Read dyu Mariki ka kitabu 12 Bible Online

Mariki ka kitabu 12 - dyu bible

Mariki ka kitabu 12

¹ O kɔ, Yezu y'a daminɛ ka talen la zuwifuw ka ɲamɔgɔw ye ko: «Cɛɛ dɔ ye *ɛrɛzɛnforo bɔ. A ye kogo lɔ k'a lamini, ka dingɛ sogi ka ɛrɛzɛn nin jii bɔyɔrɔ dilan, ka sangaso lɔ a kɔlɔsibagaw ye. A y'a don baarakɛla dɔw bolo. O kɔ, a tagara taama na.

²Ɛrɛzɛn mɔna tuma min na, a y'a ka jɔɔn dɔ ci baarakɛla nunu fɛ ko a ka taga ale niyɔrɔ minɛ.

³U y'o jɔɔn nin minɛ k'a bugɔ k'a bololakolon bila ka taga.

⁴Forotigi ye jɔɔn wɛrɛ ci u fɛ. U y'o fana bugɔ a kuun na k'a nɛni.

⁵Forotigi ye jɔɔn wɛrɛ bila ka taga, u y'o faga. O kɔ, a ye jɔɔn caaman ci u fɛ tugu, u ye dɔw bugɔ ka dɔw faga.

⁶Mɔgɔ kelen min tora forotigi fɛ sisan, o y'a dencɛ ye. A tun b'o kanu kosɔbɛ. A y'o fana ci u fɛ a laban na. A tun be miiri ko: ‹U bena n dencɛ boɲa.›

⁷Nga baarakɛlaw y'a fɔ ɲɔgɔn ye ko: ‹Nin le ye cɛntala ye, aw ye na an k'a faga, cɛɛn nin bena kɛ an ta ye.›

⁸U y'a minɛ k'a faga k'a suu fili waga kɔnɔ.

⁹«Forotigi bena mun kɛ sa? A bena segi ka taga o baarakɛlaw faga ka baarakɛla dɔ wɛrɛw ta k'u bila foro kɔnɔ.

¹⁰ Siga t'a la, aw ye yɔrɔ dɔ kalan Ala ka kuma na min b'a fɔ ko: ‹Bonlɔlaw tun banna kabakuru min na, o nana kɛ kabakuru barikaman ye, boon nɔnkɔn ta.

¹¹Matigi le y'o kɛ. O ye kabako ye an ɲana.› »

¹²Zuwifuw ka ɲamɔgɔw y'a faamu ko Yezu ka talen nin ɲaa sinna olu yɛrɛ ma. U tun be cogo ɲinina waasa ka Yezu minɛ, nga u tun be siran jama ɲa minkɛ, u tagara k'a to yen.

¹³Zuwifuw ka ɲamɔgɔw ye *Fariziɲɛ dɔw ni *Erɔdi kɔmɔgɔ dɔw ci Yezu fɛ, janko u ka se k'a minɛ a yɛrɛ dalakuma fɛ.

¹⁴U tagar'a fɔ a ye ko: «Karamɔgɔ, an y'a lɔn ko i be tiɲɛ fɔ. I fana te siran mɔgɔ si ɲa ka sɔn o tigi ta ma, bari i te mɔgɔ bɔ mɔgɔ la. I be mɔgɔw kalan Alasira la ni kuma minw ye, o bɛɛ ye tiɲɛ ye. An b'i ɲininga ni a daganin be ka nisɔngɔ sara Ɔrɔmu masacɛ ye, walima a daganin tɛ? An ka kan k'a sara, walima an man kan k'a sara?»

¹⁵Yezu y'a lɔn ko filakanfɔlaw lo. O la, a y'a fɔ u ye ko: «Mun na aw be ne dakɔrɔbɔ? Aw ye warigwɛ deen kelen di yan, n b'a filɛ.»

¹⁶U ye wari dɔ yira a la. A y'u ɲininga ko: «Jɔn jaa n'a bulonɔn ye nin ye a kan?» U y'a jaabi ko: «Ɔrɔmu masacɛ ta lo.»

¹⁷O tuma na, Yezu y'a fɔ u ye ko: «Fɛɛn min ye masacɛ ta ye, aw k'o di masacɛ ma, ka Ala ta di Ala ma.» O kuma nin y'u kabakoya kosɔbɛ.

¹⁸ *Saduseɲɛw le tun b'a fɔ ko suuw tena kunun. U dɔw tagara Yezu fɛ k'a fɔ a ye ko:

¹⁹ «Karamɔgɔ, Musa y'a fɔ an ye ko ni cɛɛ dɔ sara k'a ka muso to k'a sɔrɔ a muso ma deen sɔrɔ, a dɔgɔcɛ ka kan k'o muso nin ta ka deen sɔrɔ a kɔrɔcɛ ye.

²⁰Ayiwa, dencɛ wolonwula tun be cɛɛ dɔ fɛ. Kɔrɔcɛman ye muso furu. A sara k'a muso to yen n'a ma deen sɔrɔ.

²¹Filanan y'o muso kelen nin ta. O fana sara, a ma deen sɔrɔ ni muso nin ye. A sabanan fana kɛra ten.

²²U wolonwula la, mɔgɔ si ma deen sɔrɔ ni muso nin ye. U bɛɛ sanin kɔ, muso fana sara.

²³Suuw bena kunun loon min na, n'o mɔgɔw nunu kununna, muso nin bena kɛ u jumɛn ta ye, bari u mɔgɔ wolonwula bɛɛ y'a furu ka ye.»

²⁴Yezu y'u jaabi ko: «Aw filila, bari aw te Ala ka kuma faamu, aw te Ala ka sebagaya lɔn fana.

²⁵N'o tɛ, suuw bena kunun waati min na, furu tena kɛ. Mɔgɔw bɛɛ bena kɛ i n'a fɔ mɛlɛkɛw sankolo la.

²⁶ Suuw ka kununko faan fɛ, tasuma tun wilila yiritunin min na, aw ma deli k'o koo kalan Musa ka kitabu la wa? Ala y'a fɔ Musa ye ko: ‹Ne ye Ibrayima ni Isiyaka ani Yakuba ka Ala ye.› »

²⁷O kɔ, Yezu y'a fɔ u ye tugu ko: «Ala te suuw ka Ala ye, nga ɲanamanw ka Ala lo. O la, n b'a fɔ aw ye ko aw filila kosɔbɛ.»

²⁸Sariya karamɔgɔ dɔ tun y'a tulo malɔ Yezu ni *Saduseɲɛw ka kuma na. A y'a ye ko Yezu y'u jaabi ka ɲa minkɛ, a gwɛrɛla Yezu la k'a ɲininga ko: «Ala ka sariya jumɛn koo ka gwɛlɛ a ma ka tɛmɛ tɔw bɛɛ kan?»

²⁹ Yezu y'a jaabi ko: «Sariya min koo ka gwɛlɛ Ala ma ka tɛmɛ tɔw bɛɛ kan, o filɛ nin ye: ‹Isirayɛlidenw, aw ka mɛnni kɛ. Matigi, an ka Ala ye Matigi kelenpe le ye.

³⁰I ka Matigi i ka Ala kanu n'i dusu bɛɛ ye, an'i kɔnɔ bɛɛ ye, n'i hakili bɛɛ ye, an'i barika bɛɛ ye.›

³¹ Min be tugu o la, o filɛ nin ye: ‹I k'i mɔgɔɲɔgɔn kanu i n'a fɔ i yɛrɛ.› Sariya wɛrɛ si koo man gwɛlɛ Ala ma k'olu fila bɔ.»

³² Sariya karamɔgɔ nin y'a fɔ Yezu ye ko: «Cɔ! Karamɔgɔ, i ye tiɲɛ fɔ. Ala kelenpe le be yen, dɔ wɛrɛ si te yen n'ale tɛ.

³³ Ka Ala kanu i dusu la, i hakili la n'i barika bɛɛ ye, ani k'i mɔgɔɲɔgɔn kanu i n'a fɔ i b'i yɛrɛ kanu cogo min na, o ka fisa ni saraka sifa bɛɛ ye, saraka jɛnitaw fara jɛnibaliw kan.»

³⁴Yezu y'a ye ko a kumana ni hakilitigiya ye minkɛ, a y'a fɔ a ye ko: «Fɛɛn bɛrɛ t'i jɛn ka don Ala ka masaya la.» O kɔ, mɔgɔ si m'a jaa gwɛlɛya ka Yezu ɲininga foyi la tugu.

³⁵Ka Yezu to mɔgɔw kalan na Alabatosoba kɔnɔ, a y'u ɲininga ko: «Sariya karamɔgɔw be se k'a fɔ cogo di ko Ala bena mɔgɔ min woloma k'a ci, k'o ye Dawuda ka deen dama ye?

³⁶ Dawuda yɛrɛ y'a fɔ Nii Senuman barika la ko: ‹Matigi Ala y'a fɔ ne Matigi ye ko: Sigi ne kinibolo fɛ fɔɔ ne k'i juguw cɔnkɔn i seen kɔrɔ.›

³⁷Dawuda yɛrɛ b'a wele ko ale Matigi, a do be se ka kɛ Dawuda ka deen dama ye cogo di?» Jamaba tun b'a lamɛnna ni nisɔndiya ye.

³⁸Ka Yezu to mɔgɔw kalan na, a y'a fɔ u ye ko: «Aw k'aw yɛrɛ kɔlɔsi sariya karamɔgɔw la. A ka d'u ye ka forocaw don ka yaala. U b'a fɛ mɔgɔw k'u fo forobayɔrɔw la.

³⁹A ka d'u ye fana ka sigi ɲafɛ kalansow kɔnɔ ani dumuni kɛyɔrɔw la.

⁴⁰Olu le be firiyamusow bololafɛnw bɛɛ bɔsi u la. O kɔ, u be mɛn Aladali la janko mɔgɔw k'u filɛ mɔgɔɲumanw ye. Olu ka jalaki tɔɔrɔ bena juguya kosɔbɛ.»

⁴¹Wari tun be don kɛsu min na Alabatosoba kɔnɔ, Yezu sigira k'a ɲaa sin o ma. A tun be mɔgɔw ka wari doncogo filɛ. Nafolotigi caaman ye wari caaman don o kɛsu kɔnɔ.

⁴²Firiyamuso dɛsɛbagatɔ dɔ nana ka warimisɛn deen fila don yen. O wari hakɛ tun te tɛmɛ tama kelen ɲɔgɔn kan.

⁴³O tuma na, Yezu ye muso nin yira kalandenw na k'a fɔ u ye ko: «Tiɲɛ na, ne b'a fɔ aw ye ko firiyamuso dɛsɛbagatɔ nin ye wari min don kɛsu kɔnɔ, o ka ca ni mɔgɔ tɔw bɛɛ ta ye.

⁴⁴Mɔgɔ tɔw ye dɔɔni dɔrɔn bɔ u ka nafolo la k'a di, nga ale kɔni n'a ka fantanya bɛɛ, a y'a cɛɛn bɛɛ di. A ma foyi to a kun ka kɛ dumuni sɔngɔ ye k'a sɔrɔ dumunifɛn si t'a fɛ.»