Read dyu Matiyo ka kitabu 21 Bible Online

Matiyo ka kitabu 21 - dyu bible

Matiyo ka kitabu 21

¹Yezu n'a kɔfɛmɔgɔw surunyana Bɛtifaze la, Olivuyirikulu gɛrɛfɛ. U yɔrɔ tun man jan Zeruzalɛmu na tugu. A ye kalandenw fila ci

²k'a fɔ u ye ko: «Aw ye taga ɲafɛ dugu nin na. Aw bena falimuso n'a deen sirinin sɔrɔ yen. Aw k'a foni ka na n'u ye.

³Ni mɔgɔ dɔ y'aw ɲininga, aw k'a fɔ a tigi ye ko Matigi mako le b'u la, o yɔrɔnin bɛɛ, a bena aw to aw be na n'u ye.»

⁴O koo kɛra ten waasa kira tun ye kuma min fɔ, o ka dafa.

⁵ A tun ko: «Aw y'a fɔ *Siyɔnkaw ye k'u ka masacɛ be nana, a y'a yɛrɛ majigi ka yɛlɛ faliden kan.»

⁶Kalanden nunu tagar'a kɛ i ko Yezu tun y'a fɔ u ye cogo min na.

⁷U nana ni falimuso n'a deen ye, k'u ka faniw la u kan. Yezu sigira faniw kan.

⁸Mɔgɔ caaman y'u ka faniw lala sira kan, dɔw tun be yiri furaburu tigɛ k'o lala sira kan fana.

⁹ Jama min tun be taama Yezu ɲafɛ, ani minw tun b'a kɔfɛ, olu bɛɛ tun be pɛrɛnna k'a fɔ ko: «An b'i tɔgɔ tanu Dawuda dencɛ! E min be nana Matigi tɔgɔ la, Ala ka barika don i la. Ala tɔgɔ ka tanu arijana na.»

¹⁰Yezu donna Zeruzalɛmu kɔnɔ tuma min na, dugu bɛɛ ɲagamina, u tun be ɲɔgɔn ɲiningana ko cɛɛ nin ye jɔn ye.

¹¹U tun be ɲɔgɔn jaabi ko kira Yezu lo ka bɔ Nazarɛti, Galile mara la.

¹²Yezu donna Alabatosoba kɔnɔ waati min na, a ye feerekɛlaw, ni sannikɛlaw gwɛn ka bɔ yen, ka warifalenbagaw ka tabaliw ni tubani feerebagaw ka sigilanw ɲɔti k'u benben duguma.

¹³ O kɔ, a y'a fɔ u ye ko a fɔra Ala ka kuma na ko: «Ne ka soo bena kɛ daalilikɛyɔrɔ ye. Nga aw kɔni y'a kɛ soonw ka yɔrɔ ye.»

¹⁴Fiɲɛntɔw ni senkelenninw tagara Yezu fɛ Alabatosoba kɔnɔ. Yezu y'u kɛnɛya.

¹⁵Sarakalasebagaw kuntigiw ni sariya karamɔgɔw y'o kabako kɛninw ye tuma min na, ani denmisɛnw tun be pɛrɛn n'u b'a fɔra ko: «An b'i tanu Dawuda dencɛ,» u dimina kosɔbɛ.

¹⁶ U ye Yezu ɲininga ko: «I ma denmisɛn nunu ka kuma mɛn wa?» Yezu y'u jaabi ko: «Ɔnhɔn, aw fana ma deli k'a kalan Ala ka kuma na wa ko: ‹E y'e tanuli kuma don denmisɛnw ni denɲɛninw daa la.›?»

¹⁷A y'o kuma fɔ ka ban, a y'u to yen ka bɔ dugu kɔnɔ ka taga sii Betani.

¹⁸Sɔgɔmadafɛ Yezu tun be kɔsegira ka taga Zeruzalɛmu, kɔngɔ y'a minɛ.

¹⁹A ye torosun dɔ ye sira daa la minkɛ, a gwɛrɛla a la k'a filɛ, nga a ma foyi sɔrɔ a la furaburu kɔ. Yezu y'a fɔ yiri nin ye ko: «A banna, ele kɔni tena deen kɛ tugu!» O waati yɛrɛ la yiri nin jara.

²⁰Kalandenw y'o ye minkɛ, u kabakoyara kosɔbɛ. U y'a ɲininga ko a kɛra cogo di torosun nin jara yɔrɔnin kelen.

²¹ Yezu y'u jaabi ko: «Tiɲɛ na, ne b'a fɔ aw ye ko n'aw lara ne la, n'aw te sigasiga fewu, ne ye min kɛ torosun na, aw bena se k'o ɲɔgɔn kabakow kɛ. Aw bena dɔ wɛrɛw yɛrɛ kɛ ka tɛmɛ a kan. Hali n'aw y'a fɔ kulu nin ye ko: ‹Wili ka bɔ yan ka taga ben kɔgɔji kɔnɔ,› o bena kɛ.

²²N'aw lara ne la, n'aw ye fɛɛn o fɛɛn daali Ala fɛ, a bena o d'aw ma.»

²³Yezu tagara Alabatosoba kɔnɔ. K'a to mɔgɔw kalan na, sarakalasebagaw kuntigiw ni zuwifu ka cɛkɔrɔbaw nana k'a ɲininga ko: «I be koo minw kɛ, jɔn le y'o sira d'i ma? Jɔn le y'o kɛ see d'i ma?»

²⁴Yezu y'u jaabi ko: «Ne fana bena aw ɲininga koo kelen dɔrɔn na. N'aw ye ne jaabi, o tuma na, min ye sira di ne ma ka koo nunu kɛ, ne bena o fɔ aw ye.

²⁵Jɔn le tun ye Zan ci ka na mɔgɔw batize, Ala lo wa, walima mɔgɔw lo?» Nga u tora ka ɲɔgɔn sɔsɔ gɛrɛfɛ k'a fɔ ko: «N'an y'a jaabi ko Ala lo, a bena an ɲininga ko mun na an ma la a la.

²⁶Nga n'an y'a fɔ ko mɔgɔw lo fana, an ka kan ka siran jama ɲa, bari mɔgɔ bɛɛ lar'a la ko Zan tun ye kira ye.»

²⁷O la, u ye Yezu jaabi ko: «An t'a lɔn.» Ale fana y'a fɔ u ye ko: «N'o lo, mɔgɔ min ye sira di ne ma ka koo nunu kɛ, ne fana tena o fɔ aw ye.»

²⁸Yezu y'u ɲininga tugu ko: «Aw be mun le miiri nin na? Deen fila tun be cɛɛ dɔ fɛ. A y'a fɔ deen fɔlɔ ye ko: ‹Bii, ne b'a fɛ i ka taga baara kɛ foro kɔnɔ.›

²⁹Deen fɔlɔ nin y'a jaabi ko: ‹Ne tena se ka taga.› Dɔɔni a nimisara, a ye sira minɛ ka taga foro la.

³⁰Facɛ nin tagara deen filanan fɛ, k'a fɔ ale ye fana, deen ko: ‹Ɔnhɔn baba, ne bena taga.› Nga a ma taga.

³¹O deen fila nunu cɛma, jumɛn le ye a facɛ sago kɛ?» U y'a jaabi ko deen fɔlɔ kɛ. Yezu y'a fɔ u ye ko: «Ne b'a fɔ aw ye tiɲɛ na ko lɛnpominɛlaw ni kakalamusow bena kɔn ka don aw ɲa Ala ka masaya kɔnɔ.

³² Bari Zan nana aw fɛ ka taamacogoɲuman yira aw la. Aw ma sɔn o ma, nga lɛnpominɛlaw ni kakalamusow sɔnna o ma. Aw y'o ye, aw ma sɔn k'aw dusu yɛlɛma ka la a la.»

³³ Yezu y'a fɔ u ye tugu ko: «Aw y'aw tulo malɔ talen dɔ wɛrɛ la. Forotigi dɔ ye *ɛrɛzɛnforo bɔ. A ye kogo kɛ k'a lamini, ka dingɛ sogi ka ɛrɛzɛn nin jii bɔyɔrɔ dilan, ka sangaso lɔ a kɔlɔsibagaw ye. A y'a don baarakɛla dɔw bolo. O kɔ, a tagara taama na.

³⁴Ɛrɛzɛn mɔna tuma min na, a y'a ka jɔɔnw ci baarakɛla nunu fɛ k'u ka taga ale niyɔrɔ minɛ.

³⁵Baarakɛla nunu y'o jɔɔnw minɛ, ka kelen bugɔ kosɔbɛ, ka kelen faga ani ka tɔ kelen nin bon ni kabakuruw ye.

³⁶Forotigi y'a ka jɔɔn dɔ wɛrɛw ci minw cayara ni fɔlɔtaw ye. Baarakɛla nunu y'olu minɛ k'u kɛ i n'a fɔ u tun ye fɔlɔtaw kɛ cogo min na.

³⁷A laban na, a y'a dencɛ ci u ma, a tun be miiri ko: ‹U bena n dencɛ boɲa.›

³⁸Nga baarakɛlaw y'o ye tuma min na, u y'a fɔ ɲɔgɔn ye ko: ‹Nin le ye cɛntala ye. Aw ye na an k'a faga ka cɛɛn nin kɛ an ta ye.›

³⁹U y'a minɛ ka taga n'a ye waga kɔnɔ k'a faga.»

⁴⁰Yezu y'u ɲininga ko: «Sisan ni forotigi nana tuma min na, a bena mun le kɛ o baarakɛlaw la?»

⁴¹U y'a jaabi ko: «Wajibi lo, a tena makari o mɔgɔjugu nunu na, a bena u faga, k'a ka foro kalifa baarakɛla dɔ wɛrɛw ma, minw ben'a niyɔrɔ d'a ma ɛrɛzɛnmɔtuma na.»

⁴² O kɔ, Yezu y'a fɔ u ye ko: «Min fɔra Ala ka kuma na, aw m'o mɛn ka ye wa? Ko: ‹Bonlɔlaw tun banna kabakuru min na, o nana kɛ kabakuru barikaman ye, boon nɔnkɔn ta. O koo bɔra Matigi le fɛ, a kɛra kabako ye an ɲana.› »

⁴³Yezu y'a fɔ u ye tugu ko: «Ne b'a fɔ aw ye k'o cogo kelen la, Ala ka masaya bena bɔsi aw la, ka di siya wɛrɛw ma. Olu bena kɛwaliɲuman kɛ. [

⁴⁴Ni mɔgɔ min benna o kabakuru nin kan, o tigi kolow bena karikari, nga n'o kabakuru nin benna mɔgɔ min kan, a bena o tigi ɲɔɲɔ.]»

⁴⁵Sarakalasebagaw ani *Fariziɲɛw ye Yezu ka talen nunu mɛn ka ban tuma min na, u y'a faamu ko Yezu tun be kuma olu le koo la.

⁴⁶U tun be cogoya ɲinina waasa ka Yezu minɛ, nga u tun be siran jama ɲa, bari olu bɛɛ tun be Yezu jati kira ye.