Read dyu Matiyo ka kitabu 19 Bible Online

Matiyo ka kitabu 19 - dyu bible

Matiyo ka kitabu 19

¹Yezu tilara kuma na tuma min na, a bɔra Galile mara la ka taga Zude mara yɔrɔ dɔ la, Zurudɛn baji kɔfɛ.

²O yɔrɔ la jamaba tugura a kɔ, a y'olu ka banabagatɔw kɛnɛya.

³*Fariziɲɛ dɔw nana Yezu darabɔ k'a filɛ. U y'a ɲininga ko: «A daganin be cɛɛ k'a muso furu sa koo sugu bɛɛ la wa?»

⁴ Yezu y'u jaabi ko: «Aw m'a mɛn Ala ka kuma na, ko Ala ye diɲɛ dan tuma min na, a ye cɛɛ ni muso dan wa?

⁵ A y'a fɔ fana k'o le kosɔn cɛɛ ben'a faa n'a baa to yen ka nɔrɔ a ka muso la, u fila bɛɛ bena jɛn ka kɛ kelen ye.

⁶A kɛra ten, u tena kɛ mɔgɔ fila ye tugu, fɔɔ kelen. Ala ye min jɛn ka kɛ kelen ye, mɔgɔ si kana o faran.»

⁷ U ye Yezu ɲininga ko: «Mun na Musa y'a fɔ ko wajibi lo n'an b'a fɛ ka muso furu sa, ko an ka kan ka furusasɛbɛ d'a ma?»

⁸Yezu y'a fɔ u ye ko: «Aw ka dusugwɛlɛya le y'a to Musa sɔnna ko aw be se k'aw ka muso bila, n'o tɛ, fɔlɔfɔlɔ a tun te ten.

⁹ Ne b'a fɔ aw ye ko ni mɔgɔ o mɔgɔ y'a ka muso furu sa, ni ɲamɔgɔya sababu tɛ, ka dɔ wɛrɛ ta, o tigi ye kakalaya kɛ.»

¹⁰Yezu ka kalandenw y'a fɔ a ye ko: «Ni nin le kɛra furu cogo ye, o tuma na, kuun t'a la mɔgɔ ka furu.»

¹¹Yezu y'a fɔ u ye ko: «Mɔgɔ bɛɛ te se k'o kɛ, fɔɔ ni Ala y'a see di mɔgɔ min ma.

¹²Nga mɔgɔ dɔw be wolo ni furubaliya ye. Dɔw kɛra cɛgwanaw ye mɔgɔ wɛrɛ sababu la. Dɔw fana banna furu ma *sankolo masaya kosɔn. Mɔgɔ min be se ka sɔn furubaliya ma, o tigi ka sɔn.»

¹³Mɔgɔw nana Yezu fɛ ni denmisɛnw ye, waasa a k'a bolo la u kan ka Ala daali u ye. Nga kalandenw sɔngɔra u kunna.

¹⁴Yezu y'a fɔ u ye ko: «Aw ka denmisɛnw to u ka na ne fɛ, aw kana u bali, bari *sankolo masaya ye olu bɔɲɔgɔnw le ta ye.»

¹⁵A y'a bolo la u kan, o kɔ, a tagara.

¹⁶Cɛɛ dɔ gwɛrɛla Yezu la k'a ɲininga ko: «Karamɔgɔ, ne ka kan ka koɲuman jumɛn le kɛ ka nii banbali sɔrɔ?»

¹⁷Yezu y'a fɔ a ye ko: «Mun na i be ne ɲininga koɲuman koo? Fɛɛn kelen dama le ka ɲi. N'i b'a fɛ ka nii banbali sɔrɔ, i ka Ala ka sariyaw bato.»

¹⁸ Cɛɛ nin ye Yezu ɲininga ko: «O ye sariya jumɛn ye?» Yezu y'a fɔ a ye ko: « ‹I kana mɔgɔ faga, i kana kakalaya kɛ, i kana soɲali kɛ, i kana galon seereya kɛ.

¹⁹ E k'i faa n'i baa boɲa. Ani k'i mɔgɔɲɔgɔn kanu i n'a fɔ i yɛrɛ.› »

²⁰Kanbelen nin y'a jaabi ko ale sera k'o bɛɛ bato, ko mun b'ale jɛn tugu.

²¹Yezu y'a fɔ a ye ko: «N'i b'a fɛ i ka koow bɛɛ ka dafa, taga k'i bololafɛnw feere k'o wari tilan fantanw cɛ, o la, i bena nafolo sɔrɔ sankolo la. O kɔ, na tugu ne kɔ.»

²²Nga kanbelen nin y'o kuma mɛn tuma min na, a dusu kasinin le tagara, bari nafoloba tun b'a fɛ.

²³Yezu y'a fɔ a ka kalandenw ye ko: «Tiɲɛ na, ne b'a fɔ aw ye ko nafolotigi donko ka gwɛlɛ *sankolo masaya la.

²⁴Ne b'a fɔ aw ye tugu ko ɲɔgɔmɛ donko ka nɔgɔ miseli woo fɛ ka tɛmɛ nafolotigi donko kan Ala ka masaya la.»

²⁵Kalandenw y'o kuma mɛn minkɛ, u kabakoyara kosɔbɛ. Olu tun b'a fɔra k'o tuma na, jɔn le be se ka kisi?

²⁶Yezu y'u filɛ k'a fɔ u ye ko: «Adamadenw kɔni te se k'o kɛ, nga Ala be se koo bɛɛ la.»

²⁷Piyɛri ye Yezu ɲininga ko: «A filɛ, an ye fɛɛn bɛɛ to yen ka tugu e kɔ. An ta bena kɛ cogo di?»

²⁸ Yezu y'a fɔ u ye ko: «Tiɲɛ na, ne b'a fɔ aw ye ko ni diɲɛ nana kɛ diɲɛkura ye tuma min na, Mɔgɔ Dencɛ bena sigi a ka masasigilan kan. Aw minw tugura a kɔ, aw fana bena sigi masasigilan tan ni fila kan, ka Isirayɛli ka deen tan ni fila kɔmɔgɔw kiti.

²⁹Ani mɔgɔ o mɔgɔ min y'a ka soo to, walima a balimacɛw, n'a balimamusow, a faa n'a baa, a deenw, an'a ka foro ne kosɔn, o tigi bena o ɲɔgɔn caaman sɔrɔ, ani ka nii banbali sɔrɔ.

³⁰ Nga ɲamɔgɔ caaman bena kɛ kɔmɔgɔw ye, kɔmɔgɔ caaman bena kɛ ɲamɔgɔw ye.