Read dyu Matiyo ka kitabu 2 Bible Online

Matiyo ka kitabu 2 - dyu bible

Matiyo ka kitabu 2

¹Yezu wolola Bɛtilehɛmu, Zude mara la. O waati la, *Erɔdi tun ye o yɔrɔ masacɛ ye. A wolola minkɛ, lɔnnikɛla dɔw bɔra kɔrɔn fɛ ka taga Zeruzalɛmu

²k'a koo ɲininga ko: «Zuwifuw ka masacɛ min wolola sisan, a be min? An nan'a boɲa bari an y'a ka lolo ye k'an to kɔrɔn fɛ.»

³Masacɛ Erɔdi y'o mɛn tuma min na, ale ni Zeruzalɛmukaw bɛɛ kɔnɔnafilila.

⁴Erɔdi ye sarakalasebagaw kuntigiw ni sariya karamɔgɔw bɛɛ lajɛn k'u ɲininga ko Ala ka Mɔgɔ wolomanin nin ka kan ka wolo min.

⁵U y'a jaabi ko: «A ka kan ka wolo Bɛtilehɛmu, Zude mara la, bari kira dɔ tun y'a sɛbɛn ko:

⁶ ‹Bɛtilehɛmu min ye Zude mara dugubabaw la fitini ye, kuntigi bena bɔ yen ka ne ka jama Isirayɛli mara.› »

⁷O kɔ, Erɔdi ye lɔnnikɛla nunu wele dogo la k'u ɲininga ko: «Aw ye lolo nin ye waati jumɛn?»

⁸O kɔ a ye sira d'u ma k'a fɔ u ye ko: «Aw ye taga Bɛtilehɛmu ka denɲɛnin yɔrɔ ɲini ka ɲa. N'aw y'a ye, aw ye kɔsegi ka n'a fɔ ne ye janko ne fana ka taga boɲa.»

⁹Masacɛ tilara a ka kuma na tuma min na, u ye sira minɛ. K'u to taama na, u tun ye lolo min ye k'u to kɔrɔn fɛ, u y'o ye u ɲafɛ tugu. Denɲɛnin tun be yɔrɔ min na, lolo nin bilara u ɲafɛ fɔɔ ka taga lɔ o yɔrɔ sanfɛ.

¹⁰U ye lolo nin ye tuma min na, u nisɔn diyara kosɔbɛ.

¹¹U donna soo kɔnɔ, ka denɲɛnin n'a bamuso Mariyamu ye. U y'u kunbiri gwan k'a deen boɲa. O kɔ, u y'u ka minanw dayɛlɛ, ka sanu ni wusulan ani tulu kasadiman di deen ma.

¹²Ala y'a fɔ lɔnnikɛla nunu ye siko la k'u kana segi ka taga bɔ Erɔdi fɛ. O la, u ye sira wɛrɛ ta ka taga u ka jamana na.

¹³Lɔnnikɛlaw taanin kɔ, Matigi ka mɛlɛkɛ dɔ y'a yɛrɛ yira Yusufu la siko la. A y'a fɔ Yusufu ye ko a ka wili ka boli ka taga ni deen n'a baa ye Ezipiti jamana na, bari *Erɔdi bena deen yɔrɔ ɲini ko a b'a faga. Ko a ka to o yɔrɔ la fɔɔ n'ale ka kuma sera a ma tuma min na.

¹⁴Yusufu wilila o suu nin yɛrɛ la ka taga ni deen n'a baa ye Ezipiti jamana na.

¹⁵ U tora yen fɔɔ Erɔdi nana sa. O koow kɛra janko kira tun ye Matigi ka kuma min fɔ, o ka dafa. A tun ko: «Ne ye n dencɛ wele ka bɔ Ezipiti jamana na.»

¹⁶*Erɔdi y'a lɔn tuma min na ko lɔnnikɛlaw y'ale janfa, a dimina kosɔbɛ. A y'a ka sɔlidasiw ci Bɛtilehɛmu n'a dafɛ duguw la, ka deen cɛmanw bɛɛ faga minw bɛɛ sii ma tɛmɛ saan fila kan, bari a tun y'a jati ko deen sii ma tɛmɛ o kan, ka kɛɲɛ ni lɔnnikɛlaw ka fɔta ye.

¹⁷O tuma na, kira Zeremi tun ye min fɔ, o dafara. A tun ko:

¹⁸ «Kulekan bɔra Arama. Kasikan ni mankan caaman lo. Arasɛli le be kasira, bari a deenw sara. A t'a fɛ ka je bari a deenw banna.»

¹⁹*Erɔdi sanin kɔ, ka Yusufu to Ezipiti, Matigi ka mɛlɛkɛ dɔ y'a yɛrɛ yira a la siko la,

²⁰k'a fɔ a ye ko a ka wili ka segi ni deen n'a bamuso ye Isirayɛli jamana na, bari mɔgɔ minw tun b'a fɛ ka deen nin faga, olu banna.

²¹O la, a wilila ka taga ni deen n'a bamuso ye Isirayɛli jamana na.

²²Nga, a y'a mɛn minkɛ ko Arikelayusi kɛra masa ye Zude mara la a facɛ Erɔdi nɔɔ na, a siranna, a ma sɔn ka taga sigi yen. Ala y'a fɔ Yusufu ye siko la ko a ka taga Galile mara la. O la, a tagara yen,

²³ ka taga sigi dugu dɔ la, min tɔgɔ ko Nazarɛti. O kɛra ten janko kiraw tun ye min fɔ, o ka dafa. U tun ko: «U ben'a wele ko Nazarɛtika.»