Read dyu Matiyo ka kitabu 6 Bible Online

Matiyo ka kitabu 6 - dyu bible

Matiyo ka kitabu 6

¹ «Aw ka aw yɛrɛw kɔlɔsi. Aw kana aw ka Alasira taama kɛ tɔgɔɲini koo ye. N'o tɛ, aw Faa min be sankolo la, o tena tɔnɔ d'aw ma.

²O la, n'i be fɛɛn dɔ di dɛsɛbagatɔw ma, i kana buru fiyɛ i ɲafɛ i n'a fɔ tɔgɔɲinilaw b'a kɛ cogo min na kalansow kɔnɔ, ani sira daaw la janko mɔgɔw k'u tanu. Tiɲɛ na, ne b'a fɔ aw ye ko olu y'u ka tɔnɔ sɔrɔ ka ban.

³E kɔni, n'i be fɛɛn dɔ di dɛsɛbagatɔw ma, i kan'a to mɔgɔ si ka bɔ a kala ma.

⁴I k'a kɛ dogo la. I Faa Ala min be kodogoninw ye, ale bena i sara.

⁵ «N'aw be Ala daali, aw kan'a kɛ i n'a fɔ filakanfɔlaw b'a kɛ cogo min na. Ka lɔ kalansow kɔnɔ ani sira daaw la ka Ala daali, o le ka di u ye. U b'a kɛ ten janko mɔgɔw k'u ye. Tiɲɛ na, ne b'a fɔ aw ye k'u y'u ka tɔnɔ sɔrɔ ka ban.

⁶E kɔni, n'i b'a fɛ ka Ala daali tuma min na, don i ka soo kɔnɔ ka daa tugu. I Faa Ala min b'o yɔrɔdogonin na, i k'ale daali yen. I Faa Ala min be kodogoninw ye, ale bena i sara.

⁷N'aw be Ala daali tuma min na, aw kana segi kuma kelen kan siɲɛ caaman i n'a fɔ Alalɔnbaliw, bari olu be miiri ko u ka kuma caaman le ben'a to Ala b'u jaabi.

⁸Aw kana olu ladege, bari aw mako be fɛɛn minw na, aw Faa Ala be olu lɔn sanni aw k'o daali a fɛ.

⁹«Aw ka kan ka Ala daali cogo min na, o filɛ: ‹An Faa min be sankolo la, i tɔgɔ ka boɲa.

¹⁰I ka masaya ka na. I sago ka kɛ dugukolo kan i ko a be kɛ sankolo la cogo min na.

¹¹An ka bii makoya dumuni d'an ma.

¹²I k'an ka filiw yafa an ma i ko an fana be yafa tɔw ma cogo min na n'u filila anw ma.

¹³Kan'a to kɔrɔbɔli ka se an ma, nga an tanga kojugu ma. Bari masaya ni sebagaya ani nɔɔrɔ y'i ta ye waati bɛɛ. Amiina.› [1]

¹⁴ «Mɔgɔ minw be fili aw ma, n'aw be yafa olu ma, aw Faa min be sankolo la, ale fana bena yafa aw ma.

¹⁵Nga, n'aw te yafa u ma, aw Faa min be sankolo la, ale fana tena yafa aw ma.

¹⁶«N'aw be suun na tuma min na, aw kana aw ɲaa kumu i n'a fɔ tɔgɔɲinilaw. Olu b'u ɲaa kumu janko mɔgɔw k'a lɔn k'u be suun na. Tiɲɛ na, ne b'a fɔ aw ye k'u y'u ka tɔnɔ sɔrɔ ka ban.

¹⁷E kɔni, n'i be suun na tuma min na, e k'i ɲaa ko k'i kunsigi lalaga,

¹⁸janko mɔgɔw kan'a lɔn ko i be suun na fɔɔ i Faa Ala min be yɔrɔdogonin na. I Faa Ala min be kodogoninw ye, a bena i sara.

¹⁹ «Aw kana nafolo caaman lajɛn aw yɛrɛw ye diɲɛ nin kɔnɔ, bari bagabaga ni tumuw be cɛnni kɛ, soonw fana be daaw kari ka don ka fɛɛnw cɛ.

²⁰Nga, aw ye nafolo caaman lajɛn aw yɛrɛw ye sankolo la. O yɔrɔ la, bagabaga ni tumuw te se ka cɛnni kɛ, soonw fana te se ka daa kari ka don.

²¹I ka nafolo be yɔrɔ min na, i ka miiriya be o yɔrɔ la fana.

²²«Mɔgɔ ɲaa kɛra i n'a fɔ a fari ka fitinɛ. N'i ɲaa ma cɛn, i be yeli kɛ.

²³Nga, n'i ɲaa cɛnna, i te yeli kɛ, i be to dibi la. Ayiwa, yeelen min b'i la, n'o nana kɛ dibi ye, o dibi ka bon dɛ.

²⁴«Mɔgɔ si te se ka baara kɛ kuntigi fila ye, bari a bena kelen kɔniya ka kelen kanu, walima a bena nɔrɔ kelen na k'a mako bɔ kelen na. O cogo la fana, aw te se ka nafolo kanu, ka baara kɛ Ala ye.

²⁵«O le y'a to ne b'a fɔ aw ye ko aw kana hami aw baloko la ko aw bena mun dumu? Aw kana hami aw fɛɛrɛbɔko la fana ko aw bena mun don? Aw nii koo man gwɛlɛ ni dumuniko ye wa? Fari koo man gwɛlɛ ni faniko ye wa?

²⁶Aw ka kɔnɔw filɛ, u te danni kɛ, u te suman tigɛ. U te suman don bondo kɔnɔ. Nga aw Faa min be sankolo la, ale b'u balo. Aw man fisa n'u ye wa?

²⁷Aw la, jɔn be se ka tile kelen dama fara a sii kan hami fɛ?

²⁸Mun na aw be hami aw ka fɛɛrɛbɔko la? Binfeeren minw be bɔ kongo kɔnɔ, aw ka olu wilicogo filɛ. U te baara kɛ, u te kɔɔri fana parata.

²⁹ O n'a ta bɛɛ, ne b'a fɔ aw ye ko masacɛ Solomani n'a ka faamaya bɛɛ, a ma fani sɔrɔ min ka cɛɲa ye feeren nunu ta bɔ.

³⁰Biin min be kongo kɔnɔ bii, ni tasuma ben'a jɛni sini, ni Ala b'a janto o la ten, a tena janto aw la ka tɛmɛ o kan wa? Jigitan nunu!

³¹Aw kana jɔɔrɔ aw ka dumuni koo ni minnifɛn koo ye, walima fani koo,

³²Alalɔnbaliw le b'o fɛɛnw ɲinina tuma bɛɛ. Aw Faa min be sankolo la, ale b'a lɔn ko aw mako b'o fɛɛnw bɛɛ la.

³³Aw ka Ala ka masaya n'a ka tilenninya ɲini fɔlɔ, n'o kɛra, Ala bena fɛɛn tɔw bɛɛ d'aw ma.

³⁴Aw kana jɔɔrɔ aw ka sini makoyakow la, bari aw ka sini makoya koow bena ɲanabɔ sini. Loon o loon n'a kunko lo.