Read dyu Mariki ka kitabu 1 Bible Online

Mariki ka kitabu 1 - dyu bible

Mariki ka kitabu 1

¹Kibaru diman min be Ala Dencɛ Yezu Krista koo fɔ, o be daminɛ yan.

² Kira Ezayi ye kitabu min sɛbɛn, a fɔra o kɔnɔ ko: «A filɛ, ne bena n ka ciden ci i ɲa, a bena i ka sira labɛn.

³ Mɔgɔ dɔ be pɛrɛnna kongokolon kɔnɔ ko: ‹Aw ka Matigi ka sira dilan, aw k'a ka tɛmɛyɔrɔw tilen.› »

⁴Zan batizelikɛla y'a yɛrɛ yira kongokolon kɔnɔ. A tun be mɔgɔw waaju k'u ka nimisa ka faran u ka kojuguw la ka batize, janko Ala k'u ka hakɛ yafa.

⁵Zude mara mɔgɔw ani Zeruzalɛmukaw bɛɛ tun be bɔ ka taga sɛgɛrɛ. U tun be lɔ u ka hakɛw la, o kɔ, Zan tun b'u batize Zurudɛn baji la.

⁶ Zan ka fani tun ye ɲɔgɔmɛsi ye, a ka cɛsirilan tun ye golo ye. A tun b'a yɛrɛ balo ni tɔɔn ni lii ye.

⁷A tun b'a fɔ mɔgɔw ye ko: «Min bena na ne kɔ, o ka sebagaya ka bon ni ne ta ye. Hali ka biri k'a ka sanbara juru foni, ne kuun ka dɔgɔ o ma.

⁸Ne y'aw batize ni jii ye, nga ale bena aw batize ni Nii Senuman ye.»

⁹O tuma na, Yezu bɔra Nazarɛti, Galile mara la ka taga Zan sɛgɛrɛ. Zan y'a batize Zurudɛn baji la.

¹⁰Yezu bɔtɔ jii la, a ye sankolo dayɛlɛnin ye ka Nii Senuman jigitɔ ye a kan i n'a fɔ tuganin.

¹¹ Kumakan dɔ bɔra sankolo la k'a fɔ ko: «I ye ne Dencɛ kanunin ye, i koo ka di ne ye haali.»

¹²O yɔrɔnin kelen, Nii Senuman y'a kɛ Yezu tagara kongokolon kɔnɔ.

¹³A ye tile bi naani kɛ kongokolon kɔnɔ. Kongosogow dama tun b'o yɔrɔ la. K'a to yen, Sutana y'a kɔrɔbɔ. Mɛlɛkɛw tun b'a mako ɲa.

¹⁴Zan bilanin kɔ kaso la, Yezu tagara Ala ka kibaru diman fɔ Galile mara la.

¹⁵ A tun b'a fɔ ko: «Ala tun ye waati min latigɛ, o sera. Ala ka masaya waati surunyana. Aw ye nimisa ka faran aw ka kojuguw la ka la kibaru diman na.»

¹⁶Yezu tɛmɛtɔ Galile bada la, a ye Simɔn n'a dɔgɔcɛ Andere ye. U tun be jɔɔ filila baji la, mɔnikɛlaw tun lo.

¹⁷Yezu y'a fɔ u ye ko: «Aw ye tugu ne kɔ, ne bena aw kɛ diɲɛ mɔlaw ye ka mɔgɔw sɔrɔ.»

¹⁸O yɔrɔnin kelen, u y'u ka jɔɔw to yen ka tugu a kɔ.

¹⁹A tagara ɲafɛ dɔɔni, a ye Zebede ka deenw ye, Zaki n'a dɔgɔcɛ Zan. U tun b'u ka jɔɔw lalagara kurun kɔnɔ.

²⁰O yɔrɔnin bɛɛ, a y'u wele. U y'u faa Zebede ni baaradenw to yen kurun kɔnɔ ka tugu a kɔ.

²¹Yezu n'a ka kalandenw sera Kafaranamu dugu la. Lafiɲɛlon na, a donna kalanso kɔnɔ ka mɔgɔw kalan.

²² U kabakoyara a ka mɔgɔ kalancogo la, bari a tun t'u kalan i n'a fɔ sariya karamɔgɔw b'u kalan cogo min na, nga a tun b'u kalan i n'a fɔ fanga be mɔgɔ min bolo.

²³O waati yɛrɛ la, jinatɔcɛ dɔ tun be yen, o pɛrɛnna ko:

²⁴«Mun be an ni e cɛ, Nazarɛtika Yezu? I nana k'an halaki wa? I ye mɔgɔ min ye, ne b'o lɔn. I ye Ala ka ciden senuman ye.»

²⁵Yezu sɔngɔra a kunna k'a fɔ a ye ko: «I daje ka bɔ cɛɛ nin na!»

²⁶Jina ye cɛɛ yuguyugu kosɔbɛ ka bɔ a la ni kulekan ye.

²⁷Mɔgɔ bɛɛ kabakoyara fɔɔ u tun b'a fɔ ɲɔgɔn ye ko: «Nin ye kabako ye dɛ. A be kuma barikaman fɔ ka fɛnkura ɲaa yira mɔgɔw la. Hali jinaw be sɔn a ta ma.»

²⁸O sababu fɛ, Yezu tɔgɔ bɔra joona Galile mara bɛɛ la.

²⁹O kɔ, Yezu ni Zaki ani Zan bɔra kalanso kɔnɔ ka taga Simɔn ni Andere ka soo.

³⁰Simɔn biranmuso lanin tun be farigwan bolo. Yezu sera dɔrɔn, u y'o muso koo fɔ a ye.

³¹Yezu gwɛrɛla a la k'a bolo minɛ ka wili, farigwan banna. A wilila k'u mako ɲa.

³²Tilekun donnin kɔ, mɔgɔw tagara Yezu sɛgɛrɛ ni jinatɔw ani banabagatɔw bɛɛ ye.

³³Dugu kɔnɔ mɔgɔw bɛɛ y'u lajɛn boon daa la.

³⁴A ye banabagatɔ sifa caaman kɛnɛya ka jinaw gwɛn ka bɔ mɔgɔ caaman na. A tun te sɔn jinaw ka kuma, bari olu tun b'a lɔn.

³⁵O dugusagwɛ sɔgɔma joona, sanni kɛnɛ ka bɔ, Yezu kununna. A bɔra ka taga Ala daali kongo kɔnɔ.

³⁶Simɔn n'a tɔɲɔgɔnw kununna tuma min na, u tagar'a yɔrɔ ɲini.

³⁷U y'a ye tuma min na, u y'a fɔ a ye ko: «Mɔgɔ bɛɛ b'i yɔrɔ ɲinina.»

³⁸A y'u jaabi ko: «An ka taga gɛrɛfɛduguw la, ne bena Ala ka kuma fɔ o yɔrɔw la fana, bari ne nana diɲɛ na o le kama.»

³⁹ O la, a tagara Galile mara faan bɛɛ la ka Ala ka kuma fɔ zuwifuw ka kalansow kɔnɔ ani ka jinaw gwɛn ka bɔ mɔgɔw la.

⁴⁰Farisogobana tun be mɔgɔ dɔ la, ale gwɛrɛla k'a kunbiri gwan Yezu kɔrɔ k'a daali ko: «N'i sɔnna, i be se ka ne kɛnɛya.»

⁴¹A hinɛ donna Yezu la minkɛ, a magara a la k'a fɔ a ye ko: «N sɔnna, kɛnɛya.»

⁴²O yɔrɔnin bɛɛ, cɛɛ kɛnɛyara.

⁴³O kɔ, sanni Yezu k'a fɔ a ye ko a ka taga, a y'a gwɛlɛya a ma kosɔbɛ ko:

⁴⁴ «I yɛrɛ kɔlɔsi, i kan'a fɔ mɔgɔ si ye ko ne le y'i kɛnɛya dɛ! Nga taga i yɛrɛ yira sarakalasebagaw la. Musa tun ye saraka min koo fɔ farisogobanatigi ka saniyali koo la, i k'o bɔ k'a yira mɔgɔw la ko i kɛnɛyara.»

⁴⁵O n'a ta bɛɛ, cɛɛ tagara tuma min na, koo min tun kɛra a ye, a y'a daminɛ k'o lakali fɔɔ Yezu tun te se ka don dugu si kɔnɔ tugu mɔgɔw ɲana. A tun be to kongokolon kɔnɔ. Mɔgɔw tun be bɔ faan bɛɛ la ka ta'a sɛgɛrɛ yen.