Read dyu Matiyo ka kitabu 5 Bible Online

Matiyo ka kitabu 5 - dyu bible

Matiyo ka kitabu 5

¹Yezu ye jama ye minkɛ, a yɛlɛla kulu kan ka sigi. A ka kalandenw gwɛrɛla a la.

²A y'a daminɛ k'u kalan. A ko:

³«Mɔgɔ minw b'a lɔn k'u mako be Ala la, olu dagamunin lo, bari *sankolo masaya ye u ta ye.

⁴ Mɔgɔ minw be kasira, olu dagamunin lo, bari Ala bena u dusu saalo.

⁵ Mɔgɔ minw sabalinin lo, olu dagamunin lo, bari u bena dugukolo tigiya kɛ.

⁶ Tilenninya nigɛ be minw na, olu dagamunin lo, bari u dusu bena fa.

⁷Mɔgɔ minw be makari tɔw la, olu dagamunin lo, bari Ala bena makari u la.

⁸ Mɔgɔ minw kɔnɔ gwɛnin lo, olu dagamunin lo, bari u bena Ala ye.

⁹Hɛrɛɲinibagaw dagamunin lo, bari u bena wele ko Ala deenw.

¹⁰ U be minw tɔɔrɔ u ka tilenninya kosɔn, olu dagamunin lo, bari sankolo masaya ye u ta ye.

¹¹ «Ni mɔgɔw b'aw nɛni, k'aw tɔɔrɔ, ka galon la aw kan ko aw be kojugu sifa bɛɛ kɛ, bari aw ye ne ka kalandenw ye, o tuma na, aw dagamunin lo.

¹² Aw ka nisɔndiya kosɔbɛ, bari aw bena tɔnɔba sɔrɔ sankolo la. Kira minw tɛmɛna aw ɲa, u ye olu fana tɔɔrɔ ten.

¹³ «Aw ye diɲɛ kɔgɔ ye. Nga ni kɔgɔ timiya bɔra a la, mun b'a kɛ kɔgɔ ye tugu? A te foyi ɲa tugu. A ka ɲi ka fili, mɔgɔw ka taama a kan.

¹⁴ Aw ye yeelen ye diɲɛ kɔnɔ. Dugu min siginin be kulu kan, o te se ka dogo.

¹⁵ Mɔgɔ si te fitinɛ mana k'a bila gongo jukɔrɔ, nga a b'a bila fɛɛn dɔ kan janko a ka yeelen bɔ soo kɔnɔ mɔgɔw bɛɛ ye.

¹⁶ Aw ka kɛwaliɲumanw kɛ ka yeelen bɔ mɔgɔw ye ten, waasa u ka aw sankolo la Faa boɲa.

¹⁷«Aw kan'a miiri ko ne nana Ala ka sariya bɔ yen, walima ka kiraw ka kuma cɛn. Ne ma na o la. Ne nana janko u tun y'a fɔ ko koo minw bena kɛ, olu ka dafa.

¹⁸ Tiɲɛ na, ne b'a fɔ aw ye ko ka sankolo ni dugukolo to yen, Ala ye sariya minw sigi, foyi tena bɔ u la, hali kuma kelen tena yɛlɛma u la, a bɛɛ ka kan ka bato fɔɔ a bɛɛ ka kɛ.

¹⁹O le y'a to, sariya minw sigira, min koo ka nɔgɔ u bɛɛ ye, ni mɔgɔ min t'o bato, n'a b'a fɔ mɔgɔw ye k'u kan'a bato, o tigi tena jati mɔgɔbaba ye *sankolo masaya la. Nga, ni mɔgɔ min b'o sariyaw bato, n'a b'a fɔ mɔgɔw ye k'u k'o bato, o tigi bena jati mɔgɔbaba ye sankolo masaya la.

²⁰Ne b'a fɔ aw ye ko ni aw ka tilenninya ma tɛmɛ sariya karamɔgɔw ni *Fariziɲɛw ta kan, aw tena se ka don sankolo masaya la fewu.

²¹ «Aw b'a lɔn ko a fɔra an faaw ye ko: ‹I kana mɔgɔ faga,› ko mɔgɔfagala ka kan ka kiti.

²²Ayiwa, ne b'a fɔ aw ye ko ni mɔgɔ o mɔgɔ dimina a balima kɔrɔ, o tigi ka kan ni kiti ye. Ni mɔgɔ min y'a balima nɛni ko naloman, o tigi fana ka kan ni kiti ye. Ni mɔgɔ min y'a balima nɛni ko fatɔ, o tigi ka kan ni jahanama tasuma ye.

²³O kama, n'i b'i ka saraka bɔ Ala ye, n'i hakili jigira a la ko i balima dɔ diminin be i kɔrɔ,

²⁴i k'i ka saraka bila fɔlɔ ka taga yafa daali a fɛ. O kɔ, i ka segi k'i ka saraka bɔ.

²⁵ Ni koo dɔ be e ni mɔgɔ dɔ cɛ, i ka banba k'o ɲanabɔ janko a kana taga n'i ye faamaw fɛ, faamaw kana i don polisiw bolo, olu kana i don kaso la.

²⁶Tiɲɛ na, ne b'a fɔ i ye ko i tena bɔ o kaso la n'e m'i ka juru nin bɛɛ sara.

²⁷ «Aw y'a mɛn, a fɔra ko: ‹I kana kakalaya kɛ.›

²⁸Ayiwa, ne b'a fɔ aw ye ko ni mɔgɔ o mɔgɔ ye muso filɛ k'a ɲaa bɔ a fɛ, o tigi ye kakalaya kɛ a dusu la n'o muso ye ka ban.

²⁹ O la, n'i kinibolo ɲaa be kɛ sababu ye k'i don kojugu la, a wɔgɔbi k'a fili yɔrɔjan. I ka bɔnɔ i farikolo yɔrɔ dɔ la, o ka fisa a bɛɛ dafanin ka fili jahanama na.

³⁰ N'i kinibolo be kɛ sababu ye k'i don kojugu la, a tigɛ k'a fili yɔrɔjan. I ka bɔnɔ i farikolo yɔrɔ dɔ la, o ka fisa a bɛɛ dafanin ka don jahanama na.

³¹ «A fɔra fana ko: ‹Ni cɛɛ min b'a fɛ k'a muso bila, a ka kan ka furusasɛbɛ d'a ma.›

³² Nga, ne b'a fɔ aw ye ko ni mɔgɔ o mɔgɔ y'a ka muso furu sa ni ɲamɔgɔya sababu tɛ, o tigi b'a ka muso bila kakalaya la. Ni mɔgɔ min ye muso furu sanin furu, o tigi ye kakalaya kɛ.

³³ «Aw y'a mɛn fana, a fɔra an faaw ye ko: ‹I ka kɛ kantigi ye i ka fɔtaw bɛɛ la, n'i y'i daa di Ala ma koo min na, i ka banba k'o kɛ.›

³⁴ Nga ne b'a fɔ aw ye ko aw kana kali fewu. Aw kana kali sankolo la, bari Ala ka masasigilan lo.

³⁵ Aw kana kali dugukolo la bari o ye Ala seen bilayɔrɔ ye. Aw kana kali Zeruzalɛmu na bari o ye Masacɛba ka dugu ye.

³⁶I kana kali i kungolo fana na bari i te se k'i kunsigi deen kelen gwɛya walima k'a fin.

³⁷Aw ka jaabili ka kɛ ɔnhɔn walima ayi. Ni dɔ farala o kan, o bɔra Sutana fɛ.

³⁸ «Aw y'a mɛn, a fɔra ko: ‹Ɲaa juru be bɔ ni ɲaa ye. Ɲiin juru be bɔ ni ɲiin ye.›

³⁹Ayiwa, ne b'a fɔ aw ye ko aw kana kojugu juru sara ni kojugu ye. Ni mɔgɔ dɔ y'i kinibolo tulo ci, i ka tɔ kelen nin sin a ma fana.

⁴⁰Ni mɔgɔ dɔ b'a fɛ k'i wele faamaw fɛ janko a k'i ka deleke bɔsi i la, e k'i ka foroca fana d'a ma.

⁴¹Ni mɔgɔ dɔ y'i karaba ko i k'a ka doni ɲun ka kilo kelen ɲɔgɔn kɛ n'a ye, i ka kilo fila ɲɔgɔn kɛ n'a ye.

⁴²Ni mɔgɔ o mɔgɔ ye fɛɛn dɔ daali i fɛ, i k'o d'a ma. Ni mɔgɔ dɔ nana fɛɛn dɔndɔ i fɛ, i kana ban.

⁴³ «Aw y'a mɛn, a fɔra ko: ‹I k'i tɔɲɔgɔn kanu k'i jugu kɔniya.›

⁴⁴Ayiwa, ne b'a fɔ aw ye ko aw ka aw juguw kanu ka Ala daali aw tɔɔrɔbagaw ye.

⁴⁵Aw k'o kɛ janko aw ka kɛ aw sankolo la Faa deenw ye, bari ale be tile bɔ mɔgɔjuguw ni mɔgɔɲumanw ye, ka sanji di koɲumankɛlaw ni kojugukɛlaw ma.

⁴⁶N'aw b'aw kanubagaw dɔrɔn kanu, aw bena mun tɔnɔ sɔrɔ o la? Hali lɛnpominɛlaw te o ɲɔgɔn kɛ wa?

⁴⁷N'aw b'aw balimaw dɔrɔn fo, aw be mun lo kɛ ni tɔw t'a kɛ? Hali Alalɔnbaliw te o ɲɔgɔn kɛ wa?

⁴⁸ Aw ka kɛ mɔgɔɲumanw ye i n'a fɔ aw Faa min be sankolo la.