Read dyu Mariki ka kitabu 10 Bible Online

Mariki ka kitabu 10 - dyu bible

Mariki ka kitabu 10

¹Yezu wilila ka bɔ o yɔrɔ la ka taga Zude mara la, Zurudɛn baji kɔ. Jamaba tagara lajɛn a kɔrɔ tugu. A ye kuma ta k'u kalan i n'a fɔ a tun be to k'a kɛ cogo min na ka kɔrɔ.

²*Fariziɲɛ dɔw gwɛrɛla a la k'a ɲininga ko: «A daganin be cɛɛ k'a muso furu sa wa?» U y'o fɔ k'a kɔrɔbɔ.

³Yezu fana y'u ɲininga ko: «Musa ye sariya jumɛn sigi aw ye o koo la?»

⁴ U y'a jaabi ko: «Musa sɔnna ko cɛɛ ka furusasɛbɛ dilan ka sɔrɔ k'a muso bila.»

⁵Yezu y'a fɔ u ye ko: «Aw ka dusugwɛlɛya le y'a to Musa y'o sariya sigi aw ye.

⁶ N'o tɛ, diɲɛ daminɛtuma na, ‹Ala ye cɛɛ ni muso dan.›

⁷ O le kosɔn, cɛɛ ben'a faa n'a baa to yen ka nɔrɔ a ka muso la.

⁸U fila be jɛn ka kɛ kelen ye. O cogo la, u te fila ye tugu, nga kelen.

⁹O la, Ala ye fɛɛn min jɛn k'a kɛ kelen ye, mɔgɔ si kana o faran.»

¹⁰Yezu n'a ka kalandenw kɔsegira soo tuma min na, u y'a ɲininga o koo la tugu.

¹¹ A y'a fɔ u ye ko: «Mɔgɔ o mɔgɔ y'a muso furu sa ka dɔ wɛrɛ ta, o tigi be kakalaya kɛ, a b'a muso fɔlɔ hakɛ ta.

¹²Ni muso min bɔra a cɛɛ fɛ ka taga furu dɔ wɛrɛ fɛ, o fana be kakalaya kɛ.»

¹³Mɔgɔw tagara Yezu sɛgɛrɛ ni denmisɛn dɔw ye ko a k'a bolo la u kan ka duba kɛ u ye, nga a ka kalandenw sɔngɔra u kunna.

¹⁴Yezu y'o ye minkɛ, a dimina kalandenw kɔrɔ k'a fɔ u ye ko: «Aw k'a to denmisɛnw ka na ne fɛ, aw kana u bali, bari Ala ka masaya ye olu bɔɲɔgɔnw le ta ye.

¹⁵ Tiɲɛ na, ne b'a fɔ aw ye ko ni mɔgɔ min ma sɔn Ala ka masaya ma i n'a fɔ denmisɛn b'a kɛ cogo min na, o tigi tena se ka don a la fewu.»

¹⁶O kɔ, Yezu ye denmisɛn nunu ta kelen kelen k'a bolo la u kan ka duba kɛ u ye.

¹⁷Yezu taatɔ dugu wɛrɛ la, cɛɛ dɔ bolila ka taga kunbiri gwan a kɔrɔ k'a ɲininga ko: «Karamɔgɔɲuman, ne ka kan ka mun kɛ ka nii banbali sɔrɔ?»

¹⁸Yezu y'a fɔ a ye ko: «Mun na i be ne wele karamɔgɔɲuman? Mɔgɔɲuman si te yen ni Ala kelen tɛ.

¹⁹ I be Ala ka sariyaw lɔn: ‹I kana mɔgɔ faga, i kana kakalaya kɛ, i kana soɲali kɛ, i kana galon seereya kɛ, i kana mɔgɔ si tɔɲɔ, i faa n'i baa boɲa.› »

²⁰Cɛɛ y'a jaabi ko: «Karamɔgɔ, ne ye olu bɛɛ bato kabini n denmisɛn tuma.»

²¹O la, Yezu y'a filɛ, a koo diyara a ye. A y'a fɔ a ye ko: «Fɛɛn kelen b'i jɛn. Taga i bololafɛnw feere k'o wari tilan fantanw cɛ, o la, i bena nafolo sɔrɔ sankolo la. O kɔ, na tugu ne kɔ.»

²²O kuma ye cɛɛ ɲaa sisi. A dusu kasinin tagara, bari nafoloba tun b'a fɛ.

²³Kalandenw tun ye Yezu lamini. A y'u filɛ k'a fɔ u ye ko: «Nafolotigiw donko ka gwɛlɛ Ala ka masaya la!»

²⁴O kuma ye kalandenw kabakoya. Yezu ye kuma ta tugu k'a fɔ u ye ko: «N balimaw, minw jigi be nafolo kan, olu donko ka gwɛlɛ Ala ka masaya la dɛ!

²⁵Ɲɔgɔmɛ donko ka nɔgɔ miseli woo fɛ ka tɛmɛ nafolotigi donko kan Ala ka masaya la.»

²⁶Kalandenw kabakoyara tugu ka dama tɛmɛ fɔɔ u tun b'a fɔra ɲɔgɔn ye ko: «O tuma na, jɔn le bena se ka kisi?»

²⁷Yezu y'u filɛ k'a fɔ ko: «Koo dɔw be yen, adamadenw te se ka min kɛ, nga Ala be se k'o kɛ, bari Ala be se fɛɛn bɛɛ la.»

²⁸Piyɛri y'a fɔ Yezu ye ko: «A filɛ, an ye fɛɛn bɛɛ to yen ka tugu e kɔ.»

²⁹Yezu y'a jaabi ko: «Tiɲɛ na, ne b'a fɔ aw ye ko ni mɔgɔ o mɔgɔ y'a ka dugu to, walima a balimacɛw, walima a balimamusow, walima a faa, walima a baa, walima a deenw, walima a ka forow to yen, ne ni kibaru diman kosɔn,

³⁰siga t'a la, o tigi bena olu bɛɛ ɲɔgɔn kɛmɛ kɛmɛ sɔrɔ diɲɛ nin na. A bena duguw sɔrɔ, ka dɔgɔ ni kɔrɔw sɔrɔ, ka baaw sɔrɔ, ka deenw sɔrɔ, ka forow sɔrɔ. A bena tɔɔrɔ fana sɔrɔ, nga a bena nii banbali sɔrɔ sini.

³¹ Ɲamɔgɔ caaman bena kɛ kɔmɔgɔw ye, kɔmɔgɔw bena kɛ ɲamɔgɔw ye.»

³²Yezu n'a ka kalandenw tun be sira kan ka taga Zeruzalɛmu. A tun be u ɲafɛ. Kalandenw hakili ɲagaminin tun lo. Mɔgɔ minw tun b'u kɔ, siranya tun be olu la. Yezu tagara n'a ka kalanden tan ni fila ye u danna tuguni. Koo min ben'a sɔrɔ, a y'o fɔ u ye.

³³A y'a fɔ ko: «A filɛ, an be tagara Zeruzalɛmu. O yɔrɔ la, u bena Mɔgɔ Dencɛ don sarakalasebagaw kuntigiw ni sariya karamɔgɔw bolo. U ben'a fɔ ko a ka kan ka faga. O kɔ, u ben'a don siya wɛrɛw bolo.

³⁴U bena yɛlɛ a ma, k'u daji tu a kan, k'a bugɔ ni golokami ye, k'a faga, nga tile saba a faganin kɔ, a bena kunun.»

³⁵O kɔ, Zebede ka dencɛ fila, Zaki ni Zan, gwɛrɛla Yezu la k'a fɔ a ye ko: «Karamɔgɔ, an bena fɛɛn min ɲini i fɛ, an b'a fɛ i k'o kɛ an ye.»

³⁶Yezu y'u ɲininga ko: «Aw b'a fɛ ne ka mun kɛ aw ye?»

³⁷U y'a jaabi ko: «I bena sigi masaya la ni nɔɔrɔ ye tuma min na, i ka sɔn an kelen ka sigi i kinibolo fɛ, kelen ka sigi i numanbolo fɛ.»

³⁸ Yezu y'a fɔ u ye ko: «Aw be fɛɛn min daali, aw t'o lɔn. Tɔɔrɔ min bena ne sɔrɔ, aw be se k'o ɲɔgɔn muɲu wa? Ne bena batize cogo min na, aw bena sɔn o ɲɔgɔn na wa?»

³⁹U y'a jaabi ko: «An bena se.» Yezu y'a fɔ u ye ko: «Tɔɔrɔ ni sigɛn min bena ne sɔrɔ, o ɲɔgɔn bena aw fana sɔrɔ,

⁴⁰nga, ka sigi ne kinibolo fɛ, walima ne numanbolo fɛ, ne t'o latigɛbaga ye. O yɔrɔw labɛnna minw ye, u bena di olu le ma.»

⁴¹Kalanden tɔw y'o mɛn minkɛ, u dimina Zaki ni Zan kɔrɔ.

⁴² Yezu y'u wele k'a fɔ u ye ko: «Aw b'a lɔn ko diɲɛ kɔnɔ, siya ɲamɔgɔw be kuntigiya kɛ tɔw kan, mɔgɔbabaw be fanga yira u la.

⁴³ A man kan ka kɛ ten aw cɛma. Ni mɔgɔ min b'a fɛ ka kɛ mɔgɔbaba ye aw cɛma, o tigi ka kan ka kɛ aw ka baaraden ye.

⁴⁴Ni mɔgɔ min b'a fɛ ka kɛ ɲamɔgɔ ye aw cɛma, o ka kan ka kɛ aw bɛɛ ka jɔɔn ye,

⁴⁵bari Mɔgɔ Dencɛ ma na waasa mɔgɔw ka baara kɛ a ye, nga a nana ka mɔgɔw mako ɲa, ani k'a yɛrɛ nii di ka kɛ mɔgɔ bɛɛ kunmabɔ sara ye.»

⁴⁶Yezu n'a ka kalandenw ni jamaba sera Zeriko. U bɔtɔ o dugu kɔnɔ, Time dencɛ Baritime min kɛra fiɲɛntɔ ye, o tun siginin be sira daa la ka daalili kɛ.

⁴⁷A y'a mɛn ko Nazarɛtika Yezu be tɛmɛna minkɛ, a y'a daminɛ ka pɛrɛn ko: «Masacɛ Dawuda dencɛ Yezu, makari ne la.»

⁴⁸Mɔgɔ caaman sɔngɔra a kunna ko a ka je, nga a pɛrɛnna ka tɛmɛ fɔlɔta kan ko: «Dawuda dencɛ, makari ne la.»

⁴⁹Yezu lɔra k'a fɔ ko: «Aw k'a wele n ye.» O la, u ye fiɲɛntɔ wele k'a fɔ a ye ko: «I hakili sigi. Wili, a ko i ka na.»

⁵⁰A y'a ka foroca fili ka pan ka lɔ. A taamana ka taga Yezu fɛ.

⁵¹Yezu y'a ɲininga ko: «I b'a fɛ ne ka mun kɛ i ye?» A y'a jaabi ko: «Karamɔgɔ, ne ka yeli kɛ tugu.»

⁵²Yezu y'a fɔ a ye ko: «Taga. I kɛnɛyara i ka lanaya kosɔn.» O yɔrɔnin bɛɛ, a ye yeli kɛ, a tugura Yezu kɔ.