Read dyu Matiyo ka kitabu 16 Bible Online

Matiyo ka kitabu 16 - dyu bible

Matiyo ka kitabu 16

¹*Fariziɲɛ ni *Saduseɲɛ dɔw gwɛrɛla Yezu la waasa k'a kɔrɔbɔ. U y'a ɲini Yezu fɛ ko a ka kabako dɔ kɛ ka bɔ sankolo la.

²Yezu y'u jaabi ko: «Wuladafɛ ni tilekun be ɲini ka don tuma min na, aw b'a fɔ ko suu bena diya, bari sankolo wulennin lo.

³Sɔgɔmadafɛ fana, aw b'a fɔ ko bii tena diya bari yɔrɔ ɲaa ma ɲi. Aw be se ka sankolo filɛ ka waati cogoya faamu, nga koo minw be kɛra waati nin na, aw te sera k'olu faamu.

⁴Bii mɔgɔw ka jugu, u murutira Ala ma, u b'a fɛ ko ne ka kabako dɔ kɛ u ɲana, nga kabako si tena kɛ k'a yira u la ni kira Zonasi ta ɲɔgɔn tɛ.» O kɔ, a y'u lɔnin to yen ka tɛmɛ n'a ka sira ye.

⁵Tuma min na u tun be tagara baa kɔfɛ, kalandenw tun ɲinɛna ka buru ta.

⁶Yezu y'a fɔ u ye ko: «Aw k'aw yɛrɛ kɔlɔsi *Fariziɲɛ ni *Saduseɲɛw ka burufununan ma.»

⁷Kalandenw tora ka miiri u yɛrɛ kɔnɔ k'olu ma buru ta minkɛ, k'o la Yezu ye kuma nin fɔ.

⁸Nga Yezu y'u ka miiriya lɔn, k'a fɔ u ye ko: «Jigi t'aw fɛ wa? Mun na aw be miiri ten, ko aw ɲinɛna buru kɔ?

⁹ Aw te faamuli kɛ halibi wa? Ne ye cɛɛ waa duuru balo ni burukun duuru ye waati min na, aw ye segi daa min cɛ dumuni tɔɔ la, aw hakili te o la wa?

¹⁰ Ani ne ye cɛɛ waa naani balo ni burukun wolonwula ye tuma min na, aw tun ye segi daa min fa dumuni tɔɔ la, aw hakili t'o fana na wa?

¹¹Ne tun b'aw ladira Fariziɲɛ ni Saduseɲɛw ka burufununan koo la tuma min na, mun na aw tun m'a faamu ko ne tun te kumana buru koo la?»

¹²O tuma na, u y'a faamu ko a tun te kumana u fɛ burufununan yɛrɛ koo la, nga ko a tun be kumana u fɛ Fariziɲɛ ni Saduseɲɛw ka kalan le koo la.

¹³Yezu n'a ka kalandenw sera Filipu, Sezare mara la. A y'a ka kalandenw ɲininga ko: «Mɔgɔw b'a fɔra ko Mɔgɔ Dencɛ ye jɔn ye?»

¹⁴ U y'a jaabi ko: «Dɔw ko Zan batizelikɛla lo, dɔw ko Eli, dɔ wɛrɛw ko Zeremi, walima kira dɔ wɛrɛ.»

¹⁵Yezu y'u ɲininga ko: «Aw do, aw b'a miiri ko ne ye jɔn ye?»

¹⁶ Simɔn Piyɛri y'a jaabi ko: «I ye Ala ka Mɔgɔ wolomanin nin ye, Ala Dencɛ.»

¹⁷Yezu y'a fɔ a ye ko: «Zonasi dencɛ Piyɛri, i dagamunin lo, bari mɔgɔ si ma nin fɔ i ye, nga ne Faa min be sankolo la, o le y'o lɔnniya d'i ma.

¹⁸I ye Piyɛri ye, o kɔrɔ ko fara, ne bena n ka jama senu sigi min kan, saya tena se ka foyi kɛ a la.

¹⁹ Ne bena *sankolo masaya konnigɛ d'i ma. N'i ye fɛɛn o fɛɛn siri dugukolo kan, o bena siri sankolo la. I mana fɛɛn o fɛɛn foni dugukolo kan, o bena foni sankolo la.»

²⁰O kɔ, Yezu y'a fɔ k'a gwɛlɛya a ka kalandenw ye k'u kana sɔn k'a fɔ mɔgɔ si ɲana ko ale ye Ala ka Mɔgɔ wolomanin nin ye.

²¹K'a ta o waati ma Yezu y'a daminɛ k'a fɔ ka gwɛ a ka kalandenw ye, ko: «Ne ka kan ka taga Zeruzalɛmu, cɛkɔrɔbaw ni sarakalasebagaw kuntigiw ani sariya karamɔgɔw bena ne tɔɔrɔ yen kosɔbɛ. U bena ne faga. Nga tile sabanan loon ne faganin kɔ, ne bena kunun.»

²²Piyɛri tagara n'a ye gɛrɛn na k'a daminɛ k'a jalaki. A y'a fɔ a ye ko: «Matigi, Ala k'i kisi o koow ma. O tena i sɔrɔ.»

²³Yezu y'a ɲaa yɛlɛma k'a fɔ Piyɛri ye ko: «E Sutana nin, taga ka bɔ n kɔrɔ. E be ne ka koow cɛnyɔrɔ le ɲinina. I ka miiriya ni Ala ta te kelen ye, i be miiri i n'a fɔ adamaden tɔw.»

²⁴ Yezu y'a fɔ a ka kalandenw ye ko: «Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa la. A k'a ka gwengwenlɔgɔ ɲun ka tugu ne kɔ.

²⁵ Mɔgɔ o mɔgɔ b'a fɛ k'a nii tanga, o tigi bena bɔnɔ a la. Nga ni mɔgɔ min bɔnɔna a nii la ne kosɔn, o tigi bena tila k'a sɔrɔ.

²⁶A be mun ɲa mɔgɔ ye ka diɲɛ fɛɛn bɛɛ sɔrɔ n'a bɔnɔna a nii na? Walima mɔgɔ be se ka mun di Ala ma min b'a nii sɔngɔ bɔ?

²⁷ Ayiwa, Mɔgɔ Dencɛ bena na n'a ka mɛlɛkɛw ye a Faa ka sebagaya la, o la a bena mɔgɔ kelen kelen bɛɛ sara ka kɛɲɛ n'u ka kɛwaliw ye.

²⁸Tiɲɛ na, ne b'a fɔ aw ye ko aw minw be yan, aw dɔw tena sa n'u ma Mɔgɔ Dencɛ natɔ ye n'a ka masaya ye.»