Read dyu Matiyo ka kitabu 24 Bible Online

Matiyo ka kitabu 24 - dyu bible

Matiyo ka kitabu 24

¹Yezu tun bɔra Alabatosoba kɔnɔ, n'a be tagara, a ka kalandenw gwɛrɛla a la ka kuma a fɛ Alabatosoba lɔcogo koo la.

²Yezu y'a fɔ u ye ko: «Aw ɲaa be soo nin lɔcogo la kɛ? Tiɲɛ na, ne b'a fɔ aw ye ko loon dɔ, kabakuru si tena to a tɔɲɔgɔn kan yan, u bɛɛ bena walaka.»

³Yezu tagara sigi Olivuyirikulu kan. A ka kalandenw gwɛrɛla a la u danna k'a fɔ a ye ko: «Koo nunu bena kɛ tuma jumɛn? Taamasiɲɛ jumɛn bena i nako, ni diɲɛ laban koo yira?»

⁴Yezu y'u jaabi ko: «Aw k'aw yɛrɛ kɔlɔsi janko mɔgɔ si kana aw fili.

⁵Bari, mɔgɔ caaman bena na ne tɔgɔ la k'a fɔ k'olu ye Ala ka Mɔgɔ wolomanin nin ye ka mɔgɔ caaman fili.

⁶Aw bena kɛlɛw kibaru, ani kɛlɛw mankan mɛn. Aw hakili kana ɲagami. Wajibi lo o koow ka kɛ, nga o te diɲɛ laban ye.

⁷Siya dɔ bena wili siya wɛrɛ kama. Jamana dɔ bena wili jamana wɛrɛ kama. Kɔngɔ bena don yɔrɔ dɔw la, dugukolo bena yɛrɛyɛrɛ yɔrɔ dɔw la fana.

⁸O koow bɛɛ bena kɛ tɔɔrɔw daminɛ ye, i n'a fɔ muso ka tiin daminɛ.

⁹ U bena tɔɔrɔ la aw kan, u bena aw faga, Alalɔnbaliw bɛɛ bena aw kɔniya ne tɔgɔ kosɔn.

¹⁰O waati la, mɔgɔ caaman bena Alasira bila, u bena ɲɔgɔn janfa ka ɲɔgɔn kɔniya.

¹¹Mɔgɔ caaman bena wili ka galon tigɛ k'olu ye kiraw ye, u bena mɔgɔ caaman fili.

¹²Kojugu bena fanga sɔrɔ fɔɔ mɔgɔ caaman tena Ala, n'u tɔɲɔgɔnw kanu tugu.

¹³ Nga ni mɔgɔ min muɲuna fɔɔ ka taga se a laban ma, o tigi bena kisi.

¹⁴Ala ka kibaru diman bena fɔ diɲɛ yɔrɔ bɛɛ la, waasa Alalɔnbaliw bɛɛ k'a koo mɛn. O kɔ, diɲɛ laban be sɔrɔ ka se.

¹⁵ «Kira Daniyɛli tun ye fɛnjugu cɛnnikɛla min koo fɔ, n'aw y'o ye Alabatosoba yɔrɔ senuman na tuma min na, (mɔgɔ min be nin kalan, a ka kan k'a faamu),

¹⁶o tuma na, mɔgɔ minw be Zude mara la, olu ka boli ka taga kuluyɔrɔw la.

¹⁷ N'o kɛra ka mɔgɔ min sɔrɔ a ka boon kunna, o tigi kana jigi k'a ka boon kɔnɔnafɛnw ta.

¹⁸N'o y'a sɔrɔ ni min be foro la, o tigi kana kɔsegi ka na a ka foroca ta.

¹⁹O waati la, musokɔnɔmanw ani minw deen be siin min, olu bena tɔɔrɔ kosɔbɛ.

²⁰Aw ka Ala daali waasa o boli nin kana kɛ nɛnɛjugu tuma na, walima lafiɲɛlon na.

²¹ O bena kɛ tɔɔrɔba ye, min ɲɔgɔn ma kɛ ka ye kabini diɲɛ dantuma, fɔɔ ka na se bii ma, ani o tɔɔrɔ ɲɔgɔn fana tena kɛ tugu abada.

²²Ni dɔ tun tena bɔ o tɔɔrɔ waati nin la, mɔgɔ si tun tena kisi. Nga a ye minw woloma k'u kɛ a yɛrɛ taw ye, olu kosɔn, dɔ bena bɔ a la.

²³Ni mɔgɔ dɔ y'a fɔ aw ye o tuma na ko: ‹Ala ka Mɔgɔ wolomanin nin be yan›, walima n'a ko: ‹A be yen fɛ›, aw kana la a la,

²⁴bari mɔgɔ dɔw bena galon tigɛ, k'olu ye Ala ka Mɔgɔ wolomanin nin ye. Dɔw fana bena galon tigɛ k'a fɔ k'olu ye kira ye. U bena kabakobabaw kɛ ka mɔgɔw fili n'o ye. Ala ye mɔgɔ minw woloma k'u kɛ a yɛrɛ taw ye, n'u tun be se, u tun bena olu fana fili.

²⁵Koo minw bena kɛ, ne y'o fɔ aw ye ka ban.

²⁶ «N'u y'a fɔ aw ye ko Ala ka Mɔgɔ wolomanin nin be kongokolon kɔnɔ, aw kana taga yen. N'u y'a fɔ aw ye ko a be yɔrɔ dogonin dɔ la, aw kana la o la.

²⁷Saan be manamana kɔrɔn fɛ ka ye tileben fɛ cogo min na, Mɔgɔ Dencɛ bena kɛ ten fana a nalon na.

²⁸ Fɛnsu be yɔrɔ o yɔrɔ, dugaw be ɲɔgɔn lajɛn yen.

²⁹ «N'o waati tɔɔrɔ tɛmɛna dɔrɔn, tile bena fin, kalo tena yeelen bɔ tugu, lolow bena bɔ sankolo la ka ben, ani sankolo fangatigiw bena yɛrɛyɛrɛ.

³⁰ O tuma na, Mɔgɔ Dencɛ taamasiɲɛ bena bɔ sankolo la ka ye dugukolo kan. Mɔgɔw bɛɛ bena kasi kosɔbɛ, u bena Mɔgɔ Dencɛ natɔ ye sankaba kan ni sebagaya ni nɔɔrɔ ye.

³¹A ben'a ka mɛlɛkɛw ci ni buru fiyɛta belebele ye. A ye mɔgɔ minw woloma k'u kɛ a taw ye, u bena taga diɲɛ faan bɛɛ la k'olu lajɛn.

³²«Aw ka koo nunu faamu ka kɛɲɛ ni torosun cogo ye. N'a bolow nugura tuma min na ka furaburu bɔ, aw b'a lɔn ko samiɲa surunyana.

³³O cogo kelen na, aw mana o koow bɛɛ kɛtɔ ye tuma min na, aw k'a lɔn ko Mɔgɔ Dencɛ natuma sera ka ban, a be sira la.

³⁴Tiɲɛ na, ne b'a fɔ aw ye ko bii mɔgɔ nunu bɛɛ tena sa, ni koo nunu bɛɛ ma kɛ.

³⁵Sankolo ni dugukolo bena tɛmɛ, nga ne ka kuma tena tɛmɛ.

³⁶«Mɔgɔ si t'o loon n'o waati lɔn. Hali mɛlɛkɛw ni Ala Dencɛ t'a lɔn, fɔɔ Faa Ala kelenpe.

³⁷ Koo min tun kɛra Nuhun ka tile la, o ɲɔgɔn bena kɛ fana Mɔgɔ Dencɛ natuma la.

³⁸Bari sanni jiba ka na, mɔgɔw tun be dumunibabaw kɛ ka minni kɛ, ani ka furu fɔɔ ka taga se Nuhun donlon ma kurunba kɔnɔ.

³⁹ O tun te miiri foyi la, fɔɔ jiba nana u halaki. Mɔgɔ Dencɛ ka nako bena kɛ ten fana.

⁴⁰Cɛɛ fila bena sɔrɔ foro kelen kɔnɔ, u bena kelen ta ka kelen to yen.

⁴¹Muso fila bena to sinni la, u bena kelen ta ka kelen to yen.

⁴²O la, aw labɛnnin ka to, bari aw t'aw ka Matigi nalon lɔn.

⁴³ Aw b'a lɔn ko ni sotigi tun be soon nawaati lɔn sufɛ, a tun bena to ɲana k'a bali ka don a ka soo kɔnɔ.

⁴⁴O kosɔn, aw fana labɛnnin ka kan ka to, bari aw te miiri waati min koo la, o waati la Mɔgɔ Dencɛ bena na.

⁴⁵«Baaraden tilennin hakiliman jumɛn be yen, n'a kuntigi y'a sigi a ka baaraden tɔw kunna waasa a ka dumuni d'u ma a diwaati la?

⁴⁶N'a kuntigi nin kɔsegira ka n'a sɔrɔ a b'o baara nin na, baaraden nin bena boɲa sɔrɔ.

⁴⁷Tiɲɛ na, ne b'a fɔ aw ye ko a kuntigi ben'a ka nafolo bɛɛ ɲamɔgɔya don a bolo.

⁴⁸Nga n'o baaraden nin kɛra baaradenjugu ye, n'a y'a miiri ko a kuntigi bena mɛn ka sɔrɔ ka na,

⁴⁹o la, n'a y'a daminɛ ka to k'a tɔɲɔgɔnw bugɔ, ka to dumunibaba la ni ka minni kɛ ni dɔrɔtɔw ye,

⁵⁰o baaraden nin te miiri loon min, ani waati min la, o loon yɛrɛ le la, a kuntigi bena na.

⁵¹A bena o baaraden nin bɔ yen k'a tɔɔrɔ namaramɔgɔw tɔɔrɔcogo la. A bena kasi ka kule yen.