Read dyu Matiyo ka kitabu 27 Bible Online

Matiyo ka kitabu 27 - dyu bible

Matiyo ka kitabu 27

¹Dugu gwɛra tuma min na, sɔgɔmadafɛ, sarakalasebagaw ni cɛkɔrɔbaw ye ɲɔgɔnye kɛ ka bɛn a la k'u bena Yezu faga.

²U ye Yezu siri ka taga di masacɛ ka lasigiden Pilati ma.

³Zuda min tun ye Yezu don bolo la, a y'a mɛn ko Yezu bena faga minkɛ, a nimisara kosɔbɛ ka taga ni warigwɛ bi saba nunu ye sarakalasebagaw ni cɛkɔrɔbaw fɛ,

⁴k'a fɔ u ye ko: «Ne ye hakɛ kɛ ka mɔgɔ jalakibali don aw bolo n'a bena faga.» Olu y'a jaabi ko: «O te an ka sira la, o y'i ka koo ye.»

⁵Zuda ye wari nin fili Alabatosoba kɔnɔ ka tɛmɛ ka taga a yɛrɛ kaan don juru la.

⁶Sarakalasebagaw ye wari nin cɛ k'a fɔ ɲɔgɔn ye ko: «A daganin te an ka nin wari nin ɲɔgɔn don Alabatosoba kɛsu la, bari mɔgɔ dɔ nii sɔngɔ lo.»

⁷O kɔ, u bɛnn'a la k'u bena o wari ta ka taga dagadilanbaga ka foro san n'a ye, waasa o yɔrɔ ka kɛ lonanw suu donyɔrɔ ye.

⁸O le y'a to, fɔɔ ka na se bii ma, u b'o yɔrɔ nin wele ko Nisɔngɔ foro.

⁹ O cogo la, kira Zeremi tun ye min fɔ, o dafara. A tun ko: «U ye warigwɛ bi saba ta, min kɛra mɔgɔtilennin nii sɔngɔ ye, Isirayɛlidenw bɛɛ tun sɔnna min na.

¹⁰U y'o wari di dagadilanbaga ma a ka foro sɔngɔ ye, i ko Matigi tun y'a latigɛ cogo min na.»

¹¹Yezu lɔra masacɛ ka lasigiden ɲafɛ. Lasigiden y'a ɲininga ko: «I ye zuwifuw ka masacɛ ye wa?» Yezu y'a jaabi ko: «E ko ten.»

¹²Sarakalasebagaw ni cɛkɔrɔbaw tun be galon minw lara a kan waasa k'a jalaki, a ma sɔn ka foyi fɔ o koo la.

¹³Pilati y'a fɔ a ye ko: «Mɔgɔ nunu be minw fɔra i ka koo la, i t'o mɛnna wa?»

¹⁴Nga Yezu ma sɔn k'a jaabi. O la masacɛ ka lasigiden kabakoyara kosɔbɛ.

¹⁵*Hɔrɔnya ɲanagwɛ o ɲanagwɛ la, masacɛ ka lasigiden Pilati tun be deli ka kasoden dɔ labila, ka kɛɲɛ ni jama ka laɲini ye.

¹⁶O waati la, cɛɛ dɔ tun be kaso la, min tɔgɔjugu tun bɔra kosɔbɛ, a tɔgɔ ko Barabasi.

¹⁷Pilati ye jama ɲininga ko: «Aw b'a fɛ ne ka Barabasi labila wa, walima Yezu, u ko Ala ye min woloma?»

¹⁸Bari a tun y'a lɔn ko ɲagoya le y'a to u y'a minɛ ka na n'a ye ale fɛ.

¹⁹K'a to kiti tigɛyɔrɔ la, a ka muso ye cii bila k'a fɔ a ye ko: «I kana i niin don mɔgɔtilennin nin ka koo la, bari kunun sufɛ ne ye sikojugu kɛ a ka koo la.»

²⁰Sarakalasebagaw ni cɛkɔrɔbaw ye jama kɔnɔnasu, waasa u ka Pilati daali ko a ka Barabasi labila ka Yezu faga.

²¹A y'u ɲininga tugu ko: «U mɔgɔ fila la, aw b'a fɛ ne ka jɔn le labila?» U y'a jaabi ko Barabasi.

²²A y'u ɲininga ko: «Ne ka mun kɛ Yezu la u be min wele Ala ka Mɔgɔ wolomanin?» U y'a jaabi ko: «A ka kan ka gwengwen lɔgɔ kan.»

²³A y'u ɲininga ko: «A ye kojugu jumɛn le kɛ min kosɔn a ka kan ka faga?» U pɛrɛnna kosɔbɛ ko: «A ka kan ka gwengwen lɔgɔ kan.»

²⁴ Pilati y'a ye ko jama be murutira ka taga minkɛ, ko ale tena se ka foyi kɛ, a ye jii ɲini k'a tigɛ ko u bɛɛ ɲana, k'a fɔ u ye ko: «Ne seen te mɔgɔtilennin nin ka fagako la, o y'aw yɛrɛ ka koo ye.»

²⁵Jama bɛɛ y'a fɔ ko: «An kɔni n'an deenw be lɔ n'a ka saya kunko ye.»

²⁶O kɔ, a ye Barabasi labila, ka sira di k'u ka Yezu bugɔ, ka sɔrɔ ka taga gwengwen lɔgɔ kan.

²⁷Masacɛ ka lasigiden ka sɔlidasiw tagara ni Yezu ye a ka luu kɔnɔ, ka sɔlidasi tɔw bɛɛ wele k'a lɔ u cɛma.

²⁸U y'a ka fani bɔ a kaan na ka fani wuleman dɔ don a la.

²⁹U ye ŋɔni tigɛ k'o meleke k'o kɛ i n'a fɔ masafugulan, k'a don a kuun na. U ye bere dɔ don a bolo, n'u be to k'u kunbiri gwan a kɔrɔ, ka to ka yɛlɛ a ma, k'a fɔ a ye ko: «I dansɛ, zuwifuw ka masacɛ,»

³⁰ka to k'u daji tu a kan, ani ka bere nin minɛ a fɛ k'a bugɔ a kuun na.

³¹U y'a lɔgɔbɔ ka ban tuma min na, u ye delekewulen nin bɔ a kaan na, k'a ka fani don a ye. O kɔ, u tagara n'a ye gwengwenyɔrɔ la.

³²U taatɔ, u ye cɛɛ dɔ kunbɛn min tun ye Sirɛnika ye ka bɔ Libi jamana na, a tɔgɔ ko Simɔn. U y'ale karaba ka Yezu ka gwengwenlɔgɔ ta.

³³U tagara se yɔrɔ dɔ la u be min wele ko Gɔligota, o kɔrɔ ko kungolo yɔrɔ.

³⁴ U ye duvɛn ɲagami ni kunakuna ye, k'u b'o di Yezu ma waasa a k'a min. Yezu y'o nɛnɛ tuma min na, a ma sɔn k'a min.

³⁵ U y'a gwengwen ka ban tuma min na, u ye kala la k'a ka faniw tilan.

³⁶U bɛɛ tun sigira n'u b'a kɔlɔsira.

³⁷U tun y'a fagakun sɛbɛn k'o gwengwen a kuun sanfɛ. A tun sɛbɛnna ko: «Nin ye Yezu ye, zuwifuw ka masacɛ.»

³⁸Benkannikɛla mɔgɔ fila tun gwengwenna a gɛrɛfɛ fana. Kelen tun b'a kinibolo la, tɔɔ kelen a numanbolo la.

³⁹ Mɔgɔ minw tun be tɛmɛna, olu tun be Yezu nɛni ka to k'u kuun kɔmikɔmi.

⁴⁰ U tun b'a fɔra ko: «E min be se ka Alabatosoba ci, ani ka tila k'a lɔ tile saba kɔnɔ, e k'i yɛrɛ kisi. N'i ye Ala Deen ye, i ka jigi ka bɔ gwengwenlɔgɔ kan.»

⁴¹Sarakalasebagaw ni sariya karamɔgɔw ani cɛkɔrɔbaw tun b'a lɔgɔbɔra fana ko:

⁴²«A ye mɔgɔ dɔw kisi, nga a te se k'a yɛrɛ kisi. N'a ye Isirayɛli masacɛ ye, a ka jigi ka bɔ gwengwenlɔgɔ kan. O la, an bena la a la.

⁴³ A y'a jigi bɛɛ la Ala kan k'a fɔ ko ale ye Ala Deen ye. An k'a filɛ sisan ni Ala ben'a kisi.»

⁴⁴O cogo kelen la, benkannikɛla minw tun gwengwenna a gɛrɛfɛ, olu tun b'a nɛni fana.

⁴⁵Tilegwangwanfɛ, dibi donna yɔrɔ bɛɛ la, fɔɔ ka taga se tile sumawaati ma.

⁴⁶ Tile sumana tuma min na, Yezu pɛrɛnna k'a fɔ ko: «Eli, Eli, lamasabakitani», o kɔrɔ ko: «Ne ka Ala, ne ka Ala, mun na i ye ne bila?»

⁴⁷Mɔgɔ minw tun lɔnin be yen, olu dɔw y'o mɛn minkɛ, u y'a fɔ ko a be kira Eli welela.

⁴⁸ Olu dɔ bolila ka taga fuu ta, k'a don vinɛgiri la k'a siri kalajan dɔ la, ko a bena o d'a ma a k'a min.

⁴⁹A tɔɲɔgɔnw y'a fɔ a ye ko: «A to yen, an ben'a filɛ ni Eli bena n'a kisi.»

⁵⁰O kɔ, Yezu kulera kosɔbɛ ka sɔrɔ ka sa.

⁵¹ O yɔrɔnin bɛɛ, Alabatosoba cɛtigɛfani faranna fila ye, k'a ta a sanfɛ fɔɔ duguma. Dugukolo yɛrɛyɛrɛla, kabakuruw cicira.

⁵²Kaburuw daa yɛlɛla. Ala ka mɔgɔ minw tun sara, olu caaman kununna.

⁵³Olu bɔra kaburuw la ka don dugu senuman kɔnɔ Yezu kununnin kɔ. Mɔgɔ caaman y'u ye.

⁵⁴Sɔlidasi kuntigi min tun be Yezu kɔlɔsira n'a ka sɔlidasiw ye, olu ye dugukolo ye a yɛrɛyɛrɛla, ani koo minw kɛra o waati la, u y'o bɛɛ ye, u siranna kosɔbɛ. U y'a fɔ ko tiɲɛ na, cɛɛ nin tun ye Ala Deen ye.

⁵⁵ Muso caaman tun lɔra yɔrɔjan ka to k'o filɛ. O muso nunu tun tugura Yezu kɔ ka bɔ Galile mara la, waasa k'a dɛmɛ.

⁵⁶O muso nunu cɛma, Magidalaka Mariyamu tun be yen, ni Zaki ani Yusufu bamuso Mariyamu, ni Zebede muso.

⁵⁷Wuladafɛ, nafolotigi dɔ nana, Arimateka tun lo, a tɔgɔ ko Yusufu. Ale fana tun ye Yezu ka kalandenw dɔ ye.

⁵⁸O cɛɛ nin tagara Pilati fɛ ka Yezu suu daali. Pilati k'u k'a d'a ma.

⁵⁹Yusufu tagara Yezu suu ta k'a meleke fanikura gwɛman kɔnɔ,

⁶⁰ka taga don a yɛrɛ ka kaburu kɔnɔ, a tun ye min bɔ fara la a yɛrɛ suturali kama. A ye kabakuru belebele dɔ kolonkolon ka kaburu datugu n'o ye, ka sɔrɔ ka taga.

⁶¹O y'a sɔrɔ, Mariyamu ka bɔ Magidala, ni Mariyamu dɔ nin tun be yen. Olu tun siginin be kaburu ɲafɛ.

⁶²O dugusagwɛ, n'o ye lafiɲɛlon ye, sarakalasebagaw ni *Fariziɲɛw ye ɲɔgɔn lajɛn ka taga Pilati fɛ.

⁶³ U y'a fɔ a ye ko: «An hakili jigira a la ko galontigɛla nin tun y'a fɔ ko n'ale sara, ko ale bena kunun a tile sabanan loon.

⁶⁴O la, an b'a fɛ i ka sira di kaburu daa ka kɔlɔsi fɔɔ ka taga se tile saba, bari an be siran, a ka kalandenw kana taga a suu bɔ, ka tila k'a fɔ jama ye ko a kununna. O galon bena juguya ka tɛmɛ fɔlɔta kan.»

⁶⁵Pilati y'a fɔ u ye ko: «Kɔlɔsilikɛbaga be aw fɛ fana. Aw ye taga ka kaburu daa kɔlɔsi ka kɛɲɛ n'aw seko ye.»

⁶⁶U tagara taamasiɲɛ kɛ kabakuru kan. O kɔ, u ye kɔlɔsilikɛbagaw bila k'olu ka kaburu kɔlɔsi.