Read dyu Matiyo ka kitabu 17 Bible Online

Matiyo ka kitabu 17 - dyu bible

Matiyo ka kitabu 17

¹ Tile wɔɔrɔ o kɔ, Yezu tagara ni Piyɛri ni Zaki n'a dɔgɔcɛ Zan ye kulujan dɔ kan u danna.

²O yɔrɔ la, Yezu cogo yɛlɛmana u ɲana, a ɲada tun be manamana i n'a fɔ tile, a ka fani tun gwɛra parapara.

³O yɔrɔnin kelen, kalanden saba nunu ye Musa ni Eli ye n'u be kumana ni Yezu ye.

⁴O la, Piyɛri y'a fɔ Yezu ye ko: «Matigi, a ka ɲi an ka to yan. N'i sɔnna, ne bena bugu saba lɔ yan: e ta kelen, Musa ta kelen, Eli ta kelen.»

⁵ Ka Piyɛri t'o kuma na, sankaba manamananin dɔ jigira k'u datugu. Kumakan dɔ bɔra o sankaba nin kɔnɔ k'a fɔ ko: «Nin ye ne Dencɛ kanunin ye. Ne sagoladen lo, aw ka mɛnni kɛ a fɛ.»

⁶Kalanden saba nunu y'o kuma mɛn minkɛ, u lara k'u ɲaa biri duguma, bari u tun siranna kosɔbɛ.

⁷Yezu gwɛrɛla u la, ka magamaga u la k'a fɔ ko: «Aw kana siran, aw ye wili.»

⁸U y'u ɲaa kɔrɔta tuma min na, u ye Yezu dama le ye yen.

⁹U jigitɔ ka bɔ kulu kan, a ye kangari la u ye ko: «Aw ye koo minw ye kulu kan, aw kana o lakali mɔgɔ si ye, fɔɔ ni Mɔgɔ Dencɛ kununna a sanin kɔ.»

¹⁰ Yezu ka kalandenw y'a ɲininga ko: «Mun na sariya karamɔgɔw ko Eli ka kan ka na kisibaga ɲa?»

¹¹A y'u jaabi ko: «Tiɲɛ na, Eli ka kan ka na fɛɛn bɛɛ labɛn fɔlɔ.

¹² Ne b'a fɔ aw ye ko Eli nana ka ban, nga u m'a lɔn, mɔgɔw y'u yɛrɛ sago kɛ a la. O cogo kelen la, u bena Mɔgɔ Dencɛ fana tɔɔrɔ.»

¹³Kalandenw y'a faamu ko a be kumana Zan batizelikɛla le koo la.

¹⁴Yezu n'a ka kalanden saba nunu sera jama yɔrɔ la waati min na, cɛɛ dɔ nana a kunbiri gwan a kɔrɔ k'a fɔ ko:

¹⁵«Matigi, makari ne deen na, bari kirikirimasiɲɛ b'a la. Tuma o tuma a be wili a la k'a ta k'a ben, a y'a ben tasuma na ani jii la siɲɛ caaman.

¹⁶Ne nana n'a ye i ka kalandenw fɛ, nga u ma se k'a kɛnɛya.»

¹⁷Yezu y'a fɔ ko: «Aw bii mɔgɔw kɔni, aw ka jugu, aw te la Ala la. Ne bena to n'aw ye k'aw ka koo muɲu fɔɔ tuma jumɛn? Aw ye na ni deen nin ye yan.»

¹⁸Yezu ye kuma gwɛlɛya jina ma k'a gwɛn ka bɔ deen nin na, o yɔrɔnin bɛɛ a kɛnɛyara.

¹⁹O kɔ, Yezu ka kalandenw gwɛrɛla a la u danna, k'a ɲininga ko: «Mun na an ma se ka jina nin gwɛn?»

²⁰ Yezu y'a fɔ u ye ko: «Aw te la ne la kosɔbɛ minkɛ, o lo. Tiɲɛ na, ne b'a fɔ aw ye, ko n'aw ka lanaya boɲa tun be mutaridikisɛ ta bɔ, aw tun be se k'a fɔ kulu nin ye ko a ka wili ka bɔ yan ka taga lɔ yen fɛ. O tun bena kɛ. Fɛɛn te yen n'aw tena se ka min kɛ. [

²¹Nga nin jina nin ɲɔgɔn te se ka gwɛn ka bɔ mɔgɔ la n'i ma suun don ka Ala daali.]»

²²Loon dɔ, kalandenw ye ɲɔgɔn lajɛn Galile, Yezu y'a fɔ u ye ko: «U bena Mɔgɔ Dencɛ don mɔgɔjuguw bolo,

²³k'a faga, tile sabanan loon a faganin kɔ, a bena kunun.» U bɛɛ hakili ɲagamina kosɔbɛ.

²⁴ Yezu n'a ka kalandenw sera Kafaranamu tuma min na, bolomafara min be di Alabatosoba koo la, mɔgɔ minw tun be to k'o minɛ, olu nana Piyɛri ɲininga ko: «Aw ka karamɔgɔ nin te to ka bolomafara di wa?»

²⁵Piyɛri y'u jaabi ko: «Ɔnhɔn, a be to k'a di.» Piyɛri sera soo tuma min na, Yezu kɔnna k'a ɲininga ko: «Simɔn, ele ka miiriya ye jumɛn ye koo nin na? Mɔgɔ jumɛnw le ka kan ka wusuru, walima lɛnpo sara faamaw ye? U deenw wa, walima mɔgɔ wɛrɛw?»

²⁶Piyɛri y'a jaabi ko: «Mɔgɔ wɛrɛw lo.» Yezu y'a fɔ a ye ko: «O kɔrɔ k'u deenw lafoninin be kɛ!

²⁷Nga waasa miiriyajugu kana don mɔgɔ nunu kuun na, o kama, i ka dulen ta ka taga baa la k'a fili yen. N'i kɔnna ka jigɛ min minɛ, i k'a daa yɛlɛ ka filɛ yen. I bena wari sɔrɔ yen min be i ka bolomafara ni ne ta bɔ. I ka taga o di.»