Read dyu Matiyo ka kitabu 8 Bible Online

Matiyo ka kitabu 8 - dyu bible

Matiyo ka kitabu 8

¹Yezu jigira ka bɔ kulu kan tuma min na, jamaba tugura a kɔ.

²O kɔ, farisogobana tun be mɔgɔ dɔ la, ale gwɛrɛla k'a kunbiri gwan Yezu kɔrɔ k'a fɔ a ye ko: «Matigi, n'i sɔnna, i be se ka n kɛnɛya.»

³Yezu magara a la, k'a fɔ a ye ko: «N sɔnna ko i ka kɛnɛya.» O yɔrɔnin bɛɛ, a kɛnɛyara.

⁴ Nga Yezu y'a fɔ a ye ko: «I yɛrɛ kɔlɔsi, i kan'a fɔ mɔgɔ si ye ko ne le y'i kɛnɛya dɛ. Nga, taga i yɛrɛ yira sarakalasebaga la, Musa tun ye saraka min koo fɔ farisogobanatigi ka kɛnɛya koo la, i k'o bɔ k'a yira mɔgɔw la ko i kɛnɛyara.»

⁵Yezu donna Kafaranamu dugu kɔnɔ tuma min na, sɔlidasi kuntigi do gwɛrɛla a la ka dɛmɛ ɲini a fɛ

⁶ko: «Matigi, n ka baaraden lanin be soo, a man kɛnɛ, murukubana b'a la. A tɔɔrɔnin lo kosɔbɛ.»

⁷Yezu y'a fɔ a ye ko ale bena taga kɛnɛya.

⁸Nga sɔlidasi kuntigi y'a fɔ Yezu ye ko: «Matigi, i ka don ne ka soo kɔnɔ, ne man kan n'o ye. Kuma kelen fɔ dɔrɔn, ne ka baaraden bena kɛnɛya.

⁹Kuntigi dɔw be ne fɛ, ne fana be sɔlidasi dɔw kunna. Ne be se k'a fɔ kelen ye ko: ‹Taga yan fɛ›, a be taga. K'a fɔ dɔ wɛrɛ fana ye: ‹Na yan›, a be na. K'a fɔ n ka jɔɔn ye ko: ‹Nin kɛ ten›, a b'o kɛ.»

¹⁰Yezu y'o kuma mɛn tuma min na, a kabakoyara. A y'a fɔ a kɔfɛmɔgɔw ye ko: «Tiɲɛ na, ne b'a fɔ aw ye ko Isirayɛli mɔgɔ si fɛ, ne ma lanaya nin ɲɔgɔn ye.

¹¹ Ne b'a fɔ aw ye ko mɔgɔ caaman bena bɔ kɔrɔn ni tileben fɛ ka na sigi dumuni na ni Ibrayima ni Isiyaka ani Yakuba ye *sankolo masaya la.

¹² Nga mɔgɔ minw tun ka kan ka kɛ sankolo masaya la, olu bena to kɛnɛma dibi la. U bena kasi ka kule yen.»

¹³O kɔ, Yezu y'a fɔ sɔlidasi kuntigi nin ye ko: «I lara ne la minkɛ, i be fɛɛn min fɛ, o ka kɛ i ye. Taga soo.» Yezu y'o kuma nin fɔ tuma min na, sɔlidasi kuntigi ka baaraden kɛnɛyara o waati yɛrɛ la.

¹⁴O kɔ, Yezu tagara Piyɛri ka soo. A tagara Piyɛri biranmuso lanin sɔrɔ farigwan bolo.

¹⁵Yezu magara a bolo la, farigwan banna. A wilila k'a mako ɲa.

¹⁶Wulafɛ, mɔgɔw tagara Yezu sɛgɛrɛ ni jinatɔ caaman ye. A ye jinaw gwɛn ka bɔ u la ni kumakan kelen ye ka banabagatɔ dɔ wɛrɛw kɛnɛya.

¹⁷ O kɛra janko kira Ezayi tun ye kuma min fɔ, o ka dafa. A tun ko: «A y'an ka banaw n'an ka sigɛnw ta.»

¹⁸Yezu y'a ye ko jamaba y'ale lamini minkɛ, a y'a fɔ a ka kalandenw ye ko: «An ka taga baa kɔ.»

¹⁹Sanni u ka taga, sariya karamɔgɔ dɔ gwɛrɛla a la k'a fɔ a ye ko: «Karamɔgɔ, i mana taga yɔrɔ o yɔrɔ, ne bena tugu i kɔ.»

²⁰Yezu y'a fɔ a ye ko: «Dingɛ be kongowuluw fɛ, ɲaga be kɔnɔw fɛ, nga layɔrɔ te Mɔgɔ Dencɛ tɔgɔ la.»

²¹A ka kalanden dɔ wɛrɛ fana y'a fɔ a ye ko: «Matigi, a to ne be taga n facɛ suu don fɔlɔ.»

²²Yezu y'a fɔ a ye ko: «E ka tugu ne kɔ. A to suuw k'u ka suuw don.»

²³Yezu n'a ka kalandenw donna kurun kɔnɔ ka taga.

²⁴O tuma na, fɔɲɔba wilila fɔɔ kurun tun be ɲini ka tunu. O y'a sɔrɔ Yezu tun be sinɔgɔra.

²⁵A ka kalandenw gwɛrɛl'a la k'a kunun k'a fɔ a ye ko: «Matigi, an kisi! An satɔ filɛ!»

²⁶Yezu y'a fɔ u ye ko: «Mun na aw be siran ten? Jigitan nunu!» O kɔ, a wilila ka kuma fɔɲɔ ni baji kunna. Yɔrɔ malara tɔntɔntɔn.

²⁷U bɛɛ kabakoyara. U tora k'a fɔ ɲɔgɔn ye ko: «Cɛɛ nin ye mɔgɔ sifa jumɛn ye? Hali fɔɲɔ ni baji be sɔn a ta ma.»

²⁸Yezu sera baa kɔ, Gadare mara la tuma min na, jinatɔ fila bɔra kaburutu la ka n'a kunbɛn. U tun ka fari kosɔbɛ. Mɔgɔ si tun te se ka tɛmɛ n'o yɔrɔ sira ye.

²⁹U y'a daminɛ ka pɛrɛn ko: «Mun be an ni e cɛ, Ala Dencɛ? I nana an tɔɔrɔ sanni an tɔɔrɔwaati ka se wa?»

³⁰O y'a sɔrɔ lɛkuluba dɔ tun be dumuni kɛra o yɔrɔ masurun na.

³¹Jina nunu ye Yezu daali ko: «N'i b'an gwɛn, a to an ka taga don lɛɛ nunu na.»

³²Yezu y'a fɔ u ye k'u ka taga don o lɛɛw la. U bɔra cɛɛ fila nunu na ka taga don o lɛɛw la. Lɛkulu bɛɛ girinna ka jigi kulu jigijigijugu fɛ ka taga don baji la ka sa yen.

³³U dɛndɛbagaw bolila ka taga dugu kɔnɔ ka lɛɛw, ni jinatɔkɔrɔ fila nunu ka koo bɛɛ lakali mɔgɔw ye.

³⁴Dugu mɔgɔw bɛɛ bɔra ka taga Yezu sɛgɛrɛ. U sera a fɛ tuma min na, u y'a daali k'a ka sabali ka taga ka bɔ u ka mara la.