.

²⁹Mɔgɔ be se ka don cɛɛ barikaman ka soo kɔnɔ k'a bololafɛnw cɛ cogo di n'a m'o cɛɛ minɛ k'a siri fɔlɔ? N'a y'a siri, o tuma na, a be se k'a ka sokɔnɔfɛnw bɛɛ cɛ.

³⁰ Mɔgɔ min te ne ɲiin ye, o ye ne jugu le ye. Mɔgɔ min te ne dɛmɛ ka ɲani kɛ, o tigi be cɛnni le kɛ.

³¹«O le y'a to ne b'a fɔ aw ye ko Ala bena mɔgɔw ka hakɛw bɛɛ yafa n'u ka Ala tɔgɔcɛnkumaw bɛɛ. Nga ni mɔgɔ min ye Nii Senuman tɔgɔ cɛn, Ala tena yafa o tigi ma.

³² Ni mɔgɔ min ye Mɔgɔ Dencɛ tɔgɔ cɛn, o tigi bena o yafa sɔrɔ. Nga ni mɔgɔ min ye Nii Senuman tɔgɔ cɛn, o tigi tena o yafa sɔrɔ bii, a ten'a sɔrɔ sini fana.

³³ «Yiriɲuman deen ka di, nga yirijugu deen man di, bari yiri be lɔn a deen fɛ.

³⁴ Aw minw ka jugu i n'a fɔ fɔnfɔnni, aw be se ka kumaɲuman fɔ cogo di, bari aw ka jugu. Mɔgɔ dusu fanin be fɛɛn min na, a daa b'o le fɔ.

³⁵Mɔgɔɲuman be fɛnɲuman bɔ a ka nafoloɲuman na. Mɔgɔjugu be fɛnjuguw bɔ a ka nafolojugu la.

³⁶Ne b'a fɔ aw ye ko Ala bena mɔgɔw kiti loon min na, u ye kuma kuntan minw bɛɛ fɔ, a bena u ɲininga u fɔkun na.

³⁷Ala bena i kiti ka kɛɲɛ n'i ka dalakuma ye. O sababu la, Ala be joo d'i ma, walima a b'i jalaki.»

³⁸O kɔ, sariya karamɔgɔ dɔw, ni *Fariziɲɛ dɔw y'a fɔ Yezu ye ko: «Karamɔgɔ, an b'a fɛ i ka kabako dɔ kɛ an b'o ye.»

³⁹Yezu y'u jaabi ko: «Bii mɔgɔw ka jugu, u murutira Ala ma. U b'a fɛ ne ka kabako kɛ u ɲana, nga kabako si tena kɛ k'a yira u la ni kira Zonasi ta ɲɔgɔn tɛ.

⁴⁰ Jigɛba ye Zonasi kunu a ye tile saba ni suu saba kɛ a kɔnɔ cogo min na, Mɔgɔ Dencɛ fana bena tile saba, ni suu saba kɛ kaburu kɔnɔ ten.

⁴¹ Ala bena mɔgɔw kiti loon min na, Ninivukaw ni bii mɔgɔw bena kunun ɲɔgɔn fɛ. Ninivukaw ka kɛwali bena kɛ sababu ye Ala be bii mɔgɔw jalaki, bari Zonasi tagara Ninivukaw waaju tuma min na, u nimisara ka faran u ka kojuguw la. Mɔgɔ be yan min lɔyɔrɔ ka bon ni Zonasi ta ye.

⁴² Ala bena mɔgɔw kiti loon min na, muso min tun kɛra masa ye Saba jamana na, bii mɔgɔw n'o muso bena kunun ɲɔgɔn fɛ. A ka kɛwali bena kɛ sababu ye Ala be bii mɔgɔw jalaki, bari a bɔra yɔrɔjan ka taga a tulo malɔ Solomani ka hakilitigiya kuma na. Mɔgɔ be yan min lɔyɔrɔ ka bon ni Solomani ta ye.

⁴³«Ni jina bɔra mɔgɔ la tuma min na, a be taga yɔrɔlakolon yaala ka lafiɲɛyɔrɔ wɛrɛ ɲini. N'a m'o sɔrɔ,

⁴⁴a b'a fɔ a yɛrɛ kɔnɔ ko: ‹Ne bɔra yɔrɔ min na, ne bena segi ka taga yen.› N'a segira tuma min na, a be taga o yɔrɔ lakolon sɔrɔ, a labɛnnin lo kosɔbɛ.

⁴⁵O tuma na, a be segi ka taga jina wolonwula wɛrɛw wele minw ka jugu n'ale yɛrɛ ye, ka na n'u ye. U be sigi yen ɲɔgɔn fɛ. O tuma na, cɛɛ ka bana be wili, ka juguya ka tɛmɛ fɔlɔta kan. O ɲɔgɔn le bena kɛ bii mɔgɔw la.»

⁴⁶Yezu tun be kumana jama fɛ. K'a to o la, a bamuso n'a dɔgɔninw sera. U lɔra kɛnɛma. U tun b'a fɛ ka kuma a fɛ.

⁴⁷Mɔgɔ dɔ sɔrɔla k'a fɔ Yezu ye ko: «I bamuso n'i dɔgɔninw lɔnin be kɛnɛma, u mako b'i la.»

⁴⁸Yezu y'a fɔ o tigi ye ko: «Jɔn ye ne bamuso ye? Jɔn ni jɔn le ye ne dɔgɔninw ye?»

⁴⁹O kɔ, a y'a bolo sin a ka kalandenw ma k'a fɔ ko: «Ne bamuso ni ne dɔgɔninw filɛ yan,

⁵⁰bari mɔgɔ min be ne Faa Ala sago kɛ, o tigi le ye ne dɔgɔcɛ, walima ne dɔgɔmuso, ani ne bamuso ye.»