Read dyu Matiyo ka kitabu 15 Bible Online

Matiyo ka kitabu 15 - dyu bible

Matiyo ka kitabu 15

¹O kɔ, *Fariziɲɛ ni sariya karamɔgɔ dɔw bɔra Zeruzalɛmu ka na Yezu ɲininga ko:

²«Mun na i ka kalandenw te an faaw ka landa bato? Bari u be dumuni kɛ n'u te u tigɛ ko ka ɲa.»

³Yezu y'olu ɲininga fana ko: «Aw do, mun na aw be Ala ka sariya cɛn aw ka landaw kosɔn?

⁴ Bari Ala y'a fɔ ko i k'i baa n'i faa boɲa, ko ni mɔgɔ min y'a faa, walima a baa nɛni, k'o tigi ka kan ka faga.

⁵Nga aw b'a fɔ ko ni mɔgɔ dɔ y'a fɔ a faa, walima a baa ye ko ale tun ka kan k'a dɛmɛ ni fɛɛn min ye, ko a y'o di Ala ma,

⁶a kɛra ten wajibi tɛ o tigi ma k'a faa n'a baa dɛmɛ tugu. Aw be Ala ka kuma kɛ kumafu ye aw ka landaw kosɔn.

⁷Filakanfɔ nunu! Ezayi ye kirayakuma min fɔ aw ka koo la, o bɛnna kosɔbɛ. A ko:

⁸ ‹Mɔgɔ nunu be ne boɲa u daa dama le la, nga u dusu yɔrɔ ka jan ne la.

⁹U be ne bato gwansan, bari u be ɲɔgɔn kalan koo minw na, o ye adamadenw ka sariyaw dama le ye.› »

¹⁰Yezu ye jama wele k'a fɔ u ye ko: «Aw k'aw tulo malɔ ka n ka kuma faamu.

¹¹A ma kɛ i n'a fɔ ko mɔgɔ be fɛɛn min dumu, o le b'a nɔgɔ, nga a kɔnɔnako le b'a nɔgɔ.»

¹²A ka kalandenw gwɛrɛla a la k'a fɔ a ye ko: «I m'a lɔn ko i ka kuma nin digira *Fariziɲɛw na k'u hakili ɲagami wa?»

¹³Yezu y'u jaabi ko: «Ne Faa min be sankolo la ma yiri o yiri tutu, olu bena bɔn ka bɔ yen.

¹⁴ Aw y'u ye k'u to yen, fiɲɛntɔw lo. Ni fiɲɛntɔ ye a tɔɲɔgɔn ka bere minɛ, u fila bɛɛ bena kori ka ben dingɛ kɔnɔ.»

¹⁵Piyɛri ye kuma ta, k'a fɔ Yezu ye ko: «Talen nin kɔrɔ fɔ an ye.»

¹⁶Yezu y'a fɔ u ye ko: «Aw fana ye hakilitanw ye halibi wa?

¹⁷Aw m'a lɔn ko mɔgɔ be fɛɛn o fɛɛn don a daa la, k'o be don a kɔnɔ na, o kɔ, a be taga o fili banakɔ wa?

¹⁸ Nga mɔgɔ daa be fɛɛn min fɔ, o be bɔ a dusu la le. Olu le be mɔgɔ nɔgɔ.

¹⁹Bari miiriyajuguw be bɔ mɔgɔ dusu le la, ani mɔgɔfaga, ni ɲamɔgɔya, kakalaya, soɲali, galontigɛ, ani nɛnili.

²⁰O koo nunu le be mɔgɔ nɔgɔ, nga ka dumuni kɛ n'i ma i tigɛ ko, o te mɔgɔ nɔgɔ.»

²¹Yezu bɔra o yɔrɔ la ka taga Tiri ni Sidɔn mara la.

²²Muso dɔ tun b'o yɔrɔ la, zuwifu tun tɛ. Ale nana Yezu fɛ ka pɛrɛn ko: «Dawuda dencɛ, makari ne la Matigi, ne denmuso tɔɔrɔnin lo kosɔbɛ, jina b'a la.»

²³Nga Yezu m'a jaabi. A ka kalandenw gwɛrɛla a la k'a daali ko a ka muso nin ɲafilɛ, ko n'o tɛ, a be tugura u kɔ n'a ka mankan ye.

²⁴Yezu y'a fɔ ko: «Ne cira Isirayɛlidenw dama ma, minw be i n'a fɔ saga tununinw.»

²⁵Nga muso nin nana a kunbiri gwan Yezu kɔrɔ k'a fɔ ko: «Matigi, n dɛmɛ.»

²⁶Yezu y'a jaabi ko: «A daganin te ka denmisɛnw ka dumuni ta k'a di wuludenninw ma.»

²⁷Muso y'a fɔ Yezu ye ko: «O ye tiɲɛ ye Matigi, nga wulutigi ka dumuni murumuru minw be ben, wuluw b'o dumu.»

²⁸Yezu y'a fɔ a ye ko: «Muso, i lara ne la kosɔbɛ. I be min fɛ, o ka kɛ i ye.» O waati kelen na, a denmuso kɛnɛyara.

²⁹Yezu bɔra o yɔrɔ la ka taga Galile baa daa la. A yɛlɛla kulu dɔ kan ka sigi yen.

³⁰Jamaba tun nan'a fɛ n'u ka banabagatɔw ye. O banabagatɔ dɔw tun ye senkelenninw ye, ni fiɲɛntɔw, ani murukuw, ni bobow, ani banabagatɔ sifa wɛrɛw. U tun be na n'u ye Yezu fɛ, n'a b'o kɛnɛya.

³¹Mɔgɔw y'a ye ko bobow be kumana, ni murukuw be kɛnɛyara, ani senkelenninw be taamana ka ɲa, ni fiɲɛntɔw be yeli kɛra, u kabakoyara kosɔbɛ, fɔɔ u y'a daminɛ ka Isirayɛli ka Ala tanu.

³²Yezu y'a ka kalandenw wele k'a fɔ u ye ko: «Jama nin hinɛ be ne la, bari, u be ni ne ye, a tile saba ye bii ye, foyi t'u fɛ k'a dumu. N t'a fɛ ka sira d'u kɔngɔtɔman, u barika bena dɛsɛ sira la.»

³³Kalandenw y'a ɲininga ko: «Anw bena se ka dumuni sɔrɔ yɔrɔ jumɛn kongokolon nin kɔnɔ ka jama nin ɲɔgɔn fa?»

³⁴A y'u ɲininga ko: «Burukun joli le b'aw fɛ?» U ko burukun wolonwula ni jigɛmisɛn damani.

³⁵A y'a fɔ jama ye k'u ka sigi duguma.

³⁶A ye burukun wolonwula ni jigɛ nunu ta ka barika la Ala ye k'o karikari k'o di kalandenw ma, olu y'o tilan jama ye.

³⁷Mɔgɔw ye dumuni kɛ fɔɔ ka fa, u ye dumuni tɔɔ cɛ ka segi wolonwula fa n'a ye.

³⁸Mɔgɔ minw y'o dumuni kɛ, cɛɛw dama tun ye mɔgɔ waa naani ye, musow ni denmisɛnw ma jati.

³⁹Yezu ye sira di ka ban jama ma waati min na, a donna kurun kɔnɔ ka taga Magadan mara la.