Read dyu Matiyo ka kitabu 18 Bible Online

Matiyo ka kitabu 18 - dyu bible

Matiyo ka kitabu 18

¹ O waati la, Yezu ka kalandenw gwɛrɛla a la k'a ɲininga ko *sankolo masaya la, jɔn le ye mɔgɔbaba ye?

²Yezu ye denmisɛn dɔ wele k'o lɔ u cɛma,

³ k'a fɔ u ye ko: «Tiɲɛ na, n b'a fɔ aw ye ko n'aw m'aw sɔɔn yɛlɛma k'a kɛ i n'a fɔ denmisɛnw ta, aw tena don sankolo masaya la.

⁴O la, mɔgɔ min b'a yɛrɛ majigi ka kɛ i n'a fɔ denmisɛn nin, o tigi bena kɛ mɔgɔbaba ye sankolo masaya la.

⁵Ni mɔgɔ min be denmisɛn nin ɲɔgɔn minɛ ka ɲa ne kosɔn, o tigi be ne le minɛ ka ɲa.

⁶«Denmisɛn minw lara ne la, ni mɔgɔ dɔ kɛra sababu ye k'olu dɔ kunna cɛn, sanni a tigi k'o kɛ, ni kabakuru belebeleba tun sirila a kaan na, k'a fili kɔgɔji kɔnɔ, o tun ka fisa a ma.

⁷Diɲɛ mɔgɔ minw kɛra sababu ye ka mɔgɔ caaman kunna cɛn, bɔnɛ ye olu ta ye. Wajibi lo dɔw kunna bena cɛn, nga mɔgɔ min bena kɛ o dɔ sababu ye, bɔnɛ y'o tigi ta ye.

⁸ N'i bolo kelen, walima n'i seen kelen be kɛ sababu ye k'i don kojugu la, a tigɛ k'a fili yɔrɔjan. I ka don arijana na n'i bolo kelen, walima n'i seen kelen ye, o ka fisa i ma, i ka fili tasuma fagabali yɔrɔ la n'i bolo fila, walima n'i seen fila ye.

⁹ N'i ɲaa be kɛ sababu ye k'i don kojugu la, a wɔgɔbi k'a fili yɔrɔjan. I ka don arijana na n'i ɲaden kelen ye, o ka fisa i ma, ɲaa fila ka to i fɛ, i ka fili jahanama na.

¹⁰«Aw k'aw yɛrɛ kɔlɔsi, aw si kana denmisɛn nunu dɔ dɔgɔya, bari ne b'a fɔ aw ye k'olu ka mɛlɛkɛw be n Faa ɲakɔrɔ arijana na tuma bɛɛ. [

¹¹ Mɔgɔ Dencɛ nana ka mɔgɔ tununinw kisi.]

¹²Aw ka miiri la, ni saga kɛmɛ be mɔgɔ dɔ fɛ, ni olu dɔ tununa, sagatigi nin tena saga bi kɔnɔntɔn ni kɔnɔntɔn to kulu kan ka taga kelen nin yaala wa?

¹³Ne b'a fɔ aw ye ko n'a y'a ye, a nisɔn bena diya ale kosɔn ka tɛmɛ bi kɔnɔntɔn ni kɔnɔntɔn nunu kan.

¹⁴O cogo kelen la, aw Faa min be sankolo la, a t'a fɛ denmisɛn nunu dɔ ka tunu.

¹⁵ «N'i balima ye hakɛ kɛ, ta'a fɛ k'a ladi i kelen ale kelen. N'a sera k'i faamu ka sɔn a la, e y'i balima tanga.

¹⁶ Nga n'a banna k'i lamɛn, i ka mɔgɔ kelen, walima fila fara i kan ka ta'a fɛ tugu, waasa mɔgɔ fila, walima mɔgɔ saba k'o koo ɲanabɔ.

¹⁷N'a ma sɔn olu ka fɔta ma, i k'o koo fɔ Ala ka jama ye. N'a ma sɔn olu ka fɔta ma fana, i k'a jati Alalɔnbali, walima lɛnpominɛla ye.

¹⁸ Tiɲɛ na, ne b'a fɔ aw ye ko aw mana fɛɛn o fɛɛn siri dugukolo kan, o bena siri sankolo la. N'aw ye fɛɛn o fɛɛn foni dugukolo kan, o bena foni sankolo la.

¹⁹«Tiɲɛ na, ne b'a fɔ aw ye tugu ko ni mɔgɔ fila bɛnna aw cɛma ka Ala daali fɛɛn o fɛɛn na k'u to dugukolo kan yan, ne Faa min be sankolo la bena o d'u ma.

²⁰Bari ni mɔgɔ fila walima mɔgɔ saba mana ɲɔgɔn lajɛn yɔrɔ o yɔrɔ ne tɔgɔ la, ne b'u cɛma.»

²¹ Piyɛri gwɛrɛla Yezu la k'a ɲininga ko: «Matigi, ni n balima be to ka ne hakɛ ta tuma bɛɛ, ne ka kan ka yafa a ma siɲɛ joli? Fɔɔ ka taga se siɲɛ wolonwula wa?»

²²Yezu y'a jaabi ko: «Ayi, ne t'a fɔ i ye siɲɛ wolonwula dɛ, nga siɲɛ wolonwula sigiyɔrɔman bi wolonwula.

²³«Bari *sankolo masaya be i ko masacɛ dɔ ta. Ale tun b'a fɛ k'a ka nafolo jati minɛ n'a ka baaradenw ye.

²⁴K'a to jatili la, u nana ni baaraden dɔ ye min tun ka kan ka wari caaman sara.

²⁵Masacɛ nin y'a ye ko a tena se k'a bɛɛ sɔrɔ k'a sara minkɛ, a k'u ka baaraden nin, n'a ka muso, n'a ka denmisɛnw, n'a bololafɛn bɛɛ feere, waasa juru nin ka se ka sara.

²⁶Baaraden nin y'a kunbiri gwan a kuntigi kɔrɔ k'a daali ko a ka muɲu ale kɔrɔ dɔɔni, ko ale bena juru nin bɛɛ sara.

²⁷A kuntigi makarila a la, ka yafa a ma juru nin la.

²⁸O baaraden nin bɔra a kuntigi ka soo waati min na, a y'a tɔɲɔgɔn dɔ ye min tun ka kan ka wari dɔɔni d'ale ma. A y'a minɛ k'a kaan dɛrɛ kosɔbɛ fɔɔ a ninakili degunna, k'a fɔ a ye ko: ‹N ka wari sara.›

²⁹A tɔɲɔgɔn nin y'a yɛrɛ majigi a kɔrɔ k'a daali ko: ‹muɲu ne kɔrɔ, ne ben'a sara.›

³⁰Nga baaraden nin ma sɔn, a y'a don kaso la, k'a fɔ ko ni ale ka juru ma sɔrɔ, ko a te bɔ.

³¹A tɔɲɔgɔn dɔw fana y'u ye minkɛ, olu nii tɔɔrɔla kosɔbɛ. Olu tagara o fɔ u kuntigi ye.

³²O tuma na, u kuntigi k'u ka taga baaraden nin wele ka na. U tagar'a wele, a nana tuma min na, a kuntigi y'a fɔ a ye ko: ‹Baaradenjugu, ne tun yafara i ma juru nin la, bari i ye ne daali.

³³Ne makarila i la cogo min na, ele fana tun ka kan ka makari i tɔɲɔgɔn na ten.›

³⁴A kuntigi dimina kosɔbɛ, a ye baaraden nin don kaso la, a ko ni juru nin bɛɛ ma sara, ko a te bɔ.»

³⁵O kɔ, Yezu ye nin fɔ k'a la a kan ko: «Ne Faa min be sankolo la, o bena aw kɛ ten, n'aw te sɔn ka yafa aw tɔɲɔgɔn ma aw dusu bɛɛ la.»