Read dyu Matiyo ka kitabu 20 Bible Online

Matiyo ka kitabu 20 - dyu bible

Matiyo ka kitabu 20

¹«*Sankolo masaya bɔnin be forotigi dɔ fɛ. A bɔra sɔgɔma joona ko a be sɛnɛkɛlaw ta k'u ci a ka foro kɔnɔ.

²A kɔnna ka minw sɔrɔ, a bɛnna n'olu ye ko a bena warigwɛ deen kelen d'u ma tile kɔnɔ, min ye tile kelen baara sara ye, ka sɔrɔ k'u ci a ka foro la.

³Tile gwanna dɔɔni, forotigi bɔra tugu ka dɔ wɛrɛw siginin ye yiriba kɔrɔ, u tun te baara la.

⁴A y'a fɔ olu fana ye ko: ‹Aw ye taga ne ka foro la ka baara kɛ, ni tile banna, ne bena aw sara.›

⁵Olu tagar'a ka foro la. Tilefɛ, forotigi nin bɔra tugu ka mɔgɔ dɔw sɔrɔ, n'u te baara la, tile sumana dɔɔni, a ye dɔ wɛrɛw sɔrɔ fana, k'u bɛɛ ci a ka foro la.

⁶Tile banna tuma min na, a ye mɔgɔ dɔ wɛrɛw ye tugu minw tun te baara la. A y'a fɔ olu ye ko: ‹Mun n'aw ye tile bɛɛ ban yan n'aw ma taga baara la?›

⁷U y'a jaabi k'u ma baara sɔrɔ mɔgɔ si fɛ. A y'a fɔ olu ye k'u ka taga baara kɛ ale ka foro la.

⁸ Baara jigira tuma min na, forotigi y'a fɔ a ka baarakuntigi ye ko a ka baarakɛla nunu wele k'u ka sara d'u ma, k'a daminɛ minw tagara laban na fɔɔ ka taga bila fɔlɔ taw ma.

⁹Mɔgɔ minw tagara o y'a sɔrɔ tile banna, olu gwɛrɛla, a ye warigwɛ deen kelen kelen di olu bɛɛ ma.

¹⁰Mɔgɔ minw tagara sɔgɔmadafɛ, olu nana gwɛrɛ. U tun b'a miiri k'u bena sɔrɔli kɛ ka tɛmɛ dɔ nunu kan. Nga u kelen kelen bɛɛ ye warigwɛ deen kelen kelen le sɔrɔ.

¹¹Olu y'u ka sara minɛ tuma min na, u tun be ŋunuŋunu forotigi kama.

¹²U tun b'a fɔra ko: ‹Nunu nana kɔfɛ, u yɛrɛ ma tile kelen baara kɛ ani u ma sigɛn i n'a fɔ anw. U ye baara kɛ waati dɔɔni dɔrɔn. Ele y'olu ka sara kɛ kelen ye n'an ta ye.›

¹³Forotigi y'a fɔ u kelen ye ko: ‹N teri, ne ma i tɔɲɔ. An tun ma bɛn a la ko ne bena i sara ni warigwɛ deen kelen ye wa?

¹⁴E k'i ka sara minɛ ka tɛmɛ ka bɔ yan. Mɔgɔ minw tagara baara la kɔfɛ, ne bena e ka sara ɲɔgɔn di olu bɛɛ ma.

¹⁵O tuma na, ne man kan ka n sago kɛ ni n ka wari ye wa, walima ne ye koɲuman min kɛ, o ɲagoya le b'i la?› »

¹⁶ Yezu tilara k'a fɔ ko: «O cogo kelen la, kɔmɔgɔw bena kɛ ɲamɔgɔw ye, ani ɲamɔgɔw bena kɛ kɔmɔgɔw ye.»

¹⁷Yezu n'a ka kalandenw tun be tagara Zeruzalɛmu. K'u to sira kan, a ye kalanden tan ni fila nunu wele u danna k'a fɔ u ye ko:

¹⁸«Ayiwa, an be tagara Zeruzalɛmu. O yɔrɔ la, u bena Mɔgɔ Dencɛ don sarakalasebagaw kuntigiw ni sariya karamɔgɔw bolo. U ben'a fɔ ko a ka kan ka faga.

¹⁹U ben'a don siya wɛrɛw bolo, olu bena yɛlɛ a ma, k'a bugɔ ni golokami ye, k'a gwengwen lɔgɔ kan. Nga tile sabanan loon a bena kunun.»

²⁰O kɔ, Zebede ka muso nana Yezu fɛ n'a dencɛw ye. A y'a kunbiri gwan Yezu kɔrɔ waasa k'a daali.

²¹Yezu y'a ɲininga ko: «E be mun le fɛ?» A y'a jaabi ko: «N'i sigira i ka masaya la tuma min na, a to n deen fila nunu ka sigi i kɔrɔ, mɔgɔ kelen i kinibolo fɛ, kelen i numanbolo fɛ.»

²²Yezu y'u jaabi ko: «Aw be fɛɛn min daali, aw t'o lɔn. Tɔɔrɔ min bena ne sɔrɔ, aw be se k'o ɲɔgɔn muɲu wa?» U y'a fɔ ko: «An be se.»

²³Yezu y'a fɔ u ye ko: «Aw kɔni bena o tɔɔrɔ muɲu. Nga ka sigi ne kinibolo, walima ne numanbolo fɛ, ne t'o latigɛbaga ye. N Faa y'o yɔrɔw labɛn minw ye, u bena di olu le ma.»

²⁴Kalanden tan nunu y'o mɛn minkɛ, u dimina mɔgɔ fila nunu kɔrɔ.

²⁵Yezu y'u wele k'a fɔ u ye ko: «Aw b'a lɔn ko diɲɛ kɔnɔ, siyaw ɲamɔgɔw be kuntigiya kɛ tɔw kan, mɔgɔbabaw be fanga yira u la.

²⁶ A man kan ka kɛ ten aw cɛma. Ni mɔgɔ min b'a fɛ ka kɛ mɔgɔba ye aw cɛma, o tigi ka kan k'a yɛrɛ kɛ aw ka baaraden ye.

²⁷Ni mɔgɔ min b'a fɛ ka kɛ ɲamɔgɔ ye aw cɛma, o ka kan ka kɛ aw ka jɔɔn ye.

²⁸O cogo la, Mɔgɔ Dencɛ ma na waasa mɔgɔw ka baara kɛ a ye. Nga, a nana ka mɔgɔw mako ɲa, ani k'a yɛrɛ nii di ka kɛ mɔgɔ bɛɛ nii kunmabɔ sara ye.»

²⁹Yezu n'a ka kalandenw tun be bɔra Zeriko tuma min na, jamaba tun tugura a kɔ.

³⁰Fiɲɛntɔ fila dɔ tun siginin be sira daa la, olu y'a mɛn tuma min na ko Yezu le be tɛmɛna, u y'a daminɛ k'a fɔ ko: «Matigi, Dawuda dencɛ, makari an na!»

³¹Jama sɔngɔra u kunna k'u ka je, nga u pɛrɛnna ka tɛmɛ fɔlɔta kan. U ko: «Matigi, Dawuda dencɛ, makari an na!»

³²Yezu lɔra k'u wele, k'u ɲininga ko: «Aw b'a fɛ ne ka mun kɛ aw ye?»

³³U y'a jaabi ko: «Matigi, an b'a fɛ i k'an ɲaa yɛlɛ.»

³⁴U hinɛ donna Yezu la minkɛ, a magamagara u ɲaa na. O yɔrɔnin bɛɛ, u ye yeli kɛ, u tugura Yezu kɔ.