Read dyu Matiyo ka kitabu 22 Bible Online

Matiyo ka kitabu 22 - dyu bible

Matiyo ka kitabu 22

¹Yezu kumana u fɛ talen na tugu k'a fɔ ko:

²«*Sankolo masaya be i ko masacɛ dɔ ta, min y'a deen ka kɔɲɔya dumuni labɛn.

³A tun y'o dumuni koo fɔ minw ye, a y'a ka baaradenw ci k'u ka taga olu wele, nga olu tun t'a fɛ ka na.

⁴O kɔ, a y'a ka baaraden dɔ wɛrɛw ci tugu k'u ka taga fɔ mɔgɔ nunu ye ko: ‹Ne ye dumuni bɛɛ labɛn ka ban. Ne ye n ka turaw ani n ka begɛn tulɔninw faga ka ban. Fɛɛn bɛɛ labɛnna, aw ye na o dumu.›

⁵Nga minw welela, olu ma miiri u welekun na. U tagara u ɲana taw la: Dɔ tagar'a ka foro la, dɔ fana tagar'a ka jago kɛyɔrɔ la.

⁶Tɔɔ nunu ye baaradenw minɛ k'u tɔɔrɔ kosɔbɛ ani k'u faga.

⁷Masacɛ dimina kosɔbɛ, a y'a ka sɔlidasiw ci ka taga o mɔgɔfagala nunu halaki ani ka u ka dugu jɛni.

⁸O kɔ, a y'a fɔ a ka baaraden dɔ wɛrɛw ye ko: ‹Kɔnyɔya dumuni labɛnna ka ban, nga minw tun welela, olu tun man kan n'a ye.

⁹Aw ye taga sirabaw daa la, n'aw ye mɔgɔ o mɔgɔ sɔrɔ, aw k'u wele, u ka na dumuni nin dumu.›

¹⁰Baaraden nunu tagara sira daaw la. U ye mɔgɔ o mɔgɔ sɔrɔ yen, u y'u wele, a ɲumaman fara jugumanw kan, fɔɔ kɔɲɔya dumuni labɛnna soo min kɔnɔ, o fara.

¹¹Masacɛ donna ko a be mɔgɔ welenin nunu filɛ waati min na, a ye cɛɛ dɔ ye kɔɲɔya fani tun te min kaan na.

¹²A y'a fɔ o cɛɛ nin ye ko: ‹N teri, ele kɛra cogo di ka don yanni kɔɲɔya fani t'i kaan na?› Cɛɛ nin lɔra, a ma se ka kuma.

¹³ Masacɛ y'a fɔ a ka baaradenw ye ko: ‹Aw k'a seen n'a bolow siri, k'a ta k'a fili kɛnɛma dibi la. A bena kasi ka kule yen.›

¹⁴Ala be mɔgɔ caaman wele waasa u ka don a ka masaya yɔrɔ la, nga minw be se ka don, olu man ca.»

¹⁵*Fariziɲɛw tagara ɲɔgɔn ye kɛ, waasa ka cogo ɲini ka se ka Yezu minɛ n'a yɛrɛ dalakuma ye.

¹⁶U y'u ka kalanden dɔw, ni *Erɔdi ka mɔgɔ dɔw ci, waasa u k'a fɔ Yezu ye ko: «Karamɔgɔ, an y'a lɔn ko i be tiɲɛ fɔ, an'i be mɔgɔ kalan ni tiɲɛ ye Ala ka sira la. I fana te siran mɔgɔ si ɲa ka sɔn o tigi ta ma, i te mɔgɔ bɔ mɔgɔ la.

¹⁷I ka miiriya fɔ an ye, a daganin be ka nisɔngɔ sara Ɔrɔmu masacɛ ye wa, walima a daganin tɛ?»

¹⁸Nga Yezu bɔra u ka miiriyajugu kala ma minkɛ, a y'a fɔ u ma ko: «Namaramɔgɔw, mun na aw be ne dakɔrɔbɔ?

¹⁹Aw be lɛnpo sara ni wari min ye, aw k'o dɔ yira ne la.» U ye warigwɛ deen kelen yira a la.

²⁰A y'u ɲininga ko: «Jɔn jaa n'a bulonɔn ye nin ye a kan?»

²¹U y'a jaabi ko: «Masacɛ ta lo.» O kɔ, Yezu y'a fɔ u ye ko: «Fɛɛn min ye masacɛ ta ye, aw k'o di masacɛ ma, ka Ala ta di Ala ma.»

²²U y'o kuma mɛn minkɛ, u kabakoyara kosɔbɛ, o kɔ, u tagara k'a to yen.

²³ *Saduseɲɛw le tun b'a fɔ ko suuw tena kunun. O loon kelen na, u dɔw tagara Yezu fɛ k'a fɔ a ye ko:

²⁴ «Karamɔgɔ, Musa y'a fɔ ko ni cɛɛ dɔ sara k'a sɔrɔ a ma deen sɔrɔ, ko a dɔgɔcɛ ka kan ka firiyamuso nin ta janko ka deen sɔrɔ a kɔrɔcɛ ye.

²⁵Nga an fɛ, dencɛ wolonwula tun be cɛɛ dɔ fɛ. Kɔrɔcɛman ye muso furu, a sara k'a muso to yen, a ma deen sɔrɔ n'a ye. A kɛra ten, dɔgɔcɛ fɔlɔ ye muso nin ta,

²⁶o kɔ, filanan fana y'a ta, ani sabanan. Olu si ma deen sɔrɔ ni muso nin ye, fɔɔ u mɔgɔ wolonwula bɛɛ ta kɛra ten.

²⁷Olu bɛɛ sanin kɔ, muso nin fana sara.

²⁸Ayiwa, suuw bena kunun loon min na, o muso nin bena kɛ jɔn ta ye mɔgɔ wolonwula nunu cɛma? Bari u bɛɛ y'a furu ka ye.»

²⁹Yezu y'u jaabi ko: «Aw filila, bari aw te Ala ka kuma faamu, aw te Ala ka sebagaya lɔn fana.

³⁰N'o tɛ, suuw bena kunun waati min na, furu tena kɛ. Mɔgɔw bɛɛ bena kɛ i n'a fɔ mɛlɛkɛw sankolo la.

³¹Min ye suuw ka kununko ye, aw ma deli k'o kalan Ala ka kuma na wa? A ko:

³² ‹Ne ye Ibrayima, ni Isiyaka, ani Yakuba ka Ala ye.› Ala te suuw ka Ala ye, nga ɲanamanw ka Ala lo.»

³³Jamaba y'a ka kuma nin mɛn, olu bɛɛ kabakoyara kosɔbɛ.

³⁴*Fariziɲɛw y'a mɛn ko Yezu ye *Saduseɲɛw minɛ kuma na minkɛ, olu ye ɲɔgɔn lajɛn.

³⁵U dɔ, min tun ye sariya karamɔgɔ ye, ale tun b'a fɛ ka Yezu dakɔrɔbɔ. O la, a y'a ɲininga ko:

³⁶«Karamɔgɔ, sariya kɔnɔ, cii jumɛn le koo ka gwɛlɛ?»

³⁷ Yezu y'a jaabi ko: « ‹I ka Matigi i ka Ala kanu n'i dusu bɛɛ ye, an'i kɔnɔ bɛɛ ye, n'i hakili bɛɛ ye.›

³⁸O le ye cii fɔlɔ ye, ani o koo le ka gwɛlɛ fana.

³⁹ A filanan be yen min koo ka gwɛlɛ i n'a fɔ fɔlɔ. O ye ko: ‹I k'i mɔgɔɲɔgɔn kanu i n'a fɔ i yɛrɛ.›

⁴⁰Sariya ni kiraw ka kalan bɛɛ bɔra nin cii fila nunu la.»

⁴¹Ka *Fariziɲɛw lajɛnnin to, Yezu y'u ɲininga ko:

⁴²«Aw ka miiri la, Ala ka Mɔgɔ wolomanin nin ye jɔn ye? Jɔn ka deen lo?» U y'a jaabi ko Dawuda dencɛ lo.

⁴³Yezu y'a fɔ u ye ko: «Nii Senuman barika la, Dawuda ye Krista wele ko a Matigi, bari a y'a fɔ ko:

⁴⁴ ‹Matigi Ala y'a fɔ ne Matigi ye ko: Sigi ne kinibolo fɛ fɔɔ ne k'i juguw cɔnkɔn i seen kɔrɔ.›

⁴⁵Ni Dawuda y'a wele Matigi, a do be se ka kɛ a deen dama ye cogo di?»

⁴⁶U mɔgɔ si ma se k'a jaabi. K'a ta o loon na, mɔgɔ si ma sɔn k'a ɲininga tugu.