Read dyu Mariki ka kitabu 13 Bible Online

Mariki ka kitabu 13 - dyu bible

Mariki ka kitabu 13

¹Yezu bɔtɔ Alabatosoba kɔnɔ, a ka kalandenw kelen y'a fɔ a ye ko: «Karamɔgɔ, soba nin lɔcogo filɛ ni kabakurubabaw ye dɛ!»

²Yezu y'a fɔ a ye ko: «I ɲaa be sobaba nunu na kɛ? Kabakuru si tena to a tɔɲɔgɔn kan, u bɛɛ bena walaka.»

³Yezu tagara sigi Olivuyirikulu kan k'a ɲaa sin Alabatosoba ma. K'a to yen, Piyɛri ni Zaki ni Zan ani Andere tagar'a ɲininga u danna ko:

⁴«Koo nunu bena kɛ tuma jumɛn? Taamasiɲɛ jumɛn bena yira k'o koow bɛɛ laban tuma sera?»

⁵Yezu ye kuma ta k'a fɔ u ye ko: «Aw k'aw yɛrɛw kɔlɔsi janko mɔgɔ si kana aw fili.

⁶Mɔgɔ caaman bena na ne tɔgɔ la k'a fɔ k'olu ye ne yɛrɛ ye ka mɔgɔ caaman fili.

⁷N'aw ye kɛlɛw kibaru, ani kɛlɛw mankan mɛn tuma min na, aw hakili kana ɲagami. Wajibi lo o koow ka kɛ, nga o tena kɛ a laban ye fɔlɔ.

⁸Siya dɔ bena wili siya dɔ wɛrɛ kama. Jamana dɔ bena wili jamana dɔ wɛrɛ kama. Dugukolo bena yɛrɛyɛrɛ yɔrɔ dɔw la, kɔngɔ fana bena don. O koow bena kɛ tɔɔrɔw daminɛ ye, i n'a fɔ muso ka tiin daminɛ.

⁹ «Aw k'aw yɛrɛw kɔlɔsi. U bena aw don kititigɛlaw bolo. U bena aw bugɔ kalansow kɔnɔ. U bena taga n'aw ye jamanatigiw ni masacɛw fɛ ne kosɔn. O bena kɛ sababu ye aw be ne koo fɔ u ye.

¹⁰Sanni laban tuma ka se, wajibi lo kibaru diman ka fɔ siyaw bɛɛ ye fɔlɔ.

¹¹N'u y'aw minɛ ka taga aw don kititigɛlaw bolo tuma o tuma, aw kɔnɔ kana gwan ko aw bena mun fɔ. Kuma min bena bila aw hakili la o waati yɛrɛ la, aw k'o fɔ. Bari aw tena kuma aw yɛrɛw ma, nga aw bena kuma Nii Senuman lo barika la.

¹²Fakelendenw bena kɛ sababu ye u b'u dɔ faga. Faaw bena o ɲɔgɔn kɛ u deenw na. Deenw bena kɛ sababu ye u b'u wolobagaw faga.

¹³ Mɔgɔ bɛɛ bena aw kɔniya ne tɔgɔ kosɔn, nga ni mɔgɔ min muɲuna fɔɔ ka taga se a laban ma, o tigi bena kisi.

¹⁴ «Fɛnjugu cɛnnikɛla man kan ka ye yɔrɔ min na, aw bena o siginin ye o yɔrɔ la. (Mɔgɔ min be nin kalan, o ka kan k'a faamu.) O tuma na, mɔgɔ minw be Zude mara la, olu ka boli ka taga kuluyɔrɔw la.

¹⁵ N'o kɛra k'a sɔrɔ mɔgɔ min be boon kunna, o tigi kana jigi ka don a ka soo kɔnɔ ka fɛɛn dɔ ta.

¹⁶N'o y'a sɔrɔ ni min be foro la, o kana kɔsegi ka na a ka foroca ta.

¹⁷O waati la, musokɔnɔmanw ani minw deen be siin min, olu bena tɔɔrɔ kosɔbɛ.

¹⁸Aw ka Ala daali k'o boli kana kɛ nɛnɛjugu tuma na,

¹⁹ bari o loon tɔɔrɔ bena boɲa kojugu. O tɔɔrɔ ɲɔgɔn ma sɔrɔ fɔlɔ kabini Ala ye diɲɛ dan fɔɔ ka na se bii ma. O tɔɔrɔ ɲɔgɔn fana tena kɛ tugu abada.

²⁰Ni Matigi tun tena dɔ bɔ o tɔɔrɔ waati la, mɔgɔ si tun tena kisi. Nga, a ye mɔgɔ minw woloma k'u kɛ a yɛrɛ taw ye, olu kosɔn a bena dɔ bɔ a la.

²¹«Ni mɔgɔ dɔ y'a fɔ aw ye o tuma na ko: ‹A filɛ, Ala ka Mɔgɔ wolomanin nin be yan›, walima n'a ko: ‹A be yen fɛ›, aw kana la a la.

²²Mɔgɔ dɔw bena galon tigɛ k'olu ye Ala ka Mɔgɔ wolomanin nin ye. Dɔw fana bena galon tigɛ k'olu ye kiraw ye. U bena kabakow kɛ ka mɔgɔw fili n'o ye. Ala ye mɔgɔ minw woloma k'u kɛ a yɛrɛ taw ye, n'u tun be se, u tun bena olu fana fili.

²³O la, aw kɔni k'aw yɛrɛw kɔlɔsi! Koo minw bena kɛ, ne y'o bɛɛ fɔ aw ye ka ban.

²⁴ «Nga o waati la n'o tɔɔrɔ tɛmɛna, tile bena fin, kalo tena yeelen bɔ tugu.

²⁵ Lolow bena bɔ sankolo la ka ben, sankolo fangatigiw bena yɛrɛyɛrɛ.

²⁶ O tuma na, mɔgɔw bena Mɔgɔ Dencɛ natɔ ye sankabaw cɛma ni sebagaya ni nɔɔrɔ ye.

²⁷A ye mɔgɔ minw woloma k'u kɛ a yɛrɛ taw ye, a bena mɛlɛkɛw ci diɲɛ faan bɛɛ la ka taga olu lajɛn, k'a ta dugukolo daan na fɔɔ ka taga bila sankolo daan na.

²⁸«Aw ka koo nunu faamu ka kɛɲɛ ni torosun cogo ye. N'a bolow nugura tuma min na, aw b'a lɔn ko samiɲa surunyana.

²⁹O cogo kelen na, aw mana o koow kɛtɔ ye tuma min na, aw k'a lɔn ko Mɔgɔ Dencɛ natuma sera ka ban, a be sira la.

³⁰Tiɲɛ na, ne b'a fɔ aw ye ko bii mɔgɔw bɛɛ tena sa ka ban ni koo nunu bɛɛ ma kɛ.

³¹Sankolo ni dugukolo bena tɛmɛ, nga ne ka kuma tena tɛmɛ.

³²«Mɔgɔ si t'o loon n'a waati lɔn. Hali mɛlɛkɛw ni Ala Dencɛ t'a lɔn, fɔɔ Faa Ala kelenpe.

³³Aw k'aw yɛrɛw kɔlɔsi, aw kana ɲinɛ, bari aw t'a waati lɔn.

³⁴ Ayiwa, a bena kɛ i n'a fɔ cɛɛ dɔ ta. A tagara taama na. Sanni a ka taga, a y'a ka soo kalifa a ka baaradenw ma, ka baara di u kelen kelen bɛɛ ma. A y'a fɔ soda kɔlɔsibaga ye ko a ka to ka daa kɔlɔsi ka ɲa.

³⁵O la, aw labɛnnin ka to, bari sotigi bena segi ka na waati min na, aw t'o lɔn. A bena kɛ wulafɛ, walima dugutilama, wala dondo kasituma na, walima sɔgɔma, aw t'o lɔn.

³⁶Aw ye to ɲana janko a kana na bari aw la k'aw sɔrɔ sinɔgɔ la.

³⁷Ne be min fɔra aw ye, mɔgɔ bɛɛ seen b'a la: Aw labɛnnin ka to.»